Lesona 28 Anomea a le Faiaoga

Tutū Atu o ni Molimau a Iesu Keriso

I lenei kosi atoa, sa maua ai e tagata aoga le avanoa e suesue, mafaufau loloto, ma talanoaina Iesu Keriso ma Lana talalelei e faavavau. Ua valaaulia i latou e faamalolosia a latou molimau i le Faaola ma galulue i le faatuatua ia avea atili e faapei o Ia. I lenei lesona, o le a tomanatu ai tagata aoga i mea na latou lagonaina, aoaoina, ma oo i ai. O le a valaaulia i latou e faasoa atu a latou molimau e uiga i le Faaola.

Fautuaga mo le Aoao Atu

Ua molimau atu soo o Iesu Keriso e uiga ia te Ia.

Manatua: Ina ia tuu atu i tagata aoga le tele o le taimi e toe manatunatu ai ma faasoa a latou molimau i le Faaola i le taimi o le vasega, e itiiti lava ni manatu faafaiaoga i lenei lesona.

E mafai ona e faasoa atu le tulaga faataitai lenei a o e amataina le vasega:

Vaai faalemafaufau i se uo mamae o loo auai i lana uluai sauniga anapogi ma molimau pe toe foi mai i le lotu i le mavae ai o tausaga o toesea. Afai e te faasoa atu lau molimau, o le a sau tala e fai atu? O le a se mea e te faamoemoe e mafai ona faasoa mai e isi?

Mafaufau e tuu atu i tagata aoga se taimi e faamaumau ai mea latou te ono fai atu ai i a latou molimau. Ona mafai lea ona e valaaulia nisi o tagata aoga e faasoa mai mea na latou faamaumauina. I le avea ai ma se vaega o la outou talanoaga, e mafai ona e fai atu se tasi pe sili atu o fesili nei:

• O le a sou lagona pe afai e le’i molimau se tasi ia Iesu Keriso? Aisea e tāua tele ai le tuuina atu o le molimau ia Iesu Keriso ma Lana talalelei e faavavau? (A o talanoaina e tagata aoga, e mafai ona e faaali atu le saunoaga lenei a Elder Dieter F. Uchtdorf: “O le autu o [la tatou] molimau o le faatuatua lea e lē aunoa, ma le malamalama ia Iesu Keriso ma Lana misiona paia,” [“O Le Mana o se Molimau Patino,” Liahona, Nov. 2006, 38].)

• Na faapefea ona oo mai ia te oe lau molimau ia Iesu Keriso? (E mafai ona e iloiloina le Alema 5:46–48 ma le saunoaga lona lua a Elder Uchtdorf i le vaega 1 o anomea mo sauniuniga. Afai e manaomia, e mafai ona e fesoasoani i tagata aoga e faailoa mai se upumoni e talitutusa ma lenei: E mafai ona tatou maua se molimau mautinoa ia Iesu Keriso e ala i le Agaga Paia.) O le a se faatosinaga na i ai i le Agaga Paia i lou malamalama ma le alofa mo le Faaola?

Mafaufau e valaaulia se tagata aoga se toatasi pe toalua a o le’i amataina le vasega e saunia e faasoa mai i le vasega le auala ua faamanuiaina ai o latou olaga i le faalogo atu i isi a’o molimau mai e uiga ia Iesu Keriso. Ona mafai ai lea ona e fesili atu:

• O a nisi o auala e mafai ona tatou tutū o ni Molimau a Iesu Keriso? (Atonu e te manao e valaaulia tagata aoga e toe faamanatu le saunoaga a Elder Neil L. Andersen i le vaega 2 o le anomea mo sauniuniga.)

• Aisea e ono tāua ai le faasoa atu o a tatou molimau i le Faaola, e tusa lava pe tatou te lagona e lē malosi tele? (Mafaufau e toe faamanatu le saunoaga a Peresitene Uchtdorf i le vaega 1 o anomea mo sauniuniga.)

Faaleleia o Lo Tatou Aoao Atu ma le Aoaoina

Valaaulia tagata aoga e molimau atu ia Iesu Keriso ma Lana misiona paia. Fesoasoani i tagata aoga ia malamalama o le faasoa o se molimau ia Iesu Keriso e lē gata ina faamanuiaina ai le tagata o loo tuuina atu le molimau ae e mafai foi ona faamalosia ai le faatuatua ma molimau a isi. O se molimau e mafai ona avea ma se faailoaga faigofie o le mea e talitonu i ai se tagata, faamoemoega, po o le iloa e moni.

Faamanatu i le tagata aoga sa valaaulia i latou e saunia mo le vasega e ala i le filifilia o se gaoioiga e aoao ai e fesoasoani ai ia i latou e manatunatu i a latou molimau i le Faaola ma Lana talalelei e faavavau. Tuu atu i tagata aoga se taimi e iloilo ai a latou faamatalaga ma saunia se mea e faasoa mai.

Afai e toatele lau vasega, atonu e te manao e vaevae tagata aoga i ni vaega ina ia tofu maua e tagata uma se avanoa e faasoa mai ai. Uuna’ia tagata aoga e mafaufau i le taimi latou te faaaogaina ina ia mafai ona faasoa tagata uma o le vasega po o le vaega o e mananao ai. E ui e tatau ona uuna’ia tagata aoga uma e faasoa mai, ae e e le tatau ona lagona e se tasi le faamalosia.

Faaiu le vasega i le tuuina atu o lau molimau ma uuna’ia tagata aoga e faaauau pea ona faamalolosia a latou molimau ia Iesu Keriso ma vaavaai mo avanoa e faasoa atu ai lena molimau e uiga ia te Ia.

A o le’i faaiuina le vasega, fautuaina tagata aoga e faaauau pea ona lesitala i le inisitituti.