Lesona 10 Anomea mo le Sauniuniga o le Vasega

O le Mulimuli i le Faataitaiga a Iesu Keriso o le Gauai Atu

E mafai ona e mafuafau i ni tagata i lou olaga o e “usiusitai, agamalu, lotomaualalo, onosai, ma tumu i le alofa, loto ina usitai i mea uma ua silafia e le Alii e tatau ona faaoo mai i ona luga, e pei ona usitai atu se tamaitiiti i lona tama”? (Mosaea 3:19). O nei uiga faaKeriso e mafai ona maua e soo se tasi o i tatou o e sailia. O le Faaola o le faataitaiga atoatoa o le gauai atu i le finagalo o le Tama Faalelagi. A o e suesue, mafaufau i le taua o le saunoaga lenei a Peresitene Ezra Taft Benson: “O alii ma tamaitai e liliu atu o latou olaga i le Atua o le a iloaina e mafai ona Ia faia le anoanoai o mea i o latou olaga nai lo mea latou te mafaia” (“Jesus Christ—Gifts and Expectations,” Ensign, Tes. 1988, 4).

Vaega 1

E mafai faapefea e le lotomaualalo ma le agamalu ona faamanaina a’u?

O nisi tagata e manatu o le lotomaualalo o se faailoga o le vaivai. Atonu latou te manatu o tagata lotomaualalo e fefefe ma matamuli. Ae peitai, o nei upu e le o faamatalaina ai Iesu Keriso, o lē o se faataitaiga atoatoa o le lotomaualalo ma le agamalu.

Mafaufau i nisi o faataitaiga o le malosi, lototele, ma le lototoa o le Faaola: Sa Ia tautino atu ma le mautinoa Lona faasinomaga moni, e tusa lava pe na lamatia ai Lona soifua (tagai Ioane 8:54–59); Sa ia faamamaina ma le lototoa le malumalu ina ua faaleagaina (tagai Mataio 21:12–13; Ioane 2:14–17); Sa Ia puipuia ma le lototoa e na faasauaina (tagai Ioane 8:1–11; Mareko 2:14–17); ma sa le fefe o Ia i le feagai ai ma tuuaiga ma faitioga (tagai Mataio 16:1–12; Luka 20:19–26).

E mafai faapefea e le lotomaualalo ona taitai atu i le mana ma le malosi sili atu faaletagata lava ia? Tatou te aoao “o le iloa ma le agaga faafetai lou faalagolago atu i le Alii—o le malamalama lea o loo i ai ia i tatou le manaomia faifai pea o Lana fesoasoani. …

“… I Lana galuega talai i le lalolagi, na Ia [Iesu Keriso] faailoa e le aunoa o Lona malosi na maua ona o Lona faalagolago i Lona Tama. Na Ia fetalai: “Ou te le mafai ona faia o se mea e tasi na o au. … Ou te le usiusitai i lo’u lava loto, a o le finagalo o le Tama, o le na auina mai a’u” (Ioane 5:30)” (Autu o le Talalelei, “Lotomaualalo,” topics.ChurchofJesusChrist.org).

O le gauai atu ma le lotomaualalo o le Faaola i le finagalo o Lona Tama e fesootai foi i Lona agamalu (tagai Mataio 11:29). Na aoao mai Elder David A. Bednar o le Korama a Aposetolo e Toasefululua:

O le agamalu o se uiga manino lea o le Togiola ma e iloagofie i le tali atu ma le amiotonu, gauai atu ma le loto i ai, ma le malosi o le amio pulea. …

O le Togiola Sili, o le na “afio ifo o ia i lalo o mea uma” [Mataupu Faavae ma Feagaiga 88:6] ma puapuagatia, ma maligitoto, ma maliu “ia faamama mai ia i tatou i amioletonu uma lava” [1 Ioane 1:9], ma mulumulu i vae pefupefua o Ona soo. [Ioane 13:4–5]. O lea agamalu o se uiga tulaga ese lea o le Alii i le avea ai o se auauna ma taitai.

Ua saunia e Iesu le faataitaiga silisili o le tali atu ma le amiotonu ma le gauai atu ma le loto i ai a o Ia puapuagatia ai i tiga matuitui i Ketesemane.

“Ua oo atu o ia i lea mea, ona fetalai atu lea o ia [i Ona soo], Ia outou tatalo nei oo mai le faaosoosoga ia te outou.

“Ona … tootuli ai lea o ia, ua tatalo,

“Ua faapea atu, Lo’u Tama e, a e finagalo i ai, ia e ave ese lenei ipu ia te au; a e aua le faia lo’u loto, a o lou finagalo.” [Luka 22:40-42].

O le agamalu o le Faaola i lenei aafiaga taua e faavavau ma tiga matuitui ua faaalia ai mo i tatou taitoatasi le taua o le faamuamuaina o le poto o le Atua i luga atu o lo tatou lava poto. (“Agamalu ma Maualalo i le Loto,” Liahona, Me 2018, 32–33)

Mafaufau Loloto e Sauniuni ai mo le Vasega

Na faapefea ona faamanuiaina lou olaga ona o le agamalu o Iesu Keriso na “tuu atu ai i le finagalo o le Tama i mea uma mai le amataga”? (3 Nifae 11:11). E mafai faapefea ona e gauai atili atu i le finagalo o le Atua?

Vaega 2

E mafai faapefea e le osia ma le tausia o feagaiga ona fesoasoani ia te au e faia le finagalo o le Atua?

A o e tomanatu i lou lava olaga, atonu e te mafaufau pe faapefea ona e lotomaualalo ma agamalu e pei o le Faaola. O le mea e faafetai ai, na faaali mai e Iesu Keriso ia i tatou le ala e gauai atu ai o tatou loto i le Atua.

I le amataga o Lana galuega, sa maliu atu ai Iesu ia Ioane le Papatiso ina ia maua le sauniga o le papatisoga. I le taimi muamua na musu Ioane ma faapea atu, “E ao ona e papatisoina mai o a’u, a ē maliu mai ea oe ia te a’u?” Sa ta’u atu e Iesu ia Ioane ua tatau ai ina ia mafai ona latou “faataunuuina o mea tonu uma” (tagai Mataio 3:13–17). Mafaufau e matamata i le “O Le Papatisoga o Iesu” (2:54) e faalautele ai lau suesuega o lenei tala.

Suesue e Sauniuni ai mo le Vasega

Faitau le 2 Nifae 31:6–7, 11–13 e aoao ai i le mea na fai mai ai Nifae e uiga i le faataitaiga a le Faaola o le lotomaualalo. Vaavaai mo laasaga aoga e mafai ona e faia e gauai atu ai ma le lotomaualalo i le finagalo o le Atua.

O le gauai atu i le sauniga o le papatisoga e tuu ai i tatou i luga o le ala o feagaiga. A tatou savavali i lenei ala, tatou te taumafai e tausi poloaiga ma gauai atu ai i le finagalo o le Atua. Na saunoa Peresitene Russell M. Nelson i lenei mea e uiga i le ala o feagaiga:

O lo outou tuuto e mulimuli i le Faaola e ala i le osia o feagaiga ma Ia ona tausia lea o na feagaiga, o le a matala ai le faitotoa i faamanuiaga uma faaleagaga ma avanoa e maua e alii, tamaitai, ma fanau i soo se mea. (“Ao Tatou Agai Faatasi Atu i Luma,” Liahona, Ape. 2018, 7)

Mafaufau Loloto e Sauniuni ai mo le Vasega

Na faapefea ona faamanuiaina lou olaga, pe e mafai faapefea ona faamanuiaina, e ala i le gauai atu i le finagalo o le Alii e ala i le osia ma le tausia o feagaiga o le talalelei?

Vaega 3

O le a se mea e mafai ona ou faia ia faamuamua ai le Atua i lo’u olaga?

I tusitusiga paia, ma i aso nei, o le nuu o le feagaiga a le Alii e tele ina ta’ua o le aiga o Isaraelu. Na aoao mai Peresitene Nelson:

O se tasi o uiga FaaEperu o le upu Isaraelu o le “ia faamuamua le Atua.” O lea o le igoa moni o Isaraelu e faasino i se tagata o loo loto e faamuamua le Atua i lona olaga. O lena manatu faavae ua gaepuina lo’u agaga!

O le upu loto e taua i lenei faauigaga o Isaraelu. E tofu i tatou uma ma lo tatou faitalia. … E mafai ona tatou filifili e faamuamua le Atua i o tatou olaga, pe leai. E mafai ona tatou filifili e avea le Atua ma faatosinaga sili ona mamana i o tatou olaga, pe leai. …

O e loto e avea le Atua ma faatosinaga sili ona taua i lou olaga? Pe o le a e faatagaina Ana afioga, Ana poloaiga, ma Ana feagaiga e faatosinaina mea e te faia i aso taitasi? Pe o le a e faatagaina Lona siufofoga ia faamuamua i lo se isi lava leo? O e loto e faataga soo se mea o finagalo o Ia e te faia ia faamuamua i lo isi faamoemoega uma? O e loto e tofatumoanaina lou loto i Lona finagalo? (“Ia Faamuamua le Atua” Liahona, Nov. 2020, 92, 94)

Mai tusitusiga paia ma olaga o soo o aso nei e mafai ona tatou aoao ai e uiga i avanoa, luitau, ma faamanuiaga e oo mai pe a tatou filifili e faamuamua le Atua i o tatou olaga.

Suesue e Sauniuni ai mo le Vasega

Suesue se tasi pe sili atu foi o faataitaiga nei o tagata taitoatasi o e na faamuamua le Atua, ma mafaufau loloto i fesili o loo mulimuli mai:

• Ua saili e Naamanu le lepela le fesoasoani mai le perofeta o Elisaia: 2 Tupu 5:9–14.

• Na i ai se agelu asiasi mai ia Maria o le na tautino mai o Maria o le tina o Iesu: Luka 1:26–38.

• Ua filifilia Enoka e le Alii e valaau atu i tagata ia salamo: Mose 6:31–34, 37–39.

• Ua tatalo se tamā talavou mo lona afafine ma’i: “Accepting the Will of God” (2:23).

• Ua aoaoina e Elder Hugh B. Brown le taua o le gauai atu i le finagalo o le Atua: “The Will of God [O Le Finagalo o le Atua]” (3:01).

• • O a luitau na oo faatasi mai ma le valaaulia mo le tagata e gauai atu i le finagalo o le Atua?

  • O le a le mea na fai e le tagata e faamuamua ai le Atua?

  • Na faapefea ona faamanuiaina le tagata i le gauai atu i le finagalo o le Atua?

A o e mafaufau i au taumafaiga e faamuamua le Atua i lou olaga, mafaufau i le molimau lenei a Peresitene Bonnie L. Oscarson, o le sa avea muamua ma Peresitene Aoao o Tamaitai Talavou:

Ou te molimau atu o loo i ai faamanuiaga maoae o loo teuina pe a tatou naunau foi e fai atu i le Tama, “Ae ui i lea, ia faia lou finagalo” [tagai Mataupu Faavae ma Feagaiga 109:44] ma faaogatusa o tatou loto ma le finagalo o le Alii. … O le tofotofoga lea o le olaga. A oo ina tatou lelei atili i le faia o lena mea, o le a tatou maua le fiafia sili atu, faateleina le tomai e maua ai faaaliga faaletagata lava ia, gafatia sili atu e auauna atu ai ia i latou o siomia i tatou, fesoasoani atili i le taulimaina o tofotofoga, ma se uiga e sili atu ona faapei o Keriso. (“Leaders Address Importance of Conversion at BYU Women’s Conference,” Me 9, 2017, ChurchofJesusChrist.org)

Tusi faamaumau Ou Manatu

O le a se mea e te lagona e tatau ona e amata faia pe tuu le faia ina ia atili faamuamua ai le Atua i lou olaga? E faapefea ona e valaaulia le fesoasoani a le Alii a o e gauai atoatoa atu i Lona finagalo?

E Te Fia Aoao Atili? (Tuu i le faitalia)

O fea e mafai ona ou faitau atili ai e uiga i le faataitaiga a Iesu Keriso o le gauai atu?

I le taimi o Lana auaunaga i sa Nifae ma sa Lamana, sa masani ona talanoa Iesu Keriso e uiga i le gauai atu i le finagalo o Lona Tama (tagai i le 3 Nifae 11:10–11, 27; 15:14–18; 18:27).

I le Ioane 17:11, 20–23 ua tatou aoao ai na ausia e Iesu Keriso le lotogatasi atoatoa ma le Tama e ala i le gauai atu ia te Ia.

I le vitio “Being One with God and Christ” (1:23), o loo talanoa mai ai Elder D. Todd Christofferson o le Korama a Aposetolo e Toasefululua e uiga i le Ioane 17:11, 20–23 ma mea e mafai ona tatou faia ina ia tasi ai ma le Tama ma le Alo.

E mafai faapefea e le gauai atu i le finagalo ma le taimi a le Atua ona faamanuiaina ai lo’u olaga?

I le lauga “Taliaina o le Finagalo ma le Taimi a le Alii” (Liahona, Aok. 2016, 28–35), sa faasoa mai ai Elder Bednar i le taua o le sailia o le finagalo ma le taimi a le Alii i o tatou olaga.