Lesona 21 Anomea mo le Sauniuniga o le Vasega: Faalogoina o le Siufofoga o le Alii i Aso e Gata Ai
“Lesona 21 Anomea mo le Sauniuniga o le Vasega: Faalogoina o le Siufofoga o le Alii i Aso e Gata Ai,” O Iesu Keriso ma Lana Talalelei e Faavavau Anomea a le Faiaoga (2023)
“Lesona 21 Anomea mo le Sauniuniga o le Vasega,” O Iesu Keriso ma Lana Talalelei e Faavavau Anomea a le Faiaoga
Ata
tagata talavou fiafia
Lesona 21 Anomea mo Sauniuniga o le Vasega
Faalogoina o le Siufofoga o le Alii i Aso e Gata Ai
E toatele tagata ua taumanatunatu pe o faaauau pea ona fetalai mai le Atua ia i tatou. O nisi taimi atonu e te mafaufau pe o le a fetalai mai o Ia ia te oe. Faatasi ai ma lo tatou malamalama i le Toefuataiga, e mafai ai ona tatou alalaga i se “Ioe!” O loo faaauau pea ona taialaina i tatou e le Alii a o tatou aoao e faalogo ia te Ia. A o e suesue i lenei lesona, vaavaai pe na faapefea e Iosefa Samita ma isi i o tatou aso ona aoao ia iloa le siufofoga o le Faaola. Faaalu sina taimi e faateleina ai lou gafatia e faalogo ia te Ia i lou lava olaga.
Vaega 1
E mafai faapefea e le molimau a le Perofeta o Iosefa Samita ona fesoasoani ia te au e faalogo atili ai ma iloa Iesu Keriso?
I lona talavou, sa popole tele ai Iosefa Samita i le tulaga manuia o lona agaga ma po o le fea foi lotu e tatau ona auai. O le “fenumiai ma le fetaua’i i totonu o lotu eseese” i lona nuu na tuua ai o ia ma le lē mautonu “po o ai e sa’o ma o ai foi ua sese” (tagai Iosefa Samita—Talafaasolopito 1:8–10).
I le musuia ai e le fautuaga i le Tusi Paia e “ole atu i le Atua” (Iakopo 1:5), sa alu atu ai Iosefa i se togavao e tatalo ai. I le tali atu i ai, sa ia maua ai se faaaliga mamalu. Na faapea mai Iosefa, “Na ou vaaia ai se malamalama faaniutu i luga ae tonu o lo’u ulu, ua sili atu le pupula nai lo le la, ua alu ifo malie lava seia oo mai i o’u luga. … “Sa ou vaaia ni Tagata e toalua, o lo la’ua pupula ma le mamalu e lē mafaamatalaina, o tutu mai i o’u luga ae i le ea. Sa fetalai mai le tasi o i la’ua ia te aʼu, ma fofoga mai ia te aʼu i loʼu igoa ma fetalai mai, aʼo tusi ane i le tasi—O Loʼu Atalii Pele lenei. Faalogo ia te Ia!” (Iosefa Samita—Talafaasolopito 1:16–17).
Na saunoa Peresitene Gordon B. Hinckley i le molimau a Iosefa Samita i le Faaola:
Ata
Peresitene Gordon B. Hinckley
O ia o le auauna a le Alii i aso e gata ai o lē sa filifilia e tuuina atu se molimau fou i le Keriso toetu.
I se lalolagi ua pagatia i le masalosalo i le moni o le Toetu, na molimau manino atu ai Iosefa Samita i le Keriso toetu. O Le Perofeta o Iosefa Samita sa o se molimau silisili o le Keriso soifua. (“O Le Mea Ua Faia e le Atua e ala i Lana Auauna o Iosefa!,” Liahona, Fep. 1997, 2)
Ata
aikona, mafaufau loloto
Mafaufau Loloto e Sauniuni ai mo le Vasega
O le a sou manatu i le mea ua avea ai Iosefa Samita o “se molimau silisili o le Keriso soifua”? (Silisili o lona uiga e sili atu nai lo isi uma.) Na faapefea ona uunaia e le molimau a Iosefa e uiga i le Faaola lau molimau? Afai e te lagona le lē mautonu e uiga i lau molimau ia Iesu Keriso, e mafai faapefea e se suesuega ma le agaga tatalo o faaaliga a Iosefa Samita ona fesoasoani e faamalosia ai lou faatuatua? (tagai D. Todd Christofferson, “3 Ways Joseph Smith Reveals Jesus Christ to Us,” New Era, Mar. 2020, 2–5).
Vaega 2
E mafai faapefea ona ou faaleleia lo’u gafatia e faalogo ai i le siufofoga o le Alii?
Manatua upu muamua a le Tama Faalelagi ia Iosefa, “O Lo’u Atalii Pele Lenei. Faalogo ia te Ia!” (Iosefa Samita—Talafaasolopito 1:17). Na saunoa mai Peresitene Russell M. Nelson, “I na upu —‘Faalogo ia te Ia’—Ua tuuina mai e le Atua ia i tatou le mamanu mo le manuia, fiafia, ma le olioli i lenei olaga” (“Faalogo ia te Ia,” Liahona, Me 2020, 89).
E lē faigofie i taimi uma ona iloa le taimi e fetalai mai ai le Alii ia i tatou. O Iosefa Samita ma isi uluai taitai o le Ekalesia sa tatau ona aoao pe faapefea ona iloa Lona siufofoga. Ae o le alofa, na aoaoina ai i latou e le Faaola—ma o le a aoaoina i tatou—a o tatou saili e faalogo ia te Ia.
A o nofo (mautotogi i se potu) i le fale o Iosefa Samita Matua, sa aoao ai Oliva Kaotui e uiga i le galuega a le Perofeta. Sa tatalo Oliva e uiga i le mataupu ma sa faatumulia i le filemu e uiga i mea sa ia faalogo i ai.
E tusa lava pe na ia filifili e malaga i le 300 maila (pe tusa o le 480 km) e fesoasoani i le Perofeta, sa lei faamatalaina lava e Oliva se tasi e uiga i lona aafiaga a o tatalo. Ina ua mavae ni nai aso o avea ma tusiupu a Iosefa mo le faaliliuga o le Tusi a Mamona, sa i ai pea ni fesili a Oliva. E pei o le toatele o i tatou, atonu na ia taumanatunatu pe o ona mafaufauga ma lagona e mai le Atua pe o ia lava ia. Na maua e Iosefa se faaaliga mo Oliva lea na aoaoina ai o ia i se upumoni matagofie e uiga i le faalogo i le siufofoga o le Alii.
E pei o Oliva, e mafai ona e nofouta atili i le siufofoga o le Alii i lou olaga. Ae o fea tatou te o i ai e lagona ai o Ia? Na faamatalaina e Peresitene Nelson nisi o punaoa e mafai ona tatou faalogo ai i le siufofoga o le Alii:
Ata
Peresitene Russell M. Nelson
E mafai ona tatou ō i tusitusiga paia. … A o tatou taumamafa ai i afioga a Keriso i aso taitasi, o le a ta’u mai e afioga o Keriso ia i tatou le auala e tali atu ai i faigata tatou te le’i mafaufauina o le a tatou fetaia’i.
E mafai foi ona tatou faalogo ia te Ia i totonu o le malumalu. … O iina tatou te aoao ai i le auala e vavae ai le veli ma talanoa ma le manino atili ma le lagi. …
E sili atu foi le manino o le tatou faalogo ia te Ia a o tatou faaleleia lo tatou tomai e iloa ai musumusuga a le Agaga Paia. …
… Tatou te faalogo ia te Ia a o tatou usitai i upu a perofeta, tagatavaai, ma talifaaaliga. E molimau mai Aposetolo faauuina a Iesu Keriso i taimi uma e uiga ia te Ia. (“Faalogo ia te Ia,” Liahona, Me 2020, 89, 90)
E ui lava e mafai ona tatou faitau i afioga a le Faaola ma faalogo i Ana perofeta, o Lona siufofoga e lē masani ona tatou iloaina i o tatou sane faaletino. Sa ta’u atu e le Alii ia Iosefa ma Oliva, “O le a Ou ta’u atu ia te oe i lou mafaufau ma lou loto, e ala i le Agaga Paia. … O lenei, faauta, o le agaga lenei o faaaliga” (Mataupu Faavae ma Feagaiga 8:2–3). O le Agaga o le ki lea i le tauaveina o le siufofoga o le Alii i o tatou mafaufau ma loto. Mafaufau i mea e mafai ona e faia e valaaulia ai le Alii e fetalai mai ia te oe ma mea e mafai ona e faia e faalogo ai i Lona siufofoga.
Ua ofoina mai e Sister Michelle D. Craig, o se fesoasoani i le Au Peresitene Aoao o Tamaitai Talavou, nisi o fautuaga e mafai ona fesoasoani ia te oe e faateleina ai lou gafatia e faalogo ai i le Alii:
Ata
Sister Michelle D. Craig
Ia Naunau ma le Loto e Fatuina se Taimi ma se Avanoa e Faalogo ai i le Siufofoga o le Atua
A o e faaaogaina lou faitalia e faaavanoa ai se taimi i aso uma e faalatalata atu ai i le siufofoga o le Atua, aemaise lava i le Tusi a Mamona, i le āluga o taimi o le a manino atili Lona siufofoga ma e masani atili i ai.
E manao Satani e vavae ese i tatou mai le siufofoga o le Atua i le taofia o i tatou mai na nofoaga filemu. …
Faatino e aunoa ma le Faatuai
A e mauaina ni uunaiga ona e faatino lea ma le faamoemoe, e mafai ona faaaoga oe e le Alii. O le tele o lou faatino, o le tele foi lena o [lou] masani i le siufofoga o le Agaga. …
Ia Maua Lau Feau mai le Alii
O le tatalo e foliga mai e naunau le Tama Faalelagi e tali o la tatou aioiga ina ia taitai atu i se tasi e manaomia la tatou fesoasoani. …
Talitonu ma Faalagolago
… I le avea ai ma Sona soo faamaoni, e mafai ona e maua musumusuga ma faaaliga faaletagata lava ia, e ogatusa ma Ana poloaiga, e faapitoa lava ia te oe. (“Gafatia Faaleagaga,” Liahona, Nov. 2019, 21)
A o e mafaufau loloto i le fautuaga mai ia Peresitene Nelson ma Sister Craig, mafaufau e uiga i le auala e tele ina fetalai mai ai le Alii ia te oe. Tusifaamaumau se aafiaga na e maua i le faalogo i le siufofoga o le Alii. E mafai foi ona e faalogo i nisi o faataitaiga o le auala e “Faalogo [ai taitai o le Ekalesia] ia te Ia!” (ChurchofJesusChrist.org).