Lesona 24 Anomea mo le Sauniuniga o le Vasega

Faatuatuaina o Iesu Keriso o lo Tatou Faamasino

Vaai faalemafaufau i manatu ma lagona atonu o ia te oe pe ana faapea e valaaulia oe i le asō i le afioaga o le Alii. I se aso, “O le a tatou tutū atu taitoatasi ina ia faamasinoina e Ia e tusa ma a tatou galuega ma manaoga o o tatou loto” (O Le Keriso Soifua: O Le Molimau a le Au Aposetolo,” ChurchofJesusChrist.org; tagai foi 2 Nifae 9:15). O le auala tatou te oo ai i le i ai i le afioaga o le Faaola o le a faalagolago lea i le ala ua tatou saunia ai i tatou lava (tagai Alema 5:16–25). A o e suesue, mafaufau po o le a se mea e mafai ona e faia ina ia e lagona ai le toafimalie ma le talitonuga i Lona afioaga i le Faamasinoga Mulimuli (tagai Mataupu Faavae ma Feagaiga 121:45).

Vaega 1

Aisea e mafai ai ona ou faatuatuaina Iesu Keriso e avea ma o’u faamasino?

Ona o le natura paia o le Faaola ma Lana Togiola e lē i’u, ua mafai ai ona tatou mautinoa o le a avea o Ia ma se “Faamasino amiotonu” (Mose 6:57) pe a oo mai lena aso tatou te tutū ai i Ona luma e tuuina mai se tala o o tatou olaga (tagai Roma 14:10–12). O le a Ia fuafuaina atoatoa le tikeri o le mamalu ua tatou agavaa e maua. I le tusi o Salamo tatou te faitau ai, “O Ia lava na te faamasinoina le atu laulau ma le tonu, atoa ma nuu i lona faamaoni” (Salamo 9:8; tagai foi 96:13).

I le saunoaga e uiga i agavaa o le Alii e avea ma o tatou faamasino, na saunoa ai Elder Richard G. Scott o le Korama a Aposetolo e Toasefululua:

O ia Iesu Keriso le taui e lē mafai e se tasi ona maua. Sa avea o Ia ma Atua, o Ieova, a o le’i fanau mai o Ia i Peteleema. E lē gata ina tuuina atu ia te Ia e Lona Tama pele Lona tino agaga, ae o Iesu foi o Lona Atalii Pele e Toatasi i le tino. Sa soifua lo tatou Matai i se soifuaga atoatoa e leai se agasala, ma o lea foi na saoloto ai o ia mai poloaiga a le faamasinoga tonu. E atoatoa o Ia i soo se uiga, e aofia ai le alofa, agaalofa, onosai, usiusitai, faamagalo atu, ma le lotomaualalo. …

Ou te molimau atu o puapuaga ma mafatiaga e lē mafai ona mafaufauina i le mafaufau i se tau e lē mafuatia, na maua ai e le Faaola Lana aiā tatau e avea ai ma o tatou Fautua, o lo tatou Togiola, ma lo tatou Faamasino Mulimuli. (“E Mafai e le Togiola Ona Faamautu Lou Filemu ma le Fiafia,” Liahona, Nov. 2006, 42)

Na saunoa Dallin H. Oaks peresitene o le Au Peresitene Sili, o lē sa avea muamua ma faamasino o le Faamasinoga Maualuga a Iuta, e uiga i le tulaga tulaga ese o le Faaola e faamasinoina i tatou:

O Lona silisili ese ua Ia maua ai se silafia atoatoa i a tatou amioga ma manaoga uma, e aofia uma ai ē lē salamo pe lē suia ma ē ua salamo po o ē amiotonu. O le mea lea, i le mavae ai o Lana faamasinoga o le a tatou ta’utino atu “ua tonu ana faamasinoga” (Mosaea 16:1). (“O Le Fuafuaga Sili,” Liahona, Me 2020, 96)

Mafaufau Loloto e Sauniuni ai mo le Vasega

Mafaufau i se uiga o Iesu Keriso lea e faateleina ai lou talitonuga o le a avea o Ia ma se faamasino amiotonu. Mo se faataitaiga, atonu e te mafaufau pe faapefea ona Ia alofa, silafia mea uma, malosi uma, poto, alofa mutimutivale, amiotonu, agaalofa, faapalepale, agamalu, po o le loto faamagalo. Ia saunia e faasoa atu le uiga na tou filifilia ma lau vasega.

Vaega 2

O le a faapefea ona faamasinoina a’u?

O le mafaufau e uiga i le Faamasinoga Mulimuli e mafai ona lagonaina ai le maofa ma le lofituina. O nisi taimi atonu tatou te taumānatunatu pe o le a i ai se taimi o le a tatou lagona ai le saunia e faamasinoina e le Alii. O le tusi o Faaaliga o loo aumaia ai upumoni tāua e uiga i le ala o le a faamasino ai i tatou e le Alii.

Suesue e Sauniuni ai mo le Vasega

Faitau le Faaaliga 20:12, ma vaavaai mo se auala se tasi o le a faamasinoina ai i tatou.

Na aoao mai Peresitene Harold B. Lee:

O “tusi” o loo tautala i ai, o faamaumauga ia [o a outou amio po o galuega] o loo teuina i le lalolagi… O le tusi o le ola o le faamaumauga lea o loo teuina i le lagi. (Aoaoga a Peresitene o le Ekalesia: Harold B. Lee [2000], 226–27)

I se faaaliga o le malo selesitila, sa maua ai e le Perofeta o Iosefa Samita se malamalamaaga faaopoopo i le Faamasinoga Mulimuli. “Aua o Aʼu, o le Alii, o le a faamasinoina tagata uma e tusa ma a latou galuega, e tusa ma le manaoga o o latou loto” (Mataupu Faavae ma Feagaiga 137:9; ua faaopoopo le faamamafa). Na aoao mai le perofeta o Alema o le a tatou tali atu foi mo a tatou upu (tagai Alema 12:14).

Na aoao mai Peresitene Oaks o le Faamasinoga Mulimuli e sili atu, e ui i lea, nai lo se iloiloga o ō tatou mafaufauga, upu, ma galuega:

O le Faamasinoga Mulimuli ua lē na o se iloiloga o le aofaiga atoa o amioga lelei ma leaga—o mea ua tatou faia. O se faailoaga o aafiaga mulimuli o a tatou faatinoga ma manatu—o tagata ua avea ai i tatou. … O poloaiga, sauniga, ma feagaiga o le talalelei e lē o se lisi o ni tupeteu ua manaomia e faia i ni teugatupe faalelagi. O le talalelei a Iesu Keriso o se fuafuaga lea ua faaali mai ai ia i tatou le auala e avea ai ma tagata ua finagalo lo tatou Tama Faalelagi e avea ai. (“The Challenge to Become,” Ensign, Nov. 2000, 32)

E tāua le manatua e tusa lava po o le a lo tatou taumafai ma le filiga e ola i le talalelei, a aunoa ma le fesoasoani a le Alii, e lē mafai lava ona avea i tatou ma tagata e finagalo le Tama Faalelagi tatou te avea ai. O le mea e faafetai ai, o Iesu Keriso e lē gata o lo tatou faamasino ae o lo tatou “fautua i le Tama” (Mataupu Faavae ma Feagaiga 110:4; tagai foi 1 Ioane 2:1).

Na aoao mai Peresitene Russell M. Nelson e faapea o le fautua o lona uiga “o se leo mo” po o “se tasi e aioi atu mo se isi” (“Jesus the Christ—Our Master and More” [faigalotu a le Iunivesite o Polika Iaga, Feb. 2, 1992], 4, speeches.byu.edu). I le avea ai ma o tatou Fautua, O Iesu Keriso “ua silafia vaivaiga o le tagata ma le ala e fesoasoani ai ia i latou o e ua faaosoosoina” (Mataupu Faavae ma Feagaiga 62:1). O le a Ia aioi atu mo i tatou ma fautua mo i tatou pe a tatou faatinoina le faatuatua ia te Ia (tagai Moronae 7:28; 2 Nifae 2:9; Eperu 4:15–16).

Na saunoa Elder Dale G. Renlund o le Korama a Aposetolo e Toasefululua e uiga i le matafaioi a Iesu Keriso o lo tatou Fautua:

O le fautua ai o Keriso i le Tama mo tatou e lē o tetee atu [i le fuafuaga]. Iesu Keriso … e lē lagolagoina soo se mea nai lo le finagalo o le Tama talu mai le amataga. E tapuā’ia ma patipatia ma le lē masalosalo e le Tama Faalelagi o tatou tulaga manuia.

O le fautua ai o Keriso, i ni vaega, o le faamanatu mai lea ia i tatou ua Ia totogia a tatou agasala ma e leai se tasi e lē aofia i le alofa mutimutivale o le Atua. (“Ina Filifili Ia o Outou i le Aso Nei,” Liahona, Nov. 2018, 104–5)

I se faaaliga na maua e le Perofeta o Iosefa Samita i le 1831, sa faamatala ai e Iesu Keriso le matafaioi o Lana Togiola a o Ia fautuaina i latou o e talitonu ia te Ia.

Suesue e Sauniuni ai mo le Vasega

Faitau le Mataupu Faavae ma Feagaiga 45:3–5, ma vaavaai mo le auala o loo fautuaina ai e Iesu Keriso la tatou tagi.

Mafaufau Loloto e Sauniuni ai mo le Vasega

Vaai faalemafaufau i le faalogo atu i le Faaola o aioi atu mo lau tagi i luma o le Tama. Faamata o ā ni ou lagona i le faalogo atu ia te Ia o fetalai atu mo oe?

Vaega 3

E faapefea ona ou iloiloina lelei a’u sauniuniga mo le Faamasinoga Mulimuli?

Na aoao mai Peresitene Oaks, “O le faamoemoega o lenei Faamasinoga Mulimuli o le fuafua lea pe tatou te ausia mea na faamatalaina e Alema o se “liuga tele o le loto” (“Faamamaina e le Salamo,” Liahona, Me 2019, 93). O lenei suiga e ausia e ala i le Togiola a Iesu Keriso ma le salamo faamaoni.

Ina ua aoao atu e Alema le nuu o Saraemila, sa ia fai atu ia i latou ni fesili ina ia mafai ona latou iloiloina le tulaga o ō latou loto ma fuafua ai pe na faapefea ona latou saunia e faamasinoina e le Faaola (tagai Alema 5:14).

Suesue e Sauniuni ai mo le Vasega

Faitau le Alema 5:15–16, 19, 26–27, ma faaalu sina taimi e mafaufau loloto ai ma le faamaoni a o e mafaufau i au tali i fesili. Faailoa se fesili faapitoa e ta’u mai ai se vaega e mafai ona e faaleleia i le taimi nei.

A o e mafaufau i mea e mafai ona e faia e saunia lelei atili ai mo le Faamasinoga Mulimuli, ia manatua le fautuaga poto lenei mai ia Elder Larry R. Lawrence o le Fitugafulu:

E mafai e le Agaga ona faaali mai ia i tatou o tatou vaivaiga, ae e mafai foi ona Ia faaali mai ia i tatou o tatou malosiaga. O nisi taimi e tatau ona tatou fesili po o a mea ua sa’o ona tatou faia ina ia mafai e le Alii ona musuia ma uuna’ia i tatou. … E olioli o Ia i taimi uma tatou te alualu ai i luma. Ia te Ia, o le itu tatou te agai i ai e sili atu ona tāua nai lo le tatou saoasaoa.

Ia naunauta’i, uso e ma tuafafine, ae aua lava ne’i faavaivai. (“Se A se Mea O Toe Ou Te Lei Faia?” Liahona, Nov. 2015, 35)

Tusi Faamaumau Ou Manatu

Faaalu ni nai minute e tusi ai se tali i le fesili na e faailoa mai i upu a Alema lea na fautuaina mai ai se mea e mafai ona e galue ai i le taimi nei. E mafai foi ona e faailoa maia se fesili o loo fautuaina mai ai se mea o loo sa’o ona e faia ma tusi foi se tali mo lena fesili.

E Te Fia Aoao Atili? (Tuu i le faitalia)

O fea e mafai ona ou aoao atili ai e uiga i le Faamasinoga Mulimuli?

O le vitiō “Final Judgment” (3:50) o loo aumaia ai se vaaiga aoao o lenei vaega o le fuafuaga o le faaolataga. Ina ia aoao atili e uiga i malo o le mamalu o le a tatou maua pe a mavae le Faamasinoga Mulimuli, faitau le Mataupu Faavae ma Feagaiga 76:50–111.

Aisea o le a faamasinoina ai nisi tagata i se tulaga faatonuina maualuga atu nai lo isi?

I le Luka 12:41–48, sa faamatala ai e Iesu Keriso le uiga o le faataoto i le auauna faamaoni ma le mafuaaga o le a faamasinoina ai nisi tagata i se tulaga faatonuina maualuga atu i le Faamasinoga Mulimuli (tagai foi Mataupu Faavae ma Feagaiga 82:1–3). E mafai foi ona e maimoa i le “Much Is Required” (1:45) e aoao atili ai.

O a ituaiga o faamasinoga e na o le Atua e mafai ona faia?

I le lauga “’Judge Not’ and Judging” (Ensign, Aok. 1999, 6–13), sa talanoaina ai e Peresitene Oaks le eseesega i le va o faamasinoga mulimuli ua faapolopolo mo le Atua ma faamasinoga i le taimi nei e tatau ona tatou faia.