Lesona 19 Anomea a le Faiaoga

Fesoasoani i le Alii i le Togiolaina o e ua Maliliu

O le galuega a le Faaola i le lalolagi o agaga e faamautinoa ai o tagata uma o e sa ola ma o le a ola i le lalolagi o le a maua le avanoa e faalogo ai i le talalelei a le Alii ma maua sauniga o le faaolataga. I lenei lesona, o le a faasoa mai ai e tamaiti aoga mea e mafai ona latou aoaoina e uiga i le Faaola mai Lana galuega i le lalolagi o agaga. O le a valaaulia foi i latou e auai i galuega o le malumalu ma talafaasolopito o aiga e fesoasoani ai i le Alii i Lana galuega faaola mo e ua maliliu.

Fautuaga mo le Aoao Atu

O Iesu Keriso o loo tala’i i e ua maliliu i le lalolagi o agaga.

Ina ia amata le vasega, e mafai ona e faaali atu ata nei ma valaaulia tagata aoga e faamatala mai le mea na tupu i le va o le maliu ma le Toetu o le Faaola. (Pe e mafai foi ona e toe faamanatuina le saunoaga a Elder Spencer J. Condie i le amataga o anomea mo sauniuniga ma tuu atu i tamaiti aoga e tali mai i le fesili lava lea e tasi.)

Faaleleia o Lo Tatou Aoao Atu ma le Aoaoina

Tuu atu avanoa i tamaiti aoga e faataitai ai le faasoaina atu o le talalelei. E mafai e vasega inisitituti ona saunia se nofoaga saogalemu mo tagata aoga e faataitai ai le faamalamalamaina o aoaoga a le Ekalesia a le Alii. Mo se faataitaiga, e ala i tala faatino e mafai ai e tamaiti aoga ona faaleleia lo latou tomai e talanoa e uiga i le talalelei e faaaoga ai le gagana faigofie ma le manino.

Valaaulia le vasega e mafaufau faapea ua latou maua se avanoa e faamatala ai le galuega a le Faaola i le lalolagi o agaga i se tasi e lē auai i lo tatou faatuatuaga. Faaali atu fesili nei, ma valaaulia tagata aoga e filifili le fesili o le a latou mananao e taliina:

• Ua ou faalogo i la outou lotu o aoao atu e o tagata i le parataiso po o le falepuipui o agaga pe a maliliu i latou. Pe tutusa ea lena mea ma le lagi ma seoli?

• Sa ta’u mai ia te a’u ao tuputupu ae o tagata o e maliliu e aunoa ma le taliaina o Iesu Keriso o lo latou Faaola ua leiloloa e faavavau ma e lē mafai ona o i le lagi. O le mea lena o loo aoao mai e lau ekalesia?

• Sa ou faalogo talu ai nei o la outou lotu o faia se mea e ta’ua o le papatisoga mo e ua maliliu. E foliga mai e ese lava. O le a lena mea?

Tuu atu i tamaiti aoga se taimi e toe faamanatu ai mau o loo maua i le vaega 1 o anomea mo sauniuniga ma ia saunia se tali sao faigofie, manino, ma faaleaoaoga faavae mo le fesili na latou filifilia.

Ona valaaulia lea o tamaiti aoga e faatino ma se paga ma tali fesili na latou filifilia. A uma ona latou faia, e mafai ona e valaaulia ni nai tamaiti aoga e faasoa mai mea na latou aoaoina mai le tasi ma le isi.

Ina ia fesoasoani e faamamafa atu le tāua o le galuega a le Alii i le lalolagi o agaga, e mafai ona e fai atu se tasi pe sili atu foi o fesili nei:

• O le a se mea ua e aoaoina e uiga ia Iesu Keriso ma Lana matafaioi i le auauna atu ia i latou i le lalolagi o agaga? Toe faamanatu le Mataupu Faavae ma Feagaiga 138:12–19, 23–24, ma vaavaai mo upu o loo faamatala ai le ala na tali atu ai e faatuatua i le asiasiga a le Faaola. Faasoa atu i se paga ou lagona pe ana faapea sa e i ai i lenei mea na tupu.

• O le a se mea ua e aoaoina e uiga i manaoga ma uiga o Iesu Keriso e ala i Lana galuega i le lalolagi o agaga? (E mafai ona e toe faamanatuina le Mataupu Faavae ma Feagaiga 138:29–35. O tali e mafai ona aofia ai upumoni e talitutusa ma lenei: O le galuega a Iesu Keriso i le lalolagi o agaga e faaalia ai Lona alofa ma Lona finagalo e ofoina atu le faaolataga i tagata uma. Ua faatagaina e le Faaola i tatou uma e fesoasoani i Lana galuega tele mo e ua maliliu.)

• O a ni mafaufauga po o ni lagona mo le Faaola o ia te oe a o e mafaufau faapea o Lana galuega e oo atu i tagata uma—e aofia ai ou tuaa o e ua maliliu e aunoa ma le talalelei?

E mafai ona tatou fesoasoani i le Faaola i le faaolaina o e ua maliliu.

Mafaufau e faaali atu le ata o loo i le lesona o le Faaola ma le saunoaga lenei mai le “O Le Keriso Soifua”: “Na Ia ofoina mai Lona soifua e togiola mo agasala a tagata uma. O Lana [taulaga] o se meaalofa foaifuaina mo i latou uma na soifua i luga o le fogaeleele” (“O Le Keriso Soifua: O Le Molimau a le Au Aposetolo,” ChurchofJesusChrist.org..) Ia mautinoa ua malamalama tamaiti aoga o le sui o lona uiga o le faatino po o le sui o se isi tagata.

Ona faaali atu lea o le ata lenei, ma fesili atu:

• O a ni auala e ono faataitaia ai e a tatou galuega mo e ua maliliu le mamanu a le Faaola? (Toe faamanatu ma tagata aoga le faamatalaga a Peresitene Russell M. Nelson i le vaega 2 o le anomea mo sauniuniga.)

E faavae i tali a tamaiti aoga, e mafai ona e faaali atu se mataupu faavae e talitutusa ma lenei: A o tatou auai i talafaasolopito o aiga ma galuega faalemalumalu, tatou te faataitai i le faataitaiga a le Faaola e ala i le faia mo isi o se mea e lē mafai ona latou faia mo i latou lava.

• Na faapefea e le faia o galuega o le malumalu ma talafaasolopito o aiga ona faamalosia ai lau molimau i le Togiola a Iesu Keriso, pe na faapefea foi?

Valaaulia tamaiti aoga e toe faamanatu le saunoaga a Elder Dale G. Renlund i le vaega 2 o anomea mo sauniuniga ma faailoa mai faamanuiaga ua latou maua pe mananao e maua e ala i le faia o galuega o le malumalu ma talafaasolopito o aiga. Ona tuu atu lea i tamaiti aoga le avanoa e faasoa mai ai o se vasega po o ni vaega toalaiti pe na faapefea ona faamanuiaina i latou po o se tasi latou te iloa e ala i le faia o galuega mo e ua maliliu.

Faaali atu le faamatalaga lenei mai ia Peresitene Nelson:

Ou te valaaulia outou ina ia mafaufau ma le agaga tatalo po o le a le ituaiga ositaulaga—ma e talosia o se ositaulaga o le taimi—e mafai ona e faia ina ia faia ai nisi galuega o talafaasolopito o aiga ma le malumalu. (Russell M. Nelson, i le “Make Sacrifices for Family History, President Russell M. Nelson Challenges,” Feb. 12, 2017, ChurchofJesusChrist.org)

Tuu atu i tamaiti aoga se taimi e mafaufau ma tusi ai e tali atu ai i le valaaulia a Peresitene Nelson. E mafai ona latou faaaogaina sina taimi o totoe e tatala ai le FamilySearch ma vaavaai mo se igoa e mafai ona latou aveina i le malumalu. Fautuaina tamaiti aoga o e sa faaaogaina le FamilySearch e fesoasoani ai ia i latou e lē masani ai.

Pe e mafai foi ona e valaaulia tagata aoga e toe faamanatu manatu o loo i le tusitusiga “O Talafaasolopito o Aiga e mo Tagata Uma” (ChurchofJesusChrist.org) o loo faasino i le vaega o le “Manao Atili?” o anomea mo sauniuniga.

Mo Le Isi Taimi

Ina ia uunaia sauniuniga a tagata aoga mo le isi vasega, mafaufau e auina atu le sāvali lenei po o sau lava sāvali: A o e suesue i le lesona 20, mafaufau po o a ni malamalamaaga faaleagaga e mafai ona e maua mai upu leoleo mamoe, auauna, lotoa mamoe, isi mamoe,, vao mu’a,, ma , mamoe ua leiloa.