Lesona 7 Anomea a le Faiaoga

Fusimauina o le Faamasinoga Tonu, Alofa Mutimutivale, ma le Alofa o le Atua

Mai le Lectures on Faith ua tatou aoao ai o le faatinoina o le faatuatua i le Atua e manaomia ai ona tatou maua “se manatu sa‘o i Lona tagata ma ona tamali’aga” ([1985], 38). I le lesona lenei, o le a maua ai e tamaiti aoga le avanoa e faamatala ai pe faapefea e uiga faaleatua o le faamasinotonu ma le alofa mutimutivale ona faaalia mai Lona alofa paia. O le a latou mafaufau foi i mea e mafai ona latou faia e faaalia ai lo latou lotofaafetai mo le alofa atoatoa o le Atua ma le taulaga togiola a le Faaola.

Fautuaga mo le Aoao Atu

Ua aoao atu Enoka ma Alema e uiga i uiga paia o le faamasinogatonu, alofa mutimutivale, ma le alofa.

E mafai ona e amataina lenei lesona i le faaali atu o le faamatalaga lenei:

• I le Feagaiga Tuai, o loo faatautaia ai e Ieova le faamalosi ma le faamasinogatonu. I le Feagaiga Fou, e faamagalo ma alofa mutimutivale Iesu Keriso. E sili ia te au le talitonu i le Atua o le Feagaiga Fou i lo le Atua o le Feagaiga Tuai.

• O a ni faafitauli o e vaaia i lenei faamatalaga?

• Aisea e taua ai le malamalama ma talia le faamasinogatonu ma le alofa mutimutivale o ni uiga paia?

• O a ni faafitauli e mafai ona tatou fatuina mo i tatou lava ma isi pe afai tatou te taulai atu i le faamasinogatonu ma lē amanaia le alofa mutimutivale po o le taulai atu i le alofa mutimutivale ma lē amanaia le faamasinogatonu?

Mafaufau e tusi i luga o le laupapa le faamasinogatonu, alofa mutimutivale, ma le alofa. Valaaulia le vasega e faatulaga ni vaega toalaiti. Faamalamalama atu o le a tuuina atu ia i latou se pepa e tufa atu faatasi ai ma faatonuga o le a fesoasoani ia i latou e faalolotoina ai lo latou malamalama i le sootaga i le va o le faamasinogatonu, alofa mutimutivale, ma le alofa o le Atua.

O Le Faamasinoga Tonu ma le Alofa Mutimutivale o le Atua

O Iesu Keriso ma Lana Talalelei e Faavavau Anomea a le Faiaoga—Lesona 7

Ae e te lei amataina le tou talanoaga faavaega, faitau faatasi se fesoasoani o le talanoaga lenei:

Faaleleia o A Tatou Talanoaga Faavaega

Taumafai ia faapaleni le faasoaina o manatu. E sili atu le tele o mea tatou te aoaoina pe a tatou faalogo atu i tagata uma o le vaega, ae le na o le tasi pe lua. Afai e masani ona e fiafia e tatala lau talanoa, faamolemole ia faaeteete ia aua nei pulea talanoaga, faalavelave, pe talanoa a o faaali mantu o isi. Afai e masani ona e filemu ma itiiti lou talanoa, faamolemole ia lototele ma tautala atu ina ia mafai e isi ona aoao mai ia te oe. Tuu ese le manatu faapea e le taua lou manatu.

Faitau leotele faatasi le tulaga faataitai lenei:

Ua lagona e Zane le lofituina i tulafono ma poloaiga a le Atua. Mo se taimi umi lava, sa ia lagonaina e pei e le lava lona lelei ma e le atoatoa o ia i le tele o taimi. O le lotovaivai i le leai o se “alualu i luma,” na ia pa’u ai talu ai nei i se mamanu o se solitulafono matuia. Ua ia lagonaina le leai o se Agaga. Ua le o toe agavaa o ia e maua se pepa faataga o le malumalu. E mafaufau o ia pe o alofa pea le Atua ia te ia, ona o ana filifiliga le lelei. Sa ia fai atu talu ai nei i lana uo o Maia, “Ua leai se aoga lo‘u olaga. Ou te mautinoa lava ua tuulafoaiina au e le Atua.” I le tali atu na faapea mai Maia, “Aua le popole i ai. E alofa le Atua ia i tatou ma le le faatuaoia ma o le a Ia laveaiina oe e tusa lava po o a mea ua e faia. O le uiga lena o le i ai o le Togiola a Iesu Keriso.”

Toe faamanatu faapuupuu ia tulaga na i ai ae lei oo mai le Lolo. Ona toe faamanatu lea o le Mose 7:28–29, 32–33, 37, ma vaavaai mo mea na aoaoina e Enoka e uiga i le natura o le Atua mai le vaai atu ia te Ia o mafatia Ana fanau faalogogata. Ona talanoaina lea o fesili nei:

• O a upumoni mai nei fuaiupu e mafai ona fesoasoani ia Zane e iloa ai e alofa le Tama Faalelagi ia te ia e ui lava ua ia solia poloaiga? E mafai faapefea e lenei malamalama ona fesoasoani e faaleleia le sootaga a Zane ma le Tama Faalelagi? (E mafai ona e faitau le saunoaga a Elder Jeffrey R. Holland i le vaega 1 o anomea mo sauniuniga o se vaega o lenei talanoaga.)

• E faapefea ona faaalia le faamasinoga tonu a le Atua i nisi taimi e ala i Lona ita po o le to’asa, o se faamaoniga o Lona alofa? (Mafaufau e faitau faatasi le saunoaga a Peresitene Dallin H. Oaks i le vaega 1 o anomea mo sauniuniga.) Ana faapea e le amiotonu le Atua, e mafai faapefea e lenei mea ona faavaivaia lo tatou faatuatua ia te Ia?

• O le a se mea e ono taitaiseseina ai le vaaiga a Maia i le alofa o le Atua? (E ono fesoasoani le faitau o le saunoaga a Elder D. Todd Christofferson i le vaega 1.) O a nisi o auala e sili atu e faamatala ai le alofa o le Atua? O a ni auala ua e maua ai se aafiaga o le alofa o le Atua?

© 2023 Puletaofia e le Intellectual Reserve, Inc. Ua taofia aia tatau uma.

O Le Faamasinoga Tonu ma le Alofa Mutimutivale o le Atua

O Iesu Keriso ma Lana Talalelei e Faavavau Anomea a le Faiaoga—Lesona 7

A uma ona tuuina atu le tele o le taimi mo talanoaga faavaega, e mafai ona e valaaulia tamaiti aoga e faasoa mai upumoni po o malamalamaaga sa latou lagonaina sa faapitoa le taua i la latou talanoaga faavaega.

E mafai ona e faaauau pea ona talanoaina manatu o Zane ma Maia e uiga i le Atua, e ala i le ta‘ua o filifiliga na faia e Korianetona a o auauna atu i se misiona (tagai Alema 39:1–5). Toe faamanatu le Alema 42:15, 22, 24–25 e aoao ai mea na aoao atu e Alema ia Korianetona e uiga i le faamasinoga tonu, alofa mutimutivale, ma Iesu Keriso.

• E mafai faapefea e se malamalama sa‘o i le Togiola a Iesu Keriso ona fesoasoani ia Zane e toe faaupu pe faapefea ona ia vaai atu i lona le atoatoa, mea sese, ma agasala? E mafai faapefea e uiga ma amioga a Zane ona suia pe afai na ia aoaoina le uiga o le “salamo moni”? (tagai Alema 42:24).

• O le a sau tala o le a se mea o taitaiseseina e uiga i le vaaiga a Maia i le Togiola a Iesu Keriso? O le a se mea o le a e fetuunaia e uiga i lana vaai ina ia ogatusa ai ma aoaoga a Alema?

• Mata e faapefea ona suia le olaga o Zane pe afai na te faaitiitia le taulai atu i ona lava toilalo ma taulai atili atu i le manao o le Faaola e tuu atu avanoa lona lua? (Atonu e te manao e toe faamanatu le saunoaga a Peresitene Dieter F. Uchtdorf ma Elder Lynn G. Robbins i le vaega 2 o anomea mo sauniuniga.) Na faapefea e le taulai atu i le onosai ma le alofa mutimutivale o le Faaola ona faamanuiaina ai lou olaga?

Ina ia faaiu le vasega e mafai ona e faaali atu upumoni nei i a latou fesili e faatatau i ai. Valaaulia tamaiti aoga e filifili se tasi o nei upumoni ona tusi lea o o latou manatu ma lagona e tali atu ai i fesili:

• E lagona e le Atua le faanoanoa loloto pe a tatou puapuagatia ona o lo tatou le usiusitai. (Tagai i le Mose 7:37.)

• O a ni ou manatu po o lagona a o e mafaufau e uiga i le Tama Faalelagi o tutulu pe a e mafatia ona o lou le usiusitai? O le a se mea e mafai ona e faia e faaalia ai lou lotofaafetai mo Lona popolega ma le alofa atoatoa?

• E ala i Lana Togiola, na faamalieina ai e Iesu Keriso ia manaoga o le faamasinoga tonu ina ia mafai ai ona tatou salamo ma maua le alofa mutimutivale. (Tagai Alema 42:24.)

• O a ni ou manatu po o lagona a o e mafaufau e uiga ia Iesu Keriso e faamalie ai manaoga o le faamasinoga tonu ina ia mafai ai ona e salamo ma maua le alofa mutimutivale? O le a se mea e mafai ona e faia e faaalia ai lou lotofaafetai mo le taulaga togiola na Ia faia mo oe?

Mo Le Isi Taimi

I le aluga o le vaiaso, mafaufau e auina atu le savali lenei, po o se savali e te fatuina, i au tamaiti aoga: A o e faitauina anomea mo sauniuniga mo le lesona 8, mafaufau i auala eseese e mafai ai e Iesu Keriso ona (fesoasoani pe lagolago) oe ma i latou e te alofa i ai. Mafaufau e matamata le ata vitio puupuu “Fesoasoani i Ona Tagata” (0:42) ma Elder Jeffrey R. Holland.