“Lesona 5 Anomea a le Faiaoga: Avea ma Tagata o le Feagaiga a le Alii,” O Iesu Keriso ma Lana Talalelei e Faavavau Anomea a le Faiaoga (2023)
“Lesona 5 Anomea a le Faiaoga,” O Iesu Keriso ma Lana Talalelei e Faavavau Anomea a le Faiaoga
Lesona 5 Anomea a le Faiaoga
Avea ma Tagata o le Feagaiga a le Alii
Na aoao mai Peresitene Russell M. Nelson e faapea o le osia ma le tausia o feagaiga ma Iesu Keriso “o le a matala ai le faitotoa i faamanuiaga uma faaleagaga ma avanoa e maua” e tagata uma (“A’o Tatou Agai Faatasi Atu i Luma,” Liahona, Ape. 2018, 7). I lenei lesona, o le a tuu atu ai i tamaiti aoga le avanoa e faasoa mai ai pe faapefea e le osia ma le tausia o feagaiga o le talalelei ma Ieova ona faamanuiaina ai o latou olaga ma mea e mafai ona latou faia e faamalosia ai lo latou tuuto e savavali ma le faamaoni i le ala o feagaiga.
Fautuaga mo le Aoao Atu
Ua faaalia e Iesu Keriso o Ia o Ieova, o le Atua i le Feagaiga Tuai.
Faaleleia o Lo Tatou Aoao Atu ma le Aoaoina
Manatua le taua o le afuaga. O le uiga o se fuaitau o se mau e faatosinaina e lona afuaga. O le fesoasoani i tamaiti aoga ia malamalama i le talaaga o mau e mafai ona fesoasoani ia i latou e malamalama atili ai i le anotusi, e aofia ai le faamoemoega o tusitala musuia.
Faaali atu le faamatalaga lenei: “E moni, e moni, ou te fai atu ia te outou, sa au i ai, A‘o leai se Aperaamo”(Ioane 8:58). Faamanatu i tamaiti aoga na faia e Iesu lenei faamatalaga ina ua mumusu nisi o le au tusiupu ma le au Faresaio e talia Lana tautinoga o Ia o le Malamalama o le Lalolagi ma sa Ia faia le galuega a Lona Tama. Sa latou poloaiina ia iloa po o ai moni lava o Ia (tagai Ioane 8:25). A uma ona tuuina atu lenei afuaga, e ono fesoasoani le faaali atu o le “Ua Tautino mai e Iesu: O Au o le Malamalama o le Lalolagi; o le a Faasaolotoina Outou e le Upumoni” (mai le taimi 3:38 i le 4:26) ma talanoaina fesili nei:
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fc7%2Fdc%2Fc7dcbdcaef63300ad24182757f49a5f9934b6bb7%2Fc7dcbdcaef63300ad24182757f49a5f9934b6bb7.jpg/full/!250,/0/default)
-
Aisea na taumafai ai le au tusiupu ma le au Faresaio e fetogi o Ia i maa ona o lenei faamatalaga mai le Faaola? (Atonu e taua le toe faamanatu o le afuaga mo le Esoto 3 ona faitau lea o fuaiupu 13–14 o lena mataupu ma le saunoaga a Elder Bruce R. McConkie i le vaega 1 o anomea mo sauniuniga. Fesoasoani i tamaiti aoga e faailoa mai se upumoni e pei o lea: O Iesu Keriso o Ieova, o le Atua o le Feagaiga Tuai ma le O A‘u Silisili.)
-
O a mea ua aoao mai ia i tatou e suafa o Ieova ma le O Au e uiga i le natura o Iesu Keriso? (A o faasoa mai e tamaiti aoga mea na latou aoaoina mai le vaega 1 o anomea mo sauniuniga, e mafai ona e tusia upu nei i luga o le laupapa: le masuia, faavavau, ma le o loo iai pea.) E faapefea e lou iloaina o Iesu Keriso e le masuia, faavavau, ma o loo i ai pea, ona fesoasoani ia te oe e te faatuatuaina ai o Ia?
E mafai ona e valaaulia ni nai tamaiti aoga e faasoa mai pe aisea latou te faatuatuaina ai le Alii.
Ua valaaulia i tatou e Ieova ia osia ma tausia feagaiga paia.
Mafaufau e fesili atu:
-
Aisea e mafai ai ona tatou maua le talitonuga i feagaiga tatou te osia ma le Alii? (I la outou talanoaga, ia mautinoa ua malamalama tamaiti aoga i le faauigaina o le feagaiga, o loo maua i le vaega 2 o anomea mo sauniuniga.)
Ina ia fesoasoani i tagata aoga ia mafaufau loloto atili e uiga i le taua e faavavau o le osia ma le tausia o feagaiga ma le Alii, mafaufau e talanoaina le tulaga faataitai lenei.
Ua talia e lau uo o Simi le valaaulia ina ia papatisoina. Ae peitai, ina ua uma ona alu i se faletatala o le malumalu ua tau le mautonu o ia. Na ia ta’u atu ia te oe, “I le fale tatala o le malumalu, lea sa matuai maoae lava, sa ou iloa ai a e alu i le malumalu e tatau ona e osia ni feagaiga e sili atu nai lo feagaiga e te osia i le papatisoga. O na tautinoga uma atonu ua fai si tele naua mo au.”
Valaaulia le afa o le vasega e suesue i le saunoaga a Elder D. Todd Christofferson i le vaega 2 ma vaavaai mo faamanuiaga o le savalia o le ala o feagaiga. Fai i le isi afa o le vasega e suesue le Aperaamo 2:8–11 ma vaavaai mo faamanuiaga folafolaina o le tausia o feagaiga faaAperaamo.
A uma ona tuu atu i tamaiti aoga se taimi e suesue ai, e mafai ona e faipaga tamaiti aoga ma se tasi sa suesueina le isi anotusi ma fai atu ia i latou e faasoa mai pe mafai faapefea e upumoni na latou faailoaina ona fesoasoani ia Simi e toe faatulaga ai lana vaaiga o feagaiga.
Ina ia fesoasoani i tamaiti aoga ia lagonaina le moni ma le taua o nei feagaiga o le talalelei, atonu e mafai ona outou talanoaina se tasi pe sili atu foi o fesili nei:
-
Aisea e te manatu ai e manaomia e Iesu Keriso i tatou e osia feagaiga ia maua ai Ana faamanuiaga silisili? Na faapefea ona faamanuiaina lou olaga e ala i ie osia ma le tausiaina o feagaiga?
-
O le a le fesootaiga i le va o le feagaiga faa-Aperaamo ma le malumalu paia? (Atonu e te manao e faitau le saunoaga a Peresitene Nelson i le vaega 2 ma fesoasoani i tamaiti aoga ia malamalama e na o le malumalu lava e mafai ai ona tatou maua ai le meaalofa o le ola e faavavau, o le faamanuiaga tupito lea o le feagaiga faa-Aperaamo. Afai o le a fesoasoani i au tamaiti aoga, e mafai ona e faailoaina feagaiga tatou te osia i le taimi o le faaeega paia o le malumalu, lea o loo lisiina i le “E Uiga i Faaeega Paia o le Malumalu” [temples.ChurchofJesusChrist.org]. Ona mafai lea ona e valaaulia tamaiti aoga e faasoa mai pe na faapefea ona faamanuiaina i latou pe mafai foi ona faamanuiaina e ala i le osia ma le tausia o feagaiga o le malumalu. Pe e mafai foi ona e faalogo i le molimau a Peresitene Nelson i le feagaiga faaAperaamo i le “Molimau Faapitoa—Peresitene Nelson” [3:28] ma valaaulia tamaiti aoga e faasoa mai mea na latou lagonaina a o latou aoao atili e uiga i le feagaiga faaAperaamo.)
Ona mafai lea ona e tuu atu i tamaiti aoga se taimi e faamaumau ai se faamanuiaga o le feagaiga latou te mananao ai ma mea e mafai ona latou faia e maua ai lena faamanuiaga. (A uma ona faamaumau e tamaiti aoga o latou manatu, atonu e te manao e tuuina atu le vaaiga lenei mai ia Elder Jeffrey R. Holland o le Korama a Aposetolo e Toasefululua: ““E vave oo mai nisi faamanuiaga, o nisi e tuai, o nisi e le oo mai seia oo i le lagi; ae mo i latou e taliaina le talalelei a Iesu Keriso, e oo mai lava” [“An High Priest of Good Things to Come,” Ensign, Nov. 1999, 38].)
Mo Le Isi Taimi
A o lei oo i le isi vasega e sosoo ai, mafaufau e auina atu i tagata aoga le savali lenei: E te fia iloa po o le a le mea e mafai e se tamai mamoe, se faitotoa, falaoa mafolafola, laau afu, ma se tootoo ona aoaoina oe e uiga ia Iesu Keriso? Suesue ia anomea mo sauniuniga mo le lesona 6 e maua ai.