Lesona 1 Anomea a le Faiaoga

Taliaina o le Valaaulia a le Faaola e Aoao Mai ia te Ia

O lenei vasega e maua ai se avanoa matagofie mo oe ma au tamaiti aoga e faateleina ai lo outou faatuatua ia Iesu Keriso ma Lana talalelei e faavavau. I lenei lesona o le a mafaufau ai tamaiti aoga i mea e mafai ona latou faia e talia atoatoa atili ai le valaaulia a le Faaola e aoao mai ia te Ia. O le a latou mafaufau foi i le taua o le aoaoina o upumoni faaleagaga e ala i le suesue ma le faatuatua.

Faaleleia o Lo Tatou Aoao Atu ma le Aoaoina

Faaaogaina o anomea mo sauniuniga e faafailele ai le aoaoina. O anomea mo sauniuniga ua mamanuina e fesoasoani i faiaoga ma tamaiti aoga ia saunia e maua faatasi ni aafiaga e aoao ai. Mafaufau i motugaafa nei:

• Afai e mafai, ia faafesootai tamaiti aoga o e ua lesitala mo le vasega lenei a o le’i oo i le latou aso muamua o le vasega, ma valaaulia i latou e faitau mea e faaaoga mo sauniuniga mo le lesona a o le’i o mai i le vasega.

• Talu ai o nisi tamaiti aoga o le a le vave mauaina anomea, faaali atu ia i latou le auala e maua ai le kopi faaeletonika pe avatu ia i latou se kopi ua lolomiina o anomea ae e te lei amataina le talanoaga a lau vasega. Tuu atu lenei lava fesoasoani i tagata taitoatasi o le vasega o e auai i lau vasega i se taimi mulimuli ane.

• I le taimi o talanoaga a le vasega, gauai atu i aafiaga a tamaiti aoga ma anomea mo sauniuniga. Vaavaai foi mo ni auala e faaaoga ai anomea mo sauniuniga i le taimi o le vasega mo i latou e lei lava saunia.

• Valaaulia mai lea taimi i lea taimi ia tamaiti aoga e faasoa mai auala ua faamanuiaina ai i latou e ala i le suesueina o anomea mo sauniuniga.

Fautuaga mo le Aoao Atu

E valaaulia e Iesu Keriso tagata uma e aoao ia mai te Ia.

Manatua: E totonugalemu i le misiona o aoaoga a le inisitituti o le faafaileleina o se siosiomaga lea e lagona ai e tagata uma le saogalemu, lagolagoina, ma le faatauaina. Ina ia fesoasoani e fatu se lagona o le auai, mafaufau e faaalu sina taimi i le amataga o le vasega e faamasani ai i le tasi i le isi. Atonu e te manao e vaavaai mo ni auala i le aluga o le vasega atoa e fesoasoani ai i tamaiti aoga uma ia lagona le taliaina ma le alofagia i lau vasega.

Ina ia amata le vasega, mafaufau e faaali atu se ata o Iesu Keriso ma faasoa puupuu atu ou lagona e uiga ia te Ia. E mafai foi ona e valaaulia ni nai tamaiti aoga e faasoa mai o latou lagona e uiga i le Faaola.

Faitau faatasi ma le vasega le Mataio 11:28–30 ma le Mataupu Faavae ma Feagaiga 19:23 ma fesili i le vasega po o le a le mea e tulaga ese ia i latou e uiga i nei valaaulia ma faamanuiaga folafolaina. E mafai ona e faamamafaina le natura patino ma le alofa o nei valaaulia a o faailoa mai e tamaiti aoga se upumoni e pei o lenei: Ua valaaulia e Iesu Keriso i tatou taitoatasi e aoao mai ia te Ia ma maua Lona filemu.

• O le a sou manatu i le uiga o le aoao mai ia Iesu Keriso? (Afai e manaomia, valaaulia tamaiti aoga e toe faamanatu le saunoaga a Elder Kim B. Clark i le vaega 1 o anomea mo sauniuniga.)

• Aisea e te manatu ai o folafolaga o le filemu, malologa, ma avega māmā e fesootai i le aoaoina mai ia Iesu Keriso? O a ni auala na aafia ai oe i nei ituaiga o faamanuiaga?

E mafai ona e tusia le fasifuaitau Talalelei = Tala Fiafia i luga o le laupapa. Ona valaaulia lea o tamaiti e faitau le 3 Nifae 27:13–16, 20–21 ma talanoaina fesili nei faatasi ma se paga po o ni vaega toalaiti.

• E tusa ai ma le [fetalaiga] a le Faaola, o a upumoni autu o Lana talalelei? Aisea ua avea ai nei upumoni ma tala fiafia? (E mafai ona e toe faamanatu le saunoaga a Elder Jeffrey R. Holland i le vaega 1 o anomea mo sauniuniga.)

• O a ni auala na fesoasoani ai ia te oe le aoaoina ma le ola ai i le talalelei e te aoao ai e uiga i le Faaola ma avea atili ai e faapei o Ia?

Na aoaoina i tatou e le Alii i le auala e aoao ai upumoni faaleagaga.

Ina ia fesoasoani i tamaiti aoga e mafaufau loloto i le taua o le auala e mafai ai ona tatou aoaoina upumoni faaleagaga e uiga ia Iesu Keriso ma Lana talalelei, e mafai ona e tuuina atu le tulaga faataitai lenei:

O Chloe, o sau uo, e mafaufau faasaienitisi. E foliga mai e manaomia ona ia faaamaonia mea a o lei talitonu i ai o ia. Ona ua ia iloa e te talitonu ia Iesu Keriso, ua ia fesili ai pe mafai faapefea ona ia iloa e moni o Ia. E faapefea ona e tali atu i ai?

E mafai ona e valaaulia tamaiti aoga e faasoa mai a latou tali ma se paga ona talanoaina lea e le vasega ia tapulaa o le faalagolago i se faiga faasaienitisi e aoao ai e uiga i le Faaola. (E mafai ona e faasoa atu le saunoaga a Elder Paul V. Johnson i le vaega 2 o anomea mo sauniuniga.) Ina ia faalolotoina le tou talanoaga, mafaufau e fai atu se tasi pe sili atu o fesili nei:

• O le a le ala a le Alii e aoao ai upumoni faaleagaga? (Mafaufau e faitau le Mataupu Faavae ma Feagaiga 88:118.)

• O le a le uiga o le “aoao e ala i le faatuatua”? (Atonu e aoga le toe faamanatu o le saunoaga a Peresitene Russell M. Nelson i le vaega 2 anomea mo sauniuniga. E mafai foi ona e fesoasoani i tamaiti aoga e faailoa mai se upumoni e talitutusa ma lenei: A o tatou saili e aoao le talalelei e ala i le faatinoina i le faatuatua, o le a faateleina lo tatou faatuatua ia Iesu Keriso.)

• O a nisi o faataitaiga o tagata i tusitusiga paia po o tagata e te iloa na aoaoina e ala i le faatinoina i le faatuatua? Faaalu se minute ma mafaufau i se taimi na e aoaoina ai se mea e uiga ia Iesu Keriso ona sa e faatinoina i le faatuatua. O a ni mea na e aoao mai ia te Ia?

E mafai ona e tuu atu i tamaiti ni nai minute e mafaufau loloto ai ma faamaumau mea e sili ona latou mananao e aoao e uiga i le Faaola i lenei vasega ma le auala e mafai ona latou faaleleia ai lo latou tomai e aoao ai e uiga ia te Ia. Fautuaina i latou e tusi i lalo a latou sini. Vaavaai mo avanoa e iloilo ai e tamaiti aoga a latou sini i vaiaso a sau.

Faaleleia o Lo Tatou Aoao Atu ma le Aoaoina

Fesootai ma tamaiti aoga i fafo atu o le vasega. Ina ia iloilo manaoga o tamaiti aoga ma musuia i latou e suesue i anomea mo sauniuniga, e mafai ona e sailia ni auala e fesootai ai ma i latou e ala i feau tusitusia. E mafai ona e faaaogaina fautuaga i le vaega ua ta‘ua “Mo Le Isi Taimi” pe mamanu lau oe lava savali tusitusia.

Mo Le Isi Taimi

Uunaia tamaiti aoga a o latou suesue mo le isi vasega e vaavaai mo mea ua aoao mai e suafa ma faalaniga eseese o Iesu Keriso e uiga ia te Ia. Pe e mafai foi ona e valaaulia tamaiti aoga e mafaufau loloto i le pogai tatou te faasino atu ai i le Faaola o le “Keriso soifua.”