“Lesona 17 Anomea mo le Sauniuniga o le Vasega: Mauaina o le Faamoemoe i le Manumalo o Iesu Keriso i le oti,” O Iesu Keriso ma Lana Talalelei e Faavavau Anomea a le Faiaoga (2023)
“Lesona 17 Anomea mo le Sauniuniga o le Vasega,” O Iesu Keriso ma Lana Talalelei e Faavavau Anomea a le Faiaoga
Lesona 17 Anomea mo le Sauniuniga o le Vasega
Mauaina o le Faamoemoe i le Manumalo o Iesu Keriso i le Oti
O o tatou tino o se faamanuiaga! O le mea sili, e faigofie ona lagona faapena pe a tatou ola maloloina. Ae faapefea pe a tatou oo i na mea e pei o le matelāina, faama’i, manu’aga, po o manaoga faapitoa? Pe ua e vaai i nisi taimi i aafiaga faataumaoi o le matua i se tagata o le aiga pe oo foi i le maliu o se tasi e pele ia te oe? A o e mafaufau e uiga i mafatiaga faaletino ma le oti, mafaufau pe mafai faapefea e le faalolotoina o lou talitonuga ia Iesu Keriso ma Lona Toetu ona aumaia ia te oe le faamoemoe ma le filemu.
Vaega 1
E mafai faapefea e le suesueina o tala o le Toetu o le Faaola ona faamalosia ai lou faatuatua?
Ina ua maea ona faasatauroina Iesu Keriso, sa tuuina Lona tino i se tuugamau. I le taeao o le aso lona tolu, na iloa ai e Maria le Makatala ua gaogao le tuugamau, ma sa tagi o ia. Sa fesili atu ni agelu se toalua ia te ia pe aisea ua tagi ai. Sa tali atu o ia, “Auā ua latou ave ese lo’u Alii, ou te lei iloa foi le mea ua latou tuuina ai o ia” (Ioane 20:13).
Suesue e Sauniuni ai mo le Vasega
Faitau le Ioane 20:14–18, ma mafaufau pe faape’ī le avea ma molimau vaaitino muamua o le Faaola toetu. (O le fasifuaitau “Aua e te pa’i mai ia te au” ua faamanino mai “Aua e te taofi mai ia te au” i le Faaliliuga a Iosefa Samita. Na fautua mai Elder Bruce R. McConkie o le Korama a Aposetolo e Toasefululua atonu na fetalai atu le Alii ia Maria, “E lē mafai ona e taofia au iinei, auā o le a ou alu a’e i lo’u Tama” [The Mortal Messiah: From Bethlehem to Calvary (1981), 4:264]. E mafai foi ona e matamata i le vitiō “Jesus Is Resurrected” [4:05] e maua ai se malamalamaaga atili i le Toetu o Iesu.)
I le avea ai ma se vaega o Lana Togiola, o le Faaola o le uluai tagata lea i lenei lalolagi na toetu mai. Sa toe faatasia Lona agaga ma Lona tino ua atoatoa, ma faavavau. Ua molimau mai Aposetolo o aso e gata ai: “I Lona tulaga o se Alii Toetu, na Ia asiasi atu ai ia i latou na alofagia e ia i le olaga. Na Ia auauna atu foi i Ana ‘isi mamoe’ (Ioane 10:16) i Amerika anamua. I le lalolagi i ona po nei, sa faaali atu ai o Ia ma Lona Tama i le tama o Iosefa Samita” (“O Le Keriso Soifua: O Le Molimau a le Au Aposetolo,” ChurchofJesusChrist.org).
O le Toetu o Iesu Keriso o se tasi o mea aupito sili ona faamaumauina ma le faaeteete i tusitusiga paia (tagai Russell M. Nelson, “Life after Life,” Ensign, May 1987, 8–10). Ina ia faalolotoina lau molimau i le Toetu o le Faaola, faitau se tasi pe sili atu o tala nei o molimau pe matamata i vitiō e faatatau i ai:
-
Faitau le Luka 24:36–40, pe matamata i le “Ua Faaali Mai le Alii Toetu o Iesu Keriso i Aposetolo” (2:19).
2:19 -
Faitau le Luka 24:13–33, pe matamata i le “Ua Faaali Mai Keriso i le Ala i Emau” (3:32).O Keriso i le Ala i Emau” (3:32).
3:32 -
Faitau le Ioane 20:24–29, pe matamata i le “Amuia I Latou O E Lei Vaai, ae Talitonu Pea” (2:29).
2:29 -
Faitau le 3 Nifae 11:12–17, pe matamata le vitiō o le Tusi a Mamona “Ua Faaalia e Iesu Keriso o Ia Lava i le Malumalu” (5:43).
5:35 -
Faitau le Iosefa Samita—Talafaasolopito 1:16–17; Mataupu Faavae ma Feagaiga 76:22–24; 110:1–4.
Tusi Faamaumau Ou Manatu
Faaalu ni nai minute e tusifaamaumau ai ou mafaufauga ma lagona a o e suesueina se tasi pe sili atu o nei tala.
Vaega 2
E mafai faapefea e se malamalama loloto atu i le Toetu ona faateleina lo’u faatuatua i le Tama Faalelagi ma Iesu Keriso?
O lou tino e i ai se tāua e faavavau ma o le ki lea i lou fiafia i lenei olaga ma le olaga a sau. Na ta’u atu e le Alii i le Perofeta o Iosefa Samita faapea “o le agaga ma le elemene [tino], ua soofaatasi e lē matuueseeseina, e mauaina se atoatoaga o le olioli; ma a tuueseese, e lē mafai e le tagata ona maua se atoatoaga o le olioli” (Mataupu Faavae ma Feagaiga 93:33–34). I se faaaliga o le lalolagi o agaga, na saunoa ai Peresitene Iosefa F. Samita o e ua maliliu “sa vaai i le umi o le toesea o o latou agaga mai o latou tino o se pologa” (Mataupu Faavae ma Feagaiga 138:50). Mafaufau i le tāua o le Toetu i le fuafuaga a le Atua mo Ana fanau.
I lana tusi i le Au Paia i Korinito, sa aoao atu ai e le Aposetolo o Paulo e faapea afai e le’i toetu mai Iesu Keriso mai e ua oti, “po ua faaleaogā la matou tala’i, ua faaleaogā foi lo outou faatuatua” (1 Korinito 15:14).
Suesue e Sauniuni ai mo le Vasega
Faitau le 1 Korinito 15:17–22 ma le 2 Nifae 9:8–9 (e mafai foi ona e matamata ile “Toetutu o e ua Oti” [1:39]), ma mafaufau po o le a le mea semanu e tupu ia i tatou pe ana lē toetu Iesu Keriso.
Ua fesoasoani Elder D. Todd Christofferson o le Korama a Aposetolo e Toasefululua ia i tatou ia malamalama i nisi o faatatauga faaleaoaoga faavae faaopoopo o le Toetu:
Mafaufau mo sina taimi i le tāua o le Toetu i le taliina ai loa o le faasinomaga moni o Iesu le Nasareta ma finauga tetele ma fesili faalefilisofia o le olaga. Afai e moni lava na toetu Iesu, o lona uiga e mautinoa lava o Ia o se tagata paia. E leai se tagata ola ua i ai ia te ia lava se mana e toe ola mai ai pe a oti. Ona sa toetu o Ia, e lē mafai ai la ona faapea o Iesu ua na o se kamuta, se faiaoga, se aoao, po o se perofeta. Ona sa toetu o Ia, e ao la ona avea ai Iesu ma se Atua, o le Alo lava e Toatasi na Fanaua o le Tama.
O lea la, o mea sa Ia aoaoina e moni; e lē mafai ona ta’upepeloina le Atua.
O lea la, o Ia o le Foafoa o le lalolagi, e pei ona Ia fetalai mai.
O lea la, e moni le lagi ma seoli, e pei ona Ia aoao mai.
O lea la, e i ai se lalolagi o agaga lea sa Ia asiasi i ai ina ua mavae Lona maliu.
O lea la, o le a Ia toe afio mai, e pei ona folafolaina e agelu, ma “nofotupu lava Keriso i le lalolagi” [Mataupu Faavae o le Faatuatua 1:10).
O lea la, o le a i ai se toetutū ma se faamasinoga mulimuli mo tagata uma. (“O Le Toetu o Iesu Keriso,” Liahona, Me 2014, 113)
O le vaavaai atu i le Toetu o le Faaola mai se vaaiga e faavavau, na aoao mai ai Ezra Taft Benson:
O le mea aupito silisili o le talafaasolopito o mea ia ua aafia ai le aofaiga aupito silisili o tagata mo vaitau aupito uumi. O lea tulaga, e leai se mea na tupu e sili atu ona tāua i tagata taitoatasi po o atunuu nai lo o le toetu o le Matai. (“O Le Uiga o le Eseta,” Liahona, Ape. 1993, 3.
Mafaufau Loloto e Sauniuni ai mo le Vasega
Mafaufau i le tāua o le Toetu o Iesu Keriso, o le a se mea e mafai ona e faia e faamalosia ai lou malamalama ma lau molimau e uiga i ai?
Vaega 3
E mafai faapefea e se molimau o le Toetu ona aumaia ia te au le filemu ma le faamoemoe?
Mafaufau i luitau faaletino na feagai ma oe po o tagata e latalata atu ia te oe pe o loo feagai ai nei foi. Mafaufau i tagata o le aiga po o ni uo mamae ua maliliu. Na ofoina mai e Elder Paul V. Johnson o le Fitugafulu le vaaiga lenei e uiga i nei aafiaga faigata faaletino:
O i tatou taitoatasi e i ai ni tapulaa ma ni vaivaiga faaletino, faalemafaufau, ma faalelagona. O nei luitau, o nisi e foliga mai e lē mafai ona faatoilaloina i le taimi nei, o le a mulimuli ane foiaina. E leai se tasi o nei faafitauli o le a mafatia ai i tatou pe a mavae le toetutu. …
… O le vavega o le toetutu, le faamalologa tupito, e lē mafai ona ausia e metotia faafomai faaonaponei. Ae e lē sili atu i le mana o le Atua. …
… Mo i latou uma sa maliu se tamaitiiti pe tagi i luga o le pusa maliu o se toalua pe faavauvau ona o le maliu o se matua po o se tasi e pele ia i latou, o le Toetu o se puna o le faamoemoega sili. O le a avea ma se aafiaga mamana pe a tatou toe vaai ia i latou—e lē gata o ni agaga ae o loo i ai i ni tino toetutū. (“E Leai Foi Se Toe Oti,” Liahona, Me 2016, 122, 123)
I le avea ai ma se molimau o le Keriso toetu, sa olioli ai le Aposetolo o Paulo i le manumalo o le Faaola i le oti.
Suesue e Sauniuni ai mo le Vasega
Faitau le 1 Korinito 15:53–55, ma mafaufau pe mafai faapefea e le faalagolago i le Toetu o le Faaola ona aveesea le tui o le oti.
Manatua: O le faaupuga “tino i’u vale” iinei o lona uiga o le a lē toe oo o tatou tino i le faaleagaina po o le oti.
Faatino
E mafai faapefea ona e faaaogaina mea ua e aoaoina e uiga i le Toetu e faamalosia ai lau molimau? O ai e te iloa e mafai ona faamanuiaina e ala i le faalogo i ou mafaufauga ma lagona e uiga i le Toetu o le Faaola? Mafaufau e faasoa atu ou manatu ma lagona i lena tagata.