Ma’á e Kau Tokoní

’I he ’aho ’o e fakatahá:

• Text pe telefoni ki he kau mēmipa ’o e kulupú kapau ’okú ke ma’u ’a e fakamatala fetu’utaki kiate kinautolú. ’Eke pe ’oku nau ō mai ki he fakatahá. Fakaafe’i kinautolu ke nau vave mai ’aki ha miniti ’e 10 kimu’a ke fakamo’oni ’i he pepa tali uí.

• Teuteu ’a e ngaahi nāunau ’o e fakatahá:

  • ’Omi ha tatau ’o e tohi ngāue ko ’ení mo e ki’i tohi Ko Hoku Fakava’é: Ngaahi Tefito’i Mo’oní, Taukeí mo e Tō’onga Mo’uí ma’á e mēmipa takitaha ’o e kulupú.

  • ’Omi ha tatau kehe ’e nima ’o e Ko Hoku Hala ki he Mo’ui Fakafalala pē Kiate Kitá na’a ’i ai ha kau mēmipa na’e ’ikai ma’u ha’ane tatau.

  • Teuteu ha founga ke hulu’i ai ’a e ngaahi vitioó, kapau ’e lava.

  • ’Ikai ma’u ha ngaahi tohi pe ngaahi vitiō? Te ke lava ’o ma’u ia ’i he ’initanetí ’i he srs.lds.org.

’I he miniti ’e 30 kimu’a ’i he fakatahá:

• Fokotu’u takatakai ‘a e ’ū seá ’i ha tēpile koe’uhí ke vāofi ’a e tokotaha kotoa pē.

  • ’Oku ’ikai tu’u ’a e tokotaha tokoní ’i he lolotonga ’o e fakatahá pea ’ikai tangutu ’i he ’ulu’i tēpilé. ’Oku ’ikai totonu ke hoko ’a e tokotaha tokoní ko e taha ia ke fai ki ai ’a e tokangá ka ’oku totonu ke ne tokoni’i ’a e kau mēmipa ’o e kulupú ke fetukutaha’aki ’enau tokangá.

’I he miniti ’e 10 kimu’a ’i he fakatahá:

• Talitali fiefia ’a e kau mēmipa ’o e kulupú ’i he’enau a’u maí. ’Ai ke ke ’ilo honau hingoá.

• ’Ave takai ha la’ipepa pea kole ki he kau mēmipa ’o e kulupú ke nau hiki ai honau hingoa kakató, uōtí pe koló, mo e ’aho fā’ele’í (’aho mo e māhiná, kae ’ikai ko e ta’ú). Ka hili ’a e fakataha fakakulupú, ’alu ki he srs.lds.org/report ’o muimui ’i he ngaahi fakahinohinó ke lēsisita ’a e kau mēmipa kotoa ’o e kulupú.

  • ’Ai ha lisi fetu’utaki ’i he ’osi ’a e ’uluaki fakatahá ke tufa ’i he kulupú.

• Vahe ha tokotaha tauhi taimi ke ne fakapapau’i ’oku tauhi taimi ’a e kulupú. Kole ki ai ke ne seti ’a e uasí fakatatau mo e fakahinohino ’i he tohí.

  • Hangē ko ’ení, te ke fakatokanga’i ha fakahinohino ’oku pehē “Taimí: Seti ’a e uasí ke miniti ’e 60 ’a e konga ki he Akó.” ’E seti ’e he tokotaha tauhi taimí ’a e taimi ko iá ’i ha telefoni, uasi, pe ha me’a tauhi-taimi pē ’oku faingamālie pea te ne fakahā ki he kulupú ’i he ’oku ’osi ai ’a e taimí. Pea fili pē ’a e kulupú pe te nau kamata’i ’a e konga hono hokó pe hokohoko atu ’enau fealēlea’akí ’i ha toe ngaahi miniti si’i.

’I he taimi kamatá:

• Talaange: “’Oku ou talitali lelei kimoutolu ki he kulupu mo’ui fakafalala pē kiate kita ko ’ení.”

• Kole ki he kakaí ke tāmate’i ’enau tekefoní mo e ngaahi device kehé.

• Talaange ’eni:

  • “Ko ha kulupu mo’ui fakafalala pē kiate kita ’eni ’oku ui ko e ’Ko ’Eku Kumi Ngāué.’ ’Oku mou ’i heni kotoa ke ma’u ha ngāue pe fakalelei’i ho’o ngāué?

  • “Ko e ma’u ha ngāué ko e konga pē ia ’o ’etau taumu’a ke mo’ui fakafalala pē kiate kitá. Hili ’etau ma’u ’a e ngāué, ’e hokohoko atu ’etau fakalakalaká. Te ke ha’u nai ki he’etau ngaahi fakataha fakakulupú, hili ho’o ma’u ha ngāue?

  • “Te tau fakataha tu’o 12. Ko e fakataha kotoa pē ’e meimei houa ’e ua. Te tau toe fakamoleki foki mo ha houa ’e taha ki he ua he ’aho kotoa pē ke tauhi ’etau ngaahi tukupā ko ia te ne tokoni’i kitautolu ke ma’u ha’atau ngāué. Te ke fie tauhi ’a e tukupā ko ’eni ki ho taimí?”

• Fai ha fua lotu (mo e himi, kapau ’e fie ma’u).

• Talaange ’eni:

  • “Ko e taimi kotoa pē ’oku tau fakataha ai, ’oku tau kamata ’aki ha tefito mei he ki’i tohi ’oku ui ko e Ko Hoku Fakava’é: Ngaahi Tefito’i Mo’oni, Taukeí mo e Tō’onga Mo’uí. ’Oku tokoni ’a e ki’i tohi ko ’ení ke tau ako mo mo’ui ’aki ’a e ngaahi tefito’i mo’oni, ngaahi pōto’i ngāue, mo e tō’onga mo’ui ’oku fakatau ki he mo’ui fakafalala fakalaumālie mo fakatu’asino pē kiate kitá.”

• Seti ’a e uasí ke miniti ’e 20 ’a e Ko Hoku Fakava’é.

• Lau ’a e tohi fakafe’iloaki e Kau Palesitenisī ’Uluakí he ’i he peesi 2 ’o e Ko Hoku Fakava’é. Fakafonu ’a e tefito’i mo’oni 1 ’i he ki’i tohi ko iá pea foki mai ki he tohi ngāue ko ’ení.