Lesona 11 Anomea a le Faiaoga

Olioli i Faamanuiaga o le Ekalesia a le Alii

I le taimi o Lana galuega i le olaga nei ma i aso e gata ai, sa valaauina ai e Iesu Keriso ia Aposetolo ma faatulagaina Lana Ekalesia. I lenei lesona, o le a maua ai e tagata aoga le avanoa e mafaufau ai i faamanuiaga o loo avanoa mo i latou e ala i le Ekalesia a le Alii. O le a latou mafaufau foi i mea e mafai ona latou faia e faaleleia atili ai o latou lava aafiaga ma aafiaga o isi i le Ekalesia.

Fautuaga mo le Aoao Atu

E mafai ona tatou maua le faamoemoe i le Ekalesia a le Alii.

Faaleleia o Lo Tatou Aoao Atu ma le Aoaoina

Ia faaaloalo i isi tapuaiga. A o outou talanoaina faamanuiaga tulaga ese O Le Ekalesia a Iesu Keriso o le Au Paia o Aso e Gata Ai, ia mautinoa o la outou talanoaga e faaaloalogia ai isi faatuatuaga. Atonu e taua le faamamafa atu o saofaga taua ma lelei ua faia e isi tapuaiga i le talafaasolopito atoa ma faaauau pea ona faia i o tatou aso.

E mafai ona e amataina le vasega i le faasoa atu o le ata faataitai lenei:

E lei leva ona le toe auai Isapela i le lotu. Ua ia talitonu e mafai ona faaleagaga o ia e aunoa ma le auai i le lotu. Ina ua uma ona ia ta’u atu ia te oe e uiga i ni taimi faaleagaga na ia maua na o ia, sa ia fesili atu ia oe pe aisea e te manatu ai e taua le auai i le lotu.

• O le a le taatele o lenei vaaiga i talavou matutua e te iloa?

• E faapefea ona e tali atu i le fesili a Isapela?

A uma ona faasoa mai tagata aoga, e mafai ona e tusia le ulutala lenei i luga o le laupapa: Faamanuiaga o le Auai i le Ekalesia a le Alii. Ona valaaulia lea o tagata aoga e lisi o latou manatu i lalo o lenei ulutala.

Atonu e lisi mai e tagata aoga nisi o faamanuiaga nei: mauaina ma le faaaogaina o le pule ma ki o le perisitua, mauaina o sauniga ma le osia o feagaiga, aoaoina o aoaoga faavae mama ma manino, mauaina o le fesoasoani e salamo ai, mauaina o avanoa e faapotopoto ai Isaraelu, fesoasoani i e matitiva ma taulimaina manaoga agaalofa, auai i galuega faalemalumalu mo e ua maliliu, maua avanoa e auauna atu ai ma fegalegaleai ma isi, ma le faamalosia o aiga.

• O le fea o nei faamanuiaga e te manatu e tulaga ese i le Ekalesia a le Alii?

A o e faia lenei talanoaga, mafaufau po o fea o gaoioiga ma fesili nei o le a fesoasoani e faamamafa ai faamanuiaga tulaga ese o le Ekalesia. (Atonu e le lava sou taimi e talanoaina ai autu uma nei. E mafai foi ona e filifili e faaloloto vaega eseese o le talanoaga.)

Pule ma Ki o le Perisitua

E mafai ona e fai atu i tagata aoga e faatino le ata faataitai lenei i ni paga:

Fai mai lau uo, o le o loo faaalia le fiafia i le Ekalesia, “Ou te malamalama o loo taitaia la outou ekalesia e Aposetolo. E faapefea ona ese i latou mai taitai i isi ekalesia?”

E mafai ona faitau faatasi e tagata aoga le Efeso 2:19–20; Mataio 10:1, 7–8; 16:19; Galuega 1:21–22; ma le Mataupu Faavae ma Feagaiga 107:23 e amata ai lenei gaoioiga. (Atonu e te manao e iloilo le malamalama o tagata aoga i ki o le perisitua ma faaopoopo atu i lo latou malamalama pe a manaomia. Tagai i le saunoaga a Peresitene Russell M. Nelson “O Ki o le Perisitua” [Liahona, Oke. 2005, 40–44], o loo ta’ua foi i le vaega “E te Fia Aoao Atili?” o anomea mo sauniuniga.)

• O a faamanuiaga e na o le mana ma le pule o le perisitua paia e mafai ona oo mai ai? (Mafaufau e iloilo faamatalaga mai ia Peresitene Dallin H. Oaks ma Elder Robert D. Hales i le vaega 1 o anomea mo sauniuniga.) O le a se taimi na e mauaina ai nei faamanuiaga?

O Sauniga ma Feagaiga o le Perisitua

• O a ni ou lagona e uiga i le mauaina o sauniga paia ma le osia o feagaiga paia ma le Atua? (E mafai ona e valaaulia tagata aoga e mafaufau loloto i faamanuiaga o loo faatalitali mai mo i latou a o latou faaauau pea ona agai i luma i le ala o feagaiga.)

Malamalama e uiga i le Aoaoga Faavae a le Alii

• O faapefea ona puipuia i tatou mai “matagi uma lava o mataupu” (Efeso 4:14) a o tatou auai i le Ekalesia? (Iloilo faatasi le Efeso 4:11–14 .) Na faapefea ona fesoasoani le konafesi aoao ia te oe e aoao ma malamalama ai i aoaoga faavae a Keriso?

Galuega o le Malumalu

• Ua faapefea ona faamanuiaina patino oe e galuega o malumalu ma talafaasolopito o aiga?

Faapotopotoina o Isaraelu

• O a ni auala na fesoasoani ai le Ekalesia a le Alii ia te oe e faapotopoto Isaraelu i itu uma o le veli? O faapefea ona faamanuiaina lou olaga e nei faatinoga?

Fai atu i tagata aoga e filifili se tasi o faamanuiaga o loo lisiina i luga o le laupapa latou te mananao e olioli atoatoa atili ai i o latou olaga. Tuu atu i tagata aoga se taimi e fai ai se fuafuaga, e aofia ai le lisiina o laasaga e mafai ona latou faia e maua ai le faamanuiaga sa latou faailoa mai.

E mafai ona tatou faia a tatou uarota ma paranesi o ni nofoaga faafeiloai.

E mafai ona e fesili atu i tagata aoga po o le a se mea latou te faia pe a fai atu e auauna atu i se tasi i la latou uarota po o le paranesi o e ese o latou manatu pe atonu foi e faigata ona galulue faatasi.

• O faapefea ona e tuputupu ae i lou avea ai ma soo a o e auauna atu ma galulue faatasi ma isi tagata o le Ekalesia? ( Tagai i le saunoaga a Elder D. Todd Christofferson i le vaega 2 o le anomea mo sauniuniga.)

Mafaufau e iloilo faatasi le Moronae 6:4–5 ma fesili atu i tagata aoga pe na latou maua ni aafiaga i le lotu lea na latou lagonaina ai le manatuaina, tausia, pe faamalosia e se tasi. Atonu foi latou te mafaufau i taimi na latou lagonaina ai le tuuatoatasi i le lotu.

• Aisea e te manatu ai e ono lagona e nisi tagata le le talia leleia i le lotu? O le a se mea e mafai ona tatou faia e fesoasoani ai i isi ia lagonaina le alofagia ma le faaaofiaina i le lotu? (Atonu e te manao e iloilo le faataitaiga na faasoa mai e Sister Carole M. Stephens i le vaega 3 o anomea mo sauniuniga. E mafai foi ona outou matamata faatasi le vitio “Inviting Others to ‘Come and Stay’” [1:39].)

Faamanatu i tagata aoga o le sauniuniga mo le vasega sa valaaulia ai i latou e mafaufau i se tasi e mafai ona faamanuiaina e ala i lo latou faaaumeaina. Tuu atu i tagata aoga sina taimi e mafaufau loloto ai i mea e mafai ona latou faia e fesoasoani ai i lenei tagata ia lagona le alofagia ma le taliaina i le lotu.

Mo Le Isi Taimi

Ina ia musuia tagata aoga e sauni mo le isi vasega e sosoo ai, mafaufau e auina atu le savali lenei i le aluga o le vaiaso: Faamata e faape’i le nofo i vae o le Faaola ma faalogo ia te Ia o aoao atu? A o e faitau i anomea mo sauniuniga mo le lesona 12, mafaufau i le faatosinaga o aoaoga a Keriso i lou olaga.