Ngaahi Pulusinga Kimuʻá
Ako

Ako

ʻĪmisi
lightbulb-green

Ko e hā ’a e Ngāue ’oku “’Ikai” ’Ilo pe Tu’uakí?

Taimí:Seti ’a e uasí ke miniti ’e 60 ’a e konga ki he Akó.

Mamata’i:“Look Where There Is Less Competition” (’Ikai ha vitiō? Lau ’a e peesi (00) 48.)

Lau:Tau lau fakataha e ngaahi lea ’i he fakatātā taumāta’ú ’i laló. ’Oku fakafofonga’i ’e he fanga iká ’a e ngaahi ngāué. Fakatokanga’i ’a e feitu’u ’oku lahi taha ai ’a e fanga iká, pē ko e feitu’u ’oku lahi taha ai ’a e ngaahi ngāué.

Alea’i:Ko e fē ’a e tokotaha te ne ma’u ’a e ika lahi tahá? Siakale’i ’a e tokotaha ko iá. Ko e fē ’a e māketi ngāue ’oku “ʻikai ʻilo pe tu’uakí”?

Lau:’Oku ’i ai ha ngaahi faingamālie lahi ange ’i he ngaahi ngāue ’oku ’ikai ’iló, ’i he ngaahi ngāue’anga angamahení. ’Oku tau kumi ngāué ’i fē? Ko e fē e feitu’u ’oku totonu ke tau kumi ngāue ki aí?

ʻĪmisi
boats and fish

Ko e ngāue ko ia ’oku ’oatu ia ’i he tu’uaki pe ’i he ’Initanetí

’Oku ’ilo’i ’e he tokotaha kotoa pē fekau’aki mo e ngāue — lahi e fe’au’auhí

Ko ha ngāue ’oku ’atā mei he pule’angá pe ko ha kautaha kumi ngāue fakafo’ituitui

Na’e ’ilo ’e ha kakai tokolahi ki he ngāué — ’Ikai lahi fēfē e fe’au’auhí

’Oku palani ’a e kautahá ke fakafonu ’a e ngāue ’oku ’ikai ke nau tu’uakí

Tokosi’i pē ’oku nau ’ilo’i— si’isi’i ’a e fe’au’auhí

Mahalo kuo te’eki tu’uaki e ngāué pe ’ilo’i pe ia mei he kaungā-mahení.

’Ikai ’ilo ’e ha taha — ’ikai ha fe’au’auhi

Lau:FEHU’I ’O E UIKÉ — ’E founga fēfē ha’aku ma’u e māketi ngāue ’oku “’ikai ʻilo pe tuʻuakí”?

NGĀUE ’O E UIKÉ — Fai ha ngaahi fakataha mata ki he mata mo ha ni’ihi te nau ala fakangāue’i koe.

Lolotonga e fakataha ko ’ení, te tau ako mo ’ahi’ahi fakahoko e ngaahi pōto’i ngāue ’e tokoni ke tau tali e fehu’i ko ’ení pea fakahoko ’a e ngāue mahu’inga ko ’ení.

’Oku ’i fē ’a e ngāue ’oku ’ikai ’ilo’i pe tu’uakí?

Mamata’i:“Most Productive Sources” Hala Ha vitiō? Lau ’a e peesi 48.)

Lau:’Oku lelei ange e founga kumi ngāue ’e ni’ihi ’i ha ngaahi founga kumi ngāue ’e ni’ihi. ’I he ngaahi fonua ’e ni’ihi, ’oku lava ke tatau e tokolahi ’o e kakai ’oku ma’u ngāue ’i ha founga pau, mo e saati ’i laló. Mahalo ’e kehe ia ’i homou feitu’ú.

Akoako Fakahoko:Tali e fehu’i ko ’ení mo e kulupú:

  1. ’I he saati ko ’ení, ko e hā e founga ’oku lahi taha hono faka’aonga’i ’e he kakaí ke kumi ha ngāue?

  2. Ko e fē ’a e founga ’oku ola lelei taha ki hono kumi ’o ha ngāué?

    FOUNGA

    FEITU’U ’OKU LAHI TAHA E KUMI NGĀUE AI E KAKAÍ

    FEITU’U OKU MA’U AI ’E HE KAKAÍ ’ENAU NGAAHI NGĀUÉ

    Tu’uakí / ’Initanetí

    65%

    14%

    Pule’angá pe ngaahi tokoni kumi ngāue fakatāutahá

    27%

    21%

    Fetu’utaki hangatonu fakatāutaha mo e ngaahi kautahá

    3%

    30%

    Fakamatala (fetu’utaki fakatāutaha mo e ngaahi fakafe’iloakí)

    5%

    35%

    Ko e ngaahi ngāue ’eni ’oku ’ikai ’ilo pe tu’uakí. Tokanga taha ki heni pea faka’ehi’ehi mei he 92% ’o e fe’au’auhí!

    Kae ’oua ’e tukunoa’i ’a e ngaahi me’a ko ’ení, he ’e lava ke ’ikai ke ke ’’ilo ai ha 35% ’o e ngaahi ngāué!

Te u ma’u fēfē ’a e ngaahi ngāue ’oku ’ikai ʻILO PE TUʻUAKÍ?

Lau:Kuo tau ’osi ma’u e ngaahi kī ki he ngaahi ngāue ko ’eni ’oku ’ikai ’iló! ’Oku fie ma’u ki ai e ngaahi fetu’utaki fakatāutahá. Pea ’oku tau faka’aonga’i lelei taha e fetu’utaki fakatāutahá ’aki hono faka’aonga’i ’etau (1) “ko au ’i he sekoni ’e 30” mo ’etau ngaahi (2) fakamatala ongo ke fakalotoá ’o fakafou ’i he’etau (3) fakatupulaki e kulupu fengāue’akí. ’I he’etau ako he’etau fakataha faka’osí, ’oku kau ’i he’etau kulupu fengāue’aki ’a e kakai ’oku tau ’ilo’í pea mo e kakai ’oku nau ’ilo’í.

ʻĪmisi
men shapes

Ko koe

Kakai ’oku ke ’iló

Kakai ’oku nau ’iló

Mamata’i:“Building Your Network” (’Ikai ha vitiō? Lau ’a e peesi 49.)

Alea’i:Na’á ke faka’aonga’i ho’o “ko au ’i he sekoni ’e 30” mo e fakamatala ongo ke fakalotoá, talu mei he’etau fakataha kuo ’osí? Na’á ke kole ki ho’o ngaahi fetu‘utakí ke talanoa ki he’enau ngaahi fetu’utaki ma’au?

Ngaahi tokoni ki he kulupu fengāue’akí

  1. Kole ki he ngaahi fetu’utakí, ha ngaahi tokoni fakaengāue, fakamatala, mo ha ngaahi fakakaukau.

  2. Kole ma’u pē ha ngaahi fakafe’iloaki lahi ange.

  3. Tauhi totonu ’a e ngaahi lekooti pea muimui’i ia.

Akoako Fakahoko:Ko ’etau kulupú ’a e ’uluaki ma’u’anga tokoni ki he kulupu fengāue’akí. Tau kamata ke fakalahi ’a ’etau kulupu fengāue’akí he taimí ni! Lau ’a e ngaahi fakahinohino ’i laló pea kamata leva:

  1. Tu’u hake pea tafoki ki he tokotaha ho tafa’akí.

  2. Fakahoko ki he tokotaha kehé ho’o “ko au ’i he sekoni ’e 30” pea faka’osi ’aki ’a e ongo fehu’í ni: “’Ko hai ’okú ke ’ilo’i ’e ala tokoni ke u ma’u ha ni’ihi ke fetu’utaki ki ai?” “Kātaki pe te ke lava ’o talanoa ki he kakai ko iá pea kole ’enau tokoní?”

  3. Hiki e ngaahi fetu’utakí ’i he lisi ’o e kulupu fengāue’akí ’i he peesi hokó pea kole ki he tokotaha ko eé ke ne ’oatu ha ni’ihi tokolahi lahi ange ke fetu’utaki ki ai ki mu’a he fakataha hokó ’i he taimi te nau fakakaukau ai kiate kinautolú.

  4. Fetongi tu’unga leva pea toe fakahoko ’eni.

  5. Hiki holo pea fai ’eni mo e kau mēmipa kehe ’o e kulupú.

  6. Hiki ’a e ngaahi fetu’utaki ’i he lahi taha te ke lavá ’i he peesi hono hokó.

  7. Hili ’etau fakatahá, fai ’eni mo e kakai kehe ’okú ke ’ilo’í.

  8. ’I he ’otu ’o e Me’a Mahu’ingá, fakafika ’a e tokotaha kotoa te ke fetu’utaki ki aí mei he 1 ki he 20.

LISI ’O E KULUPU FENGĀUE’AKÍ

Hingoá

Fakamatala ki he Fetu’utaki (fika telefoní, tu’asila, ’ī-meilí)

Fakahokohoko Hono Mahu’ingá

Lau:Ki mu’a ’etau fakataha hokó, te tau fetu’utaki ki he kakai ko ’ení, pea pehē ki he tokotaha kotoa pē ’oku tau ’iló mo ’enau fetu’utaki. ’E hoko atu pē ’etau tānaki ki he lisí. ’I he’etau fetu’utaki ki he kakai ko ’ení, te tau faka’aonga’i ’etau fakamatala ’oku ongó ke fakamahino kiate kinautolu ’a e me’a kotoa te tau lava ’o fai ma’anautolú.

Te tau lava ke talanoa ki he kakai ko ’ení mo ha kakai tokolahi ange!

  • Kaungāme’á

  • Kāinga

  • Kaungā’apí

  • Kāingalotu hotau Siasí

  • Kakai ’oku tau va’inga sipoti mo iá

  • Kaungā-ngāue kimu’á

Ko e hā ha founga ke u fakataha ai mo e kau taki ngāue ’oku nau fakangāue’i ’a e kakaí?

Lau:’E lava ke tataki kitautolu ’e he kulupu fengāue’akí ki ha ngaahi pisinisi ’oku nau fie ma’u ha kau ngāué. Ka ’oku fie ma’u ke tau ’ilo’i ’a e tokotaha ’okú ne fai ’a e ngaahi fili tu’utu’uni ki hono fakangaue’í.

Akoako Fakahoko:Tau ’ahi’ahi fakahoko fakakulupu.

  1. Vahe ki ha taha ke ne hoko ko e tokotaha kumi ngāué. ’Oku totonu ke mateuteu ’a e tokotahá ke fai ha fakamatala “ko au ’i he 30,” ha fehu’i, pea mo ha fakamatala ongo mālohi ki he taha pulengāué.

  2. Vahe ha toko ua kehe ke hoko ko e kau ngāué: tokotaha ngāue 1 mo e tokotaha ngāue 2.

  3. Vahe ha taha kehe ke hoko ko e taki ngāue.

  4. Fekau ke tu’u hake ’a e toko fā ko ’ení. ’E lau ’e he tokotaha tokoní ’a e laine ’uluaki ’o e fakatātā ko ’ení. Pea lau leva ’e he ni’ihi kehe ’enau ngaahi kongá.

  • Tokotaha Tokoní: ’Oku hū ’a e tokotaha kumi ngāue ko ’ení ki ha falekoloa pe ’ōfisi ’okú ne fie ngāue aí. ’Okú ne talanoa ki he tokotaha ngāue ’okú ne ’uluaki sio ki aí.

  • Tokotaha Kumi Ngāué: Mālō e lelei. Ko hai ’a e pule ngāue ’oku fai fatongia he taimí ni?

  • Tokotaha Ngāue 1: Ko Vēnisi, ka ’oku ’ikai ke u ’ilo pe ’oku ’i fē he taimí ni. Te ke lava ’o ’eke ki hono tokoní ko ’ena.

  • Tokotah Kumi Ngāué: Mālō ’aupito. [Tafoki ki he tokotaha ngāue 2.]

  • Tokotaha Kumi Ngāué: Mālō e lelei. Te ke lava ’o tala mai pe ’oku ’i fē ’a Vēnisi?

  • Tokotaha ngāue 2: Na’e ’alu ke ’omai e me’a. ’Oku totonu pē ke foki vave mai. Ko ia ’ena.

  • Tokotaha Kumi Ngāué: ’Io. Mālō. [Tafoki kia Vēnisi.]

  • Tokotaha Kumi Ngāué: Mālō ’etau ma’u e pongipongí ni Vēnisi. Ko ___ [hingoa] au. [Fakahoko ’a e “ko au ’i he sekoni ’e 30” pea faka’osi ’aki ha fehu’i.] Ko e hā ha founga te u ala tokoni ai mo hoku pōto’i ngāué ki ho’o pisinisí?

  • Pule Ngāué: Ko hono mo’oní ne kamata ke mau kumi ha taha hangē pē ko koé. ’Oku toe pē ha’aku miniti ’e taha. Fai mai ha fakamatala vave fekau’aki mo koe.

  • Tokotaha Kumi Ngāué: [Fai ha fakamatala totonu ’oku ongó.] ’Oku ou ’ilo ’okú ke femo’uekina. Ko e fē ha taimi ’e lava ke ta talanoa fuoloa ange ai, ko e ho’ataá ni pe ’apongipongi?

Alea’i:Kapau ’e pehē ’e he pulé “’ikai” pe “toe foki mai ’amuiange” pe “fakafonu ha tohi kole,” ko e hā ’e ala lea ’aki ’e he tokotaha kumi ngāué?

Lau:’Oku fie ma’u ke tau lava ’o fakafe’unga’i kitautolu ki he tūkunga takitaha.

Akoako Fakahoko:Tu’u pea vahevahe ki ha kulupu tautau toko fā. Toe fai pē ’a e me’a tatau ke ma’u ’e he taha kotoa ’a e faingamālie ke hoko ko e tokotaha kumi ngāué.

ʻĪmisi
manager diagram

Tokotaha Kumi Ngāué

Tokotaha ngāue 1

Tokotaha ngāue 2

Tokotaha Pule Ngāué

Lau:’Oku tau ma’u he taimí ni ha ngaahi me’angāue mālohi ke faka’aonga’i ’i he’etau ngaahi fetu’utaki: “ko au ’i he sekoni ’e 30,” fakamatala ’oku ongó, mo e fakataha mo e pulé pe taki ngāué. Te ke lava foki ’o ako ke liliu ’a e ngaahi me’a ’oku koví ki he ngaahi me’a leleí ’i he peesi 33.

Alea’i:Te ke faka’aonga’i fēfē ’a e ngaahi me’angāue ko ’ení ke ma’u ha ngaahi fakataha ola lelei kimu’a ’i he’etau taimi fakataha hokó?

Akoako Fakahoko:’Alu ki he peesi 50 pea taufetongi hono lau ’a e founga ke muimui’i ho’o ngaahi feinga kumi ngāué. Hili ia peá ke toe foki mai ki heni.

Paaki