“Lesona 28 Anomea mo le Sauniuniga o le Vasega: Tutū o Ni Molimau a Iesu Keriso,” O Iesu Keriso ma Lana Talalelei e Faavavau Anomea a le Faiaoga (2023)
“Lesona 28 Anomea mo le Sauniuniga o le Vasega,” O Iesu Keriso ma Lana Talalelei e Faavavau Anomea a le Faiaoga
Lesona 28 Anomea mo le Sauniuniga o le Vasega
Tutū Atu o ni Molimau a Iesu Keriso
Na faapefea ona uunaia lau molimau ia Iesu Keriso e ala i le auai i lenei kosi? O le a se mea ua e aoaoina mai le Agaga Paia a o e galue i le faatuatua e ala i le suesue i anomea mo sauniuniga, auai i talanoaga i le vasega, ma tali atu i uunaiga faaleagaga? A o e sauni mo lau vasega mulimuli, mafaufau loloto i le uiga o le tu atu o se molimau a Iesu Keriso (tagai Mosaea 18:9).
Vaega 1
E faapefea ona ou faamalosia la’u molimau ia Iesu Keriso?
A o e mafaufau e uiga i lau molimau ia Iesu Keriso, ia manatua e tofu maua e i tatou taitoatasi se molimau i se auala patino. Na aoao mai Peresitene Dieter F. Uchtdorf, a’o avea ma Fesoasoani Lua i le Au Peresitene Sili:
O loo i ai nisi tagata o le Ekalesia o a latou molimau e mautinoa ma e matuā malolosi lava. O isi o loo tauivi lava ia iloa mo i latou lava. O le Ekalesia o se aiga lea mo tagata uma e o mai faatasi ai, e lē afaina po o le a le lautele po o le maualuga o i ai a tatou molimau. (“Mauaina o se Molimau o le Malamalama ma le Upumoni,” Liahona, Nov. 2014, 22)
Afai e te lagona le lē mautonu e uiga i lau molimau i le Faaola pe lagona foi e lē o malosi tele, ia manatua “e faatupuina le molimau e ala i aafiaga. E leai se tasi e mauaina se molimau atoa i le taimi e tasi” (Autu o le Talalelei, “Testimony,” topics.ChurchofJesusChrist.org).
Mafaufau i le aafiaga o Alema le Itiiti. A o avea ma se alii talavou sa ia saili e faaumatia le Ekalesia a le Alii. Ina ua uma ona faaali atu se agelu ia te ia, sa ia salamo ma filifili e mulimuli ia Iesu Keriso (tagai Mosaea 27:8–24). E ui o lenei faaaliga na mautinoa lava le faatosinaina o Alema, ae e lē o le punavai autu lea o lana molimau. Mulimuli ane i lona olaga, a o aoao atu tagata i le nuu o Saraemila, sa faasoa atu e Alema le ala na ia maua ai lana molimau ia Iesu Keriso.
Suesue e Sauniuni ai mo le Vasega
Faitau le Alema 5:46–48, ma vaavaai mo le punavai o le molimau a Alema.
A o e tomanatu i lau molimau, ia maua le olioli i mea ua e iloa, faamoemoe, pe talitonu i ai e uiga i le Faaola. Ona mafaufau lea ma le agaga tatalo po o le a se mea e mafai ona e faia e fausia ai i luga o lena faavae, seia oo ina avea ma se molimau mautinoa. Na aoao mai Elder Uchtdorf:
O le faapogai o lenei malamalama mautinoa ma le talitonuga maumaututū, o le faaaliga mai le lagi, ‘aua o le agaga o le valoaga o le mau lea ia Iesu’ (Faaaliga 19:10).
Tatou te mauaina lenei molimau pe a saunoa mai le Agaga Paia i le agaga o i totonu ia i tatou. O le a tatou maua se mautinoa toafilemu ma le lē fetotoa’i, o le a avea ma faapogai o a tatou molimau ma talitonuga maumaututū, tusa lava pe o ā o tatou aganuu, lanu, gagana, ma tulaga o le tamaoaiga. O na uunaiga a le Agaga, ae lē na o le faautautaga faaletagata, o le faavae moni lea o le a fausia ai a tatou molimau.
O le autu o lenei molimau o le faatuatua lea e lē aunoa, ma le malamalama ia Iesu Keriso ma Lana misiona paia, lea o loo ta’ua i le mau e faatatau ia te Ia lava, “O au nei le ala, le upumoni, ma le ola” (Ioane 14:6). (“O Le Mana o se Molimau Patino,” Liahona, Nov. 2006, 38)
Talanoa e Sauniuni ai mo le Vasega
Talanoaina ma se tasi e talitonu ia Iesu Keriso pe na faapefea ona latou mauaina taitoatasi a latou molimau i le Faaola. Afai e te lagona le lē mautonu i lou loto e uiga i mea e te talitonu i ai, taulai atu i mea e te manao e iloa e uiga i le Faaola ma talanoaina pe faapefea e lenei manao faatauvaa ona taitai atu ai i le faateleina o le faatuatua ma le molimau (tagai Alema 32:27–28).
Vaega 2
E faapefea e la’u molimau ia Iesu Keriso ona faamanuiaina isi?
Mafaufau i lau molimau ia Iesu Keriso. Pe o iloa e au uo, aiga, ma isi e te mafuta i ai ou lagona e uiga ia te Ia? Ua e saunia e tali fesili e uiga i le Faaola i le faatuatua ma le molimau? (tagai 1 Peteru 3:15). Pe ua e valaauliaina isi e o mai ma aoao e uiga ia Iesu Keriso mo i latou lava? (tagai Ioane 1:39).
A o e mafaufau e uiga i le aafiaga o lau molimau ia Iesu Keriso i isi, mafaufau i le fautuaga lenei mai ia Elder Neil L. Andersen o le Korama a Aposetolo e Toasefululua:
Faatasi ai ma i latou o siomia i tatou, ia faateleina ona tatou talanoa faamaoni, ma faateleina le naunau e talanoa e uiga ia Keriso. Sa saunoa Peresitene [Russell M.] Nelson, “O soo moni o Iesu Keriso ua loto e tutū atu, tautatala atu, ma ia ese ai mai tagata o le lalolagi.” …
… Tau ina ia tatou molimau agalelei atu i lo tatou faatuatua ia Keriso. Afai e faasoa mai e se tasi se faafitauli i lona olaga patino, atonu tatou te faapea atu, “Ioane, Maria, ua e iloa ou te talitonu ia Iesu Keriso. Sa ou mafaufau lava i se mea sa Ia fetalaia mai e ono fesoasoani ia te oe.”
Ia atili faamaoni i ala o faasalalauga faaagafesootai i le talanoa e uiga i lou faatuatuaina o Keriso. …
O nisi o ō tatou uso ā Kerisiano e i ai taimi, e lē mautonu ai i o tatou talitonuga ma popole i o tatou faamoemoega. Ia tatou olioli moni faatasi ma i latou i lo tatou faatuatua tuufaatasi ia Iesu Keriso ma i mau o le Feagaiga Fou lea tatou te fiafia uma i ai. …
A o faaitiitia le tautatala o le lalolagi e uiga ia Iesu Keriso, tau ina ia faateleina lo tatou tautatala e uiga ia te Ia. A o faaali atu o tatou lanu moni o ni Ona soo, o le toatele o loo siomia i tatou o le a saunia e faalogo. A o tatou faasoa atu le malamalama ua tatou mauaina mai ia te Ia, o Lona malamalama ma Lona mana laveai paia o le a susulu atu i luga o i latou o e naunau e tatala o latou loto. (“Ua Matou Tautalatala e Uiga ia Keriso,” Liahona, Nov. 2020, 90)
Faamaumau Ou Manatu
Filifili se tasi o fautuaga o loo i lalo e fesoasoani ia te oe e mafaufau loloto ai ma iloilo pe na faapefea ona tuputupu a’e lau molimau ia Iesu Keriso ma Lana talalelei e faavavau i le āluga o lenei kosi. Sau saunia i le vasega e faasoa mai ou aafiaga.
-
Faitau le “O Le Keriso Soifua: O Le Molimau a le Au Aposetolo” (i le ChurchofJesusChrist.org), ma mafaufau pe na faapefea ona tuputupu a’e lau molimau i le Faaola. Tusi lau molimau ia Iesu Keriso po o ou manatu po o lagona e uiga ia te Ia.
-
Afai na e taulotoina le “O Le Keriso Soifua,” faamaumau pe na faapefea e lenei taumafaiga ona uuna’ia lou malamalama ma lau molimau i le Faaola.
-
Faitau le 3 Nifae 27:13–21, ma mafaufau loloto po o le a le uiga o le talalelei a le Alii ia te oe. Faamaumau pe na faapefea e le taumafai e ola i Lana talalelei ona suia ai lou olaga.
-
Toe iloilo le lisi o anotusi mo lenei tusi lesona, ma faailoa mai le lesona na i ai se aafiaga sili ia te oe. Toe iloilo anomea mo sauniuniga mo lena lesona, ma faamaumau pe aisea na faia ai se eseesega i lou olaga.
-
Mafaufau pe na faapefea ona avea atili oe e pei o le Faaola a o e faaaogaina mea na e lagonaina ma aoaoina i lenei kosi. Faamaumau suiga ua e vaaia i lou olaga.
-
Filifili se mau se tasi pe sili atu e uiga ia Iesu Keriso lea ua faateleina ai lou malamalama ma le molimau ia te Ia. Faamaumau mea na e aoaoina mai nei mau ma po o le a le eseesega na latou faia i lou olaga.
-
Filifili se viiga po o se pese e uiga i le Faaola e faaalia ai lau molimau e uiga ia te Ia. Faamaumau manatu ma lagona e aumaia e lenei viiga po o se pese i lou mafaufau ma lou loto.
-
Tusi se tusi o le loto faafetai i le Faaola. Faamaumau ou lagona e uiga i Lona soifuaga ma lona uiga ia te oe. Afai o oe o se tusiata, e mafai ona e tusia se ata e faaalia ai ou lagona mo le Faaola ma faasoa atu i lau vasega.