“Lesona 16 Anomea mo le Sauniuniga o le Vasega: Taliaina o le Taulaga Togiola Sili a le Faaola” O Iesu Keriso ma Lana Talalelei e Faavavau Anomea a le Faiaoga (2023)
“Lesona 16 Anomea mo le Sauniuniga o le Vasega,” O Iesu Keriso ma Lana Talalelei e Faavavau Anomea a le Faiaoga
Lesona 16 Anomea mo le Sauniuniga o le Vasega
Taliaina o le Taulaga Togiola Sili a le Faaola
Na molimau mai Elder Jeffrey R. Holland o le Korama a Aposetolo e Toasefululua, “O le mea aupito sili na tupu ma le mea aupito sili ona taua na ausia i le gasologa o le talafaasolopito o tagata uma o le taulaga togiola a le Alii o Iesu Keriso” (“Molimau atu i le Toefuataiga,” Liahona, Ape. 2017, 3). A o e suesue, mafaufau i le mea na onosaia e le Alii e faamaea ai Lana taulaga togiola. Mafaufau foi pe mafai faapefea ona e faaalia le lotofaafetai mo mea ua Ia faia mo oe.
Vaega 1
Aisea ou te manaomia ai le Togiola a le Faaola?
O le Pa’ū o Atamu ma Eva o se laasaga tatau lea i luma i le fuafuaga a le Tama Faalelagi mo lo tatou alualu i luma e faavavau. Na tuuina mai ai ia i tatou se avanoa e o mai ai i le lalolagi, faaaoga le faitalia, atinae ni aiga, lagona le olioli, ma aoao ma tuputupu ae (tagai 2 Nifae 2:19–25).
Peitai o lenei laa agai i luma na aumaia ai foi se laa agai i lalo. Ona o le Pa’u, ua tofu maua ai e i tatou taitoatasi se tulaga pa’ū ma e oo i ai le oti faaleagaga ma le faaletino (tagai Alema 42:5–9, 14). E lē mafai ona tatou faatoilaloina nei tulaga e ala i a tatou lava taumafaiga po o galuega (tagai 2 Nifae 2:5, 8). Na aoao mai le perofeta o Iakopo e faapea a aunoa ma le “togiola aoao lē gata” a le Alii, o le a tatou “lē toe tutu” ma vavae ese e faavavau mai luma o le Atua (tagai 2 Nifae 9:7–9).
Suesue e Sauniuni ai mo le Vasega
Faitau le 2 Nifae 9:10, 21, ma vaavaai pe faapefea e Iesu Keriso ona laveai i tatou mai le oti faaletino ma le faaleagaga.
Na molimau mai Elder D. Todd Christofferson o le Korama a Aposetolo e Toasefululua i le ala e fesoasoani ai le Togiola a le Faaola ia i tatou e faatoilalo ia taunuuga o le Pa’ū:
E lua vaega o le Togiola a le Faaola. Muamua, ua togiola ai le solitulafono a Atamu atoa ai ma le Pa’ū o le tagata lea na sosoo ai e ala i le faatoilaloina o le mea e mafai ona ta’ua o aafiaga fitoitonu o le Pa’ū—o le oti faaletino ma le oti faaleagaga. O le oti faaletino ua malamalama lelei i ai; o le oti faaleagaga o le vavaeeseina o le tagata mai le Atua. … O lenei togiolaina mai le oti faaletino ma le oti faaleagaga e mo tagata uma lava e aunoa ma ni tuutuuga.
O le vaaiga lona lua o le Togiola a le Faaola o le togiola mai le mea e mafai ona faaupuina o taunuuga fitoitonu o le Pa’ū—o a tatou lava agasala e ese mai le solitulafono a Atamu. …
Ona tatou te tali atu mo i tatou lava ma tatou faia ni filifiliga, o le togiolaina o a tatou lava agasala e i ai la tuutuuga—o tuutuuga i le ta’uta’u atu ma le lafoaia o agasala ma liliu atu i se olaga faaleatua, po o se isi faaupuga, o tuutuuga o le salamo [tagai Mataupu Faavae ma Feagaiga 58:43]. (“Togiolaina,” Liahona, Me 2013, 109–10)
Mafaufau Loloto e Sauniuni ai mo le Vasega
O a ni ou mafaufauga ma lagona mo Iesu Keriso, i le iloaina ua na o Ia lava le ala e mafai ona faasaoina ai oe mai le oti faaleagaga, oti faaletino, ma aafiaga o au lava agasala? (Tagai Mosaea 3:17.)
Vaega 2
E mafai faapefea e le mafaufau loloto i puapuaga o le Faaola i Ketesemane ma luga o le satauro ona faateleina ai lou lotofaafetai mo Ia?
Ina ua uma ona talisua faatasi ma Ana Aposetolo i le Tausamaaga Mulimuli ma faailoa atu le faamanatuga ia i latou, sa ave i latou e Iesu i le Faatoaga o Ketesemane. O iina na tatalo ai le Faaola ma puapuagatia mo a tatou agasala.
Suesue e Sauniuni ai mo le Vasega
Faitau lemu ma le toto’a i le Mareko 14:33–36, Luka 22:43–44, ma le Mataupu Faavae ma Feagaiga 19:18 . Taumafai e vaai faalemafaufau i le tau na totogi e Iesu Keriso e togiola ai a tatou agasala. E mafai foi ona e matamata i le “Ua Puapuagatia le Faaola i Ketesemane” (8:30).
Ina ua uma ona mafatia i tiga e lē mafuatia i Ketesemane, sa faalataina Iesu. “Sa pue faapagotaina o Ia ma tausalaina i moliaga sese” (“O Le Keriso Soifua: O Le Molimau a le Au Aposetolo,” ChurchofJesusChrist.org). A o i ai i le tausiga o taitai faalelotu Iutaia, sa tauemuina le Faaola, tuufeanu i ai, fepō, ma tuuaia sese (tagai Mataio 26:47–68).
Ona sa latou lē maua le pule e fasiotia ai Iesu, o lea na ave ai o Ia e taitai Iutaia ia Pilato, le kovana Roma. I le fefe ai i tagata, na faasalaina ai e Pilato ia Iesu i le oti e ala i le faasatauroga. I sauniuniga mo le faasatauroga, sa faatigaina Keriso, ona tauemuina lea ma le sauā e fitafita Roma. Sa latou tutu’i fao i Ona lima ma vae ma sii ae o Ia i luga o se satauro i le va o pagota e toalua (tagai Mataio 27:11–38). Mafaufau e matamata i le “Ua Faatigainaina ma Faasatauroina Iesu” (4:49) o se vaega o lau suesuega.
Na aoao mai Elder Bruce R. McConkie o le Korama a Aposetolo e Toasefululua e faapea, a o tautau Iesu i luga o le satauro, “o tiga uma e le iu ma tiga faalealofa o Ketesemane na toe tutupu mai” (“O Le Mana Faamama o Ketesemane,” Liahona, Ape. 2011, 58). Ina ua mavae le pe a ma le ono itula, “Ua alaga Iesu ua leotele, ua faapea atu, Eloi, Eloi, lama sapatani? o lona uiga, pe a faamatalaina, Lo’u Atua e, lo’u Atua e, se a le mea ua e tuulafoai mai ai ia te a“u?” (Mareko 15:34).
Na saunoa Elder Jeffrey R. Holland o le Korama a Aposetolo e Toasefululua i le mea lenei e uiga i lenei tagi mafatia (po o le, nai lo le faitauina o le faamatalaga lenei, e mafai ona e matamata i le “Sa Leai Se Tasi na I Ai Faatasi ma Ia” [2:28]):
Ina ia mafai ona atoatoa le taulaga silisili ese a Lona Alo e faapei ona ofofua mai ma faia toatasi lava, na aveesea e le Tama i sina taimi ititi mai ia Iesu le mafanafana o Lona Agaga, le lagolago atu o Lona lava i ai patino. … Mo Lana Togiola ina ia lē gata ma faavavau, na ao ona lagona [e Iesu Keriso] pe faape“i le oti e lē nao le faaletino ae faaleagaga, ia iloa ai pe na faape“i pe a aveesea le Agaga mamana, ma le tuua toatasi ai o se tasi e lagonaina le matuā tuulafoaiina, faanoanoa, ma le aunoa ai ma se faamoemoe. …
… Talu ai sa savalia e Iesu se ala umi, ma le tuuatoatasi na o ia lava, tatou te lē tau faia lena mea. (”E Leai Se Tasi na I Ai Faatasi ma Ia,” Liahona, Me 2009, 87–88)
Tusi Faamaumau Ou Manatu
Mafaufau i le tau na totogi e le Faaola i Ketesemane ma luga o le satauro e togiola ai oe, ma tusifaamaumau ou mafaufauga ma lagona. Mafaufau e tuuina atu se tatalo e faailoa atu ai lou lotofaafetai i le Tama Faalelagi mo le taulaga togiola a Iesu Keriso mo oe.
Vaega 3
O le a se mea e mafai ona ou faia e talia ai le taulaga togiola a le Alii?
E tāua le malamalama ma faailoa atu le lotofaafetai mo le puapuagatia o le Alii mo oe. Ae e mafai ona e faia nisi mea e faaalia ai lou faatuatua i le moni o Lana Togiola pe a e filifili e salamo i au agasala. (E mafai ona e vaaia se faataitaiga o lenei mea i le 3 Nifae 9:12–13, 21–22, lea na valaaulia ai e le Alii sa Nifaē ma sa Lamanā ia salamo a o lei asiasi atu o Ia ia i latou.)
Suesue e Sauniuni ai mo le Vasega
Faitau le Mataupu Faavae ma Feagaiga 18:10–14, ma vaavaai mo le sootaga i le va o lo tatou tāua faaletagata lava ia, le Togiola a le Alii, ma le salamo.
Na saunoa Peresitene Russell M. Nelson e uiga i le meaalofa a le Alii o le salamo:
Ua toatele nauā tagata e mafaufau i le salamo o se faasalaga—o se mea e ao ona aloese mai ai vagana ai tulaga e sili ona matuiā. Ae o lenei lagona o le faasalaina e mafua mai ia Satani.
E leai se mea e sili atu ona saoloto, sili atu ona malualii, pe sili atu ona tāua i lo tatou alualu i luma faaletagata lava ia nai lo se taulaiga masani i aso taitasi i le salamo. O le salamo e lē o se mea e faa-tasi ona tupu; ae o se faagasologa. O le ki lea i le fiafia ma le filemu o le mafaufau. Pe a vaavaalua ma le faatuatua, e tatala e le salamo lo tatou faitotoa e maua ai le mana o le Togiola a Iesu Keriso. (“E Mafai Ona Tatou Faia ia Lelei Atu ma Ia Tatou Lelei Atu,” Liahona, Me 2019, 69).
Faatino
O le a lou uiga faaalia i le salamo? O le a se mea e mafai ona e faia e avea ai le salamo o se aafiaga e faatotonugalemu ia Keriso ma fiafia i lou olaga? Mafaufau e seti ma tusifaamaumau se sini, ma ia faamanatu soo. (E mafai ona e matamata i le “Salamo: O Se Filifiliga Fiafia” [4:36], faatasi ai ma Elder Dale G. Renlund o le Korama a Aposetolo e Toasefululua, e faaloloto ai lou aoaoina.)