Երեց Ջոզեֆ Վ. Սիտատի. 13 տարեկանում ես ապրում էի Քենիայի մի գյուղական վայրում։ Մարդիկ շատ աղքատ էին։ Բայց նրանք, ովքեր կարողանում էին գնել այնպիսի իրեր, որ ուրիշները չէին կարող իրենց թույլ տալ, լավ կրթություն ստացած մարդիկ էին: Ես հասկացա, որ կրթությունը ավելի լավ կյանքի բանալին էր։
Անընդհատ մի միտք էր տանջում ինձ, որ գնայի և խոսեի դպրոցներից մեկի տնօրենի հետ, որտեղ ես իսկապես ցանկանում էի սովորել։ Կես օր տևող այդ ճամփորդության համար ինձ անհրաժեշտ էր հայրիկիս հեծանիվը։ Ես իմ գյուղից երբեք դուրս չէի եկել։ Լավ չէի խոսում անգլերեն, իսկ այդ տնօրենը սպիտակամորթ էր։ Նախկինում, ես երբեք չէի հանդիպել կամ խոսել սպիտակամորթ մարդու հետ, և այդ միտքն ինձ վախեցնում էր։
Ներսումս մի բան մղում էր ինձ և ասում, որ ես պետք է դա անեմ և այսպիսով, ես գնացի այցելելու այդ տնօրենին։ Երբ նայեցի նրա դեմքին, ես նկատեցի, որ նա շատ զարմացած էր, տեսնելով այդ պատանի տղային, ով զինվորի նման կանգնած էր իր առջև։ Նա բարի աչքեր ուներ և դա ինձ խիզախություն ներշնչեց։ Ես ասացի, որ իսկապես ցանկանում եմ հաճախել նրա դպրոցը և ուրախ կլինեմ, եթե նա ընդունի ինձ։ Նա ասաց. «Դե, կտեսնենք, թե ինչպիսին են քննության արդյունքները»։ Ես ասացի. «Շնորհակալություն, պարոն»: Չորս րոպե անց ես դուրս եկա գրասենյակից։
Այդ չորս րոպեները, որ ես անցկացրեցի գրասենյակում, իսկապես, իմ կյանքի որոշիչ րոպեներն էին: Ես մեր դպրոցի միակ ուսանողն էի, ով ընտրվեց մեր տարածաշրջանի լավագույն դպրոցներից մեկում սովորելու համար: Ես երախտապարտ էի այդ բարի մարդու տված հնարավորության համար, որն ինձ ոգեշնչեց, որ ձգտեմ լինել իմ դասարանի լավագույն աշակերտը:
Դա ինձ համար մեկ ուրիշ լավ դպրոց հաճախելու և համալսարանին պատրաստվելու նոր հնարավորություններ բացեց։ Իմ կրթության շնորհիվ համալսարանում հանդիպեցի կնոջս։ Դրա շնորհիվ ես քաղաքում աշխատանք գտա։ Նաիրոբիում ապրելիս, մենք հանդիպեցինք միսիոներական զույգի, ովքեր մեզ հրավիրեցին իրենց տուն, որտեղ նրանք ժողովներ էին անցկացնում եկեղեցու անդամների հետ: Եթե այդ ժամանակ Նաիրոբիում չլինեի, ես երբեք չէի գտնի ավետարանը։ Այն փաստը, որ ես ապահով աշխատանք ունեի, ինձ հնարավորություն տվեց ծառայել Եկեղեցում:
Ես վկայում եմ, որ կրթությունը ինքնապահովման բանալին է։ Այն կբացի բազմաթիվ հորիզոններ, որպեսզի դուք հնարավորություն ունենաք նյութապես և հոգևորապես ինքնապահով դառնալ: