Wase 13

Veivakalougatataki Tawavoli Rawa ni Vale ni Turaga

“Ena loma ni valetabu eda na rawata mai kina na veivakalougatataki cecere ni Kalou ki na bula tawamudu. Na valetabu era sa matamata dina ki lomalagi.”

Na Bula nei Ezra Taft benson

“Au vakavinavinaka vua na Turaga niu rawa ni vakasamataka lesu na valetabu — mai na gauna sara au se gonetagane lailai kina,” e kaya o Peresitedi Ezra Taft Benson. “Au nanuma vinaka tiko, niu se cauravou lailai, niu butuka mai na were ka gole yani ki na itikotiko makawa ni iteitei e Whitney, e Idaho. Au rogoci tinaqu sara ni lagata tiko ‘Na Cakavinaka?’ (Sere ni Lotu, naba 131).

“Au se rawa tikoga ni raici koya ena noqu vakasama ni cuvara sobu yani na vava ni yayani ka qera toka na niusiveva ena vuloa, ka yania tiko na siti balavu vulavula, ka bunobuno toka na yadrena. Niu tarogi koya se cava e cakava tiko, a kaya mai, ‘Luvequ, oqo na kote balavu ni valetabu. Oi au kei tamamu keirau na gole tiko i valetabu. …’

“A biuta sara na vatu ni yayani makawa ena sitovu, tosoya mai e dua na idabedabe e yasaqu, ka tukuna vei au na cakacaka ni valetabu — na kena sa rui bibi na gole ki valetabu ka laki vakaitavi ena cakacaka tabu vakalotu era vakayacori tiko kina. A vakamacalataka talega na nona nuitaka dina tiko ni dua na siga ena yaco na madigi vei ira na luvena kei na makubuna kei ira na makubuna vakarua mera laki marautaka na veivakalougatataki tawavoli rawa oqo.

“Na vakanananu kamica oqo me baleta na yalo ni cakacaka ni valetabu a veivakalougatataki ki na neitou itikotiko ni teitei. … Era sa lesu tale mai na vakanananu oqo niu sa mai vakayacora na nodra vakamau na luvei keirau kei na makubui keirau yadua, o ira na makubui kei na makubui tinaqu vakarua, ena veivakauqeti ni Yalotabu ena vale ni Turaga.

“Sai ira oqo na vakanananu talei vei au.”¹

iVakavuvuli nei Ezra Taft Benson

Na valetabu era sa ivakatakilakila ni veika kece eda vakamareqeta.

Na valetabu era sa vanua voleka duadua ki lomalagi ena vuravura vakayago oqo.²

[Na] valetabu era sa rarama ki na tamata kecega [ena] vanua — e dua na ivakatakilakila ni veika kece eda vakamareqeta.³

Na valetabu sa veivakavotui tudei tiko ni sa nakita tiko na Kalou me tawamudu na matavuvale.⁴

[Na valetabu] sa ivakatakilakila tudei, ka laurai tiko ni Kalou e sega ni biuta tu na tamata me vakayayamo voli ena butobuto. E vanua ni ivakatakila. E dina ga ni da bula tiko ena dua na vuravura sa lutu— e dua na vuravura ivalavala butobuto— era sa vanua tabu tabaki ka vakatabui me rawa vei ira na tagane kei na yalewa bula kilikili mera vulica na ivakarau tudei kei lomalagi ka talairawarawa ki na lewa ni Kalou.⁵

[Na valetabu sa] ivakadinadina qaqa ni sa rawa ki na kaukauwa ni Kalou me tarova na kaukauwa ni vu-ni-ca ena keda maliwa. E vuqa na itubutubu, ena loma kei na taudaku ni Lotu, era sa lomaleqataka tiko na veitaqomaki mai na veiuabaleti tiko ni ivalavala ca ka sa saga tiko me valuta na ivakavuvuli va-Karisito. Au raica niu sa mai duavata tiko ki na veika a kaya o Peresitedi Harold B. Lee ena gauna ni iKarua ni Valu Levu. A kaya kina: “Eda sa dau tukuna tiko na veitaqomaki edaidai, ia eda sega tiko ni kila ni … da sa vakaduria tu na valetabu savasava eda na kunea kina na ivakatakilakila ena rawa ni vure mai kina na kaukauwa ena vakabula na matanitu oqo mai na veivakarusai.”⁶

Ena dua na pati ena otela na Beverly Hills Hilton mai Los Angeles [California,] a kerei au kina na Peresitedi kei Amerika [niu nona sekeriteri ni teitei] meu kidavaka e dua vei ira na neimami matanitu vou, na peresitedi ni walusagavulu ka walu na milioni na lewenivanua era veituyaki ena 3,000 na veiyanuyanu ka udolu na maile na kedra balavu, oqo e dua na matanitu se qai buli ga ena vica na yabaki. Ena neimami dabe vata ena gauna ni kana, ka cau raraba kina vakalevu na kabani levu ni caka iyaloyalo yavala ka ra tiko talega kina o ira na dauvakaraitaki ena iyaloyalo yavala, au raica rawa yani mai na katubaleka na toba totoka. Niu rai sobu yani, ena dua na delana, au raica rawa sara na cina ramase malumu e wavokita na noda Valetabu lagilagi e Los Angeles, kau marautaka na noqu vakaraitaka vei ira na noqu vulagi dokai kei na itokani ena neitou teveli kei ira ena teveli tale eso. Au vakasamataka, ni keimami dabe tiko, “E vuqa sara na ka e yaco tiko ena bogi nikua sa ka walega ni bula oqo. Na veika e gugumatua, na veika e dina, na veika era sa ka bibi sai ira era sa vakayacori tiko ena valetabu ni Kalou.”⁷

Me sa yaco [na valetabu] me veivakavotui tudei ni bula sa tawamudu kei na veiyalayalati eda sa vakayacora ena bula oqo ena rawa me tawamudu.⁸

Eda sa gadreva na cakacaka vakalotu ni valetabu kei na veiyalayalati me rawa ni da curuma na taucoko ni matabete ka vakavakarau meda tiko tale ena iserau ni Kalou.

Ena gauna sa vakatikori Atama kina kei Ivi na Kalou ena vuravura oqo, a vakayacora o Koya ena nona inaki me vakavulica vei ira na sala mera tiko tale ena Nona iserau. A yalataka na Tamada e dua na iVakabula me vueti ira mai ena kedra ituvaki ni lutu. A solia vei ira na ituvatuva ni veivakabulai ka tukuna vei ira mera vakavulici ira na luvedra mera vakabauti Jisu Karisito ka veivutuni. E kena ikuri, a vakarota na Kalou vei Atama kei ira na nona kawa mera papitaiso, mera ciqoma na Yalo Tabu, ka mera curu ki na ilesilesi ni Luve ni Kalou.

Na curu ki na ilesilesi ni Luve ni Kalou sa vakatauvatani nikua ki na curu ki na taucoko ni Matabete i Melikiseteki, ka sa dau ciqomi duadua ga ena vale ni Turaga.

Ena vuku ga ni rau muria o Atama kei Ivi na ilavaki oqo, a kaya kina na Kalou vei rau, “Ia ko iko sa lesi iko ko Koya sa tawamudu na nona gauna, sa bula tu mai na ivakatekivu ka tawamudu.” (Mosese 6:67.)

Ni vo e tolu na yabaki me qai mate o Atama, a yaco e dua na ka levu. A kauti Seci na luvena, kei makubuna tagane o Inosi, kei na so tale na bete levu era sa wekana dina, vata kei na so na nona kawa bula savasava, ki na buca e vakatokai na Atama-onitai- Amani. E kea a solia kina o Atama vei ira na kawa ivalavala dodonu oqo na iotioti ni nona veivakalougatataki.

A qai rairai mai vei ira na Turaga [raica na V&V 107:53–56]. …

A kauti ira vakacava na nona kawa o Atama ki na iserau ni Turaga?

Kena isau: E ratou a curu o Atama kei ira nona kawa ki na ilesilesi ni matabete ni Kalou. Nikua eda rawa ni kaya era a gole ki na Vale ni Turaga ka ciqoma kina na nodra veivakalougatataki.

Eso na gauna na ilesilesi ni matabete e tukuni tiko ena ivolanikalou e dau vakatokai me ilesilesi vakapeteriaki baleta ni dewa sobu mai vei tama kivei luvena tagane. Ia na ilesilesi oqo sa qai mai vakamacalataki tiko ena ivakatakila ni gauna oqo me sa ilesilesi ni matanitu vakamatavuvale e rau curuma e dua na tagane kei na dua na yalewa e dua na veiyalayalati kei na Kalou —me vakataki rau o Atama kei Ivi— me rau vauci ki na bula tawamudu, me rau vakakawa, ka vakayacora na lewa kei na cakacaka ni Kalou ena nodrau bula taucoko vakayago.

Kevaka rau na dina tiko e dua na veiwatini ki na nodrau veiyalayalati, rau sa oka ki na veivakalougatataki ni ivakatagedegede cecere ni matanitu vakasilesitieli. Nikua o ira na veiyalayalati oqo era na rawa ga ni curumi ena kena golevi na Vale ni Turaga.

A vakamuria o Atama na ilesilesi oqo ka kauti ira mai na nona kawa ki na iserau ni Kalou. …

… Na ilesilesi oqo ni matabete ena rawa walega ni curumi ena gauna eda vakamuria kina na ivakaro taucoko ni Kalou ka vakasaqara na nodra veivakalougatataki na tama me vakataki Eparama [raica na Eparama 1:1–3] ena noda curuma yani na vale nei Tamada. E sega tale ni dua na vanua ena vuravura oqo era na ciqomi kina!

… Gole ki na valetabu — na vale nei Tamada— mo ni ciqoma kina na veivakalougatataki nei tamamuni mo ni rawata kina na veivakalougatataki cecere ni matabete. “Ia kevaka sa sega na ilesilesi oqo, ena sega na tamata e raica rawa na mata ni Kalou ko Tamada, me qai bula tiko.” (V&V 84: 22.)

Na vale nei Tamada sa vale ni caka dodonu. Eda gole yani ki na Nona vale meda laki curuma na ilesilesi ni matabete meda rawata kina na veika sa nei Tamada, kevaka eda yalodina tiko.⁹

Mai na cakacaka vakalotu kei na veiyalayalati ni valetabu, eda sa rawa ni taqomaki ka ciqoma na veivakalougatataki cecere ni Kalou ki na bula tawamudu.

Sa tawamudu na veivakalougatataki ni vale ni Turaga. Era sa ka bibi duadua vei keda baleta ena loma ni valetabu eda na rawata mai kina na veivakalougatataki cecere ni Kalou ki na bula tawamudu. Na valetabu era sa matamata dina ki lomalagi.¹⁰

Sa gagadre ni Turaga vei ira yadua na tagane kei na yalega uabula mera ciqoma na cakacaka vakalotu ni valetabu. Sa kena ibalebale mera na vakaedaumeni ka mera vauci na veiwatini sa vakamau ki na veigauna tawamudu. O ira na cakacaka vakalotu era sa veitaqomaki ka veivakalougatataki ki na nodra bula vakamau. Era sa vakalougatataki talega na luvedra era sucu ena loma ni veiyalayalati. Na sucu ena loma ni veiyalayalati era sa wili kina na gone oqori ki na veivakalougatataki ni dodonu ni sucu ka sa vakadeitaki kina na nodra itubutubu tawamudu se cava ga e na yaco vei rau na itubutubu, ke ra bula kilikili tiko na gone me baleta na veivakalougatataki.¹¹

E sega beka ni matalia vei kemuni nikua ni ra sa veituyaki na Yalododonu e vuravura taucoko, ia ena nodra veituyaki oqo, sa vakarautaki yani vei ira na valetabu? Mai na cakacaka vakalotu era sa ciqoma ena vanua tabu oqo, era sa na vakaiyaragi ena ivalavala dodonu ka vakaedaumeni ena kaukauwa ni Kalou ena kena ivakarau cecere.¹²

E tiko e dua na kaukauwa e veisemati ki na cakacaka vakalotu kei lomalagi— o ya na kaukauwa ni bulavakalou— ka na rawa me vakadruka na kaukauwa butobuto kevaka eda na kilikili kaya ki na veivakalougatataki tabu oqori. Ena taqomaki na [noda] itikotiko raraba, era na taqomaki na noda matavuvale, o ira na luveda era na viribaiti ni da bulataka na kosipeli, sikova na valetabu, ka bula volekata tiko na Turaga. … Na Kalou sa na vakalougatataki keda na Yalododonu meda bula kilikili tiko ki na veiyalayalati kei na cakacaka vakalotu e vakayacori ena vanua tabu oqo.¹³

Sa solia mai na soqo ni valetabu e dua na Tamada Vakalomalagi vuku me vukei keda meda sa bula va-Karisito vakalevu cake.¹⁴

Eda na sega ni rawa ni laki bula vata kei ira na kai silesitieli vakavo ga keda sa bula savasava ka vakalou. Na lawa kei na cakacaka vakalotu e cakacakataki ira na tagane kei na yalewa mai na vuravura oqo mera bula vakacerecerei e vakayacori duadua ga ena veivanua tabu oqo. Era soli mai ena ivakatakila ka ra na kilai ga ena ivakatakila. Ena kena inaki oqo e vakatoka kina e dua vei ira na Veitacini na valetabu me “univesiti ni Turaga.”¹⁵

E sega ni rawa ki na dua na lewe ni Lotu me savasava taucoko ke sega na cakacaka vakalotu ni valetabu. Sa qai noda ilesilesi meda vukei ira na tamata e sega vei ira na veivakalougatataki oqo mera na ciqoma.¹⁶

Sa tu vei keda na madigi meda tadolava na katuba ni veivakabulai kivei ira na noda qase e liu.

Era sa tara na valetabu ka vakatabui me rawa kina, ena kaukauwa ni matabete, vei ira na itubutubu mera vauci vei ira na luvedra ka vauci o ira na gone vei ira na nodra itubutubu. Na cakacaka vakalotu oqo ni veivauci e vakayacori ruarua vei ira na bula kei na mate. Kevaka eda na sega ni vauci vei ira na noda qase e liu kei ira na noda kawa, na inaki ni vuravura oqo, o ya me bula vakacerecerei na tamata, ena rusa na ka kecega me vaka eda sa kila tu.¹⁷

E sega ni se taucoko kevaka me rau vauci e dua na veiwatini e valetabu me rau bula vakacerecerei rawa kina— kevaka rau sa yalodina tiko— ia e dodonu talega me rau semati tawamudu vata kei ira na nodrau qase e liu ka raica me caka na cakacaka e baleti ira na qase e liu o ya. “Ko ira ke sega koi keda,” e kaya o Paula na iApositolo, “ena sega talega ni rawa meda vakavinakataki sara— koi keda ke sega ko ira” (V&V 128:15). E dodonu kina mera kila na noda lewenilotu ni sa tiko na nodra dui ilesilesi mera raica na nodra semati na nodra qase e liu — se, me vaka e lesia na ivolanikalou tabu, o ira na “tamada.” Oqo na ibalebale ni wase e 2, tikina e 2, ni Vunau kei na Veiyalayalati ka kaya kina o Moronai ni o Ilaija ena “vakadeitaka ko koya ki lomadra na gone na vosa ni yalayala a caka vei ira na qase, io ena vagolea na lomadra na gone vei ira na nodra qase.”¹⁸

Niu vakasamataka na tuva kawa, au raici ira na tamata— o ira au lomana era waraka tiko na noqu matavuvale, nodra kawa, me vukei ira mera rawata na bula vakacerecerei ena matanitu vakasilesitieli.¹⁹

Sa qai noda madigi meda tadolava na katuba ni veivakabulai kivei ira na tamata o ya era na rairai vesu tu ena butobuto ena nodra vuravura na yalo, me rawa ni ra ciqoma na rarama ni kosipeli ka lewai me vakataki keda. Io, “na cakacaka kau sa kitaka”— na kena vakayacori na cakacaka vakalotu ni veivakabulai vei ira na tamata—“ena kitaka talega na cakacaka” [raica na Joni 14:12]. E vica beka na udolu na wekada era waraka tu na cakacaka vakalotu ni veivauci?

E ka vinaka meda taroga, “Au sa vakayacora taucoko beka na noqu ena yasa ni ilati oqo? Au sa nodra ivakabula beka — na noqu qase e liu?”

Ke sega o ira, eda na sega ni rawa me vakavinakataki sara! Na bula vakacerecerei sa cakacaka ni matavuvale.²⁰

Sa mamare sara na ilati. Eda sa bula tiko ena veigauna tawamudu. Na ka kecega oqo sa dua ga na siga vua na Kalou. Au nanuma kina ni sa sega na ilati vua na Turaga. Sa dua ga na parokaramu cecere. Au vakabauta ni sa reki tiko ko lomalagi ni da dau laki sota [e valetabu]. Era sa reki tiko o ira na noda qase e liu, kau sa nuitaka ka masu ni da na taura na madigi sa soli mai oqo vei keda meda gole yani vakawasoma ki valetabu.²¹

Vei kemuni ko ni sa cakava oti na nomuni tuva kawa, o ni sa kila na bibi ni cakacaka oqo ka vakila na marau e yaco mai ni ko semati ira vata na matavuvale ka vulica na nomuni isolisoli cecere, e gadrevi mo ni wasea na marau oqo vei ira na tamata. Vukei ira mera raica na marau kei na veivakadeitaki o raica ena cakacaka oqo. E dodonu meda tuberi ira e vuqa na noda lewenilotu ki na cakacaka oqo. E levu sara tu na cakacaka, me vaka ko ni sa kila tiko, ka vuqa, vakavuqa na lewenilotu era rawa ni cakava na cakacaka ka marautaka mera cakava ke so vei keda— kemuni taucoko— mo ni vakayaloqaqataki ira ena nomu mamarau, ivakaraitaki, kei na dina.²²

E dodonu mera vulica na gone kei na itabagone na veivakalougatataki sa waraki ira tiko mai valetabu.

Na valetabu sa vanua vakalou, kei na cakacaka vakalou ena valetabu era sa cakacaka vakatabui. Ena vuku ga ni ra sa vakatabui eso na gauna eda sega ni kaya e dua na ka baleta na valetabu kivei ira na luveda kei na makubuda.

Me kena irevurevu, e vuqa era sega ni tauyavutaka e dua na gagadre dina mera gole ki valetabu, se ni ra sa gole kina, era vakayacora ga vakalailai na nodra vakavakarau ki na ilesilesi oqo kei na veiyalayalati era na curuma.

Au vakabauta ni kena kilai vakavinaka se vakavakarau ena vukei ira sara vakalevu na noda itabagone ki na valetabu. Na kila oqo, au vakabauta, ena tugana vei ira na gagadre mera vakasaqara na nodra veivakalougatataki ni matabete me vaka ga a vakasaqara na nona o Eparaama [raica na Eparaama 1:1–4].²³

Ena gauna era taroga kina na luvemuni na vuna me vakayacori kina na vakamau e valetabu, e dodonu mo ni vakavulica vei ira ni valetabu sai koya duadua ga na vanua e vuravura ena dau vakayacori kina na cakacaka vakalotu digitaki. Sa dodonu talega mo wasea vei ira na luvemuni na nanuma ni lomamuni ni ko ni tekiduru vata ena icabocabo ni soro ka taura vei kemuni na veiyalayalati me rawa kina vei ira mera vauci vei kemuni me tawamudu.²⁴

“Sa vakalougatataki keda na Kalou meda vakavulici ira na luveda kei na makubuda ena veivakalougatataki cecere sa waraki ira tu ena nodra gole ki valetabu.

Sa qai ka uasivi kina vei ira na tina kei na tama mera veidusimaki yani ki valetabu ka kaya vei ira na luvena, “Oqo na vanua keirau a vakamau kina veigauna tawamudu.” Ni vakayacori oqo, sa na rawa ni umanaki na vakamau e valetabu vinaka duadua ki na nodra vakasama kei na yalodra na gone ni ra se gone lailai sara.²⁵

E dodonu meda wasea ki na noda matavuvale na noda lomani ira na tukada taumada kei na noda vakavinavinaka ni da rawa ni vukei ira mera ciqoma na cakacaka vakalotu ni veivakabulai, me vaka rau a cakava vei au na noqu itubutubu. Ni da vakayacora oqo, ena tauyavutaki ena loma ni noda matavuvale e dua na ivau ni vakavinavinaka kei na veiyaloni e torocake.²⁶

Au vakabauta ni ra sega walega ni sa tu vakarau ka rawa vei ira na itabagone me ra cakava na vakadidike ena ivola ni kawa, ia era sa idewadewa talega ni kena vakabulabulataki na parokaramu taucoko.²⁷

Sa vakalougatataki keda na Kalou meda vakavulici ira na luveda kei na makubuda ena veivakalougatataki cecere sa waraki ira tu ena nodra gole ki valetabu.²⁸

Na talevi wasoma ni valetabu ena veimuataki ki na vakavuqataki na ivakatakila vei keda yadua.

Sa noqu ivakarau, niu dau caka vakamau, meu kaya vei rau na veiwatini gone me rau lesu mai ki valetabu ena gauna totolo rau rawata ka curuma tale na valetabu vaka-tagane kei na yalewa vakawati. Ena dredre toka me rau kila vakavinaka taucoko na ibalebale ni edaumeni savasava se na veivauci ena dua ga na ilakolako ki valetabu, ia ni rau na vakavuqataka na nodrau gole ki valetabu, na kena totoka, na kena inaki, kei na kena bibi ni veika kece ena qai matata vei rau. E muri au sa qai dau ciqoma eso na ivola ni vakavinavinaka mai vei ira na veiwatini gone oqo baleta ni a vakamatatataki vakatabakidua na tikina o ya. Ni ra vakavuqataka na nodra gole ki valetabu, sa tekivu me tubu cake na nodra veilomani vakai ira ka yaco mesa qaqaco vinaka na nodra bula vakamau.²⁹

Ena veigauna ni noda gole ki valetabu, sa soli mai vei keda na veivakararamataki ni ibalebale ni nona ilakolako ni bula tawamudu na tamata. Eda raica na ivakatakilakila totoka ka veivakauqeti ni veika bibi e vakayacori—,na kena sa oti, gauna oqo, kei na veisiga ni mataka— e vakatakilakilataka na ilesilesi ni tamata ni veiwekani kei na Kalou. Sa vakavotui kina vei keda na noda ilesilesi ni da sa vakayacora na veiyalayalati vakalou ki na noda talairawarawa, soli-ka, solibula, kei na veiqaravi yalodina vua na Tamada Vakalomalagi.³⁰

Au sa yalataka vei kemuni, ni vakavuqataki na ilakolako ki valetabu ni noda Kalou, ko ni na ciqoma vakalevu na nomuni dui ivakatakila mo ni bula kalougata kina ena nomuni vakalougatataki ira era sa mate.³¹

Mai na vakacegu ni valetabu totoka oqo, eso na gauna eda na kunea mai kina na iwali ki na leqa bibi eso ni bula. Ena veivakauqeti ni Yalo, eso na gauna na vuku dina e drodrovi keda mai kea. Na valetabu era vanua ni noda dui ivakatakila. Niu dau lomabibitaka e dua na leqa se dredre, au dau gole ki na Vale ni Turaga ena masumasu ni yaloqu meu rogoci. Na isau ni masu e dau lako mai ena sala e matata ka sega ni cala.³²

Eda lesu beka vakawasoma ki valetabu meda laki ciqoma na noda dui kalougata e yaco mai ni da laki sokalou wasoma e valetabu? Sa dausaumi mai na masu, e yaco mai na ivakatakila, kei na veivakasalataki ni Yalotabu ena loma ni valetabu savasava ni Turaga.³³

Meda sa qai cakava na valetabu me noda itikotiko tabu vakayawa mai na noda itikotiko tawamudu.³⁴

Vakatutu ni Vuli kei na Veivakavulici

Taro

E kaya o Peresitedi Benson ni valetabu sa “dua na ivakatakilakila ni veika kece eda vakamareqeta,” ka vakaraitaka eso na dina e vakatakilakilataka tiko na valetabu (raica na wase e 1). Na cava e matataka tiko na valetabu vei iko?
Ena wase e 2, e yaga vakacava na ivakavuvuli nei Peresitedi Benson baleta na veivakalougatataki ni matabete kivei ira na lewe taucoko ni matavuvale? Ni ko raicalesu na iwasewase oqo, vakasamataka vakatitobu na nomu madigi kei na ilesilesi mo vukei ira nomu matavuvale mera vakavakarau ki na lesu ki na iserau ni Kalou.
Ni ko wilika na wase e 3, vakasamataka vakatitobu na ivakavuvuli nei Peresitedi Benson me baleta na veivakalougatataki eda ciqoma ena cakacaka vakalotu ni valetabu. Ena sala cava o sa bau vakalougatataki kina mai na cakacaka vakalotu ni valetabu? Kevaka o se bera ni ciqoma na cakacaka vakalotu ni valetabu, vakasamataka vakatitobu na cava o rawa ni cakava mo na ciqoma kina.
E kaya o Peresitedi Benson, “Niu vakasamataka na tuva kawa, au raici ira na tamata— o ira au lomana” (wase e 4). Ena rawa vakacava ki na vakadidike oqo mo vakauqeti ki na tuva kawa? Na cava e rawa ni da cakava meda vukei ira vakalevu na noda qase e liu mera ciqoma na veivakalougatataki ni kosipeli?
Na cava eso na ka eda rawa ni cakava meda vukei ira na gone kei na itabagone mera vakavakarau ki na cakacaka vakalotu ni valetabu kei na veiyalayalati? Ena sala cava e rawa ni ra solia na itabagone na “bula ki na parokaramu taucoko’ ni tuva kawa? (Raica na wase e 5.)
E vakayaloqaqataka o Peresitedi Benson meda “ sa qai cakava na valetabu me noda itikotiko tabu vakayawa mai na noda itikotiko tawamudu” (wase e 6). Na cava na ibalebale ni ka oqo vei iko? Raica na veivakalougatataki ko sa ciqoma oti ena nomu lesu tale tiko ki valetabu.

iVolanikalou Veisemati

Aisea 2:1–3; V&V 97:15–16; 109:8–23; 124:39–41; 138:32–34

Veivuke ni Veivakavulici

“E levu na gauna e tiko e na lesoni e levu sara na iyaragi se ka ni veivakavulici e na rawa ni o vakavulica taucoko e na gauna sa lavaki vei iko e na veilesoni. Ena kena ituvaki vakaoqo, e dodonu ga mo digitaka na uto ni lesoni ena vukei ira vakalevu na lewe ni nomu kalasi” (Na Veituberi, Me iLutua ni Noda Bula [1999], 120).