Burimet

Ide për Qetësim

Muzika	Ka prova që muzika mund të ndihmojë në uljen e ankthit dhe të stresit. Kur ndiheni të stresuar dhe të shkurajuar, këndoni me vete ose dëgjoni një pjesë muzikore të parapëlqyer. “Himnet [dhe këngë të tjera frymëzuese] mund të na e lartësojnë shpirtin, të na japin kurajë dhe të na nxitin drejt veprimit të drejtë. Ato mund të na e mbushin qenien tonë me mendime qiellore dhe të na sjellin një shpirt paqeje” (“Hyrje nga Presidenca e Parë”, Himne, 1985, f. x).
Ushtrim i Përshkallëzuar për Qetësimin	Qetësimi i thellë e ndihmon trupin tuaj ta rimarrë veten nga stresi. Bëjeni këtë ushtrim në mbrëmje përpara se të flini për ta stërvitur trupin tuaj që të qetësohet. Bëni një variant më të shkurtër të këtij ushtrimi gjatë ditës sa herë që ndiheni të stresuar. Shtrihuni ose uluni në rehati dhe mbyllini sytë. Kërkoni për çfarëdolloj tensionimi që po mbartni përbrenda, duke u përqendruar te një pjesë e trupit tuaj për çdo herë: kokën dhe fytyrën, sytë, nofullën, qafën, shpatullat dhe shpinën, krahët, duart dhe gishtat e duarve, kraharorin dhe barkun, këmbët, shputat dhe gishtat e këmbëve. Qetësojeni në mënyrë të ndërgjegjshme çdo pjesë të trupit tuaj. Ndiejeni të gjithë tensionimin t’ju shterojë, si rëra nëpër gishtat e dorës suaj. Nëse ndieni ende tensionim, tendoseni pjesën e tensionuar të trupit tuaj për 10 sekonda dhe pastaj lirojeni për 10 sekonda. Mos u nxitoni. Skanojeni mendërisht trupin tuaj për çfarëdolloj tensionimi të mbetur, pastaj qetësohuni plotësisht. Përqendrohuni te një kujtim ose rrethanë e përfytyruar që ju sjell paqe dhe gëzim. Përpiquni ta përfytyroni skenën sa më gjallërisht që të jetë e mundur derisa të ndiheni gati për t’i hapur sërish sytë.
Ndërgjegjësimi duke Përdorur Pesë Shqisa	Përqendrimi te shqisat tuaja mund t’ju ndihmojë të ushtroni ndërgjegjësimin. Për disa minuta vëzhgoni në heshtje mjedisin që ju rrethon. Teksa e bëni këtë, provoni të bëni sa vijon: Vini re pesë* gjëra që mund të shikoni.* Kërkoni përreth dhe kushtojuni vëmendje pesë gjërave që mund të shikoni. Piketoni diçka që nuk e vini re normalisht, si një hije ose një plasaritje të vogël. Vini re katër* gjëra që mund të ndieni.* Kushtojuni vëmendje katër gjërave që po ndieni aktualisht, si thurjen e pëlhurës së rrobave tuaja, ndjenjën e puhizës mbi lëkurën tuaj ose sipërfaqen e lëmuar të tryezës ku po i mbështetni duart. Vini re tri* gjëra që mund të dëgjoni.* Gjeni një çast për të mbajtur vesh dhe për të vënë re tri gjëra që i dëgjoni në sfond. Kjo mund të jetë cicërima e një zogu, gumëzhima e frigoriferit ose zhurmat e vagëta të trafikut nga një rrugë e afërt. Vini re dy gjëra që mund t’i nuhatni. Kini parasysh dy aroma që zakonisht jua ngacmojnë nuhatjen, qofshin të këndshme ose të pakëndshme. Mund të vini re një duhmë të pemëve të pishës nëse jeni përjashta ose të rrobave që keni veshur. Vini re një* gjë që mund t’ia ndieni shijen.* Përqendrohuni te një gjë që mund t’ia ndieni shijen tani, në këtë çast. Mund të pini një gllënjkë nga një pije, të përtypni një çamçakëz, të hani diçka ose të vini re shijen e tanishme që keni në gojë.
Përfytyrimi	Në këtë teknikë qetësimi, ju do të krijoni pamje mendore për të kryer një rrugëtim të përfytyruar drejt një vendi ose situate paqësore dhe qetësuese. Fillojeni duke imagjinuar një vend që ju bën të lumtur. Ky mund të jetë një vend real ose një vend imagjinar. Gjatë përfytyrimit, përpiquni të përdorni sa më shumë shqisa që të mundeni, duke përfshirë nuhatjen, shikimin, tingullin dhe prekjen. Nëse po përfytyroni sikur po çlodheni buzë oqeanit, mund të mendoni për aromën e ujit të kripur, tingullin e valëve që përplasen dhe ngrohtësinë e diellit në trupin tuaj. Mund të dëshironi t’i mbyllni sytë, të uleni në një vend të qetë dhe të siguroheni që veshja juaj është e rehatshme.

Shënim: Mund të përdorni edhe veprimtarinë e ndërgjegjësimit nga ky kapitull.