“7: Noqu Yavu: Vakaraitaka na Dina,” Kunea na Kaukauwa mai vua na Turaga: Vakaqaqacotaki ni Lomada (2020)
“7: Noqu Yavu: Vakaraitaka na Dina,” Kunea na Kaukauwa mai vua na Turaga: Vakaqaqacotaki ni Lomada
Noqu Yavu: Vakaraitaka na Dina—Levu ni Gauna: 20 na miniti
Vakananuma:
Na cava e lomani ira kina na “dina e yalodra” na Turaga (Vunau kei na Veiyalayalati 124:15)?
Sarava na:
“Na Cava ena Solia na Tamata me iSau ni Yalona?” e tiko ena https://churchofjesuschrist.org/study/video/self-reliance-videos (Sega na vidio? Wilika na itukutuku mai na, “Cava ena Solia na Tamata me iSau ni Yalona?”)
Cava ena Solia na Tamata me iSau ni Yalona?
Kevaka o sega ni rawa ni sarava na vidio, wilika na itukutuku
Elder Robert C. Gay:
E a taroga na iVakabula vei ira na Nona tisaipeli na taro: “Cava ena solia na tamata me isau ni yalona?”
Qo e dua na taro e dau tukuna wasoma o tamaqu meu vakasamataka ena veiyabaki sa oti. Niu tubucake tiko, erau dau lesia vei au na noqu itubutubu meu sasamaki e loma ni vale ka rau qai dau saumi au ena cakacaka au cakava. Au qai dau vakayagataka na ilavo o ya, sivia toka e 50 na sede meu laki sara iyaloyalo kina. Ena gauna o ya e rauta ni 25 na sede na icurucuru ni dua na yabaki 11. Qo sa na qai vo kina e 25 na sede me saumi kina na loli, ka dau tau ya 5 na sede dua. Dua na iyaloyalo ka kena i vaqa e lima na loli! O ya sa bau totoka dina sara ga.
E vinaka tu na veika kece me yacova ga noqu sa yabaki 12. Ena noqu sa laini tu meu voli tikite au qai kila ni sa tauya 35 na sede na icurucuru ni yabaki 12, ka kena ibalebale sa na lailai mai na rua na loli. Ena noqu se bera ni tu vakarau me sotava na leqa oqo, au sa qai vakanananu lo ga e lomaqu, “Tautauvata sara ga na kemu irairai mai na macawa sa oti.” Au toso yani ka sauma na 25 na sede na isau ni tikite. E sega mada ga ni sauriva o kesia, kau qai sauma e lima na loli ka sega ni tolu.
Niu marautaka tiko na ka au cakava, au sa gole yani ki vale ka laki talanoataka vei tamaqu na ka au sa cakava. Sega ni tukuna o koya e dua na ka ena noqu talanoataka tiko na ka e yaco. Niu sa vakacavara noqu italanoa, e rai cake mai o koya ka kaya, “Luvequ, ko sa na volitaka tu vaqori na yalomu ena dua na sede lailai vaqori?” E curu basikata sara ga na utoqu yabaki 12. Au na sega vakadua ni guilecava na lesoni o ya.
(“Cava ena Solia na Tamata me iSau ni Yalona?” Liaona, Nove. 2012, 34).
Veivosaki:
Na cava na ibalebale ni dina? Na cava e so na sala lalai era solia kina na yalodra e so na tamata me ra rawata mai kina eso na ka ni bula qo?
Wilika:
“Keimami vakabauta ni sa dodonu meda yalododonu” (Yavu ni Vakabauta 1:13).
Au na sega ni biuta tani vei au na noqu yalododonu, ka yacova na siga kau na mate kina(Jope 27:5).
Wilika:
Na malanivosa ni ivolanikalou oqo kei na itukutuku nei Elder Wirthlin:
“Ka’u sa gadreva mo ni nanuma tiko, ko koya yadua sa kerekere mai vua na wekana me vakasuka tale na ka sa kerea, me vaka sa yalataka, kevaka e sega sa ivalavala ca, ka na rawa tale beka ga ni vakavuna me ivalavala ca ko koya na wekana” (Mosaia 4:28).
“Na buladodonu e kena ibalebale na nomu cakava na ka e dodonu ka vinaka veitalia na kena isau. E kena ibalebale mo yalododonu mai na yalomu sara e loma, e sega wale ga ena noda ivalavala, ka vakabibi ena noda vakananu kei na lomada. … Na lasu, lawaki lalai, se lawaki ca mo rawata vakailoa na veika sa sega sara ni ciqoma oqo na Turaga. … Na isau cecere duadua ni yalodina sai koya na veitokani tudei ni Yalo Tabu. … Ni da cakava na ka dodonu, e rawa ni tiko vata kei keda ka dusimaki keda ena veika kece eda cakava” (Joseph B. Wirthlin, “Yalodina Vakayadua,” Ensign, Me 1990, 30, 32–33).
Veitalanoataka:
Na cava na vuna e gadrevi kina na yalodina me da vakaqaqacotaka cake kina na lomada?
Yalataka:
Au na dau dina vakalevu ena dua vei ira na ciwa na vanua au vola e cake.