Lesona 8 Anomea a le Faiaoga: Taliaina o Iesu Keriso o le Mesia Folafolaina
“Lesona 8 Anomea a le Faiaoga: Taliaina o Iesu Keriso o le Mesia Folafolaina,” O Iesu Keriso ma Lana Talalelei e Faavavau Anomea a le Faiaoga (2023)
“Lesona 8 Anomea a le Faiaoga,” O Iesu Keriso ma Lana Talalelei e Faavavau Anomea a le Faiaoga
Lesona 8 Anomea a le Faiaoga
Taliaina o Iesu Keriso o le Mesia Folafolaina
O Iesu Keriso o le Mesia (po o le “O Lē Ua Faauuina”) o le Feagaiga Fou. Sa filifilia o Ia e le Tama Faalelagi e avea ma o tatou Faaola. I lenei lesona, o le a maua ai e tamaiti aoga le avanoa e talanoaina ai pe mafai faapefea e le taliaina o le misiona a Iesu Keriso ona suia o latou olaga. O le a uunaia tamaiti aoga e mafaufau pe mafai faapefea e le Mesia ona fesoasoani ia i latou i tiga po o puapuaga o loo latou feagai.
Fautuaga mo le Aoao Atu
Ua Tautino mai Iesu Keriso o Ia o le Mesia.
E mafai ona e amataina le vasega i le faailoa atu o le saunoaga lenei a Elder Neil L. Andersen o le Korama a Aposetolo e Toasefululua:
Ata
Elder Neil L. Andersen
E leai se tasi na faasaoina mai ma‘i ma le faanoanoa. … O manuaga o le agaga e le tulaga ese i le mauoa po o le mativa, i se aganuu se tasi, se malo se tasi, po o se augatupulaga se tasi. E oo mai i tagata uma ma o se vaega o le aoaoina tatou te maua mai i lenei aafiaga faaletino. (Neil L. Andersen, “Manu‘a,” Liahona, Nov. 2018, 84)
Mafaufau e tusi le fasifuaitau lea i luga o le aupapa: O manu‘a o le agaga.
Valaaulia tamaiti aoga e faasoa mai ni auala eseese tatou te aafia ai i manu‘a o le agaga, ma tusi tali a tamaiti aoga i luga o le laupapa. Ina ia faia lenei gaoioiga ia sili atu ona talafeagai mo tamaiti aoga, e mafai ona e valaaulia i latou e faailoa filemu mai ni manu‘a o o latou agaga po o manu‘a o se tasi latou te alolofa i ai. Faamalosiau i tamaiti aoga e mafaufau faalilolilo i le aluga o le vasega atoa pe mafai faapefea ona fesoasoani le Alii i nei manu‘a.
Valaaulia tamaiti aoga e faamalamalama pe faamatala le faalaniga Mesia ma pe aisea na taua ai le Mesia faatalitali i le nuu o le feagaiga a le Atua i taimi o le Feagaiga Tuai ma le Feagaiga Fou.
Ta‘u i ai o le Isaia 61:1–3 o se valoaga o le ala o le a fesoasoani ai le Mesia e faamalolo agaga ua manunua. Valaaulia tamaiti aoga e toe faamanatu nei fuaiupu ma vaavaai mo upu ma fuaitau e mafai ona ofoina atu le faamoemoe ia i latou o e mafatia.
A o suesue le vasega, e mafai ona e tusia le fuaitau lenei i luga o le laupapa: O le ala e fesoasoani ai le Mesia i le agaga ua manu‘a. Ona mafai lea ona e fai atu i tamaiti aoga e faasoa mai upu po o fasifuaitau latou te maua e sili ona taua ma tusi i luga o le laupapa. Ina ia fesoasoani i tamaiti aoga e mafaufau loloto, mafaufau e fai nisi o fesili nei:
E faapefea e lenei upu po o le fasifuaitau ona tautalagia manu‘a o le agaga?
Aisea e taua ai lenei upu po o le fasifuaitau ia te oe?
O le a se mea ua aoao mai e lenei upu po o le fasifuaitau ia i tatou e uiga i le Mesia ma Lana misiona?
A uma ona tuuina atu se taimi mo se talanoaga anoa, e mafai ona e faaali atu le ata o Iesu o loo avatu fi le sunako i Nasareta. Toe faamanatu puupuu le matalalaga, ona valaaulia lea o se tamaitiiti aoga e faasoa mai pe na faapefea ona faaaoga e Iesu Keriso le Isaia 61:1–2 e folafola atu ai o Ia o le Mesia folafolaina. (Afai e tatau ai, fai i le vasega e toe faamanatu le Luka 4:18–22.)
E mafai ona e faaali atu le upumoni lenei: O Iesu o le Mesia o lē na auina mai e faamalolo i e loto momomo, faasaoloto e ua faasauaina, ma faamafanafana i e faanoanoa.
E mafai faapefea e le Faaola ona fesoasoani ia i latou o e lagona le loto momomo pe ua sauaina faalelagona? (Mafaufau e faitau le faamatalaga a Elder Gerrit W. Gong i le vaega 1 o le anomea mo sauniuniga.)
Na faapefea ona fesoasoani pe faamafanafanaina e le Faaola oe po o se tasi e te iloa?
Ua molimau mai Isaia ma Alema i le mana o le Mesia e fesoasoani ia i tatou.
E mafai ona e faaali atu ata o loo avatu faatasi ai o le Faaola ma valaaulia tamaiti aoga e faasoa faapuupuu mai ni auala eseese na Ia puapuagatia ai i le olaga nei.
Mafaufau e fai atu i tamaiti aoga e galulue ma se paga. E mafai e se tagata e toatasi ona suesue le Isaia 53:3–6, 8, 11–12 ma le isi e mafai ona suesue le Alema 7:11–12. Valaaulia tamaiti aoga e vaavaai mo ni mea se lua: (1) pe faapefea ona mafatia le Mesia, ma le (2) pe mafai faapefea ona Ia faamanuiaina i tatou ona o Ona puapuaga. A uma ona talanoaina e tamaiti aoga ma a latou paga mea na latou mauaina, valaaulia nisi o tamaiti aoga e faasoa mai i le vasega mea sa latou aoaoina.
A o faasoa mai tamaiti aoga, atonu e fesoasoani le pueina o lo latou aoaoina i se faamatalaga e pei o lea: Ona sa tauave e le Mesia o tatou tiga, faanoanoaga, ma solitulafono, e mafai ona Ia faamaloloina i tatou, aumaia ia i tatou le filemu, tauave a tatou amioletonu, faamagalo i tatou, faamafanafana i tatou, ma fesoasoani ia i tatou. Mafaufau e fai atu le fesili tulitatao lenei:
O a ituaiga o tiga ma puapuaga faaletino e mafai ona fesoasoani ai le Faaola ia i tatou? (Atonu e taua le toe faamanatu o le uiga o le upu fesoasoani ona faitau leotele lea o saunoaga a Peresitene Jean B. Bingham ma Peresitene Dallin H. Oaks i le vaega 2 o anomea mo sauniuniga.)
Atonu e te faaaluina sina taimi e fesoasoani ai i tamaiti aoga e faailoa mai faataitaiga moni o le olaga i le ala e fesoasoani ai le Faaola ia i tatou. O nei faataitaiga e mafai ona maua mai tusitusiga paia, taitai o le Ekalesia, po o olaga o au tamaiti aoga. E mafai foi ona e faasoa atu lou lava aafiaga.
Faaleleia o Lo Tatou Aoao Atu ma le Aoaoina
Tuu atu i tagata aoao se taimi e mafaufau filemu ai. E i ai taimi e ono avea ai upu o se papupuni i le aoaoina faaleagaga. O le filemu e mafai ona avea o se meaalofa paia lea e mafai ai e tamaiti aoga ona mafaufau loloto atili i mea o loo latou aoaoina ma faalogo ma le manino atili i musumusuga malu a le Agaga Paia.
E mafai e tamaiti aoga ona toe mafaufau i “manu‘a” latou te oo i ai, po o se tasi latou te alolofa i ai. Faaali atu fesili nei, ma valaaulia tamaiti aoga e mafaufau loloto i ai. Tuu atu se taimi mo tamaiti aoga e tusifaamaumau ai o latou manatu ma uunaiga.
E faapefea e le iloaina e malamalama le Faaola i mea uma o loo e feagai ai ona aafia ai le ala e te vaai ai i ou lava tiga ma puapuaga?
O a ni ou mafaufauga po o lagona mo Iesu Keriso a o e mafaufau i mea na Ia puapuagatia ai ina ia mafai ona Ia fesoasoani ia te oe? O le a se mea ua musuia oe e lenei mea e fai?
E mafai faapefea e lenei malamalama ona faamanuiaina se tasi e te iloa o loo tauivi? E faapefea ona e faasoa atu ia i latou?
Afai e lava le taimi, e mafai ona e tuuina atu i tamaiti aoga taitasi se pepa pipii po o se fasipepa laitiiti. Valaaulia i latou e tusi se tali i le fesili lenei:
Mafaufau i se tasi e te iloa o loo tauivi ma ni tulaga faigata. O le a se savali e mafai ona e faasoa atu ia i latou e uiga i le gafatia e Iesu Keriso ona faamalosi ma faamalolo i tatou?
Ona tuu lea o a latou pepa faataamilo i le potu. Tuu atu i tamaiti aoga ni nai minute e savavali faataamilo ai i le potu ma faitau e le tasi le faamatalaga a le isi.
Mo Le Isi Taimi
Ina ia uunaia tamaiti aoga e faitau anomea mo sauniuniga mo le lesona 9, e mafai ona e auina atu ia i latou le ata ma le savali lenei a o lei oo i le isi vasega: Faaalu se taimi e suesue ai anomea mo sauniuniga mo le lesona 9 ma mafaufau loloto pe aisea e tatau ai ona faamanatuina le soifua mai o Iesu Keriso e le gata i le Kerisimasi ae o le tausaga atoa.