Lesona 12 Anomea mo le Sauniuniga o le Vasega: Mauaina o le Upumoni Mama i Aoaoga a Iesu Keriso
“Lesona 12 Anomea mo le Sauniuniga o le Vasega: Mauaina o le Upumoni Mama i Aoaoga a Iesu Keriso,” O Iesu Keriso ma Lana Talalelei e Faavavau Anomea a le Faiaoga (2023)
“Lesona 12 Anomea mo le Sauniuniga o le Vasega,” O Iesu Keriso ma Lana Talalelei e Faavavau Anomea a le Faiaoga
Ata
O Le Aoaoga a le Faaola e uiga i le Avea ma Soo, tusia e Justin Kunz
Lesona 12 Anomea mo Sauniuniga o le Vasega
Mauaina o le Upumoni Mama i Aoaoga a Iesu Keriso
O le ola ai i le vaitau faatekinolosi ua tuuina mai ai ia i tatou le avanoa ofoofogia i le tele o faamatalaga. Ae sa matauina e Peresitene Russell M. Nelson, “O se tasi o mala o o tatou aso o le toalaiti lea o tagata e iloa le mea e liliu i ai mo le upumoni” (“Upumoni Mama, Aoaoga Faavae Mama, ma Faaaliga Mama,” Liahona, Nov. 2021, 6). A o e mafaufau e uiga i savali ma leo eseese o loo faatautava mo lou gauai atu i ai, mafaufau pe faapefea e Iesu Keriso ma Ana aoaoga ona avea ma punavai sili o le upumoni mama ma maua le mana e taiala ai, faamalosia, ma suia ai lou olaga (tagai Ioane 14:6).
Vaega 1
E mafai faapefea e aoaoga a Iesu Keriso ona faaleleia lo’u olaga?
Ina ua mavae Lona Toetu, sa savavali atu Iesu ma ni soo se toalua o e sa malaga atu i Emau. Sa la le iloa o Ia o le Keriso toetu. A o latou savavali, sa aoao Iesu mai tusitusiga paia e uiga o Lana misiona paia. (Tagai Luka 24:13–27.)
Faitau le Luka 24:31–32, ma vaavaai mo le aafiaga o le aoaoga a le Faaola i nei soo.
Na aoao atu Iesu Keriso i le “pule mai le Atua” ae le pei o le au tusiupu ma le au Faresaio (Faaliliuga a Iosefa Samita, Mataio 7:37 [i le Mataio 7:29, vaefaamatalaga a]). Ina ua Ia aoao atu i Lona nuu o Nasareta, sa “matua ofo i latou i lana mataupu: aua o lana fetalaiga ua i ai i le pule” (Luka 4:32). Ae e ui ina sa aoao mai le Alii ma le mana, ae sa maua e nisi tagata Ana aoaoga ma aoaoga faavae sa o se luitau tele ma sa filifili e le mulimuli ia te Ia. I se tasi o taimi faapena na fesili atu ai le Alii i Ona Aposetolo, “Pe tou te fia o ese foi?” (Ioane 6:67; tagai foi Ioane 6:68–69).
I o tatou aso, e mafai foi ona tatou lagonaina le luitauina e aoaoga ma aoaoga faavae a Iesu Keriso. E i ai taimi tatou te lagona ai le faaosoosoina e “o ese.” Ina ia tumau faamaoni i o tatou olaga atoa o le a le lava le tau lava o le faalogo i Ana afioga.
Ina ua uma ona aoao atu se Faresaio e igoa ia Nikotemo i upumoni taua o le talalelei, sa fetalai mai le Alii, “A o le ua faamaoni ana mea e fai e sau lava o ia i le malamalama, ia faaalia ana amio ina ua tatau i le Atua” (Ioane 3:21; ua faaopoopo le faamamafa).
I se tasi taimi ao aoao atu i le malumalu, na fetalai Iesu: “Ai se tasi e fia fai lona finagalo, e iloa ai e ia le mataupu, pe mai le Atua, pe ou te tautala fua lava a’u” (Ioane 7:17). Mulimuli ane, a o faia e Iesu se faataitaiga o le auauna atu mo Ona soo e ala i le mulumuluina o o latou vae, sa Ia fetalai, “Afai ua outou iloa ia mea, amuia outou pe a outou faia” (Ioane 13:17; ua faaopoopo le faamamafa).
I le faamatalaina o le taua o le faatinoina o aoaoga a Iesu Keriso, na saunoa ai Elder Jeffrey R. Holland o le Korama a Aposetolo e Toasefululua:
Ata
Elder Jeffrey R. Holland
“Ona a lea?” Ou te manatu o le auala lea na tali ai le Faaola mai lea aso i lea aso o se elemene o le le mavaeeseina o Ana aoaoga ma saunoaga. E leai se aoga o Ana lauga ma apoapoaiga pe ana le suia olaga moni o Ona soo.
“Ona a lea?” Ua tatou iloa ua toatele naua tagata e lei faia le sootaga i le va o mea latou te fai mai latou te talitonu i ai ma le ala moni latou te ola ai i o latou olaga. (“Aoao Atu, Talai Atu, Faamalologa,” Liahona, Ian. 2003, 37)
Ata
aikona, suesue
Suesue e Sauniuni ai mo le Vasega
Mafaufau i aoaoga a le Faaola o loo maua i Evagelia a (Mataio, Mareko, Luka, ma Ioane) ma i le 3 Nifae 11–27. Filifili se aoaoga se tasi sa sili ona taua ia te oe ma toe suesue i ai. (Manatua: Afai e te manaomia ni manatu e toefaafou ai lou manatua, tagai “O Aoaoga a Iesu Keriso,” o loo maua i le ChurchofJesusChrist.org.)
A o e suesue ma mafaufau loloto, tusi faamaumau ou manatu e uiga i fesili nei:
O le a se mea e sili ona faagaeetia ai oe e uiga i lenei aoaoga faapitoa mai le Faaola?
O a ni auala ua aafia ai lou olaga i lenei aoaoga?
Ua faapefea ona e latalata atili atu ai ia Iesu Keriso?
Sau saunia i le vasega e faasoa mai aoaoga na e faailoa mai ma pe na faapefea ona uunaia ai lou olaga. Afai e le mafai ona e mafaufau i se aoaoga mai le Faaola na uunaia ai oe, ona vaavaai lea mo se aoaoga e ono talafeagai i lou olaga. Suesue i ai ma sau saunia e faasoa mai mea e sili ona faagaeetia ai oe e uiga i lenei aoaoga.
Vaega 2
O a aoaoga a le Alii e sili ona taua i lo’u faaolataga?
Na aoao mai Peresitene Boyd K. Packer o le Korama a Aposetolo e Toasefululua:
Ata
Peresitene Boyd K. Packer
E taua le iloa o upumoni uma. O nisi upumoni e sili ona aoga, ae o loo i ai upumoni e sili ona taua le iloaina. (“Truths Most Worth Knowing” [faigalotu a le Ofisa o Aoga a le Ekalesia mo talavou matutua, Nov. 6, 2011], ChurchofJesusChrist.org)
E mafai ona tatou vaavaai atu i le Faaola mo le taitaiga i mea atonu e sili ona taua le iloaina. Ina ua mavae Lona Toetu, sa faaali atu Iesu Keriso i le toatele o tagata, e aofia ai Ona Aposetolo e Toasefululua. Na Ia poloaiina le Toasefululua e talai atu Lana talalelei i nuu uma. Sa ia faamautinoa atu foi o i latou o e talitonu i Lana talalelei ma papatisoina o le a faasaoina. (Tagai Mareko 16:15–16.)
Ina ua faaali atu Iesu Keriso i sa Nifaē, sa Ia aoao i latou i le uiga o Lana talalelei ma le mafuaaga na taua ai i lo latou faaolataga.
Faitau le 3 Nifae 27:13–14, 19–21, ma mafaufau e faailoga ia elemene autu o le talalelei a le Faaola. Atonu foi e te manao e matamata le vitio “Gospel Is Good News”(1:33) saunia e Peresitene Russell M. Nelson.
Na saunoa Brother Daniel K Judd, o le sa avea muamua ma Fesoasoani Muamua i le Au Peresitene Aoao o le Aoga Sa:
Ata
Brother Daniel K Judd
E ui o le talalelei a Iesu Keriso o loo fusia ai upumoni uma, ae le o upumoni uma e tutusa le taua. Na manino ona aoao mai e le Faaola e faapea o Lana talalelei, e muamua ma faasilisiliina, o Lana taulaga togiola. O Lana talalelei o se valaaulia foi ina ia maua faamanuiaga o le Togiola e ala i le faatuatua ia Keriso, salamo, papatisoga, mauaina le Agaga Paia, ma le tumau faamaoni e oo i le iuga. …
… E taua lo tatou tausia o i latou tatou te aoaoina ma taitai e ala i le taulai atu i aoaoga faavae autu … nai lo le faaaluina o le taimi taua i mataupu ma punavai e itiiti le taua. (“Tausia i le Afioga Lelei a le Atua,“ Liahona, Nov. 2007, 93–94)
Na ofo mai e Peresitene Dieter F. Uchtdorf, ao avea ma Fesoasoani Lua i le Au Peresitene Sili lenei apoapoaiga:
Ata
Peresitene Dieter F. Uchtdorf
Uso e ma tuafafine, afai o loo e manatu e le o matua aoga tele le talalelei ia te oe, ou te valaaulia oe ia taofi teisi lava, toe tagai i lou olaga mai se mea maualuga, ma faafaigofie lou auala i le avea ai ma soo. Taulai atu i aoaoga faavae autu, mataupu faavae, ma faaaogaaga o le talalelei. Ou te folafola atu o le a taiala ma faamanuia outou e le Atua i o outou ala e faamalieina ai le olaga, ma o le a mautinoa lava le aoga atili o le talalelei mo outou. (“E Aoga!,” Liahona, Nov. 2015, 22)
Ata
aikona, mafaufau loloto
Mafaufau Loloto e Sauniuni ai mo le Vasega
O le a se mea e mafai ona tupu pe a tatou le amanaia faavae o le talalelei ma taulai atu i aoaoga e itiiti le taua? O le a se mea na sili ona fesoasoani ia te oe e faatumauina ai le taulai atu i mataupu faavae?