Lesona 16 Anomea a le Faiaoga

Taliaina o le Taulaga Togiola Sili a le Faaola

O le Togiola a Iesu Keriso e totonugalemu i le fuafuaga o le faaolataga a le Tama Faalelagi. I le taimi o lenei lesona, e mafai e tamaiti aoga ona faalolotoina lo latou talisapaia o le tau na totogi e Iesu Keriso “e togiola ai mo agasala a tagata uma” (“O Le Keriso Soifua: O Le Molimau a le Au Aposetolo,” ChurchofJesusChrist.org). O le a valaaulia i latou e mafaufau i mea e mafai ona latou faia e avea ai le salamo o se vaega e sili ona totonugalemu ia Keriso ma olioli i o latou olaga.

Fautuaga mo le Aoao Atu

Ona o le Pa’ū, tatou te manaomia ai le Togiola a Iesu Keriso.

Faaleleia o Lo Tatou Aoao Atu ma le Aoaoina

Atiina ae se siosiomaga e siitia ai le aoaoina faaleagaga. Sa aoao mai Peresitene Boyd K. Packer e faapea “e faigofie ona oo mai musumusuga i ni nofoaga toafilemu” (“Reverence Invites Revelation,” Ensign, Nov. 1991, 21). Pe o faatulaga lelei, mamā, ma toafimalie lou siosiomaga e aoao ai? O a ni mea e ono faalavelave i tamaiti aoga mai le faagasologa o le aoaoina, ma e mafai faapefea ona e faaitiitia? Pe o lagona ea e tamaiti aoga le taliaina pe a latou taunuu mai? E mafai faapefea e musika paia po o ata e faatatau i le talalelei ona fesoasoani e saunia tamaiti aoga mo le aoaoina?

E mafai ona e amataina le vasega i le faasoaina atu o le ata faataitai lenei:

E talisapaia e Logan le Togiola a Iesu Keriso, ae na te lē lagonaina i taimi uma se manaoga vave mo le Faaola i lona olaga. E talitonu o ia talu ai o ia o se tagata lelei, e masani lava ona tausia poloaiga, auauna atu i le Ekalesia, ma e lē tausalaina i se agasala matuiā, o le Togiola a le Alii e lē talafeagai tele i lona tulaga.

• E faapefea ona e faamatalaina le vaaiga a Logan i le Togiola a le Alii? O a ni manatu sesē e ono umia e Logan e tusa ai ma le Togiola a le Faaola?

• E mafai faapefea e le suesueina o le Pa’ū ona aafia ai lagona o Logan e uiga i le Togiola a Iesu?

Mafaufau e faaali atu le saunoaga lenei mai ia Peresitene Ezra Taft Benson:

E leai se tasi e lava ma lelei lona iloaina o le mafuaaga na te manaomia ai Keriso seiloga ua ia malamalama ma taliaina le aoaoga faavae o le Pa’ū ma lona aafiaga i tagata uma. (O Se Molimau ma se Lapataiga: Ua Molimau mai se Perofeta o Aso Nei i le Tusi a Mamona [1988], 33)

Valaaulia tamaiti aoga e lisi na o i latou lava pe faatasi ma se paga nisi o aafiaga o le Pa’ū o Atamu ma Eva. (E mafai ona tagai tamaiti aoga i le vaega 1 o anomea mo sauniuniga mo se fesoasoani.) Ona mafai lea ona e valaaulia i latou e faasoa mai mea na latou maua i le vasega. A uma ona faasoa mai tamaiti aoga, mafaufau e fesoasoani ia i latou ia loloto lo latou malamalama e ala i le fai atu o se tasi pe sili atu foi o fesili nei:

• Aisea e maua ai e tagata uma, e aofia ai tagata “lelei” ma “usiusitai” e pei o Logan, se manaoga vave ma manaomia pea mo le Togiola a le Alii? (Afai e aogā, faitau 2 Nifae 9:7–9. E mafai e tamaiti aoga ona faailoa mai se mataupu faavae e pei o lea: E na o le Togiola a Iesu Keriso e mafai ai ona tatou faatoilaloina tuutuuga o le oti faaletino ma le faaleagaga.)

• O le a le uiga o le oti faaletino ma le faaleagaga? (Afai e manaomia, toe faamanatuina le saunoaga a Elder D. Todd Christofferson i le vaega 1 o anomea mo sauniuniga. Aisea e te manatu ai ua ta’ua e Iakopo le oti faaletino ma le faaleagaga o se “sauai leaga matautia”? (2 Nifae 9:10).

• O a ni ou lagona mo le Faaola, i le iloaina ua na o Ia lava le ala e mafai ai ona e faatoilaloina le oti faaletino ma le faaleagaga? (tagai Mosaea 3:17).

Na puapuagatia Iesu Keriso i Ketesemane ma luga o le satauro ina ia mafai ai ona tatou salamo ma togiolaina.

Faamanatu i le vasega o le sauniuniga mo le vasega, sa valaaulia ai i latou e faitau le Mareko 14:33–37, Luka 22:43–44, ma le Mataupu Faavae ma Feagaiga 19:18 ma tusifaamaumau o latou manatu ma lagona. Tuu atu i tamaiti aoga se taimi e toe faamanatu ai nei fuaitau. Ona fai atu lea ia i latou e fai ni vaega toalaiti ma tuu atu ia i latou le pepa lenei.

Na Puapuagatia Iesu Keriso e Laveai i Tatou

O Iesu Keriso ma le Talalelei e Faavavau Anomea a le Faiaoga—Lesona 16

Faitau i fesili nei ma taulai atu i fesili e sili ona mananao lau vaega e talanoaina.

1. O a ni ou mafaufauga ma lagona mo le Faaola a o e mafaufau loloto i Ona puapuaga mo oe? O le a se mea ua aoao mai ia i tatou e Lona naunau e puapuagatia e uiga ia te Ia? (Mafaufau e faitau 1 Nifae 19:9.)

2. Aisea na aveese ai e le Tama Faalelagi Lona Agaga a o puapuagatia le Faaola i luga o le satauro? (Mafaufau e toe faamanatu le Mareko 15:34 saunoaga a Elder Jeffrey R. Holland i le vaega 1 o le anomea mo sauniuniga. E mafai faapefea ona fesoasoani ia i tatou e manatua le aafiaga o le Alii i luga o le satauro pe a tatou lagonaina le tuuatoatasi, faagaloina, pe tuulafoaiina?

3. E mafai faapefea e se molimau i le Togiola a le Alii ona fesoasoani ia i tatou pe a tatou masalosalo i lo tatou tāua faaletagata lava ia? (E mafai ona e iloiloina le Mataupu Faavae ma Feagaiga 18:10–11.) E mafai faapefea e le taulai atu ia Iesu Keriso ma Lana Togiola ona tosina ai le ala tatou te vaai atu ai i o tatou gafatia ma le lumanai?

4. O le a le sāvali tatou te auina atu ia i tatou lava ma le Faaola pe a tatou filifili e salamo? Aisea e ono lagona ai e le Alii le olioli pe a tatou salamo? (tagai Mataupu Faavae ma Feagaiga 18:13).

5. Afai e lagona e se tasi le lē mautinoa e uiga i le moni o le Togiola a le Alii, o le a se mea e mafai ona ia faia e maua ai se molimau e uiga i ai?

© 2023 Puletaofia e le Intellectual Reserve, Inc. Ua taofia aiā tatau uma.

Na Puapuagatia Iesu Keriso e Laveai i Tatou

O Iesu Keriso ma le Talalelei e Faavavau Anomea a le Faiaoga—Lesona 16

E faalagolago i manaoga o au tamaiti aoga, e mafai ona e valaaulia i latou e faasoa mai mea na uunaia ai i latou i le taimi o a latou talanoaga. Pe e mafai foi ona e taulai atu i le aoaoga faavae o le salamo e ala i le faaali atu o faamatalaga nei e lua. Valaaulia tamaiti aoga e mafaufau pe o le fea e masani ona latou fesootai i ai a o latou vaai i lo latou lava manaomia o le salamo.

1. O le salamo e pei o se faasalaga e ao ona aloese mai ai.

2. O le salamo e pei o se meaalofa paia e taliaina ma le olioli.

Ina ia fesoasoani i tamaiti aoga e toe manatunatu i o latou uiga faaalia i le salamo, mafaufau e faitau leotele le saunoaga a Peresitene Russell M. Nelson i le vaega 3 o anomea mo sauniuniga. Ona mafai lea ona e fesoasoani i tamaiti aoga e iloa lenei upumoni: “Pe a vaavaalua ma le faatuatua, e tatala e le salamo lo tatou faitotoa e maua ai le mana o le Togiola a Iesu Keriso” (“E Mafai ona Tatou Faia ia Sili Atu ma ia Sili Atu,” Liahona, Me 2019, 67). Ona fesili atu lea:

• O a ni auala e tatala ai e le faatuatua ma le salamo lo tatou avanoa i le mana o le Faaola?

• O le a se mea e mafai ona tatou faia e vaai atu ai i le salamo o se meaalofa paia ma ia sili atu ona taliaina ma le olioli?

A uma ona tali mai tamaiti aoga, e mafai ona e tuu atu ia i latou se taimi e tusi ai se mea o le a latou faia e avea ai le salamo o se vaega sili ona olioli ma anoa o o latou olaga.

A lava le taimi, e mafai ona e valaaulia nisi o tamaiti aoga e faasoa mai pe na faapefea ona fesoasoani le salamo ia i latou e maua ai le mana faamama o le Faaola. Faamanatu i tagata aoga e aua nei faaalia mai agasala ua mavae a o latou faasoa mai.

Mo Le Isi Taimi

Ina ia uunaia le sauniuniga a le tamaitiiti aoga mo le lesona 17, mafaufau e auina atu i tamaiti aoga le sāvali ma le ata lenei: A o e suesue i anomea mo sauniuniga mo le lesona 17, mafaufau loloto i le tāua o le tuugamau avanoa o le Faaola.