Lesona 2 Anomea a le Faiaoga: Faamalosia o a Tatou Molimau i le Keriso Soifua

“Lesona 2 Anomea a le Faiaoga: Faamalosia o a Tatou Molimau i le Keriso Soifua,” O Iesu Keriso ma Lana Talalelei e Faavavau Anomea a le Faiaoga (2023)

“Lesona 2 Anomea a le Faiaoga,” O Iesu Keriso ma Lana Talalelei e Faavavau Anomea a le Faiaoga

Lesona 2 Anomea a le Faiaoga

Faamalosia o a Tatou Molimau i le Keriso Soifua

I le aso 1 Ianuari, 2000, sa lolomi ai e le Au Peresitene Sili ma le Korama a Aposetolo e Toasefululua la latou molimau i le paia o Iesu Keriso i se pepa o faamatalaga ua ta‘ua “O Le Keriso Soifua: O Le Molimau a le Au Aposetolo” (o loo maua i le ChurchofJesusChrist.org). I le lesona lenei, o le a maua ai e tamaiti aoga se avanoa e faamatala ai le taua o le faalaniga paia o Keriso ma faasoa mai pe mafai faapefea ona faamalosia lo latou faatuatua e ala i se suesuega ma le agaga tatalo “O Le Keriso Soifua.”

Fautuaga mo le Aoao Atu

O Iesu o le Keriso.

Faaleleia o Lo Tatou Aoao Atu ma le Aoaoina

Taulai atu i le liua, ae le o le talanoaina o le lesona atoa. E le o se mea e le masani ai le lagonaina o le popole i le talanoaina o mea uma na saunia mo se lesona. Pe a e lagonaina se lagona faapena, mafaufau e toe faatulaga ou mafaufauga e taulai atu ai i mea o loo aafia ai au tamaiti aoga i o latou mafaufau ma loto. Pe o i ai i tamaiti aoga le taimi e manaomia ona latou mafaufau ai ma lagonaina ai le taua o upumoni o loo latou aoaoina? Ia manatua le fautuaga poto mai ia Peresitene Dallin H. Oaks, “E le mafai ona tatou fai faamalosi ni mea faaleagaga e tutupu” (“I Lana Lava Taimi, i Lana Lava Ala,” Liahona, Aok. 2013, 24).

Valaaulia tamaiti aoga e faailoa mai nisi o faataitaiga o taitai maoae o le amio mama ma faaleagaga i le talafaasolopito atoa. (Pe e mafai foi ona e maua ni au lava faataitaiga.) Talanoa puupuu pe na faapefea e nei tagata ona faatosinaina le lalolagi mo le lelei. E te ono manao e faaali atu se ata o Iesu Keriso ma fesili atu:

E faapefea ona tulagaese Iesu Keriso i taitai maoae o le amio mama ma faaleagaga o le lalolagi?

Valaaulia le vasega e toe faamanatu le Mataio 16:13–17 pe matamata i le “Thou Art the Christ” (1:30) ma vaavaai mo fasifuaitau na faaaoga e Peteru na tulagaese ai Iesu mai tagata uma o e na soifua i le lalolagi.

1:30

O le a se mea sa taua e faavavau e uiga i le fai atu o Peteru ia Iesu, “O oe o le Keriso, o le Alo o le Atua soifua”? (Mataio 16:16). (Atonu e fesoasoani le tuu i tamaiti aoga e toe faamanatu mea na latou aoaoina i le vaega 1 o anomea mo sauniuniga. E mafai e tamaiti aoga ona faailoa mai upumoni e pei o nei: O Iesu o le Keriso, o le tasi ua faauuina po o le Mesia. Ua fai o Ia ma sui o le Tama ma ua na o le pau lea o le ala e mafai ona faaolaina ai i tatou.)
O a ni ou manatu e uiga i le taua o le mauaina ma le faamalosia o lau molimau patino o Iesu o le Keriso? (Atonu e te manao e valaaulia nisi o tamaiti aoga e faasoa mai pe na faapefea ona maua a latou molimau o Iesu o le Keriso.)

Faaleleia o Lo Tatou Aoao Atu ma le Aoaoina

Faaaoga fesoasoaniga mo suesuega. OFesoasoaniga mo Suesuega, o loo maua i le vaega o Tusitusiga Paia o le Potutusi o le Talalelei, e aofia ai punaoa e pei o le Taiala i Tusitusiga Paia, taiala faasino i le Tusi Paia ma le Tusi a Mamona, o le Bible Dictionary, ma le Taiala i Autu. O nei punaoa e utuvai mai tusitusiga faavae e fesoasoani ai i le aufaitau e aoao e uiga i se autu patino. A o suesue tamaiti aoga i autu, fesoasoani ia latou iloa le taua o le malamalama i le talaaga ma le anotusi o fuaitau o mau e fesoasoani ia i latou e iloa ai le faamoemoega o le tusitala musuia.

Faamanatu i tamaiti aoga o le sauniuniga mo le vasega sa valaaulia ai i latou e sailiili “Iesu Keriso” i le Taiala i Autu po o le Taiala i Tusitusiga Paia ma faailoa mai suafa paia, faalagiga, ma matafaioi na tuuina atu i le Alii. Tuu atu i tamaiti ni nai minute e iloilo ai mea na latou maua. Ona mafai lea e tamaiti aoga ona faasoa mai mea na latou mauaina i le vasega po o ni vaega toalaiti. Afai e te manatu e mafai ona faaleleia ai le aoaoina o au tamaiti aoga, e mafai ona e faaali atu ma valaaulia i latou e tali se tasi po o fesili uma nei:

O a lagona e oo mai i lou loto a o e mafaufau e uiga ia Iesu Keriso o le [tusi le suafa, faalaniga, po o le matafaioi]?
E faapefea e le iloaina o Iesu Keriso o le [tusi le suafa, faalaniga, po o le matafaioi] ona aafia ai lou faatuatua ia te Ia?

E mafai ona e fautuaina tamaiti aoga e filifili ma suesue se igoa, faalaniga, po o se matafaioi a Iesu Keriso latou te mananao e aoao atili i ai.

O Aposetolo a le Alii o ni molimau faapitoa o Ia o le Keriso.

Mafaufau e valaaulia tamaiti aoga e faasoa mai pe faapefea ona avea le talitonuga taatele ia Iesu Keriso ma a latou paaga. Atonu e te manao e valaaulia i latou e faasoa mai foi mea na latou faalogo i ai talu ai nei e uiga i le Faaola i luga o ala o faasalalauga faaagafesootai po o faafiafiaga lauiloa.

Faitau faatasi le Mataupu Faavae ma Feagaiga 107:23, ma mafaufau e tusi le faamatalaga lenei i luga o le laupapa: Ua valaauina e Iesu Keriso ia Aposetolo e avea ma molimau faapitoa o Ia i le lalolagi atoa. Ona fesili atu lea:

I lau vaaiga, aisea e ono faapitoa ai le taua o molimau a Aposetolo valaauina a le Alii i o tatou aso?
Na faapefea ona faamalosia e nei molimau faapitoa lau molimau ia Iesu Keriso? (Atonu e fesoasoani le valaaulia o ni nai tamaiti aoga e faasoa mai mea na latou aoaoina pe lagonaina a o latou matamata i se tasi pe sili atu o ata vitio o le “Molimau Faapitoa ia Keriso” mai le vaega 2 o anomea mo sauniuniga. E mafai ona outou matamata faatasi o se vasega i se tasi o mea latou te fiafia i ai.)

Faamanatu i tamaiti aoga o le aso 1 Ianuari, 2000, na faasoa mai ai e le Au Peresitene Sili ma le Korama a Aposetolo e Toasefululua a latou molimau i le Faaola i le “O Le Keriso Soifua.” Tuu atu i tamaiti aoga se kopi o le pepa o faamatalaga, pe valaaulia i latou e tatala i luga o a latou masini eletonika. Atonu e te manao e faaali le vitio “O ni vaega mai le ‘Keriso Soifua: O le Molimau a le Aposetolo’” (2:45) e sauniuni ai mo la outou talanoaga o lenei pepa o faamatalaga faasolopito.

2:45

Ina ia fesoasoani i tamaiti aoga ia loloto lo latou talisapaia o le pepa o faamatalaga “O Le Keriso Soifua,” tuu atu ia i latou e auai i le gaoioiga lenei. Valaaulia i latou e galulue ma se paga, ma tuu atu i tamaiti aoga taitasi se pepa e tufa atu o loo i lalo. Ia mautinoa ua lava se taimi o tamaiti aoga e toe faamanatu ai ma fefaasoaai i le tasi ma le isi mea latou te maua i le “O Le Keriso Soifua.”

Savali mo o Tatou Aso i le “O Le Keriso Soifua”

O Iesu Keriso ma Lana Talalelei e Faavavau Anomea a le Faiaoga—Lesona 2

Sa aoao mai Elder Robert D. Hales o le Korama a Aposetolo e Toasefululua:

“O Le Keriso Soifua: O Le Molimau a Aposetolo” ua leva ona tapena mo le taimi o le a sili ona tatou manaomia ai. (“Konafesi Aoao: Faamalosia o le Faatuatua ma le Molimau,” Liahona, Nov. 2013, 7)

Toe faamanatu le “O Le Keriso Soifua” mo savali e te lagona e sili ona manaomia i o tatou aso. Ia saunia e faasoa atu mea e te maua i lau paga o suesuega.

Talanoa Atili e uiga ia Iesu Keriso

O Iesu Keriso ma Lana Talalelei e Faavavau Anomea a le Faiaoga—Lesona 2

Na saunoa Elder Neil L. Andersen o le Korama a Aposetolo e Toasefululua:

A o faaitiitia le tautatala o le lalolagi e uiga ia Iesu Keriso, ia tatou tautatala atili e uiga ia te Ia. A o faaali atu o tatou lanu moni o ni Ona soo, o le toatele o loo siomia i tatou o le a saunia e faalogo. (“Ua Matou Tautalatala e Uiga ia Keriso,” Liahona, Nov. 2020, 90)

Toe faamanatu le “O Le Keriso Soifua” mo savali e te lagona o le a sili ona taua e faasoa atu i se lalolagi e le o talanoa mai e uiga ia Iesu Keriso. Ia saunia e faasoa atu mea e te maua i lau paga o suesuega.

Ina ia faaiu le vasega, valaaulia tamaiti aoga e faasoa mai pe na faapefea ona faamalosia lo latou faatuatua ia Iesu Keriso pe mafai foi ona faamalosia e ala i le suesueina o le “O Le Keriso Soifua.” Tuu atu ia i latou se taimi e faatu ai se sini o mea o le a latou faia e faateleina ai a latou molimau ia Iesu Keriso e ala i le suesue atili po o le taulotoina o lenei pepa o faamatalaga musuia.

Mo Le Isi Taimi

Mafaufau e auina atu i au tamaiti aoga a o lei oo i le isi vasega ia manatu nei po o se isi e te lagona o le a faaosofia ai lo latou fiafia: A o e suesue i anomea mo sauniuniga mo le lesona 3, mafaufau pe aisea na e filifili ai e mulimuli ia Iesu Keriso i le muai olaga.