Lesona 12 Anomea a le Faiaoga

Mauaina o le Upumoni Mama i Aoaoga a Iesu Keriso

Na saunoa Peresitene Russell M. Nelson: “O le mataupu mama a Keriso e mamana tele. E suia ai le olaga o tagata uma e malamalama i ai ma saili e faatino i lona olaga” (“Upumoni Mama, Mataupu Faavae Mama, ma Faaaliga Mama,” Liahona, Nov. 2021, 6). I lenei lesona, o le a maua ai e tagata aoga le avanoa e faasoa mai ai pe na faapefea ona tosinaina o latou olaga i aoaoga a Iesu Keriso. O le a latou talanoaina foi le uiga o le talalelei ma valaaulia e mafaufau i mea e mafai ona latou faia ina ia taulai atili atu ai i le ola ai.

Fautuaga mo le Aoao Atu

Ua aoao mai e Iesu Keriso upumoni e suia ai olaga.

E mafai ona e faaali atu le ata o loo i le lesona, po o se isi e te filifilia e uiga ia Iesu Keriso o loo aoao atu, ma valaaulia tagata aoga e faasoa mai ni mafuaaga talafeagai “o [Iesu Keriso] o le faiaoga sili ua soifua pe o le a soifua mai” (Jeffrey R. Holland, “Aoao Atu, Talai Atu, Faamalologa,” Liahona, Ian. 2003, 33).

Ina ia uunaia se talanoaga anoa, e mafai ona e fai atu nisi o fesili nei:

• O le a le aafiaga o aoaoga a le Faaola ia i latou o e na faalogo ia te Ia o aoao atu? (E mafai ona e iloiloina faataitaiga o loo maua i le vaega 1 o anomea mo sauniuniga.) O le a se aafiaga o Ana aoaoga i lou olaga?

• O le a se mea e tatau ona tatou faia pe afai tatou te mananao i aoaoga a Iesu Keriso ina ia i ai se faatosinaga loloto ma tumau i o tatou olaga? (Atonu e te manao e iloilo le Ioane 3:21; 7:17; 13:17 ma le saunoaga a Elder Holland i le vaega 1 o anomea mo sauniuniga. Ona mafai lea ona e valaaulia tagata aoga e faailoa mai se mataupu faavae e talitutusa ma lenei: A o tatou faatino i aoaoga a le Alii, e mafai ona tatou iloa lo latou moni, faateleina i le malamalama, ma maua le fiafia.)

Faamanatu i tagata aoga o le vaega 1 o anomea mo sauniuniga sa valaaulia ai i latou e filifili se aoaoga a le Faaola na aafia ai o latou olaga. Sa mafai foi ona latou vaavaai mo se aoaoga latou te manatu atonu e talafeagai i o latou olaga. Tuu atu i tagata aoga ni nai minute e iloilo ai a latou fuaitau ma fesili e tolu e faatatau i ai i le vaega 1 o anomea mo sauniuniga. Fautuaina tagata aoga o e lei faia le gaoioiga e vaavaai mo se aoaoga a le Faaola e mafai ona latou faasoa mai.

Valaaulia tagata aoga e faasoa mai aoaoga a Iesu Keriso na latou filifilia ma a latou tali i se tasi o fesili e tolu mai anomea mo sauniuniga. E mafai ona outou faia lenei gaoioiga o se vasega pe vaevae tagata aoga i ni vaega toalaiti ma fai atu ia i latou e feauauai e faasoa mai.

Ua aoao e Iesu Keriso sa Nifae i le uiga o Lana talalelei.

Faitau faatasi le tulaga faataitai lea:

E lei leva ona toe toaga mai Amelia i gaoioiga a le Ekalesia i le mavae ai o tausaga o toesea. E ui ina agalelei tagata ia te ia, ae e masani ona ia lagona le le mautonu ma le lotovaivai i le taimi o lauga ma lesona. I le le fiafia, sa ia fai atu ia te oe i se tasi aso, “O le isi aso na ou faalogo ai i se tasi o fai mai o le talalelei o lona uiga o le ‘tala fiafia.’ E mautinoa lava e le faapena se lagona mo au. E foliga faigata le talalelei, ma e tele naua mea e faamoemoeina. E lagonaina le pei o se avega nai lo o se faamanuiaga.”

• O le a se mea e mafai ona tupu i le taimi o lauga, lesona, po o talanoaga o le talalelei e ono tuua ai se tasi o lagona e pei o Amelia?

• O a ni malamalamaaga sese e ono i ai ia Amelia e faatatau i le uiga ma le faamoemoega o le talalelei?

Faaleleia o Lo Tatou Aoao Atu ma le Aoaoina

Aoao faatasi ma tagata aoga. Ina ua uma ona oo i taunuuga matautia o le faafaitaulaga pepelo, o tagata o le Ekalesia i ona po o Alema o e sa tumau faamaoni sa “mausali ma le le mafaagaeetia” (Alema 1:25) i o latou talitonuga ma iloa ai “sa le sili atu le lelei o le sa talai atu nai lo lē sa faalogologo mai ia te ia, pe sa sili atu foi le lelei o le na aoao atu, i le na aoaoina; ma sa faapea ona latou tutusa uma” (Alema 1:26). A o e taulima tutusaina tagata aoga, o le a sili atu ona e tatalaina le aoao faatasi ma mai ia i latou. Mafaufau loloto pe o a ni lagona o au tagata aoga pe a e faaalia lou fiafia moni i o latou manatu ma lagona.

Valaaulia tagata aoga e iloilo le 3 Nifae 27:13–14, 19–21 ma vaavaai mo elemene autu o le talalelei e pei ona aoao mai e le Faaola.

Ina ia uunaia se talanoaga anoa, e mafai ona e fai atu fesili e pei o nei:

• E tusa ai ma le Faaola, o a elemene faavae ma le faamanuiaga tupito o le ola ai i Lana talalelei? (Fesoasoani i tagata aoga e faailoa mai le upumoni lenei: A o tatou faatino i le faatuatua ia Iesu Keriso, salamo, papatisoina, maua le Agaga Paia, ma tumau e oo i le iuga, e mafai ona tatou tutu ma le le pona i luma o le Atua i le aso gataaga.)

• E mafai faapefea e le tuuina o Iesu Keriso i le totonugalemu o le talalelei ona suia ai lagona o Amelia e uiga i ai? Na faapefea e le taulai atu i le Faaola ona aafia ai lou mafaufau e uiga i ai ma le ola ai i le talalelei?

• O a luitau e mafai ona tatou fetaiai pe a tatou le taulai atu ia Iesu Keriso ma elemene faavae o Lana talalelei? (Atonu e te manao e iloilo le saunoaga mai ia Brother Daniel K Judd i le vaega 2 o anomea mo sauniuniga.) O a ni mea na mafua ai lou lē taulai atu i faavae autu o le talalelei? O le a se mea na sili ona fesoasoani ia te oe e faatumauina ai le taulai atu i mataupu faavae?

Valaaulia tagata aoga e iloilo le saunoaga a Peresitene Dieter F. Uchtdorf i le vaega 2 o anomea mo sauniuniga ma tusi faamaumau mea e mafai ona latou faia e taulai atili atu ai i mataupu faavae autu ma le faaaogaina o le talalelei.

E mafai foi ona e fesili atu pe i ai ni tagata aoga o le a naunau e faasoa mai mea atonu latou te faia e taulai atu ai i mea e sili ona taua a o latou taumafai e ola i le talalelei.

Ina ia faaiu, e mafai e oe po o se tagata aoga ona molimau atu i le matagofie ma le mana o le ola ai i le talalelei e faavavau a Iesu Keriso.

Mo Le Isi Taimi

Mafaufau e auina atu le savali lenei i tagata aoga i le aluga o le vaiaso: Matamata le “Be a Minister: Become Part of Someone’s Life” (0:34), ma mafaufau i mea e mafai ona e aoaoina e uiga i le auauna atu mai anomea mo sauniuniga mo le lesona 13.