“8: Vulica,” Kunea na Kaukauwa mai vua na Turaga: Vakaqaqacotaki ni Lomada. (2020)
“8: Vulica,” Kunea na Kaukauwa mai vua na Turaga: Vakaqaqacotaki ni Lomada.
Vulica—Levu ni Gauna: 60 na Miniti
1. Sa Ka Bibi na Veimaliwai
Wilika:
Ni da taracake na noda veilomani vata kei ira tale eso, ena vaqaqacotaki na noda bula vakayago, vakasama, kei na bula vakayalo. E vinakata na Tamada Vakalomalagi meda lomani Koya kei ira era tu wavoliti keda. Era lomani keda na noda matavuvale kei na itokani ka vakarautaka na veitokoni, veivakayaloqaqataki, kei na nanuma yalodina eda gadreva me da sotava rawa kina na veibolebole ni bula. E vinakata o vu-ni-meca me vakatikitikitaki keda mai vei ira na tani ka gadreva vei keda meda vakila na vakuwai ni veivakalougatataki e lako mai ena loma ni veiwekani.
“E vakavulica Josefa Simici na Parofita ni ‘veitokani sa dua vei ira na ivakavuvuli bibi ni “Vakabauta Vakamomani” [Nodra iVakavuvuli na Peresitedi ni Lotu: Josefa Simici (2007),463]. Na vakasama oya e dodonu me veivakauqeti ka vakayaloqaqataki keda kece baleta niu nanuma ni na veitokani e dua na gagadre bibi ni noda bula. Au vakabauta vei keda kece ni tiko e dua na gagadre bibi ni veitokani, e dua na gagadre titobu me baleta na vakacegu kei na veitaqomaki e rawa ni solia na veimaliwai voleka ka tawayalani” (Marlin K. Jensen, “Veitokani: E Dua na iVakavuvuli ni Kosipeli,” Ensign, May 1999, 64).
Veitalanoataka:
Na yaga cava soti o sa raica mai na veimaliwai loloma ka veivolekati?
2. Tarai Cake ni Veimaliwai
Wilika:
Ni tarai cake na veimaliwai, e dodonu me da taura na ituvatuva me da dolele yani vei ira na tani ka vosota na duidui. E rawa ni da tara cake na veimaliwai ena ibalebale ni “lalai ka rawarawa” (Alama 37:6). Taura na gauna me tauyavutaki e dua na veimaliwai vinaka e bibi cake mai na iwili levu cake. Eda na kunea ni da na reki vakalevu cake ena bula oqo ni da taracake na veimaliwai voleka kei na vica na tamata eda vakararavi kina ka sega ni levu na keda isema vakaveiwekani. E sega ni dua na ka e cala kevaka me levu na noda itokani, ia me da kakua ni nanuma ni levu ni itokani e vakatautauvatataki ena levu ni noda bula marau.
Wilika na lisi e ra ni ikuri ni sala me tauyavutaki ka tarai cake kina na veimaliwai kei ira tale eso.
Mo kauwaitaki ira dina sara na tamata tale eso. Vulica na veika era taleitaka se marautaka na tamata tale eso. E sega ni gadrevi mo taleitaka vakakina, ia sa rawa mo vulica mo kauwaitaka na veika era taleitaka.
Mata mamarau. Na marau e sega ni vakatau ki na veika e yaco wavoliti iko ia me baleta ga na nomu sauma na veika o sotava. Na matadredredre eda rawa ni solia wale ka rawa ni dua na sala cecere me ra vakila kina na tani na vinaka cake.
Nanuma na yacadra na tamata. Na yaca ni dua na tamata e rogorogo bibi duadua vua, kevaka e vakila se sega ni vakila na tamata oya. Na vulici ni yacana e dua e rawa ni vukea na tamata oya me vakila ni sa yaga ka bibi.
Mo tamata dauvakarorogo. Vakayaloqaqataki ira na tani me ra veivosakitaki ira vakataki ira. Era dau taleitaka na tamata ni dua e vakarorogo vei ira. Na sala rawarawa duadua me dua e vinakata me vosa vei iko sai koya mo dua na dauvakarorogo vinaka. Mo dauvakarorogo vinaka, sa dodonu mo kauwaitaka dina na veika era na tukuna na tani.
Tovolea ena yalodina mo vakamareqeti ira na tani. Na lawa koula sai koya mo qaravi ira na tamata e na ivakarau ko vinakata mo na qaravi kina. Era dau taleitaka na tamata ni ra vakila ni ra bibi—me vaka na ka era tukuna se cakava eso vei ira na tani. E rawa ni o cakava na nomu vinaka duadua mo vukei ira na tamata me ra vakila ni bibi na nodra vakatovotovotaka na vakasama eso e volai tiko eke.
Wilika:
“Eda tara cake na veimaliwai oqo vakaveitarataravi ki na tamata yadua—ena noda raica na nodra gagadre tale eso, qaravi ira, ka solia na noda gauna kei na taledi. Au qoroya dina e dua na marama ka lomaocaoca voli ena vuku ni nona yabaki kei na nona tauvimate tiko ia e dina ga ni sa sega ni cakava rawa e dua na ka, sa nanuma me sa vakarorogo ga. Ena veimacawa sa qai vakaraici ira na tamata era rairai lomaleqa tu se yalolailai ka laki sikovi ira sara, ka vakarorogo. Sa dua dina na veivakalougatataki a tiko o koya ena nodra bula e vuqa na tamata” (Dieter F. Uchtdorf, “Na Veika e Bibi Duadua,” Liaona, Nove. 2010, 22).
Vakananuma:
Vakasamataka e dua o rawa ni tara cake kina e dua na veimaliwai kaukauwa cake. Vakasamataka na vei vakasama taumada ena iwase oqo kei na ivakasala ena vosa nei Peresitedi Uchtdorf, ka vola na sala eso o rawa ni vakayagataka kina na veika o sa vulica mo tara cake kina na veiwekani oqo.
3. Mo Kila Ka Sega ni Vakalelewa
Wilika:
Na tamata kece e dau vakalewa na ituvaki kei na tamata, oka kina na nodra ivakarau na lewe ni matavuvale. Vakamacalataka o Peresitedi Uchtdorf, “Ni da vakila na mosi ni yalo, cudru, se veiqati, ia ena rawarawa me da vakalewai ira na tani, ka vakaibalebaletaka vakatani na nodra ivalavala me rawa ni dodonu kina na noda yaloca tu ena vukudra.” (“O Ira Era Dauloloma Era na Lomani,” Liahona, May 2012, 70). Tukuna na Vola i Momani, “Ni dou sa kila na rarama mo dou vakayagataka mo dou na vakatulewa kina, ia na rarama oqo sai koya na rarama i Karisito, mo dou raica me kakua ni cala na nomudou; ni dou na lewai tale ga ena lewa dou sa kitaka” (Moronai 7:18).
Veitalanoataka:
E vakayarayarataka vakacava na noda marau na noda kila na yalomatua ka lailai na vakalelewa?
Wilika:
Raitayaloyalotaka mada ni ko raica e dua na itubutubu kei na va na gone lalai. Era sa vakosakosa na gone ka ra sa vakatuburarawa tiko vei ira era tu wavoliti ira. Era sega ni kauwai na itubutubu, ka sega ni raica na nodra itovo ca na gone vei ira era tu wavoliti ira. Ni oti e dua na gauna, qai dau cudruvi ira na gone na itubutubu, ka tukuna vei ira me ra vagagalu.
Veitalanoataka:
Vakailawalawa, veivosakitaka e vakacava beka na mataqali isau ni vakalelewa. Vakasamataka e dua na ivakamacala yalololoma me baleta na vuna e vakina oqo na nodra ivakarau na itubutubu. Na cava o rawa ni cakava mo kila vinaka cake kina ka sega ni o vakalelewa?
4. Veivosakitaka ka vakayagataka na “Au” ena nomu itukutuku
Wilika:
Na veisaqasaqa kei na duidui kei ira na tani e ivakarau ni veimaliwai. Oqo e rawa ni yaco baleta na duidui ni yavunibula, vakasama, nanuma, gagadre, kei na vakasama. Na nomu vulica mo walia na duidui oqo ena sala bulabula e rawa ni vaqaqacotaka na nomu veimaliwai kei ira na tani ka vukei iko mo tara cake na yalololoma kei na vosota. E rawa ni yaco na iwali bulabula ni veisaqasaqa ni ra vakila na tamata nira taqomaki ka yaga. E dina ga ni tu na duidui, e sega ni dodonu me ra veimuataki ki na veileti. Na veileti ena gauna ni veisaqasaqa edau vakavuna na leqa levu.
Ni yaco na duidui yadua, ena dredre beka mo veivosakitaka vakamatata na nomu yasana ka sega ni tubu cake kina na veisaqasaqa. Ni o vakayagataka na “Au” ena rawa ni vukei iko mo tukuna na nomu kauwai, veika o vakila, kei na gagadre ena dua na ivakarau e rawarawa cake vei koya e vakarorogo me rogoca ka kila. Na itukutuku me vakayagataki kina na “Au” e vakanamata ki na nomu nanuma kei na veika o sotava ka sega ni nomu rai me baleta na veika e cakava se sega ni cakava na kena ikarua.
Na imatai ni wasewase ni dua na itukutuku ni “Au” e vakatakila ka vakaraitaka na veika o vakila, ka sa bibi sara ena kena wali na leqa se veisaqasaqa. E vukea me vakalailaitaka na cudru ka vakarawarawataka na noda veirogorogoci. Wilika na ivakaraitaki e ra ni kena vakadewataki na itukutuku e vakayagataki kina na “iko” ki na dua na itukutuku e vakayagataki na “Au”.
|
iVakaraitaki ni iTukutuku oka kina na “Iko” |
iVakaraitaki ni iTukutuku oka kina na “Au” |
|---|---|
iVakaraitaki ni iTukutuku oka kina na “Iko” “O sega vakadua ni vakarorogo vua e dua, ka o sega sara ga ni vakarorogo tiko vei au ena gauna oqo.” | iVakaraitaki ni iTukutuku oka kina na “Au” “Au dau yalolailai niu sega ni nanuma niu rogoci.” “Na maroroi ni mata ni veitaratara e vukei au meu vakila ni ko kauwai.” |
iVakaraitaki ni iTukutuku oka kina na “Iko” “O sa sega ni veinanumi ka sega ni kauwaitaka na vakayakavi ka sega ni o qiri mai.” | iVakaraitaki ni iTukutuku oka kina na “Au” “Au vakila niu dau vakawalena ni ko calata na vakayakavi ka sega ni qiri mai.” “Au lomaleqa talega ni dua na ka e yaco vei iko.” |
Veitalanoataka:
Na cava soti na kedrau duidui na itukutuku ni “iko” kei na “au”?
Wilika:
Ni o taura e dua na gauna mo tukuna na lomamu vua e dua, o na rairai nanuma ni sa nona itavi e dua tale na tamata me muria ena kena vakayacori na nomu gagadre. Ia ena gauna mada ga o tukuna kina na nomu nanuma vei ira tale eso, se nomu itavi tikoga na nomu nanuma kei na gagadre. Ni nomu itukutuku ni “au” e sega ni vakavurea na vuana e gadrevi, sa rawa mo cakacaka ena loloma mo bulia na veika o vinakata ka sega ni yaloca.
5. Dau Loloma
Wilika:
“Se cava ga na leqa e sotava tiko nomu matavuvale, se cava ga mo cakava me wali kina, na itekivu kei na itinitini ni iwali sa loloma cecere, na loloma savasava i Karisito. Kevaka e sega na loloma oqo, ena sotavi dredre na veimatavuvale ka ra daumaka tu. Ni tiko kina, ena rawaka vakalevu sara na matavuvale ena veibolebole lelevu” (Dieter F. Uchtdorf, “Veivakacaucautaki Vei Ira Era Veivakabulai,” Liaona, Me 2016, 80).
Sarava na:
“Loloma e Tudei,” sa tiko https://churchofjesuschrist.org/study/video/self-reliance-videos [4:16].
Vakananuma:
O cei o kila e rawa ni yaga mai na nomu loloma cecere? Na cava na vuna?
Wilika:
Sa solia vei keda na Turaga na ivakasala me baleta na kena tarai cake na veimaliwai mai na itukutuku veivakauqeti “Na Matavuvale: Ai Vakaro ki Vuravura Raraba.” E vakavulica ni vuavuai vinaka na veimaliwai ni “yavutaki ka taqomaki ena ivakavuvuli ni vakabauta, masumasu, veivutuni, veivosovosoti, veidokai, veilomani, yalololoma, gugumatua, kei na ivakasala vinaka me ra vakamarautaki kina” (“Na Matavuvale: Ai Vakaro ki Vuravura Raraba,” ChurchofJesusChrist.org).