Lesona 3 Anomea a le Faiaoga

Faalagolago ia Iesu Keriso, Lo Tatou Faaola ma le Taitai i le Muai Olaga

I le muai olaga, na aoao mai ai i tatou e le Tama Faalelagi e uiga i Lana fuafuaga o le faaolataga. O iina na tatou maua ai le avanoa e tulai ae ai e lagolago Lana fuafuaga ma lagolagoina Iesu Keriso o lo tatou Faaola. I lenei lesona, o le a faailoa mai ai e tamaiti aoga mafuaaga na tatou faatuatuaina ai Iesu Keriso e avea ma o tatou Faaola ma taitai i le muai olaga. O le a mafaufau foi tagata aoga pe faapefea ona tutu faatasi ma Ia i la latou taua faifai pea ma Satani ma ana au i lenei olaga.

Fautuaga mo le Aoao Atu

Faaleleia o Lo Tatou Aoao Atu ma le Aoaoina

Tulitatao le aoaoina o tamaiti aoga. E mafai ona faamalosia le faatuatua o tamaiti aoga pe a tuuina atu ia i latou se avanoa e faasoa mai ai pe na faapefea ona faamanuiaina i latou e ala i le faatinoina o valaaulia na tuuina atu i le taimi o se vasega ua mavae. Pe a taialaina e le Agaga Paia, vaavaai mo avanoa e tulitatao ai pe o faapefea ona faaaoga e tamaiti aoga mea o loo latou aoaoina.

Na filifilia Iesu Keriso e avea ma o tatou Faaola ma Togiola mai le amataga.

I le avea ai o se vasega, faaalu ni nai minute e faailoa mai ai upumoni na faaalia mai e uiga i lo tatou muai olaga. (Afai e manaomia, tuu atu i tamaiti aoga e filifili a le o le vaega 1 po o le2 o anomea mo sauniuniga ma toe faamanatu puupuu. Atonu e faailoa mai e tagata aoga se tasi pe sili atu foi o upumoni nei: I le Fono Tele, na tuuina mai ai e le Tama Faalelagi Lana fuafuaga o le faaolataga ina ia mafai ai ona tatou toe foi atu i Lona afioaga ma avea e faapei o Ia. O le naunautaiga o Iesu Keriso e avea ma o tatou Faaola sa taua i le manuia o le fuafuaga a le Tama. I le muai olaga, o Iesu Kerso o le silisiliese ma le sili ona atamai o fanau uma a le Tama Faalelagi.)

A o atiina ae le talanoaga a lau vasega, mafaufau po o fea o fesili nei e mafai ona e fai atu o le a sili ona talafeagai mo au tamaiti aoga. (Manatua: Ina ia uunaia aafiaga o le liua ai, atonu e sili atu le fai atu o ni nai fesili ma faia ni talanoaga loloto e uiga i ni autu patino, nai lo le taumafai e fai atu fesili uma ua fautuaina mai.)

• E mafai faapefea e le malamalama i le fuafuaga o le faaolataga ona faamanuiaina ai se tasi e lagonaina o latou olaga ua aunoa ma se uiga po o se faamoemoe? (Atonu e te manao e toe faamanatu le faamatalaga a Elder Robert D. Hales i le vaega 1 o anomea mo sauniuniga.) Na faapefea ona fesoasoani ia te oe le malamalama i le fuafuaga o le faaolataga i taimi faigata?

• Aisea e manaomia ai se Faaola i le fuafuaga a le Tama Faalelagi? (Tagai vaega 1 o anomea mo sauniuniga.)

• I le mafaufau ai i le tau patino na totogi e Iesu Keriso e togiola ai a tatou agasala, o a ni ou mafaufauga po o lagona e uiga i Lona naunau e avea ma o tatou Faaola? (tagai Mose 4:2).

• O le a le mea na aoaoina e Aperaamo e uiga i le tulaga ese o Iesu Keriso i le muai olaga? (Atonu e fesoasoani le toe tomanatu i upumoni na aoao mai i le vaega 2 o anomea mo sauniuniga.) E mafai faapefea e le iloaina o le silisiliese o Iesu Keriso i le muai olaga ona fesoasoani ia te oe e faatuatuaina o Ia i luitau e te feagai?

Ina ia faaiuina lenei vaega o le lesona, e mafai ona e fai i le vasega e mafaufau pe na faapeī le i ai i le Fono Tele ina ua tuuina mai e le Tama Faalelagi le fuafuaga o le faaolataga ma sa filifilia Iesu Keriso e avea ma o tatou Faaola. Valaaulia se tamaititi aoga se toatasi pe toalua e faasoa mai o laua manatu ma lagona.

Faatasi ai ma le fesoasoani a Iesu Keriso, e mafai ai ona tatou manumalo i le taua ma Satani ma e e mulimuli ia te Ia.

Faaali atu le ata o loo i ai i le lesona o le Taua i le Lagi. Valaaulia tamaiti aoga e faasoa mai pe faapefea ona ese lenei ata mai mea ua tatou iloa mai faaaliga i ona po nei e uiga i le Taua i le Lagi. (Faamalosiau tamaiti aoga e utuvai mai i le Mose 4:1–4, Faaaliga 12:7–11, ma le saunoaga a Peresitene Gordon B. Hinckley i le vaega 3 o anomea mo sauniuniga.)

A o faasoa mai e tamaiti aoga o latou malamalama, mafaufau e fai atu le fesili nei:

• Aisea na fouvale ai Satani? O a ana auala i le taimi o le Taua i le Lagi? (tagai Mose 4:1, 3–4; Faaaliga 12:7–9). O faapefea ona ia faaaogaina ia auala i o tatou aso nei?

• E tusa ai ma le Faaaliga 12:11, na faapefea ona tatou manumalo i le taua ma Satani ma e na mulimuli ia te ia i le muai olaga? (E mafai ona faaopoopo i lau talanoaga e toe faamanatu le saunoaga a Brother Ahmad S. Corbitt i anomea mo sauniuniga. Fesoasoani i tamaiti aoga e faailoa mai le upumoni lenei ma tusi i luga o le laupapa: E pei ona tatou faia i le muai olaga, e mafai ona tatou faatoilaloina le mana o Satani e ala i le faatuatua i le Togiola a le Faaola ma la tatou molimau ia te Ia.)

• Na faapefea ona fesoasoani lau molimau ia Iesu Keriso ma Lana Togiola ia te oe i le taua e faasaga ia Satani ma ana faaosoosoga? O le a se mea e mafai ona e faia e faateleina ai lou faalagolago i le gafatia o le Faaola e fesoasoani ia te oe e faatoilalo le mana o Satani?

Ina ia faaiu le vasega, atonu e te manao e faaali atu ma faitau leotele le saunoaga lenei a Elder Jorg Klebingat o le Fitugafulu:

[I le taua i le lagi] O i tatou na faaauupegaina i le faatuatua i le Togiola a Iesu Keriso i le lumanai, o i latou na faamalolosiina e molimau e uiga i Lana matafaioi paia, o i latou ua i ai le malamalama faaleagaga ma le lototele e faaaoga ai i le puipuiga o Lona suafa paia na tau i laina pito i luma o lenei taua o upu. Na aoao mai Ioane e faapea, o na agaga totoa, ma isi, ua manumalo ia Lusifelo “ona o le toto a le tamai mamoe, ma le upu a la latou mau’ (Faaaliga 12:11; faaopoopo le faamamafa).

Ioe, o le folafolaga o se Faaola ma se Ketesemane ma se Kalevaria na pisia i le toto, na manumalo i le taua i le muai olaga. Ae o lo tatou lototele ma le molimau, i le muai olaga, lo tatou naunautai e faamalamalama, finauina, ma faatauanau isi agaga, na fesoasoani foi e faatautai le tai fanae o mea sese mai le salalau atu e aunoa ma se faalavelaveina!

O le faamaeaina manuia o le taua i le muai olaga e puipui o Ia, ua avea ai i tatou ma molimau i Lona suafa paia. E moni lava, o le faamaonia o i tatou i le taua ma faapea ona faamautinoa ai i o tatou loto ma le lototele, lea na fetalai mulimuli ane ai le Alii e uiga ia i tatou—o tagata o le aiga o Isaraelu—“O outou o a’u molimau” (Isaia 43:10). Sei o tatou fesili ifo ia i tatou lava: Pe o moni lava lenei tautinoga e uiga ia i tatou i aso nei?” (Jorg Klebingat, “Puipuia o le Faatuatuaga,” Liahona, Sete. 2017, 49–50)

Valaaulia tamaiti aoga e mafaufau i le saunoaga a Elder Klebingat ma fuafua po o le a se mea e mafai ona latou faia e tutu faatasi ai ma Iesu Keriso i o tatou aso. E mafai ona e valaaulia i latou e tusi faamaumau o latou manatu ma lagona.

Mo Le Isi Taimi

I le aluga o le vaiaso, atonu e te manao e auina atu le valaaulia lenei i tamaiti aoga: A o e faitauina le anomea mo le sauniuniga mo le lesona 4 ma mafaufau loloto i vavega o le Foafoaga, mafaufau e auina mai ia te au, po o le aumaia i le vasega, o se ata o foafoaga a le Atua e faapitoa ona musuia ai oe.