“8: Pagkat-on,” Pagkaplag og Kalig-on diha sa Ginoo: Emosyonal nga Kalig-on (2020)
“8: Pagkat-on,” Pagkaplag og Kalig-on diha sa Ginoo: Emosyonal nga Kalig-on
Pagkat-on—Labing Dugay nga Oras: 60 Minutos
1. Mga Relasyon Importante
Basaha:
Samtang kita nagpalambo og mahigugmaong mga relasyon sa uban, ang atong pisikal, emosyonal, ug espirituhanong panglawas nalig-on. Ang Langitnong Amahan gusto kanato nga mahigugma Kaniya ug niadtong naglibot kanato. Ang atong pamilya ug mga higala nahigugma kanato ug makahatag sa suporta, pag-awhag, ug matinuoron nga feedback nga atong gikinahanglan aron malampusong makasagubang sa mga hagit sa kinabuhi. Ang kaaway gusto nga ipalain kita gikan sa uban ug gusto kanato nga mobati nga nawagtangan sa mga panalangin nga moabot gikan sa mga relasyon.
“Si Propeta Joseph Smith mitudlo nga ang ‘panaghigala usa sa labing mahinungdanong sukaranan sa mga baruganan sa “Mormonismo”’ [Mga Pagtulon-an sa mga Presidente sa Simbahan: Joseph Smith (2007), 560]. Kana nga hunahuna angay nga modasig ug moawhag kanatong tanan tungod kay akong gibati nga ang panaghigalaay usa ka importanting panginahanglan sa atong kalibotan. Naghunahuna ako nga diha kanatong tanan adunay lawom nga pangandoy alang sa panaghigalaay, usa ka lawom nga tinguha alang sa katagbawan ug seguridad nga ikahatag nianang suod ug malungtarong mga relasyon” (Marlin K. Jensen, “Friendship: A Gospel Principle,” Liahona, Hulyo 1999, 64).
Hisgoti:
Unsang mga kaayohan ang inyong nakita gikan sa suod ug mahigugmaong mga relasyon?
2. Pagtukod og mga Relasyon
Basaha:
Kon magtukod og mga relasyon, kinahanglan gayod nga kita mangako sa pagduol ngadto sa uban ug magmatuguton sa mga kalainan. Kita makatukod og mga relasyon pinaagi sa “gagmay ug yano nga mga butang” (Alma 37:6). Ang paggahin og panahon sa pagmugna og may kalidad nga mga relasyon mas importante kaysa gidaghanon. Atong makaplagan nga makakuha kita og mas daghan pa nga hingpit nga kalipay sa kinabuhi uban sa diyutay nga mga tawo nga atong gisaligan kay sa magbaton og daghang taphaw nga mga relasyon. Walay sayop ang pagbaton og daghang mga higala, apan kinahanglan nga dili kita maghunahuna nga ang pagbaton og daghang mga higala katumbas og kalipay.
Basaha ang lista sa ubos sa dugang nga mga paagi sa pagmugna ug pagtukod og mga relasyon ngadto sa uban.
Himoa nga tinuod nga interesado diha sa ubang mga tawo. Pagkat-on kon unsay gusto o makalingaw sa ubang mga tawo. Dili kinahanglan nga kamo adunay sama nga mga interes, apan kamo makakat-on sa pagkagusto mahitungod sa unsay ilang nainteresan.
Pahiyom. Ang kalipay wala mag-agad sa unsay nahitabo sa inyong palibot apan hinoon kon sa unsang paagi kamo moatubang ngadto sa inyong mga kahimtang. Ang mga pahiyom libre nga ihatag ug makahimo sa usa ka dakong paagi nga ang uban mobati og mas maayo.
Hinumdomi ang mga ngalan sa mga tawo. Ang ngalan sa usa ka tawo mao ang labing importante nga tunog ngadto kaniya, makaamgo ang tawo niini o dili. Ang pagkamahibalo sa ngalan sa usa ka tawo makatabang niana nga tawo sa pagbati nga bililhon ug importante.
Pagmaayo nga tigpaminaw. Awhaga ang uban sa pagsulti mahitungod sa ilang mga kaugalingon. Ang mga tawo mobati og pagdayeg kon adunay uban nga maminaw ngadto kanila. Ang labing sayon nga paagi nga adunay usa ka tawo nga gustong makigsulti kaninyo mao ang mahimong maayo nga tigpaminaw. Ang mahimong maayo nga tigpaminaw, kamo kinahanglan gayod tinuoray nga moamuma mahitungod sa unsay ikasulti sa uban.
Sulayi sa sinserong paagi sa paghimo sa uban nga mobati nga importante. Ang bulawanong lagda mao ang pagtagad sa ubang tawo sa paagi kamo gustong tagdon. Ang mga tawo gusto nga mobati nga importante––sama sa unsay ilang isulti o buhaton importante sa uban. Kamo makabuhat sa inyong labing maayo sa pagtabang sa mga tawo nga mobati nga importante pinaagi sa paggamit sa mga ideya nga gilista dinhi sa ubos.
Basaha:
“Maugmad nato kini nga pakigrelasyon ngadto sa usa ka tawo sa matag higayon—pinaagi sa pagkasensitibo sa panginahanglan sa uban, pagserbisyo kanila, ug paghatag sa atong panahon ug mga talento. Nakadayeg gyud ako sa usa ka sister kinsa nabug-atan sa mga hagit sa pangidaron ug sa sakit apan nakahukom nga bisan dili na siya makahimo og daghan, mahimo siya nga maminaw. Ug busa sa matag semana bantayan niya ang mga tawo nga ingon og nahasol o nawad-an sa kadasig, ug migahin siya og panahon uban kanila, sa pagpaminaw. Unsa ka dako siya nga panalangin sa kinabuhi sa daghan kaayong mga tawo” (Dieter F. Uchtdorf, “Kabahin sa mga Butang nga Labing Mahinungdanon,” Liahona, Nob. 2010, 22).
Palandonga:
Paghunahuna mahitungod sa usa ka tawo kang kinsa ikaw makatukod og usa ka mas lig-on nga relasyon. Hunahunaa ang mga ideya nga mas nag-una niini nga seksiyon ug ang tambag nga mga pulong ni Presidente Uchtdorf, ug pagsulat og mga paagi nga kamo makagamit sa unsay inyong nakat-onan sa pagtukod niini nga relasyon.
3. Pagmasinabtanon ug Dili Magmahukmanon
Basaha:
Ang tanan naghimo og mga paghukom mahitungod sa mga sitwasyon ug mga tawo, lakip ang mga lihok sa mga sakop sa pamilya. Si Presidente Uchtdorf mipasabot, “Kon masakitan kita, masuko, o masina, dali ra ang paghukom sa ubang tawo, sagad dauton ang mga motibo sa ilang mga lihok aron adunay katarongan ang atong mga kasilag” (“Ang Maloloy-on Magadawat og Kalooy,” Liahona, Mayo 2012, 70). Apan ang Basahon ni Mormon nagpahayag, “Kamo nasayod sa kahayag diin kamo mahimo nga mohukom, kansang kahayag mao ang kahayag ni Kristo, tan-awa nga kamo dili mohukom sa sayop nga paagi; kay uban nianang sama nga paghukom kamo mahimo usab nga pagahukman” (Moroni 7:18).
Hisgoti:
Sa unsang paagi nga ang pagkamasinabtanon ug dili kaayo mahukmanon nag-impluwensiya sa atong kalipay?
Basaha:
Handurawa nga ikaw nakakita og usa ka ginikanan nga may upat ka gagmay nga anak. Ang mga bata saba ug makasamok kaninyo ug niadtong naglibot kanila. Ang ginikanan ingon og wala makaamgo ug wala samoki, nakalimtan kon unsa ka nakaapekto ang pamatasan sa mga anak niadtong naglibot kanila. Human sa pipila ka panahon, ang ginikanan nasuko pag-ayo sa mga bata, nagsulti kanila sa paghilom.
Hisgoti:
Isip usa ka grupo, hisgoti unsa ang mahimong mahukmanong tubag. Mohimo og mapuangurong mga pagpasabot kon nganong ang ginikanan nakalihok og ingon niana nga paagi. Unsa ang inyong mabuhat nga mahimong mas masinabtanon ug dili kaayo mahukmanon?
4. Pakigsulti uban sa “Ako” nga mga Mensahe
Basaha:
Ang mga dili pagsinabtanay ug ang mga kalainan ngadto sa uban mga natural nga bahin sa mga relasyon. Kini mahitabo tungod sa mga kalainan sa mga mithi, mga opinyon, mga panan-aw, mga kadasig, mga tinguha, ug mga ideya. Ang pagkat-on sa pagsulbad niini nga mga kalainan sa maayong paagi makalig-on sa inyong mga relasyon ngadto sa uban ug nagtabang kaninyo sa pagpalambo og kalooy ug pailob. Ang maayong solusyon sa panaglalis malagmit mahitabo kon ang mga indibidwal mobati nga luwas ug gihatagan og bili. Bisan tuod og ang mga kalainan normal, kini dili kinahanghlan nga mogiya ngadto sa panagbingkil. Ang panagbingkil atol sa panaglalis ang mga hinungdan sa usa ka problema.
Kon personal nga mga kalainan mahitabo, mahimong kamo adunay kalisod sa klaro nga pakigsulti sa inyong bahin nga dili mopasamot sa panaglalis. Ang paggamit sa “Ako” nga mga mensahe makatabang kaninyo sa pagpahayag sa inyong mga kabalaka, mga pagbati, ug mga panginahanglan sa paagi nga mas sayon alang sa tigpaminaw sa pagpamati ug pagsabot. Ang “Ako” nga mensahe nagpunting sa inyong kaugalingong mga pagbati ug mga kasinatian kay sa inyong panan-aw sa unsay nabuhat sa o wala mabuhat sa laing tawo.
Ang unang bahin sa “Ako” nga mensahe nag-ila ug nagpahayag sa inyong kaugalingong mga pagbati, nga importante sa pagsulbad og panaglalis o dili pagsinabtanay. Kini nagtabang sa pagpaminos og mga pagbati sa pagpanalipod ug naghimo niini og mas masayon sa pagpamati ngadto sa usag usa. Basaha ang mga ehemplo sa ubos kon unsaon sa paghubad sa usa ka “ikaw” nga sulti ngadto sa “Ako” nga mensahe.
|
Mga Ehemplo sa “Ikaw” nga mga Mensahe |
Mga Ehemplo sa “Ako” nga mga Message |
|---|---|
Mga Ehemplo sa “Ikaw” nga mga Mensahe “Dili gyod ka maminaw ngadto ni bisan kinsa, ug ikaw wala sa tinuoray maminaw ngari kanako karon.” | Mga Ehemplo sa “Ako” nga mga Message “Gibati ko ang walay kadasig kon dili ako maghunahuna nga ako nasabtan. Ang pagtan-aw sa mata nagtabang kanako sa pagbati ingon og ikaw nagpakabana.” |
Mga Ehemplo sa “Ikaw” nga mga Mensahe “Ikaw hilabihan sa pagkawalay konsiderasyon ug pagkawalay paghunahuna nga dili modungan og panihapon ug wala motawag.” | Mga Ehemplo sa “Ako” nga mga Message “Gibati ko nga pinasagdan sa dihang ikaw wala manihapon ug wala motawag. Gibati ko usab ang kaguol nga adunay nahitabo nganha kanimo.” |
Hisgoti:
Unsa ang kalainan tali sa “ikaw” ug sa “ako” nga mga mensahe?
Basaha:
Kon kamo mogahin og panahon sa pagpakigsulti sa inyong mga pagbati ngadto sa usa ka tawo, tingali ikaw maghunahuna nga kini responsibilidad sa lain nga tawo sa pagsunod sa pagtuman sa inyong mga tinguha. Apan bisan pa kon kamo makigsulti sa inyong mga pagbati ngadto sa uban, ang inyong mga pagbati ug mga tinguha imo gihapon nga responsibilidad. Kon ang inyong “Ako” nga mensahe dili mobunga sa gitinguha nga resulta, kamo makalihok sa mahigugmaong paagi sa pagmugna sa resulta nga inyong gusto kay sa masuko.
5. Pagmanggihatagon
Basaha:
“Bisan unsa nga mga problema ang giatubang sa inyong pamilya, bisan unsay inyong buhaton aron masulbad kini, ang sinugdanan ug ang kataposan sa solusyon mao ang gugma nga putli, ang tiunay nga gugma ni Kristo. Kon wala kining gugma, gani ang ingon og hingpit nga pamilya nagkalisod pa. Uban niini, bisan ang pamilya nga may dagkong hagit magmalampuson” (Dieter F. Uchtdorf, “Agig Pagdayeg Niadtong Miluwas,” Liahona, Mayo 2016, 79).
Tan-awa:
Enduring Love,” anaa sa https://churchofjesuschrist.org/study/video/self-reliance-videos [4:16].
Palandonga:
Kinsa ang inyong nahibaloan nga makabenepisyo gikan sa inyong gugma nga putli? Ngano?
Basaha:
Ang Ginoo naghatag kanato og tambag mahitungod sa pagpalambo og mga relasyon pinaagi sa dinasig nga dokumento “Ang Pamilya: Usa ka Pamahayag ngadto sa Kalibotan.” Kini nagtudlo nga ang malampuson nga mga relasyon “gitukod ug gipadayon diha sa mga baroganan sa hugot nga pagtuo, pag-ampo, paghinulsol, pagpasaylo, pagtahod, gugma, kalooy, buhat, ug maayong mga kalihokan nga kalingawan” (“Ang Pamilya: Usa ka Pamahayag ngadto sa Kalibotan,” ChurchofJesusChrist.org).