Lesona 17 Anomea a le Faiaoga

Mauaina o le Faamoemoe i le Manumalo o Iesu Keriso i le Oti

Na aoao mai Peresitene Dallin H. Oaks o le Au Peresitene Sili: “O le Toetu mai le oti o le faatumutumuga patino mautinoa lea o lo tatou faatuatuaga. E faaopoopo ai le uiga i la tatou aoaoga faavae, faaosofia i a tatou amioga, ma le faamoemoe mo lo tatou lumanai” (“O Le A Se Mea Na Faia e lo Tatou Faaola mo i Tatou?,” Liahona, Me 2021, 75). I le taimi o lenei lesona, o le a talanoaina ai e tamaiti aoga le moni o le Toetu o le Alii ma faasoa mai pe faapefea ona tuuina atu ia i latou le faamoemoe pe a feagai ma luitau e oo mai ma se tino faitino.

Fautuaga mo le Aoao Atu

E tele molimau patino i le Toetu o Iesu Keriso.

E mafai ona e amataina le vasega i le valaaulia o tagata aoga e tusi ni nai fuaiupu e uiga i le mafuaaga e tāua patino ai ia i latou le Toetu o Iesu Keriso. Ona tuu atu lea o se taimi mo nisi e faasoa mai ai i ni vaega toalaiti po o se vasega. E mafai ona e fai atu se tasi pe sili atu foi o fesili nei e iloilo ai po o a mea e ono manaomia e tamaiti aoga ona talanoaina auiliili atili i le taimi o le lesona:

• Aisea e tāua tele ai o tatou tino i lo tatou taunuuga e faavavau? (Tagai vaega 2 o anomea mo saunuiuniga.)

• O le a le mea e tupu pe afai e leai se toetu? (Tagai 1 Korinito 15:17--22 ma le 2 Nifae 9:8–9.)

• Aisea e ono tāua ai le faamalosia o lou malamalama ma le molimau i le Toetu o Iesu Keriso? (E mafai ona e toe faamanatuina le saunoaga a Peresitene Ezra Taft Benson i le vaega 2 o anomea mo sauniuniga.)

Mafaufau e faaali atu se ata o le Keriso toetu o loo faaali atu ia Maria i le tuugamau. Faitau faatasi le Ioane 20:14–18 ma fai i le vasega e vaai faalemafaufau pe faape’ī le vaai o Maria i le Alii toetu. Valaaulia tamaiti aoga e faasoa mai o latou manatu, lagona, ma uunaiga.

Faamanatu i tagata aoga o le vaega 1 o anomea mo sauniuniga sa valaaulia ai i latou e filifili se tala o le molimau vaaitino i le Keriso toetu ma tusifaamaumau o latou manatu ma lagona e uiga i lenei mea na tupu. Tuu atu i tamaiti aoga se taimi e iloilo ai a latou fuaitau pe filifili se fuaitau pe a manaomia. Ona fai atu lea ia i latou e fai ni vaega toalaiti ma valaaulia i latou e faasoa mai mea sa latou aoaoina mai tala sa latou suesueina. Ona mafai ai lea ona e fesili atu:

• E mafai faapefea e nei tala o le Toetu ona tosina ai le faatuatua o se tasi ia Iesu Keriso?

E mafai ona e faaali atu le tulaga lenei: Mafaufau pe mafai faapefea ona e tali atu i se uo na fai mai, “Ou te talitonu o Iesu Keriso o se faiaoga maoae ma se taitai faalelotu. Ou te taliaina Ana aoaoga faavae, ae ou te lē talitonu na tupu moni lava le Toetu.“

I le avea ai ma se vaega o la outou talanoaga, e mafai ona e fai atu nisi o fesili nei:

• Mata na faapefea ona tali atu le Aposetolo o Paulo i lenei faamatalaga? (Atonu e te manao e toe faamanatu le 1 Korinito 15:14, 17–22. E mafai e tagata aoga ona faailoa mai upumoni e talitutusa ma lenei: O le Toetu e tāua i le talalelei a le Alii. Ona o le Toetu o Iesu Keriso, o le a toetutu ai tagata uma.)

• Aisea ua totonugalemu ai le Toetu o Iesu Keriso i Lana tala lelei? O a upumoni e uiga ia Iesu Keriso ma Lana talalelei ua faamautuina ona ua toetu o Ia? (Atonu e te manao e toe faamanatu le saunoaga a Elder D. Todd Christofferson i le vaega 2 o le anomea mo sauniuniga.)

• O a ni mafaufauga ma ni lagona ua e maua i le iloa ona o Iesu Keriso, o tagata uma—e aofia ai ma oe—o le a toetutu? (Afai e te manao i ai, e mafai foi ona e faasoa atu ou lagona e uiga i lenei fesili.)

Ua aoao mai Paulo e mafai ona tatou olioli ona o le manumalo o Iesu Keriso i le oti.

Faaleleia o Lo Tatou Aoao Atu ma le Aoaoina

Talanoaina autu patino ma le faaeteete ma le agaalofa. A o e talanoa e uiga i autu e mafai ona afua ai lagona malolosi, ia nofouta i tulaga ma lagona o au tamaiti aoga. Aoao e uiga i olaga o au tamaiti aoga ina ia mafai ona e iloa le auala sili e taulima ai autu maaleale. I le taimi o le vasega, mata’itū foliga o tamaiti aoga ma mafaufau pe faapefea ona aafia tamaiti aoga i talanoaga faalevasega.

Faasoa atu le tala lenei e uiga ia Alisa, le afafine o Elder Paul V. Johnson o le Fitugafulu:

Toeitiiti tasi le tausaga talu ai, sa maliu ai la ma tama teine o Alisa. Sa ia tauivi ma le kanesa mo le toeitiiti lava valu tausaga, ma ni nai taotoga, ma le tele o togafitiga, vavega faafiafiaina, ma le loloto o le lē fiafia. Sa matou vaaia le faaletonu o lona tulaga faaletino a o ia oo mai i le taimi mulimuli o lona olaga faaletino. Sa matuā tiga le vaaia o lena mea ua tupu i lo ma afafine faapelepele—la ma pepe laitiiti tiotio o lē sa tuputupu ae e avea ma se tinā, se toalua, se tamaitai aulelei ma talenia. Sa ou faapea o le a ta’e lo’u fatu. (“Ma o le a Leai Se Toe Oti,” Liahona, Me 2016, 121)

• O anafea na e mauaina ai, pe na maua ai e se tagata e te iloa se tasi o nei lagona? Afai o lea, o a ia tulaga?

Valaaulia tagata aoga e toe faamanatu le sunoaga a Elder Johnson i le vaega 3 o anomea mo sauniuniga ma le 1 Korinito 15:52–55. E mafai ona e fautua atu latou te vaavaai mo aoaoga e mafai ona aumaia ai le mafanafana ma le faamoemoe. Ona mafai ai lea ona e fesili atu:

• E mafai faapefea e le aoaoga faavae o le Toetu ona aumaia le mafanafana ma le faamoemoe i tagata o loo tauivi ma faama’i faataumaoi, manuaga e suia ai le olaga, o lē atoatoa i le fanau mai, po o le maliu o se e pele? (E mafai ona faailoa mai e tagata aoga se upumoni e talitutusa ma lenei: O le a tatou toetutu mai ma ni tino atoatoa ma ni tino ola pea.)

• O anafea na fesoasoani ai ia te oe po o se tasi e te iloa le malamalama i le moni o le Toetu?

Mafaufau e faasoa atili atu e uiga i le aafiaga o Alisa:

Sa suesueina e Alisa le aofaiga o tagata sa faasaoina mai le ituaiga o kanesa sa ia te ia, ma o fuainumera sa lē faafiafiaina. Sa ia tusia: “Ae o loo i ai se fofo, o lea ou te lē fefe ai. Ua uma ona faamalolo e Iesu lo’u kanesa ma lou kanesa. O le a ou manuia. Ou te fiafia ua ou iloa lenei mea.”

E mafai ona tatou suia le upu kanesa i soo se isi gasegase faaletino, faalemafaufau pe faalelagona e ono feagai ma i tatou. Ona o le Toetu, ua uma foi ona faamaloloina na gasegase. (“Ma o le a Leai Se Toe Oti,” Liahona, Me 2016, 122)

• O le a se mea e mafai ona tatou aoao mai aafiaga o Alisa ma Elder Johnson?

Mafaufau e usu le viiga “Ua Toetu Mai o Ia!” ( Viiga, nu. 111) pe matamata le vitiō “He Lives—Celebrate Easter Because Jesus Christ Lives” (2:26).

Ona faaali atu lea o fesili nei, po o nisi e te lagona atonu e sili atu ona talafeagai mo au tamaiti aoga, ma valaaulia tagata aoga e mafaufau loloto ma tusifaamaumau o latou manatu, lagona, ma uunaiga.

• Na faapefea e le Toetu o le Faaola ona aumaia ia te oe le filemu ma le faamoemoe a o e feagai ma luitau o le olaga faaletino, pe na faapefea foi?

• E mafai faapefea ona e faaaogaina mea ua e aoaoina e uiga i le Toetu e faamalosia ai lau molimau po o le molimau a se isi tagata?

A ua lava se taimi mo le tusitusia ma le manatumantu, faamalosiau i ni nai tamaiti aoga e faasoa mai mea na latou tusia.

Mo Le Isi Taimi

Ina ia uunaia sauniuniga mo le vasega e sosoo ai, e mafai ona e auina atu le sāvali lenei i tamaiti aoga: A o e suesue i anomea mo sauniuniga mo le lesona 18, mafaufau e uiga i le matafaioi a le alofa tunoa i lou olaga.