Talateú
’E lava ’e he kulupú ni ’o tokoni’i au ke kumi ha’aku ngāue?
’Oku ’ikai faingofua ke ma’u ha ngāue, ka ’e tokoni’i koe ’e he kulupu fakafalala pē kiate kitá ke ke ako ’a e founga lelei taha ke ma’u ha ngāue pea lavame’a ai. Te ke tukupā ’i he ngaahi fakataha fakakulupú, ke ke fai ha ngaahi ngāue pau, pea ’e ’oatu ’e he kulupú ha ngaahi fakakaukau mo ha fakalotolahi. ’Oku ’ikai ko e taumu’a ’a e kulupú ni ke tokoni’i pē koe ’i ho’o pisinisí; ka ke toe tokoni’i foki koe ke ke talangofua lahi ange mo tui ki he ’Eikí pea mo ma’u ’a ’Ene ngaahi tāpuaki ’o e mo’ui fakafalala pē kiate koe, fakatu’asino mo fakalaumālie kuo tala’ofa maí.
Ko e hā ’a e kulupu mo’ui fakafalala pē kiate kita?
’Oku kehe ’a e kulupu mo’ui fakafalala pē kiate kitá ia mei he ngaahi kalasi ’a e Siasí, ngaahi lēsoní mo e ngaahi ako ngāué. ’Oku ’ikai ke ’i ai ha kau faiako, kau taki, pe kau faifakahinohino ia ai. ’Oku ako fakataha ’a e kau mēmipa ’o e kulupú pea fetokoni’aki mo fepoupouaki. ’Oku tau feha’isia’aki ’iate kitautolu ki he’etau ngaahi tukupaá pea fealēlea’aki fakataha ke fakalelei’i e ngaahi palopalemá.
Ko e hā ’oku fai ’e he kau mēmipa ’o e kulupú?
’Oku tukupā ’a e kau mēmipa ’o e kulupú ’i he ngaahi fakatahá ke ngāue. ’Oku ’ikai ngata pē ’i he’etau akó ka ’oku tau toe fai ’a e ngaahi me’a te ne ngaohi kitautolu ke tau mo’ui fakafalala pē kiate kitautolú. ’Oku tau fai ha ngaahi tukupā, fetokoni’aki ke tauhi ’a e ngaahi tukupā ko iá, pea līpooti ’etau fakalakalaká. Koe’uhí ’oku ngāue ’a e kulupú hangē ha fakataha alēleá, ’oku mahu’inga leva ke te ma’u ma’u pē ’a e ngaahi fakatahá ’i he taimi totonu. ’Omi ma’u pē ’a e ki’i tohi ngāué, ’a ia ko e ki’i tohi Ko Hoku Hala ki he Mo’ui Fakafalala pē Kiate Kitá, mo e ki’i tohi Ko Hoku Fakava’é: Ngaahi Tefito’i Mo’oni, Taukeí mo e Tō’onga Mo’uí. Ko e fakataha fakakulupú takitaha ’e meimei houa ’e ua. Ko hono ngāue’i ’etau ngaahi tukupaá ’e meimei houa ’e taha pe ua ’i he ’aho kotoa pē.
Ko e hā ’a e me’a ’oku fai ’e he tokotaha tokoní (facilitator)?
Ko e tokotaha tokoní, ’oku ’ikai ko ha kau mataotao pē ’i he ngāue ma’u’anga mo’uí pe ko e faiakó. ’Oku ’ikai ke nau tataki pe ako’i ’a e kulupú. ’Oku nau tokoni pē ke muimui pau ’a e kulupú ki he ngaahi fakamatalá hangē tofu pē ko hono tohí. ’Oku meimei ke tokoni’i ’e ha mataotao ’o e mo’ui fakafalala pē kiate kitá ’a e ngaahi fakataha fakakulupú; neongo ia, ’e lava ke vahe ’a e kau mēmipa ’o e kulupú ke nau tokoni ’i ha ’osi ha ngaahi uike, ’o ka fie ma’u. Koe’uhí ke ke ’ilo lahi ange, vakai ki he Fakahinohino ’a e Takí mo e ngaahi vitiō ’oku ’oatu ’i he srs.lds.org.
Tohi Fakamo’oni Kuo Kakató
Ko e kau mēmipa ko ia ’o e kulupú ’oku nau ō ki he ngaahi fakatahá mo tauhi ’enau ngaahi tukupaá, te nau fe’unga ke ma’u ha tohi fakamo’oni he mo’ui fakafalala pē kiate kitá mei he LDS Business College. Vakai ki he peesi 29 ’i he Ko Hoku Fakava’é ki he ngaahi fie ma’ú.