“Lesona 25 Anomea mo le Sauniuniga o le Vasega: Taumafai e Avea o se Soo Faamaoni o Iesu Keriso,” O Iesu Keriso ma Lana Talalelei e Faavavau Anomea a le Faiaoga (2023)
“Lesona 25 Anomea mo le Sauniuniga o le Vasega,” O Iesu Keriso ma Lana Talalelei e Faavavau Anomea a le Faiaoga
Lesona 25 Anomea mo le Sauniuniga o le Vasega
Taumafai e Avea o se Soo Faamaoni o Iesu Keriso
O aso taitasi, tatou te maua ai se avanoa e faamamalu ai a tatou feagaiga o le papatisoga e ala i le avea ma se soo moni o Iesu Keriso. I le avea ai ma Ona soo, tatou te tautino atu e mulimuli i le Faaola ma ola e tusa ai ma Ana aoaoga (tagai Mataupu Faavae ma Feagaiga 41:5). O le mea e lelei ai, o le avea ma soo e lē o se tūuga po o se tauvaga. Ae o se malaga i le olaga atoa tatou te faia faatasi ai ma le lagolagosua a Iesu Keriso ma isi soo (tagai Mosaea 18:8–10). A o e suesue i upumoni o loo aoaoina i lenei iunite mulimuli, mafaufau i le fesoasoani ma faamanuiaga e mafai ona e maua a o e taumafai e avea ma se soo faamaoni o Iesu Keriso.
Vaega 1
O le a se mea e mafai ona ou aoaoina e uiga i le avea ma soo mai le faataitaiga a le Faaola?
O se soo o sē e mulimuli ma le faamaoni. Ma e leai se tasi na te faaalia le avea ma soo e pei o Iesu Keriso. O Lona avea ai ma soo a o Ia mulimuli i le finagalo o Lona Tama ma Lona alofa mo isi o ni faataitaiga matagofie ia mo i tatou. I ni nai itula a o le’i puapuagatia le Faaola i le Faatoaga o Ketesemane e faataunuu ai le finagalo o Lona Tama, sa Ia tu ai e mulumulu ma le agamalu vae o Ana Aposetolo. Na faamatalaina e Elder Jeffrey R. Holland o le Korama a Aposetolo e Toasefululua lenei mea na tupu:
A o saunia le tausamaaga paia o lena Paseka mulimuli, sa lofituina Iesu i lagona ootia loloto. E na o ia lava na silafia le mea o le a oo mai. …
I le totonugalemu o lenei talisuaga ma na manatu, sa tulai filemu ai Keriso, ma fusia o ia faapei o se pologa po o se auauna, ma tootuli e mulumulu vae o le au Aposetolo. … Na oo i lona toe itula—ma tala atu—ona avea ma a latou auauna na lagolagoina. (“He Loved Them unto the End,” Ensign, Nov. 1989, 25)
I le mulimuli ai i lenei auaunaga paia, sa aoao atu ai e Iesu Ana Aposetolo i upumoni ia e mafai ona taialaina ai i tatou uma a o tatou saili e avea ma Ona soo.
Suesue e Sauniuni ai mo le Vasega
Faitau le Ioane 13:14–17, 34–35; 14:15, ma mafaufau e faailoga mea ua e aoaoina e uiga i le avea ai ma se soo o Iesu Keriso.
Na saunoa Sister Silver H. Allred, o lē sa avea ma fesoasoani i le Au Peresitene Aoao o le Aualofa:
E tatau ona tatou fealofani ma feauaunaa’i. O le mea moni, o le fatu lea o le avea ai ma soo i le Ekalesia moni a Iesu Keriso. (“O Le Fatu o le Avea ai ma Soo,” Liahona, Me 2011, 84)
Mafaufau Loloto e Sauniuni ai mo le Vasega
Mafaufau i se tasi mai tusitusiga paia pe mai lou lava olaga o lē ua faaalia le ute o le avea ma soo. Ia saunia e faasoa atu lau faataitaiga i le vasega.
Vaega 2
O le a se mea e ono manaomia mai ia te a’u o se soo o Iesu Keriso?
Na faataatia e Iesu le tulaga lenei mo le avea ma soo, “A fia mulimuli mai se tasi ia te au, aua le usiusitai o ia ia te ia, a ia ave e ia lona satauro i aso fai soo, i le mulimuli mai ai ia te au” (Luka 9:23). Sa ia faamalamalama mai, “Aua e ave e se tagata lona satauro, o le faafitia lea e ia lava o le amioleaga, ma tuinanau uma faalelalolagi, ma tausi a’u poloaiga” (Faaliliuga a Iosefa Samita, Mataio 16:26; tagai foi fuaiupu 25 [i le faaopoopoga i le Tusi Paia]).
Na aoao mai Elder Ulisses Soares o le Korama a Aposetolo e Toasefululua:
O le aveina i o tatou luga o lo tatou satauro ma mulimuli i le Faaola e manaomia ai i tatou ia mulimuli i Ana faataitaiga ma tauivi ia avea e faapei o Ia, ia feagai ma le onosai i tulaga o le olaga, faafitia ma le inoino i tuinanau o le tagata natura, ma faatalitali i le Alii. (“Ave Lo Tatou Satauro,” Liahona, Nov. 2019, 115-16)
Sa fesili se taulealea mauoa i le Faaola pe o le a se mea na te faia ia maua ai le ola e faavavau.
Suesue e Sauniuni ai mo le Vasega
Faitau le Mataio 19:16–21, ma vaavaai mo mea e lua: (1) O le a se mea ua faagaeetia ai oe e uiga i fesili a le taulealea? (2) O le a le mea na aoao atu e le Faaola i le taulealea e uiga i le avea ma soo?
Na aoao mai e Elder Larry R. Lawrence o le Fitugafulu le ala e mafai ai ona tatou faaaogaina lenei tala faatusi paia i o tatou olaga:
Ou te fia fautuaina ia taitasi outou ma auai i se faatinoga faaleagaga i se taimi vave mai, atonu o nanei a o faia a outou tatalo. Ia fesili atu ma le agaga maualalo i le Alii le fesili lenei: “O le a le mea o loo taofia a’u mai le alualu i luma?” I nisi upu: “Se a se mea o toe ou te le’i faia?” Ona faatalitali lea ma le filemu mo se tali. Afai e te faamaoni, o le a vave ona manino le tali. O le a avea ma faaaliga e faamoemoeina mo na o oe lava. (“Se A Se Mea o Toe Ou Te Lei Faia?,” Liahona, Nov. 2015, 35)
Ua aoao mai i tatou e tusitusiga paia e faapea, o le mea e faanoanoa ai, o le taulealea mauoa i le tala “na alu ese [ai lea] o ia ma le tiga: aua e tele lava ana mea” (Mataio 19:22). O le a i ai pea osigātaulaga e manaomia e avea ai o se soo o le Alii. Ae na faamatalaina e Peresitene James E. Faust, a o auauna ai i le Au Peresitene Sili:
I le mafaufau atu i le folafolaga sili a le Faaola mo le filemu i lenei olaga ma le olaga a sau, o le avea ma soo o se tau e aogā le totogiina. O se tau e lē tatau ona tatou lē totogiina. Pe a faatusatusa, o tulaga manaomia o le avea ma soo e matuā itiiti nauā nai lo faamanuiaga ua folafolaina mai. (“Avea ma Soo,” Liahona, Nov. 2006, 20)
Mafaufau Loloto e Sauniuni ai mo le Vasega
Faaalu sina taimi e mafaufau loloto ai ma le agaga tatalo i le fesili “Se a se mea o toe ou te le’i faia?” A o e sailia le taitaiga a le Alii, ia manatua upu nei mai ia Peresitene Dieter F. Uchtdorf, a o avea o se fesoasoani i le Au Peresitene Sili: “O le laasaga muamua lava i le ala o le avea ma soo e amata, e laki lava, i le nofoaga tonu lava o tatou tutū ai! (“The Way of the Disciple,” Liahona, Me 2009, 77).
Vaega 3
E faapefea ona faamalosia ma lagolagoina a’u a o o’u feagai ma luitau o le avea ma soo?
Afai, e i ai taimi, e te mafaufau ai pe aogā faamanuiaga folafolaina o le avea ma soo, manatua le mea lenei: “O le ala [a le Alii], o le ala lea e tau atu i le fiafia i lenei olaga ma le ola e faavavau i le lalolagi a sau” (“O Le Keriso Soifua: O Le Molimau a le Au Aposetolo,” ChurchofJesusChrist.org). Na molimau mai le perofeta o Iakopo, “O e amiotonu, o le au paia lea a le Paia e Toatasi o Isaraelu, o i latou ia o e sa talitonu i le Paia e Toatasi o Isaraelu, i latou ia o e na onosaia satauro o le lalolagi, … o le a fai mo o latou tofi i le malo o le Atua, … ma o lo latou olioli o le a atoatoa e faavavau” (2 Nifae 9:18).
Atonu e te fesili ifo ia te oe lava i le mea na fesili ai le Faaola i Ona soo i aso ua mavae: “Aua se a le aoga i le tagata pe afai na te maua le lalolagi uma, a e maumau lona ola? Se a foi se mea e avatu e le tagata e togiola a’i lona ola?” (Mataio 16:26).
E lē gata ina folafola mai e le Alii i Ona soo ni taui e faavavau, ae Na te faamanuiaina foi i tatou a o tatou taumafai e mulimuli ia te Ia. O se tasi o nā auala na te faamanuiaina ai i tatou o le tuuina mai lea ia i tatou o le olioli tumau i lenei olaga. Ae o loo i ai foi isi faamanuiaga tatou te maua. I se tusi i Roma, sa manatunatu ai le Aposetolo o Paulo i nisi o auala e lagolagoina ai e le Alii i latou o e mulimuli ia te Ia, e oo lava i o latou luitau.
Suesue e Sauniuni ai mo le Vasega
Faitau le Roma 8:16–18, 28, 35, 38–39, ma mafaufau pe faapefea ona fesoasoani le Alii ia te oe i au taumafaiga e mulimuli ia te Ia.
Tusi Faamaumau Ou Manatu
Tusi i lalo se luitau patino o loo e feagai ai nei—po o se suiga o loo e taumafai e fai—a o e taumafai e mulimuli i le Faaola. Ona tusi lea pe faapefea e lou alofa mo le Faaola, ma Lona alofa mo oe, ona fesoasoani ia te oe ia faamaoni i lou avea ai ma soo.