Lesona 25 Anomea a le Faiaoga

Taumafai e Avea o se Soo Faamaoni o Iesu Keriso

O le avea ma se soo faamaoni o Iesu Keriso e aogā ai taumafaiga uma auā “O Lana ala o le ala lea e tau atu i le fiafia i lenei olaga ma le ola e faavavau i le lalolagi a sau” (“O Le Keriso Soifua: O Le Molimau a le Au Aposetolo5,” ChurchofJesusChrist.org). I lenei lesona, o le a faailoa mai ai e tamaiti aoga mea e manaomia e le Alii mai Ona soo. O le a latou mafaufau foi i mea e mafai ona latou faia e avea ai o se soo tuuto ma faamaoni o Iesu Keriso.

Fautuaga mo le Aoao Atu

Ua valaaulia i tatou e Iesu Keriso e avea ma Ona soo.

Mafaufau e faaali atu se ata o Iesu o mulumuluina vae o Ana Aposetolo, ma fai atu i se tamaititi se toatasi pe toalua e faasoa mai ni lagona atonu latou te maua pe a mulumulu e le Faaola o latou vae.

E mafai ona e faaali atu fesili nei ma fai i tagata aoga e mafaufau loloto i ai mo se minute:

• O le a se mea e mafai ona ou aoaoina e uiga i uiga o le Faaola mai Ana faatinoga i Ana Aposetolo? O le a se auala sili atu ou te faata’ita’ia ai nei uiga faa-Keriso?

Faamalamalama atu o nei ituaiga o fesili e mafai ona tatou fesili ifo ai ia i tatou lava a o tatou taumafai e avea ma soo sili atu o Iesu Keriso. O se soo o Keriso o se tasi e mulimuli i le Faaola ma ola i Ana aoaoga (tagai Mataupu Faavae ma Feagaiga 41:5). Ina ua uma ona mulumulu e le Faaola vae o Ana Aposetolo, sa Ia aoao atili i latou e uiga i le avea ma soo.

Valaaulia tagata aoga e iloilo le Ioane 13:14–17, 34–35; 14:15 ma faauma le faamatalaga lenei: O se soo o Iesu Keriso …

Valaaulia ni nai tagata aoga e faasoa mai a latou faamatalaga ua mae’a, lea e mafai ona aofia ai fasifuaitau e pei ole “auauna atu i isi,” “alofa i isi,” ma “tausi Ana poloaiga.” A o faasoa mai tagata aoga, e mafai ona e fai atu fesili tulitatao, e pei o fesili nei:

• O ai mai tusitusiga paia po o lou lava olaga o loo faataitaia lenei ituaiga o soo? Na faapefea ona aafia oe i lana faataitaiga?

Faaleleia o Lo Tatou Aoao Atu ma le Aoaoina Mai

Tuu atu i tagata aoga ni avanoa mo le iloiloga faaletagata lava ia. O le iloiloga faaletagata lava ia e mafai ona avea ma se meafaigaluega aogā mo le tuputupu a’e patino. Peitai, i nisi tulaga, e ono taitai atu ai tagata aoga ia lagona le tausalaina po o le lotovaivai. Faamanatu i tagata aoga a o latou faamae’aina le iloiloga lenei faaletagata lava ia ina ia onosai ma agalelei ia i latou lava. Ua fetalai mai le Alii, “O le a Ou alofagia lo outou vaivai” (Mataupu Faavaema Feagaiga 38:14).

E mafai ona e faaali pe avatu i tagata aoga se kopi o lenei iloiloga faletagata lava ia.

Iloiloga Faaletagata Lava Ia o le Avea ma Soo

O Iesu Keriso ma Lana Talalelei e Faavavau Anomea a le Faiaoga—Lesona 25

Mafaufau i faamatalaga taitasi ma faatulaga oe lava e faaaoga ai le fuafaatatau lenei: 1 = matua’i lē ioeina, 2 = e fai si lē ioeina, 3 = e ioeina pe lē ioeina, 4 = e fai si ioeina, ma le 5 = ioeina malosi.

1. Ou te taumafai ma le faamaoni ia avea ma se soo o Iesu Keriso.

2. Ou te taumafai e tausi poloaiga a le Faaola i aso uma.

3. Ou te taumafai e alofa ma auauna atu ia i latou o siomia a’u e pei ona faia e Iesu Keriso.

4. Ou te taumafai e ositaulaga manaoga o le lalolagi e mulimuli ai i le Faaola.

© 2023 Puletaofia e le Intellectual Reserve, Inc. Ua taofia aiā tatau uma.

Iloiloga Faaletagata Lava Ia o le Avea ma Soo

O Iesu Keriso ma Lana Talalelei e Faavavau Anomea a le Faiaoga—Lesona 25

A uma ua lava se taimi e faamaumau ai e tagata aoga a latou tali, valaaulia i latou e faaalu ni nai minute e mafaufau loloto ai i mea ua latou aoaoina mai lenei iloiloga faaletagata lava ia.

Faasoa atu i tagata aoga na valaaulia e le Faaola se taulealea mauoa e fai lana lava iloiloga faaletagata lava ia. Valaaulia se tagata aoga e aotele mai le tala i lenei taulealea (tagai i le vaega 2 o anomea mo sauniuniga), pe e mafai foi ona e maimoa i le “Christ and the Rich Young Ruler” (2:26).

• O le a se mea tāua e uiga i le fesili “Se a se mea o toe ou te le’i faia”? (Mataio 19:20). Aisea e tāua ai mo soo uma o Iesu Keriso ona fai atu lenei fesili?

Valaaulia tagata aoga e faitau le Mareko 10:21, ma vaavaai pe na faapefea ona faamatala e Mareko lagona o le Faaola e uiga i lenei taulealea mauoa.

• E faapefea e le lagonaina o le alofa o le Faaola ona fesoasoani ia te oe pe a e iloaina se mea e tatau ona e suia?

• O le a le uiga o le “ave lou satauro” ma mulimuli ia Iesu Keriso? (Atonu e te manao e iloilo le Faaliliuga a Iosefa Samita, Mataio 16:25–26 [i le faaopoopoga i le Tusi Paia] ma le saunoaga a Elder Ulisses Soares mai le vaega 2 o anomea mo sauniuniga.)

Ona mafai lea ona e tuu atu i tagata aoga e iloilo le saunoaga a Elder Larry R. Lawrence i le vaega 2 o anomea mo sauniuniga. Ona faaali atu lea o fesili nei, ma valaaulia tagata aoga e faamaumau o latou manatu e uiga i le fesili e sili ona talafeagai:

• O le a se mea o taofia oe mai le alualu i luma faaleagaga?

• E faapefea ona e faaali atu i le Alii lou manao e ave lou satauro ma mulimuli ia te Ia?

• O i ai se mea o e lagona e tatau ona e ositaulagaina i lenei taimi ina ia avea ai o se soo sili atu o Iesu Keriso?

E faamalosia e le Alii Ona soo.

E mafai ona e faaali atu le saunoaga lenei a Peresitene James E. Faust ma valaaulia tagata aoga e vaavaai mo faamanuiaga ua folafola mai ia i latou o ē naunau e totogi le tau o le avea ma soo:

E toatele e manatu faapea o le tau o le avea ma soo e taugata nauā ma e mamafatū. O nisi e manatu e aafia ai le tuueseina o ni mea se tele. Ae o le satauro e lē mamafa e pei ona foliga mai ai. O le usiusitai tatou te maua ai le malosi sili atu e tauaveina ai.

“Ia outou o mai ia te au, o outou uma o e tigaina ma mafatia i avega, o au foi e malolo ai outou.

“Ia outou amoina la’u amo, ma ia outou faaaoao ia te au, aua o au le agamalu ma le loto maulalo; ona maua lea e outou le malologa mo outou agaga.

“Aua e avegofie la’u amo, o la’u avega foi e mama ia” (Mataio 11:28–30). (James E. Faust, “Avea ma Soo,” Liahona, Nov. 2006, 22)

E mafai ona e fai i tamaiti aoga e galulue ma se paga po o ni vaega toalaiti ma fai i ai e iloilo le Roma 8:16–18, 28, 35, 38–39. Valaaulia i latou e vaavaai mo upumoni e mafai ona fesoasoani ia i latou a o latou feagai ma luitau o le avea ma soo. (E mafai e tagata ona faailoa mai upumoni e pei o nei: Afai o i tatou o ni soo faamaoni, e mafai ona avea i tatou ma suli-faatasi ma Iesu Keriso ma faamamaluina faatasi ma Ia. Afai tatou te alolofa i le Atua, o le a galulue mea uma mo lo tatou lelei.)

A o faasoa mai e tagata aoga ni upumoni ua latou mauaina, mafaufau e fai atu fesili nei:

• E faapefea e le talitonu e mafai ona avea i tatou ma suli-faatasi ma Iesu Keriso ona fesoasoani ia i tatou e tumau ai o ni soo faamaoni? (E mafai ona e iloiloina le 2 Nifae 9:18. Atonu e tāua le ta’u atu e maua e se suli-faatasi se tofi tutusa ma se isi [tagai Mataupu Faavae ma Feagaiga 76:50, 55–59; 84:38].)

• Na faapefea ona lagolagoina oe e lou alofa mo le Atua ma Lona alofa mo oe ina ua faigata le ala o le avea ma soo?

Ina ia faaiu le vasega, e mafai ona e faasoa atu lau molimau i mataupu faavae o le avea ma soo sa outou talanoaina o se vasega. Pe e mafai foi ona outou maimoa i le “Living the Gospel Joyful” (1:40) faatasi ma Peresitene Dieter F. Uchtdorf, ao avea ai ma se tasi o le Au Peresitene Sili.

Mo Le Isi Taimi

Ina ia uuna’ia tagata aoga e faitau anomea mo sauniuniga mo le vasega e sosoo ai, mafaufau e auina atu ia i latou se sāvali puupuu e uiga i uiga faa-Keriso, e pei o nei: Ina ia faatamaoaigaina lau suesuega o anomea mo sauniuniga mo le lesona 26, e mafai ona e maimoa i le “Christlike Attributes” (2:53).