Lesona 27 Anomea a le Faiaoga

Mauaina o le Faamoemoe i le Malamalama ma le Ola o le Lalolagi

E mafai e tagata aoga ona lagona le pogisa, lotovaivai, ma le faanoanoa mo le tele o mafuaaga. I se faatusatusaga, e mafai ona faatumulia i latou i le mana o le faamoemoe pe a latou taulai atu i le Malamalama o le Lalolagi, o Iesu Keriso. I lenei lesona, o le a maua ai e tagata aoga le avanoa e mafaufau ai i mea e mafai ona latou faia e faateleina ai lo latou faamoemoe ia te Ia.

Fautuaga mo le Aoao Atu

Ua folafola mai e Iesu Keriso o Ia o le Malamalama ma le Ola o le Lalolagi.

Ina ia amata le lesona, e mafai ona e faaali atu le ata lenei:

• O loo talanoa mai tusitusiga paia e uiga i tagata e “savavali pea i latou i le pouliuli” po o le “nonofo pogisa” (tagai Salamo 82:5; Mataupu Faavae ma Feagaiga 95:6, 12; Salamo 107:10–11; Luka 1:79). O le a se mea e te manatu e mafai ona faatusa i ai lenei pogisa?

Faitau leotele le Ioane 8:12 ma le Mosaea 16:9, ma fai i tagata aoga e vaavaai pe faapefea ona fesoasoani Iesu Keriso ia i tatou e faatoilalo le pogisa. Faaali atu le upumoni lenei i luga o le laupapa: A o tatou mulimuli ia Iesu Keriso, o le a avea o Ia ma malamalama ma le ola o ō tatou olaga.

• O a ni auala ua avea ai Iesu Keriso ma malamalama ma le ola o ō tatou olaga? (Afai e manaomia, valaaulia tagata aoga e toe faamanatu le saunoaga a Elder Dallin H. Oaks i le vaega 1 o anomea mo sauniuniga.)

Ina ia fesoasoani i tagata aoga ia maua le tāua i lenei lesona, e mafai ona e faaali atu ma faitau leotele ia fesili o loo i lalo. Valaaulia tagata aoga e mafaufau loloto i nei fesili a o latou maimoa i le vitiō “The Light That Shineth in Darkness” (2:19).

• E mafai faapefea e le mulimuli ia Iesu Keriso o le Malamalama ma le Ola o le Lalolagi ona faamanuiaina, faamalosia, ma fesoasoani ia te oe?

• O anafea na e iloa ai le malamalama po o le ola na saunia e Iesu Keriso? O le a se eseesega ua faia, pe mafai ona faia, i lou olaga?

A uma ona latou maimoa i le vitiō, valaaulia tagata aoga e faamaumau nisi o ō latou manatu e uiga i fesili. E mafai ona e valaaulia i latou e talanoaina a latou tali o se vasega po o ni vaega toalaiti.

E mafai ona e faaali atu le ata o loo i le lesona o le Malumalu o Sate Leki ma faitau faatasi le saunoaga a Sister Sharon Eubank i le vaega 1 o anomea mo sauniuniga. Pe e mafai foi ona e faaalia le vaega o le vitio e o faatasi ai (0:00–1:17) mai lana lauga “O Keriso: O Le Malamalama e Susulu i le Pogisa” (Liahona, Me 2019, 73–74).

• O a nisi o auala e “galue o ia e faaitiitia lo tatou malamalama, talepe fesootaiga,” pe vavaeeseina i tatou mai le malamalama o le Faaola? (Sharon Eubank, “O Keriso: O Le Malamalama e Susulu i le Pogisa,” 73).

• O a nisi o auala e mafai ona tatou fesootai ai pe tumau ai i le fesootaiga ia Iesu Keriso, le punavai moni o le malamalama ma le ola? (E mafai ona e valaaulia tagata aoga e faamaumau mea e mafai ona latou faia.)

E faateleina le faamoemoe pe a tatou faaleleia la tatou taula’iga ia Iesu Keriso.

Faaali atu le upumoni lenei mai le “O Le Keriso Soifua:O Le Molimau a le Au Aposetolo”: O Iesu Keriso “o le malamalama, o le ola, ma le faamoemoe o le lalolagi.”

E faalagolago i manaoga o au tagata aoga, atonu e fesoasoani le iloiloina faapuupuu o le faauigaga o le faamoemoe ma le saunoaga lona lua a Elder Dieter F. Uchtdorf i le vaega 2 o anomea mo sauniuniga. Ona e fesili atu lea:

• E faapefea ona faamanuiaina i tatou pe a tatou vaai atu i le Tama Faalelagi ma Iesu Keriso o lo tatou punāvai autu o le faamoemoe? Aisea e aogā ai le iloa o le faamoemoe o se meaalofa foi?

E mafai ona e valaaulia tagata aoga e mafaufau e uiga i se tasi latou te iloa atonu o lagonaina le lotovaivai, faanoanoa, tuuatoatasi, lofituina, po o le popole. Valaaulia tagata aoga e iloilo le Moronae 7:40–42 ma le Eteru 12:4, ma vaavaai mo upumoni e uiga i le faamoemoe ia Keriso e mafai ona suia ai le ala tatou te oo ai i le olaga.

A uma ona tuu atu i tagata aoga se taimi ia lava e suesue ai, valaaulia nisi o tagata aoga e faasoa mai upumoni na latou maua ma pe faapefea e nei upumoni ona faateleina le faamoemoe o se tasi ia Keriso.

Mafaufau e fai atu i tagata aoga e tagai i le tala faatusipaia sa latou filifili e suesue mai le vaega 2 o anomea mo sauniuniga. Tuu atu i ai ni nai minute e iloilo ai mea na latou maua. Vaevae le vasega i ni vaega toalaiti ma fai atu i tagata aoga e faasoa mai a latou tala o tusitusiga paia ma mea na latou aoaoina mai ai e uiga i le faamoemoe ia Keriso.

Ina ia fesoasoani i tagata aoga ia lagonaina le tāua o le i ai o le faamoemoe ia Keriso, e mafai ona e faaali uma atu po o se vaega o le saunoaga lenei a Peresitene Uchtdorf, ao auauna ai i le Au Peresitene Sili. A uma se minute e faitau ma mafaufau loloto ai tagata aoga i lenei saunoaga, e mafai ona e valaaulia se tagata aoga se toatasi pe toalua e molimau atu i lo latou faamoemoe ia Iesu Keriso ma le ala ua aafia ai o latou olaga.

Ou te tautino atu faatasi ma Ieremia, “Amuia le tagata … o le ua fai Ieova mona faatuatuaga.” [Ieremia 17:7].

Ou te molimau atu faatasi ma Ioelu “o Ieova [o le] malu o ia o lona nuu, ma le olo o le fanauga a Isaraelu.” [Ioelu 3:16].

Ou te folafola atu faatasi ma Nifae: “Fetaomi atu i luma ma le faamaoni ia Keriso, ina ua i ai le faamoemoe atoatoa lelei, i le ma le alofa atu i le Atua atoa ma tagata uma. O lea, afai tou te fetaomi atu i luma, o fiafia i le afioga a Keriso, ma tumau lava e oo i le iuga, o loo faapea ona fetalai mai le Tama: Tou te maua le ola faavavau.” [2 Nifae 31: 20]. …

Ma, mo outou uma o e o puapuagatia—o i latou uma o e o lagona le lotovaivai, popole, po o le tuulafoaiina—ou te faapea atu ma le alofa ma le popole tele mo outou, ia aua lava nei fiu.

Aua nei [e] talia le toilalo.

Aua nei faatagaina le leai o se faamoemoe e manumalo i lou agaga.

Ia talia ma faalagolago i le Faamoemoe o Isaraelu, aua o le alofa o le Alo o le Atua e ati atu i le pogisa uma, faamalūlūina le faanoanoa uma, ma faafiafiaina loto uma. (“O Le Mana e Le Iu o le Faamoemoe,” Liahona, Nov. 2008, 24)

Valaaulia tagata aoga e toe manatunatu i fesili nei ma tusi o latou manatu, uunaiga, po o lagona:

• O le a se mea ua e aoaoina i le asō e mafai ona fesoasoani ia te oe e maua ai le faamoemoe i taimi o tauiviga po o le faanoanoa?

• O a ni mea faigofie e mafai ona e faia e faateleina ai lou faatuatua ma le faamoemoe ia Iesu Keriso?

Mo Le Isi Taimi

Ina ia fesoasoani e saunia tagata aoga mo le vasega faaiu i lenei kosi, e mafai ona e auina atu le sāvali lenei i le āluga o le vaiaso: A o e suesue i anomea mo sauniuniga mo la tatou vasega mulimuli, mafaufau loloto i mea ua e aoaoina mai lenei kosi. Na faapefea e mea ua e aoaoina ona tosina ai lou malamalama ma le faatuatua ia Iesu Keriso?