“Lesona 15 Anomea mo le Sauniuniga o le Vasega: Faalatalata Atili atu ia Iesu Keriso e ala i le Faamanatuga,” O Iesu Keriso ma Lana Talalelei e Faavavau Anomea a le Faiaoga (2023)
“Lesona 15 Anomea mo le Sauniuniga o le Vasega,” O Iesu Keriso ma Lana Talalelei e Faavavau Anomea a le Faiaoga
Lesona 15 Anomea mo Sauniuniga o le Vasega
Faalatalata Atili atu ia Iesu Keriso e ala i le Faamanatuga
Mafaufau i le taimi mulimuli na e tagofia ai le faamanatuga. Na faape’i se aafiaga na oo ia te oe? O le a se gauaiga na e tuuina atu i le Togiola a le Faaola ma lau sootaga faalefeagaiga ma Ia? A o e suesue i lesona i le iunite 4, o le a e maua le avanoa e mafaufau ai i mea e mafai ona e faia e avea ai Iesu Keriso ma Lana Togiola ia sili atu ona patino, talafeagai, ma faaaoga i lou olaga.
Vaega 1
E mafai faapefea ona fesoasoani le faamanatuga ia te a’u ia latalata atili atu ai i le Faaola?
I ni nai itula a o lei ulufale atu i le Faatoaga o Ketesemane, sa faatonuina ai e Iesu Ana Aposetolo e Toasefululua e saunia le tausamiga o le Paseka (tagai Mataio 26:17–19). Mo le toeitiiti atoa le 1,500 tausaga, sa faamanatu ai e le fanauga a Isaraelu le Tausamiga o le Paseka ma faaaoga le toto o tamai mamoe e le pona e faatusa i lo latou laveaiina mai le agelu o le faafanoga (tagai Esoto 12:21–28; 13:14–15). Ina ua maea lenei talisuaga, sa faataunuuina e Iesu Keriso, le Tamai Mamoe a le Atua, le faatusa o le Paseka ina ua faamaligiina Lona toto ma avea ai o Ia ma Faaola o le lalolagi (tagai Ioane 1:29; 1 Peteru 1:18–19). I le avea ai ma se vaega o Lana tausamiga faaiu o le Paseka, “Sa Ia faatuina le faamanatuga e fai ma faamanatu o Lana taulaga togiola sili” (“O Le Keriso Soifua: O Le Molimau a le Au Aposetolo,” ChurchofJesusChrist.org). O le Togiola a le Faaola o le a aofia ai Lona puapuagatia i Ketesemane, Lona maliu i luga o le satauro, ma Lona Toetu mamalu.
Suesue e Sauniuni ai mo le Vasega
Faitau le Mataio 26:26–28, ma mafaufau pe faape’i le mauaina o le faamanatuga mai ia Iesu Keriso. E mafai ona e matamata i le “O Le Talisuaga Mulimuli” (6:01) e fesoasoani ia te oe e tomanatu ai i lenei aafiaga.
O le areto ma le uaina, po o le vai, o faatusa paia ia o le faamanatuga. O se faatusa o se suitulaga faaletino o se manatu faavae, uiga auaumamā, po o se manatu. A o e suesue i manatu nei, mafaufau loloto pe mafai faapefea e faatusa o le faamanatuga ona faamanatu atu ia te oe le Faaola ma mea na Ia faia mo oe:
-
I le taimi o le 40 tausaga o Isaraelu anamua i le vao, sa fafagaina i latou i aso taitasi i le manai po o le “areto mai le lagi” (Ioane 6:31; tagai foi Salamo 78:24–25). Ina ua uma ona talanoa e uiga i le manai, sa tautino mai e Iesu Keriso, “O a’u le areto ola na alu ifo mai le lagi. … Pe a ’ai se tasi i lenei areto ona ola ai lea o ia e faavavau” (Ioane 6:51, 58).
-
I le avea ai o se vaega o Lana Togiola, o le tino o Iesu Keriso “sa faalavaau, mo i matou” (“Iesu o Nasareta, le Tupu, Faaola,” Viiga, nu. 101). Sa mātauina e Peresitene Dallin H. Oaks o le Au Peresitene Sili, “Ona ua nutimomoia ma masae, o fasi falaoa taitasi e tulaga ese, e pei lava o tagata taitoatasi o e fetagofi i ai e tulaga ese” (“Important Aspects of Missionary Work Remain Unchanged, Says Elder Oaks,” Church News, June 30, 2017, ChurchofJesusChrist.org).
-
Sa faaaoga le uaina i le faamanatuga muamua e faatusa i le toto o Iesu Keriso. Ua faamamaina i tatou e Lona toto (tagai 1 Ioane 1:7). O le asō tatou te faaaogaina ai le vai, lea e faatatau foi i le faamamaina (tagai i le Mataupu Faavae ma Feagaiga 27:2) ma e tāua mo le olaga. A o i ai i se vaieli, sa ta’u atu e Iesu i se fafine o Samaria o le vai ua Ia ofoina mai ia i tatou e pei “o le vaipuna e puna i luga i le ola e faavavau” (Ioane 4:14).
-
Na aoao mai Elder D. Todd Christofferson o le Korama a Aposetolo e Toasefululua: “O le aai faafaatusa i la le tino [o Keriso] ma inu i Lona toto e i ai se faauigaga sili atu, ma o le teulotoina lea o tomai ma uiga o Keriso. … A o tatou aai ma feinu i le falaoa ma le vai o le faamanatuga i vaiaso taitasi, o le a lelei ona tatou mafaufau pe faapefea ona tatou faaaofia uma ma le atoatoa Lona uiga ma le mamanu o Lona soifua o le aunoa ma se agasala i o tatou olaga ma tagata” (“O Le Areto Ola na Alu Ifo Mai le Lagi,” Liahona, Nov. 2017, 37).
Tusi Faamaumau Ou Manatu
Tusi i lalo tali i fesili nei: O le a se mea ua faagaeetia ai oe e uiga i uiga faafaatusa o le areto ma le vai? O le a se mea e te manao e manatua e uiga i le Faaola i le isi taimi e te tagofia ai le areto ma le vai i le taimi o le faamanatuga?
Vaega 2
E mafai faapefea e le tagofia o le faamanatuga ona aumaia ia te a’u le avanoa sili atu i le mana o le Alii?
I le taimi o Lana auaunaga i sa Nifaē ma sa Lamanā, na tuu atu ai e Iesu Keriso i Ona soo le pule ma poloaiina i latou e faatautaia le faamanatuga i tagata o Lana Ekalesia. Sa Ia fetalai mai, “Ia outou tausisi e faia lenei mea e le aunoa … e pei lava ona ou tofitofi le areto ma faamanuia i ai ma avatu ia te outou” (3 Nifae 18:6; tagai foi fuaiupu 5). Ina ia potopoto soo ma aai ma feinu ma le agavaa i le faamanatuga o se poloaiga foi mai le Alii i o tatou aso (tagai i le Mataupu Faavae ma Feagaiga 20:75; 59:9).
Suesue e Sauniuni ai mo le Vasega
Faitau le 3 Nifae 18:7, 10–12; 20:8–9, ma vaavaai mo faamanuiaga ua folafola mai e le Alii ia i latou o e usiusitai ma le faamaoni i Lana poloaiga e faatautaia ma aai ma feinu i le faamanatuga.
Sa faamatalaina foi e Sister Cheryl A. Esplin, o lē sa avea muamua ma fesoasoani i le Au Peresitene Aoao o le Peraimeri ia faamanuiaga ua ofoina mai e le Alii ia i tatou e ala i le faamanatuga:
E avea le faamanatuga ma se aafiaga faaleagaga faamalosiau pe a tatou faalogo atu i tatalo o le faamanatuga ma toe tuuto atu i a tatou feagaiga. … A tatou aai ma feinu i le faamanatuga, tatou te molimau atu i le Atua o le a tatou manatua pea Lona Alo i taimi uma, ae lē na o le taimi puupuu o le sauniga faamanatuga. …
O le faamanatuga e maua ai se taimi mo se aafiaga moni faaleagaga a o tatou mafaufau i le mana togiola ma le gafatia o le Faaola e ala i Lana Togiola. …
… A o faaloaloa mai e sē o umiaina le perisitua lona lima e ofo mai ia i tatou ia faatusa paia, e peisea’i o loo faaloaloa mai e le Faaola Lava Ia Lona aao o le alofa mutimutivale, ma valaauliaina i tatou taitoatasi e aai ma feinu i meaalofa tāua o le alofa ua faaavanoa mai e ala i Lana taulaga togiola—o meaalofa o le salamo, faamagaloga, mafanafana, ma le faamoemoe.
O le tele ina tatou mafaufau loloto i le tāua o le faamanatuga, o le faatupulaia foi lena o lona paia ma le anoa ia i tatou. (“O Le Faamanatuga— O Se Faafouga mo le Agaga,” Liahona, Nov. 2014, 12, 13–14)
Talanoa e Sauniuni ai mo le Vasega
Aapa atu i se uo faatuatuaina po o se tagata o le aiga o loo faaalia le faatuatua ia Iesu Keriso. Fesili atu ia i latou po o le a se mea na latou faia e faateleina ai lo latou migao i le taimi o le faamanatuga pe fai atu ia i latou e faasoa mai pe faapefea ona latou taumafai e manatua pea le Faaola. Ia sauniuni e faasoa atu mea sa outou aoaoina ma lau vasega.
Vaega 3
E mafai faapefea ona ou iloa pe o o’u agavaa moni e ai ma inu i le faamanatuga?
Sa fautuaina e le Aposetolo o Paulo tagata o le Ekalesia ia ’suesue” i latou lava (1 Korinito 11:28) a o le’i aai ma feinu i le faamanatuga. Ona ia lapatai mai lea, ’Aua o le ai ma inu faaletatau ua ai ma inu i lona lava faasala, ina ua le faautauta o ia i le tino o le Alii” (1 Korinito 11:29; tagai foi fuaiupu 27–28; 3 Nifae 18:28–29). O le malaia o le faatapulaaina o le alualu i luma o se tasi (tagai Taiala i Tusitusiga Paia,’Faasalaga,” scriptures.ChurchofJesusChrist.org).
Na ofoina mai e Elder John H. Groberg, a o auauna ai i le Fitugafulu, le taitaiga lenei e iloilo ai le agavaa o le tagata lava ia:
Afai tatou te mananao e faaleleia i tatou lava (o le salamo lea) ma e lē o i lalo o se vaavaaiga a le perisitua, o lona uiga, i lo’u lava manatu, o loo agavaa i tatou. Ae afai tatou te lē fia salamo ma faaleleia, ma afai tatou te lē naunau e mulimuli i le taitaiga a le Agaga, e ao ona tatou fesili: Pe o tatou agavaa ea e tagofia le faamanatuga, pe o tatou tauemuina ea le faamomoega tonu o le faamanatuga, o le a avea lea ma sui o le salamo patino ma le faaleleia? (“O le Matagofie ma le Taua o le Faamanatuga,” Liahona, Iulai 1989, 48).
I le vitio “Sacrament Meeting” (mai le taimi 6:40 i le 7:30), ua ofoina mai ai e Elder David A. Bednar o le Korama a Aposetolo e Toasefululua se fautuaga tāua e faatatau i le agavaa e ’ai ma inu i le faamanatuga.
Faatino
A o e sauni e ’ai ma inu i le faamanatuga, mafaufau po o le a se mea e mafai ona e faia ia sili ai le aogā o lena aafiaga paia. E mafai ona amata au tapenapenaga e ala i le suesueina o lou olaga. Afai e te lagona le lē agavaa e ai ma inu i le faamanatuga, fai se taimi faatulagaina ma lou epikopo po o le peresitene o le paranesi ma faasoa atu ia te ia ou atugaluga.