Wase 22

Vunautaki ni Kosipeli ki Vuravura

“Eda sa marau meda vakaitavitaki keda ena dua na veitokani vata kei na Tamada Vakalomalagi ena cakacaka levu ni veivakabulai kei na nodra bula vakalou na luvena.”

Na Bula nei Ezra Taft Benson

Mai vei Peresitedi Ezra Taft Benson, na cakacaka vakaulotu e sa ivalavala makawa tu ni matavuvale. “Na matavuvale i tamaqu e tiko kina e tinikadua na gone,” a vakamacalataka okoya. “Keitou sa qarava taucoko na lewe tinikadua na kaulotu. A qarava talega na watiqu na kaulotu ka marautaka na nona veiqaravi vata kei koya na tinana dawai ena icavacava ni ono na vula [ni nona kaulotu]. Ni a lako o tamaqu ena dua na kaulotu, au nanuma, me vaka na ulumatua tagane, na ivola eso e dau vola okoya mai na vanua ni kaulotu ena Midwest. A lako mai ki na itikotiko oya e dua na yalo ni cakacaka vakaulotu ka se bera ni lesu mai kina, ka’u sa vakavinavinakataka ena yalomalumalumu.”¹

A veiqaravi vakadaukaulotu tudei o Peresitedi Benson ena iTikotiko ni Kaulotu e Peritania mai na 1921 ki na 1923, ka a tomana vata kei koya na “yalo ni cakacaka vakaulotu” ena taudaku ni rua veimama na yabaki oya. Me kena ivakaraitaki, ni a sekeriteri voli ni iteitei e Amerika mai na 1953 ki na 1961, a veitaratara okoya kei na vuqa na tamata ni vakabauta tale eso. Donuya na koniferedi raraba ni Epereli 1961, a tukuna okoya kivei ira na Yalododonu: “E tiko oqo vei au na yacadra eso na 9,000 na turaga, volekata, ka’u a sa veitaratara kei ira ena tabana vakacakacaka. Au vakanuinui ni solia vei ira na kadi ni yacasoli. Au na vinakata vei ira yadua mera rogoca na kosipeli. Au nuitaka ni ra na rekitaka na luvena taucoko na Tamada na veivakalougatataki ka lako mai ena dua na veiciqomi kei na bulataki ni kosipeli i Jisu Karisito.”²

Na nona taleitaka dina o Peresitedi Benson na cakacaka vakaulotu a tomani ena nona veiyabaki emuri, ka sa gadreva okoya kivei ira taucoko na lewe ni Lotu mera vakila talega na mamakutu vakatautauvata. A vosa vakadodonu okoya kivei ira na cauravou me baleta na nodra vakarautaki ira ki na veiqaravi vakadaukaulotu tudei. “Vakarau oqo,” a kaya okoya. “Vakarautaki kemuni vakayago, ena itovo ni vakasama, vakaveimaliwai, ka vakayalo.”³ A vakamasuti ira na itubutubu mera tubera na luvedra tagane ena vakavakarau oqo. A vakasalataki ira talega na goneyalewa kei na lewe ni Lotu qase cake mera navuca vakabibi na veiqaravi vakadaukaulotu tudei. Ka vakamasuta taucoko na lewe ni Lotu mera wasea na kosipeli kivei ira na tamata wavoliti ira.

A tukuna o Peresitedi Thomas S. Monson me baleta e dua na gauna ka a vakauqeta kina e dua na daukaulotu emuri na nona dau taleitaka o Peresitedi Benson na cakacaka vakaulotu: “Dua na Vakaraubuka, a vakamuria okoya kei Sisita Benson na nodrau ituvatuva matau ni tiko ena dua na soqoni ena Valetabu e Jordan River. Ni tiko ekea, a torovi Peresitedi Benson e dua na cauravou ka kidavaki koya ena lomareki ka tukuna ni okoya e sa mai kacivi me vakaitavitaki koya ena kaulotu tudei. A taura na ligai koya na daukaulotu kacivi vou o Peresitedi Benson, ena matadredredre, a kaya, ‘Kauti au vata kei iko! Kauti au vata kei iko!’ A vakadinadinataka na daukaulotu oya ni, ena dua na sala, okoya a kauti Peresitedi Benson vata kei koya ena nona kaulotu, me vaka ni sota oqo a vakaraitaka na loloma tudei nei Peresitedi Benson, nona gumatuataka na cakacaka vakaulotu, kei na nona gagadre me na dau kune tiko ga ena veiqaravi ni Turaga.”⁴

Na loloma me baleti ira taucoko na luve ni Tamada Vakalomalagi a sa nona sasaga taumada vagumatua o Peresitedi Benson ki na wasei ni kosipeli: “Era gadreva na kosipeli o ira na luve ni Tamada. …Au kila na Turaga e lomani ira, ka me vaka na nona italai yalomalumalumu sa tiko vei au e dua na loloma e lomaqu me baleta na milioni vakavuqa na tamata ena vuravura oqo.”⁵ Ni vakasamataki tiko na kaukauwa ni loloma ni Turaga, a vakadinadinataka, “E vakaikuritaki na noda veivakalougatataki ni da wasea na nona loloma vata kei na noda itokani voleka.”⁶

Mai na dua na gauna ni bula ena vakaitavi ni cakacaka vakaulotu kei na vakayaloqaqataki ni Yalododonu veitokani mera cakava vakakina, e rawa ni vakadeitaka o Peresitedi Benson: “Au sa tovolea na reki ni cakacaka vakaulotu. Sa sega ni dua na cakacaka e vuravura taucoko e rawa ni kauta mai ki na lewedua na reki kei na marau levu cake.”⁷

“Eda solia vakarawarawa na noda gauna kei na veika tale eso ka na rawa ni vakalougatataki keda kina [na Turaga] ki na tauyavutaki ni nona matanitu.”

iVakavuvuli nei Ezra Taft Benson

Sa gadreva vakaukauwa na vuravura na lotu dina, ka sa tiko vei keda.

Salamuria koto na basika lagilagi ni Kalou na Tamada kei na Luvena o Jisu Karisito kivei Josefa Simici, e kena irairai ni a imatai ni ilesilesi levu ka a vakataqari ki na Lotu vakalesuimai oya me na kau yani na kosipeli ki vuravura—kivei ira kece na luve ni Tamada.

E sa dua vakaidina na drama levu ena kena bibi cecekia—e drama ni solibula, reki, dredre e sotavi, yaloqaqa, ka kena ilutua, na loloma vakaveitokani. E sega tale na vanua ena mata ni vuravura oqo mo na raica kina e dua na drama vakatamata me vakatauvatana. Io, e sa saumi ena dra, buno, kei na wainimata me kau voli kina na cakacaka ni loloma oqo. Ka cava na vuna eda sa cakava kina? Baleta ni sa vakarota na Kalou ni lomalagi; baleta ni lomani ira na luvena, ka sa lomana me rawata vakataucoko na veimilioni e vuravura na madigi mera rogoca ka, vakayacora ga vakaiira na ka era kila ni dodonu, vakadonuya ka bulataka na veivakabulai lagilagi ka vakalou ni ivakavuvuli ni kosipeli i Jisu Karisito.⁸

Sa noqu vakabauta kaukauwa ni sa gadreva na vuravura, ni sega tale ni dua na ka e gadreva, na kosipeli i Jisu Karisito, ka ra vinakata na tamata e vuravura na ka ena solia na kosipeli, ia era sega ni vakila tu. Era vinakata na iyaqa ka vakarautaka na kosipeli, ka solia vei ira na isaunitaro ki na veidredre era sotava; ka kauta mai vei ira na vakilai ni dua na tataqomaki kei na vakacegu eloma. Kemuni na taciqu kei na ganequ, na kosipeli sa isaunitaro duadua ga ni veileqa ka roboti vuravura tu.⁹

Na kosipeli duadua ga ena vakabula na vuravura mai na veika vakadomobula ni kena vakarusai vakaikoya. Na kosipeli duadua ga ena vakaduavatataka na tamata duikaikai taucoko kei na veimatanitu ena vakacegu. Na kosipeli duadua ga ena kauta mai na reki, marau, kei na veivakabulai ki na matavuvale ni tamata.¹⁰

Sa gadreva vakaukauwa na vuravura na lotu dina, ka sa tiko vei keda.¹¹

Oqo na itukutuku lagilagi eda gadreva meda wasea ki vuravura, ni mai vua na Kalou na Tamada kei na Luvena o Jisu Karisito, e sa vakalesui tale mai kina na matanitu ni Kalou. Sa ikoya na itukutuku levu duadua me tekivu mai na tucaketale i Jisu Karisito.¹²

Eda vakadonuya ena yalomalumu, kei na vakavinavinaka, na ilesilesi levu oqo ka sa vakataqari ki na Lotu. Eda sa marau ni vakaitavitaki ena dua na veitokani vata na Tamada Vakalomalagi ena cakacaka levu ni veivakabulai kei na bula vakalou ni luvena. Eda solibulataka na noda gauna kei na ilavo me rawa ni da taura mai Vua vakarawarawa me baleta na tauyavutaki ni nona matanitu e vuravura. Oqo eda kila sa imatai ni noda itavi ka noda madigi levu. Na ivakarau ni bula oqo e sa matanataka na cakacaka vakaulotu ni Lotu i Jisu Karisito ena veitabagauna ni vuravura. E sa mai dua na ivakatakilakila vakasakiti ni sa yaga sara na ka oqo ni sa vakarautaki tiko na iotioti ni gauna—na noda gauna. Na vanua cava ga era na kune kina na Yalododonu Edaidai, sa tiko na yalo oqo ni solibula tawakocokoco me baleta na inaki levu duadua ena vanua taucoko.¹³

Sa tiko vei keda e dua na qaravitavi levu. Sa dodonu meda vakavakarau, gone kei na qase ruarua. Sa dodonu meda duri vaka e dua ka veivakayarayarataki ena kedra maliwa na veimatanitu, ka yalodina ki na ivakavuvuli ni yalododonu.¹⁴

Sa rawa ni da daukaulotu taucoko, se vakacava na keda ituvaki se itutu ena bula.

Me vaka na lewe ni Lotu ni Turaga, sa dodonu meda taura vakabibi na cakacaka vakaulotu. Kevaka o sa cakacaka tiko me vaka na kena inaki, kevaka o taleitaka na cakacaka oqo, o sa na veivuke tiko ni vakabula na yalo ni luve ni tamata.¹⁵

Sega walega ni na vakatokai na wasei ni kosipeli me dua na itavi vakamatabete, ia sa dodonu meda rai taucoko ki liu ki na ka sotavi vou oqo ena reki levu kei na nanamaki. Na inaki dina ni kena wasei na kosipeli oya me kau mai na yalo kivei Karisito, mera vakatavulici ka papitaisotaki na luve ni Tamada Vakalomalagi me rawa ni da reki vata kei ira (raica na V&V 18:15) ena matanitu ni Tamada.¹⁶

Eda wasea taucoko na ilesilesi levu oqo. Eda sega ni rawa ni levea. Me kakua ni nanuma e dua na turaga se marama ni baleta ga na vanua eda vakaitikotiko kina, se baleta na noda ituvaki ena vanua vakaitikotiko, se baleta na noda cakacaka se itutu, meda sa vakuwai kina mai na ilesilesi oqo.¹⁷

Cauravou kei na goneyalewa

Keitou nuitaka ni sa tiko na tuvatuvaka ni cauravou taucoko mera dua na italai ni Turaga.¹⁸

O dau taracake vakacava e dua na gagadre levu kivei ira na gone tagane mera veiqaravi? O sega ni wawa … ni vukei ira ni navuca mera qarava na kaulotu. O vukei ira ni navuca mera lako ni ra sa ciwa, tini, se tinikadua! Na itikotiko sa vanua me tauyavutaki kina na nodra vakavakarau na cauravou. Kei ira kece na cauravou sa dodonu me na vakarautaki ena nona itikotiko me veiqaravi.

Na vakavakarau kusarawa e umani kina na vakatavulici ni dua na gone tagane ena iwalewale ni masu, wiliki vua na italanoa mai na iVola i Momani kei na ivolanikalou tale eso, na vakayacori ni lotu vakamatavuvale kei na soli vua ni dua na tiki ni lesoni [me vakatavulica], na vakatavulici vua ni ivakavuvuli ni bula savasava, na tauyavutaki ni dua na akaude ni vakacuruilavo me baleta na nona kaulotu mai muri, na nona vakatavulici ena iwalewale ni cakacaka, kei na vakarautaki ni veimadigi me qaravi ira kina eso tale.¹⁹

Keitou vinakati ira na cauravou era curu tiko mai ki na buturara ni kaulotu ka rawa ni curuma na buturara ni kaulotu “ena cici,” ka tiko vei ira na vakabauta ka bucini ena yalododonu vakaikoya kei na bula savasava me rawa ni ra rawata kina e dua na kaulotu levu vakavatukana.²⁰

Sa vinakata na Turaga mera veiqaravi vakaulotu tudei na cauravou taucoko. … Sa sega na ka e bibi cake e rawa ni cakava e dua na cauravou. Na vuli sa rawa ni wawa. Na sikolasivi eso sa rawa ni tu vakawawa me yacova tale e dua na gauna. Na inakinaki eso vakacakacaka sa rawa ni biu tu vakawawa. Io, sa rawa ni wawa na vakamau ena valetabu me yacova ni sa qarava oti e dua na cauravou e dua na kaulotu tudei dokai kivua na Turaga.

… O ira na goneyalewa … sa rawa ni nodra talega na madigi mera veiqaravi tudei vakaulotu. Au sa vakavinavinaka ni a veiqaravi vakaulotu na noqu itokani tawamudu e Hawaii ni bera ni keirau qai vakamau ena Valetabu e Salt Lake, ka’u sa marautaka ni’u donuya rawa e tolu na makubuqu yalewa me ratou veiqaravi tudei. Eso na noda daukaulotu vinaka o ira na sisita gone.²¹

Daukaulotu qase

Keitou gadreva na iwiliwili toso cake ni daukaulotu qase ena veiqaravi vakaulotu.²²

Sa rawa ki na vuqa na veiwatini qase cake mera veiqaravi vakaulotu. Ni kena caka, era na raica ni kaulotu e vakalougatataka na luvedra, na makubudra, kei na makubudra vakarua ena sala ka na sega ni rawa ni caka ena dua tale na kena iwalewale. Ena vakarautaka e dua na ivakaraitaki levu me baleta na nodra kawa muri mai.²³

E rawa ni ra vakadinadinataka e vuqa na veiwatini ni nodra veiqaravi vakaulotu a so na gauna marautaki duadua vakataki ira baleta ni ra a soli ira vakataucoko ki na dua na inaki—cakacaka vakaulotu.²⁴

Lewenilotu daukaulotu

Sa dodonu meda vakabibitaka na gagadre me levu cake na cakacaka vakaulotu ni lewenilotu. Eda sa vulica mai na veika sa sotavi oti ni oqo na kaulotu vuavuai vinaka duadua. Na cakacaka vakaulotu ni lewenilotu e sa dua na idola levu ki na tubu yadudua ni noda lewenilotu. Sa noqu vakabauta kaukauwa ni cakacaka vakaulotu ni lewenilotu ena laveta na bula vakayalo ena dua ga na tabanalevu e vakayacori kina.²⁵

“E namaka vei keda na Turaga meda daukaulotu.”

Cava na balavu ni gauna o a sureta taumada kina e dua na itokani vakaitikotiko voleka ki na soqoni ni sakaramede se ki na dua na koniferedi ni iteki, se me lako mai ki na nomu itikotiko me baleta e dua na lotu vakamatavuvale? Cava na balavu ni gauna o a vakayacora taumada kina e dua na veitalanoa vakaidina ni kosipeli? Oqo na digidigi donu vakadua.²⁶

Na Turaga ena tokoni ira na lewenilotu ena nodra itavi vakaulotu kevaka e tiko walega vei ira na vakabauta mera tovolea.²⁷

Sa kena gauna meda vakasaqara na veika vinaka cake, ka raica vakamatau na rabailevu ni cakacaka levu oqo. Oya e namaka na Turaga kivei keda. E sega ni rauta meda lewe ni Lotu walega ka lako ki na soqoni ni sakaramede, sauma noda ikatini, ka tokona na parokaramu ni welefea. Oya e sa vinaka taucoko—ia oya e sega ni rauta. E namaki keda na Turaga meda daukaulotu, meda bulataka na kosipeli—io, vakaoti, ka veivuke ena taraicake ni Nona matanitu.²⁸

Na iVola i Momani na yavu levu meda na vakayagataka ena noda cakacaka vakaulotu.

Na iVola i Momani e sa baleti rau ruarua na lewenilotu kei na tawalewenilotu. Ni cokoti vata na Yalo ni Turaga, e sa iyaya levu duadua na iVola i Momani e solia kivei keda na Kalou meda saumakita kina na vuravura. Kevaka meda na vukei ira na tamata mera ciqoma na kosipeli, sa dodonu meda na vakayagataka na iyaya ni cakacaka ka sa vakarautaka tu na Kalou me baleta na itavi—na iVola i Momani.

Kei na wiliki ni iVola i Momani sa dua na ka e cikevi keda vakaukauwa meda lako kina ena kaulotu. Eda gadreva e levu cake na daukaulotu. Ia eda gadreva talega na daukaulotu vakarautaki vinaka ka ra lako tani mai na tabanalevu kei na tabana kei na itikotiko eso era kila kina ka taleitaka na iVola i Momani. Eda gadreva na daukaulotu ka tiko vei ira na ivakadinadina qaqaco ni kena ilesilesi vakalou, ka rawa ni sureta ena Yalotabu na nodra dauvakatataro mera wilika ka vakasamataka vagumatua na kena veitabana, ena kilai taucoko vakaidina ni na vakatakila na Turaga na kena dina kivei ira ena kaukauwa ni Yalo Tabu. Eda gadreva na daukaulotu era sa vinaka me vaka na noda itukutuku.²⁹

Na iVola i Momani na yavu levu meda na vakayagataka ena noda cakacaka vakaulotu. E vakaraitaka ni o Josefa Simici a dua na parofita. E tiko kina na vosa i Karisito, ka sa kena ilesilesi levu oya mera kau mai na tamata kivei Karisito. Na veika tale eso era sa ikuri walega. Na taro bibi duadua ena iVola i Momani oya na “Ko na vinakata mo vulica e levu cake na ka me baleti Karisito?” Na iVola i Momani e sa iyaya maucokona duadua ni nodra kunei na tamata ka ra sa vakarau tu ni ciqoma na kosipeli. E sega ni tiko kina na veika e sa “vinaka vei ira na kai vuravura,” ka ra sa sega ni makututaka na vakavuravura. E sa tawasea na veika vakavuravura mai vei ira ka ra gadreva tu mera lako mai kivei Karisito. (Raica na 1 Nifai 6:5.)

E tiko e dua na duidui ena tadrua ni dua na curuvou ka sa tara ena vatu i Karisito mai na iVola i Momani ka tautauri dei ki na ititoko kaukamea, kei na dua e sega.³⁰

Meda kakua ni guilecava ni Turaga Vakaikoya a vakarautaka na iVola i Momani me Nona ivakadinadina cecere. Na iVola i Momani e se noda iyaya ni kaulotu kaukauwa duadua tikoga. Meda sa vakayagataka.³¹

Me rawati na rawaka vinaka ena cakacaka vakaulotu, sa dodonu meda ciqoma na Yalotabu, rawata na yalomalumalumu, lomani ira na tamata, ka cakacaka vagumatua.

Era taroga ena so na gauna na daukaulotu, “Au na rawaka vinaka beka vakacava? E rawa vakacava vua e dua me na maucokona ena cakacaka ni kaulotu?” Oqo e va na imoimoi maucokona vakadinadinataki ki na rawaka vinaka ni cakacaka vakaulotu me baleta ruarua na daukaulotu kei na lewenilotu vakatautauvata.

iMatai, saga mo ciqoma na Yalotabu.

Me yaco na rawaka vinaka, sa dodonu me tiko vata kei keda na Yalo ni Turaga. Eda sa vakatavulici ni Yalotabu e sega ni dautiko ena vale dukadukali. Sa na dua na imatai ni noda iusutu oya na kena vakadeitaki ni sa matata tu na ituvaki ni noda bula. A vakatakila na Turaga, “Mo dou savasava koi kemudou sa kauta na iyaya ni Turaga.” (Vunau kei na Veiyalayalati 38:42.)

Sa solia vei keda na Turaga na Nona ivakaro me baleta na vakatavulici ni Nona kosipeli: “Ena soli vei kemudou na Yalotabu ni dou sa kerea ena vakabauta; ia mo dou vunau walega ena veivakauqeti ni Yalotabu.” Vunau kei na Veiyalayalati 42:14.³²

Ke tiko e dua na itukutuku au sa tokaruataka kivei ira na taciqu Le Tinikarua, sa ikoya oya ni Yalotabu o koya e wili. Sa ikoya na Yalotabu ka sa bibi. Au sega ni kila se’u sa tukuna oqo vakavica, ia au sega ni oca na tukuna tiko—sa ikoya na Yalotabu ka sa bibi duadua.³³

iKarua, rawata na yalomalumalumu.

Sa tukuna na Turaga ni sega ni dua e rawa ni veitokoni ena cakacaka oqo vakavo ke sa yalomalumalumu ka dauloloma. (Raica na Vunau kei na Veiyalayalati 12:8.) Ia na yalomalumalumu e sega ni kena ibalebale na malumalumu. E sega ni kena ibalebale na ririko; e sega ni kena ibalebale na rere. [Eda] rawa ni yalomalumalumu ka doudou talega. [Eda] rawa ni yalomalumalumu ka yaloqaqa talega. Na yalomalumalumu sa ivakaraitaki ni noda vakatautaki keda ki na dua na kaukauwa cecere cake, ka gadrevi wasoma ki na cuqeni ni Turaga ena Nona cakacaka.³⁴

Eda sega ni rawa ni cakava duadua na cakacaka oqo. Oqo na Nona cakacaka. Oqo na Nona kosipeli. Meda sa rawata na Nona veivuke. Kerea mo rawata, cakacaka mo rawata, masu vagumatua kivua na Turaga me ciqoma.³⁵

iKatolu, lomani ira na tamata.

Sa dodonu meda tara cake na loloma me baleti ira na tamata. Sa dodonu meda yalololoma kivei ira ena loloma savasava ni kosipeli, ena gagadre ni laveti ira, ni tarai ira cake, ni dusi ira ki na dua na bula cecere ka vinaka cake ka kena icavacava na bula vakalou ena matanitu vakasilesitieli ni Kalou. Keitou vakadreta na ituvaki vinaka ni tamata ka keitou sa veimaliwai vata, ka lomani ira vaka na luve ni Kalou ka sa lomana na Turaga. …

Eda na sega ni rawa ni qaqaco sara vakavo ni da sa vulica ni rawata na veikauwaitaki me baleti ira taucoko na luve ni Kalou—me yacova ni da vulica meda lomani ira. E rawa ni vakila na tamata ni sa vakaraitaki vei ira na loloma. E vuqa era gadreva tu. Ni da kauwaitaka na ka era vakila, era na vakaraitaka lesu mai ena imoimoi ni loma vinaka kivei keda. Eda sa na rawa ni rawata e dua na itokani.³⁶

E tiko … vei keda e dua na itavi levu meda lomani ira na noda itokani wavoliti keda. Sa ikoya na ikarua ena rua na ivunau levu duadua. E vuqa vei ira na noda itokani wavoliti keda era se bera tu ni lewe ni Lotu. Sa dodonu meda itokani vinaka vata kei ira era wavoliti keda. Sa dodonu meda lomani ira kece na luve ni Tamada ka veimaliwai vata kei ira.

Au vakanuinui kaukauwa ni da na vakasinaiti ena loloma ni Kalou me baleti ira na noda veitokani!³⁷

iKava, cakacaka vagumatua.

Kevaka eda vinakata meda maroroya na Yalotabu, sa dodonu meda cakacaka. E sega tale ni dua na malaude se yalovakacegu levu duadua ena kena kilai, ni oti e dua na siga ni cakacaka kaukauwa, ni da sa vakayacora na noda vinaka taucoko.

Dua na ka vuni levu duadua ni cakacaka vakaulotu oya na cakacaka vakaukauwa. Kevaka e cakacaka e dua na daukaulotu, ena vakila okoya na veivakauqeti ni Yalotabu; kevaka e sa vakila okoya na veivakauqeti ni Yalotabu, ena veivakatavulici ena Yalotabu; kevaka e veivakatavulici ena Yalotabu, ena tara okoya na lomadra na tamata, ka na marau vakaidina. … Cakacaka, cakacaka, cakacaka—sa sega ni dua na isosomi maucokona, vakabibi ena cakacaka ni kaulotu.³⁸

Au kila ni bula tiko na Kalou. Oqo na Nona cakacaka. Sa vosa tale mai lomalagi o Koya vata e dua na itukutuku ki na vuravura raraba; sega ki na dua na iluku sinai walega ni Yalododonu Edaidai, ia me baleti ira taucoko na tacida kei na ganeda, ka ra tiko e loma se taudaku ni Lotu. Au nuitaka ni na solia vei keda na Kalou na kaukauwa me kau kina na itukutuku oya ki na vuravura, mera bulataka na Kosipeli, mera taura matua na yavu ni Lotu, me rawa ni da vakadeitaki keda ki na veivakalougatataki yalataki.³⁹

Vakatutu ni Vuli kei na Veivakavulici

Taro

Cava na vuna e gadreva kina na vuravura na kosipeli “ni sa sega tale ni dua na ka e gadreva”? (Me baleta na ivakaraitaki eso, raica na wase e 1.) Na cava eso na dina vakalesuimai o vakabauta “sa gadreva tu na vuravura”?
Ni ko raica lesu na wase e 2, navuca na ivakasala e kovuti iko kei na nomu matavuvale. Ena sala cava soti e rawa vakayadua kina vei keda, se vakacava tu na keda ituvaki, meda wasea na kosipeli? Na cava eda rawa ni cakava ena vakavakarau ki na veiqaravi ni kaulotu tudei? Na cava eda rawa ni cakava me ra vukei tale kina eso ena vakavakarau ki na veiqaravi ni kaulotu tudei?
A tukuna o Peresitedi Benson ni iVola i Momani “sa iyaya ni cakacaka levu duadua ka sa solia vei keda na Kalou meda saumakita kina na vuravura” (wase e 3). Gauna cava o sa bau raici ira kina na tamata ni ra sa saumaki baleta na vulici ni iVola i Momani? Ena sala cava soti eda na rawa ni vakavinakataka kina na noda sasaga ni wasea na iVola i Momani?
A wasea o Peresitedi Benson na “va na idola vakadinadinataki ki na rawaka vinaka ni cakacaka ni kaulotu” (wase e 4). Cava na vuna o nanuma kina ni o ira na idola oqo era muataka na rawaka vinaka ni cakacaka ni kaulotu? Na ivakaraitaki cava o sa raica vei ira na tamata ka ra muria na ivakavuvuli oqo?

iVolanikalou Veisemati

Marika 16:15; 1 Timoci 4:12; Alama 17:2–3; 26:1–16; V&V 4; 12:7–9; 15:4–6; 88:81; 123:12–17

Veivuke ki na Vuli

“Wasea na veika o sa vulica. Ena gauna o vakayacora kina, ena makare na nomu vakasama, vakarabailevutaka ka vakaukauwataka tale ga na dei ni nomu kila” (Veituberi, Me iLutua Ni Noda Bula [1999], 18).