Wase 6

Jisu Karisito, Na Noda iVakabula ka Dauveivueti

“Eda vakadeitaka ni vakalou o Jisu Karisito Eda rai vei Koya ni noda ivurevure ni veivakabulai.”

Na bula nei Ezra Taft Benson

“E se bera mada ni dua na gauna meu sega ni vakabauti Jisu Karisito,”e a kaya o Peresitedi Ezra Taft Benson. “Sa dei tu ni Nona bula, mate, kei na tucaketale sa tiki tu ni noqu bula. Au a tuberi cake ena dua na vuvale ka rau vakabauta ka vakadinadinataka na noqu itubutubu na veika baleti Karisito kau sa dau vakavinavinaka tu ga.”¹

Na ivakadinadina oqo kei Jisu Karisito sa yavu dei ni bula nei Peresitedi Benson. Sa yavutaki kina na veika e vakaliuca, tuberi koya ena vakatulewa, ka vukei koya ena dredre e dau sotava. E vakarautaka na iyaloyalo ni inaki ni bula vakayago, kei na dei ni yalayala kei na veivakalougatataki ni bulatawamudu.

Ena gauna ni nona veiqaravi vaka-iapositolo ka ivakadinadina kei Jisu Karisito, e dau vakadinadinataka tu ga kina o Peresitedi Benson na iVakabula. Ni sa ciqoma na kena dau “tarogi ena so na gauna na taro, ‘Era va-Karisito li na Momani?’” dau kaya vaka oqo:

“Keimami vakadinadinataka ni vakalou o Jisu Karisito. Keimami raici Koya taudua vaka neimami ivurevure ni vakabulai. Keimami tovolea me keimami bulataka na Nona ivakavuvuli, ka keimami sa vakanamata tu kina Nona na lesu mai ki vuravura me mai vakatulewa ka veiliutaki vaka-Tui ni Tui ka Turaga ni Turaga. Ena ka e kaya e dua na parofita ena iVola iMomani, keimami kaya … , ‘Sa sega tale ni dua na yaca se na sala se ivakarau sa soli mera bula rawa kina na luve ni tamata na yaca duauda ga i Karisito na Turaga Kaukauwa Sara’ (Mosaia 3:17).”²

Na nona dau vakadinadinataki Jisu Karisitio ni vakalou, o Peresitedi Benson e dau semati vakavoleka sara kina iVola iMomani.³ “Na iVola iMomani sa vakarautaka tu na ivakadinadina ena gauna oqo ni o Jisu na Karisito,” e a kaya.⁴ E a vakatavuvulitaka ni “inaki levu” ni iVola iMomani me vakauqeti ira na tamata kina dina oqo.⁵ “Sivia na veimama ni veitiki ni iVola iMomani e tukuna tiko na noda Turaga,” e a kaya o koya. “E cavuti ena sivia na duanadrau na yaca duidui ena iVola iMomani. Na veiyaca oqori e tiko kina e so na ka bibi me vakamacalataka na Nona ituvaki.”⁶

Na ivakadinadina ni iVakabula ka tiko vei Peresitedi Benson e vakaraitaka na nodrau sa veiwekani voleka sara vata kei Koya.

“Au sa lomani Koya sara ga ena yaloqu taucoko.

“Au vakadinadinataka ni o Koya tikoga oqo na Turaga dauloloma ka a dau taubaletaka na gaunisala kuvu mai Palasitaina. E tiko voleka sara vei ira na Nona tamata e vuravura ena gauna oqo. E kauwaitaki keda ka lomani keda yadua nikua. Mo na vakadinata na ka o ya.

“O Koya e bula tu edaidai me noda Turaga, Noda iVakavuvuli, noda iVakabula, noda Dauveivueti, ka noda Kalou.

“Me vakalougatataki keda kece na Kalou meda vakabauti Koya, meda ciqomi Koya, me da qaravi Koya, meda sa vakararavi vakatabakidua Vua, ka muri Koya.”⁷

“Ena sega ni dua na soqo me na bibi cake kina tamata yadua se dua na matanitu, me tautauvata kei na nona tucaketale na iVakavuvuli.”

iVakauvuli nei Ezra Taft Benson

Me vaka ni lomani keda dina sara o Koya, e sa mai vueti keda kina o Jisu Karisito mai na mate vakayago kei na mate vakayalo.

E sega tale mada ni dua me tara vakalevu na nodra bula na lewe i vuravura me vakataka na bula nei Jisu Karisito. Eda na sega ni rawa ni vakabulai keda vakaikeda kevaka me sega na Nona ivakavuvuli. Kevaka me sega o Koya eda na yali ena levu na veimataqali vakabauta kei na qaravi kalou ka tauyavu ena taqaya kei na butobuto ka veidre tu yani kina na veika vakavuravura. Eda sega ni yacova tiko na ituvatuva e tuva o koya me da yacova, ia me da kakua ni mataboko kina, se me da guilecava ni rarama eda via torovolekata tiko yani kina bula e vinaka sara ena sega ni rawa vakavo ena Nona ivakavuvuli, Nona bula, Nona mate kei na Nona tucaketale.⁸

Me da vakavinavinakataka na veika sa vakayacora o Jisu Karisito me baleti keda e dodonu meda nanuma tiko na veika dina oqo:

E a lako mai ki vuravura o Jisu me mai vakayacora na loma i Tamada.

O Koya e lako mai ka sa kila rawa tu ni na mai colata na icolacola ni noda ivalavala ca kece sara.

E kila tu o Koya ni na mai lauvako ena kauveilatai.

O Koya e a mai sucu me iVakabula ka Dauveivueti ni tamata kecega.

O Koya e rawata me vakataucokotaka na nona itavi baleta ni o Koya e Luvena na Kalou ka tiko vua na kaukauwa va-Kalou.

O Koya e rawata me vakacavara vinaka na Nona itavi baleta ni o Koya e lomani keda.

E sega ni dua na tamata e vuravura e tiko vua na kaukauwa se na rawa-ka me vakabulai ira kece na tamata mai na nodra ivalavala ca se me dua tale me solia wale tuga na nona bula me cabori me ra vakabulai kina na tamata ka vakayacora na tucaketale vei ira kece na lewe i vuravura.

Sa i Jisu Karisito duadua ga ena rawata na veika oqori mera vueti kina ena ivakaraitaki ni loloma.⁹

O Jisu Karisito … e a lako mai ki vuravura ena gauna sa yalataki tu ena dua na ituvatuva vaka tui ka a taqomaki tu kina na itutu vakalou. E a soqoni vata kina na nona iTutu vakalou kei na nona itutu ni a vakalewe ka vakasui na tinana kei na ivakarau kei na kaukauwa ni Tamana Tawamudu.

Na Nona itutu kei na iyatu e tukuni Koya ni ravouvou ena itutu—Ni Luvena e Le Duabau Ga na Kalou. Me vaka ni Luvena na Kalou, e a tiko vua na kaukauwa kei na kila ka sega ni tiko vua na tamata mai na gauna o ya se dua tale na gauna. Sa i Koya ko Imanueli, ka kena ibalebale, na “Kalou sa tiko vata kei keda.” (Raica na Aisea. 7:14; Maciu. 1:23.)

Dina ga ni o Koya e Luvena na Kalou, ka lako mai ki vuravura, ia na ituvatuva ni Tamada ena gadrevi kina vei Jisu me sotava na dredre kece kei na veivakatovolei vakayago. O ya na vuna e lako curuma kina na “veitemaki, … viakana, kei na wawale ni yago.” (Mosaia 3:7.)

Me da na yaco me vaka na Dauveivueti kivei ira kece na luvena na Tamada, e dodonu me ivalavala dodonu ka talairawarawa kina ivunau kece ni Kalou o Jisu Karisito. Me vaka ni sa semati koya kina loma ni Tamada, e a tubucake kina, ko Koya ena loloma kina loloma me yacova ni sa laki taucoko na kaukauwa ni Tamada sa mai tu vei Koya. Sa tu Vua na “kaukauwa mai lomalagi kei vuravura.” (V&V 93:13, 17.)¹⁰

Me vaka ni o [Jisu] e Kalou—e luve ni Kalou—sa rawa Vua me colata vakai Koya na icolacola ni nodra ivalavala ca na tamata. E vakamacalataka vaka oqo o Aisea na Nona sa lomasoli na iVakabula: ‘E dina sa colata ko koya na noda rarawa ka sa colata na rarawa ni lomada: … sa vakamavoataki ko koya ena vuku ni noda talaidredre ka sa qaqi ena vuku ni noda caka cala sa tau vua na cudruvi sa vu ni noda veivinakati tale ia, na we ni kena kuita eda sa vakabulai kina.” (Aisea. 53:4–5.)

Na vakacacabo ni solibula o ya ena nona taura vei Koya na ivalavala ca ni tamata kece sara sa ikoya na Veisorovaki. E rawa vakacava vua e Dua me colata na ivalavala ca ni tamata kece sara i sa dredre vua na tamata sa vakavuravura me na kila. Ia, oqo na ka au kila: Sa taura kece sara ga o Koya na ivalavala ni tamata kece ka caka vaka oqori ena nona loloma dina vakalou. Sa kaya oti o Koya, “Raica, ko i au na Kalou; au sa vosota oti na veika oqo, mera bula kina ko ira era sa veivutuni; … raica ko i au na Kalou sa Kaukauwa Sara au sa sautaninini ena mosi ni veivakararawataki ko ya, au a bunotaka na dra, ka sa yaluma sara kina na yagoqu kei na yaloqu — au a sa kerea me kautani vei au na bilo ni cudru.” (V&V 19:16, 18.)

Dina ga ni sa bau mosimosi sara ga na veika e a sotava, ia e taura ga na bilo ka gunuva. E a vakararawataki ena nodra mosi na tamata kecega meda kakua kina ni vakararawataki o keda. E a vosota na veivakamadua laki kei na veivakacacani mai vei ira era beitaki Koya ka sega ni bau vosa se sauma lesu ena duabulu na ka me cakava. E a vosota na veivakanakuitataki kei na veivakararawataki levu ni lauvako ena—kauveilatai.¹¹

Mai Kecisemani me laki yaco sara ki Kalivari, o [Jisu]e a cakacakataka kina na Nona veisorovaki cecere ka tawamudu. O ya na ivakaraitaki ni loloma levu duadua e rawa ni vakacabora e duabulu na tamata ka kilai tu ena ivola tukutuku ni gauna. Qai muria mai na Nona mate kei na tucaketale.

Sa qai yaco o Koya me noda Dauveivueti—vueti keda kece mai na mate vakayago, ka vueti keda e so mai na mate vakayalo ni da sa talairawarawa kina ivakaro kei na cakacaka vakalotu ni kosipeli.¹²

Eda na sega beka ni rawa ni kila sara ena bula oqo na Nona rawa ni vakavatukanataka na ka e a sa cakava, ia, me da kakua ni vakawalena na kena kilai na vuna e cakava kina na ka e a cakava.

Na veika kece e a cakava o Koya, e yaco baleta na Nona sega ni nanumi Koya ga kei na Nona loloma cecere baleti keda.¹³

“E sega tale ni dua na ka me yaco e vuravura me tara na bula ni levu sara na tamata e vuravura me tautauvata kei na bula nei Jisu Karisito.”

Sa tucake tale mai na mate o Jisu Karisito, ka sa bula tiko ni kua me vaka e dua sa tucaketale.

Na ka levu duadua e yaco ena itukutuku ni veigauna, sa ikoya ena tara na nodra bula na iwiliwili levu duadua ni tamata ena dua na gauna balavu duadua. Ena kena itagede oqo, ena sega tale ni dua na itukutuku me na bibi cake vua e dua na tamata se dua na matanitu me vaka na itukutuku ni tucaketale ni iVakavuvuli.

Na tucaketale ni tamata yadua ka sa mai bula ka mate e vuravura sa vakadeitaki oti tu, ka sa dodonu kina me vakarautaki koya na tamata kece kina gauna vaka oqo. Na lagilagi ni tucaketale me sa nanamaki kece kina na tamata baleta ni na yaco dina sara na tucaketale.

Ena sega tale ni dua na ka levu ena yaco me tautauvata kei na tucaketale. Na ka bula taucoko era na tucaketale. “Ni sa qai mate kecega ena vukui Atama, ena vakabulai kece talega ena vukui Karisito.” (1 Kori. 15:22.)

E tukuni ena ivolanikalou ni ena ikatolu ni siga ni oti na lauvako i Jisu ena kauveilatai e a yaco kina e dua na uneune levu. E a vaqiqici tani mai na katuba ni ibulubulu na kena isogo. E so vei ira na yalewa yalodina ka ra dauvakamuri Koya era a lako mai kina vanua o ya vata kei na waiwai boi vinaka, “ka sega ni kunea na yago ni Turaga o Jisu.”

Era rairai na agilosi ka kaya, “Na cava dou sa vakasaqarai ira kina sa bula ena kedra maliwa na mate? Sa sega eke ko koya, sa tucaketale.” (Luke 24:3–6.) E sega ni dua na itukutuku me tautauvata na itukutuku talei veivakurabuitaki o ya: “Sa sega eke ko koya sa tucaketale.”

Na ivakadinadina ni Nona tucaketale na Turaga e yavutaki ena ivakadinadina ni levu sara na ivakadinadina. Rairai na Turaga vei ira e levu na yalewa, vei rau na rua na tisaipeli ena gaunisala mai Emeo, vei Pita, vei ira na iApositolo; kei na ka e a vola o Paula, “ni a rairai vei ira e le lima na drau ena dua vata ga na gauna. … Sa rairai talega e muri sara vei [Paula].” (1 Kori. 15:6, 8.) …

Me vaka niu dua na nona ivakadinadina bula, edaidai au vakadinadinataka ni o Koya e bula tiko nikua. O Koya e sa tucaketale. O Koya e noda iVakabula, noda Turaga, na Luve ni Kalou. Au vakadinadinataka ni o Koya ena lesu tale mai me noda Turaga ka sa tucaketale mai ena lagilagi. Sa sega ni yawa na gauna ko ya. Vei ira era sa ciqomi Koya me nodra iVakabula ka nodra Turaga, sa ibalebale ni nona tucaketale ni bula e sega ni kena icavacava na mate, ni sa yalataka o Koya: “ Me vaka niu sa bula, dou na bula vaka talega kina.” (Joni 14:19.)¹⁴

Sai Koya taudua e tiko vua na kaukauwa ni tucaketale. Ena ikatolu ni siga ni oti na Nona bulu, sa qai tucake mai na ibulubulu ni sa bula ka vakaraitaki Koya vei ira na lewe vuqa. … Niu dua na [Nona] ivakadinadina ka kacivi nikua, au vakadinadinataka vei kemuni ni o Koya e bula tiko edaidai. E bulataka tiko nikua e dua na yago sa tucaketale. Sa na sega tale ni dua na dina se ka me vakadinadinataki meu na vakadeitaka ni dina me vaka na dina ni sa tucaketale na noda Turaga.¹⁵

Me da sa na yalo dina ena ena vakadinadinataki Jisu Karisito.

Sa dua na veivakalougatataki levu vei ira na lewe ni Lotu na ivakadinadina kei Jisu Karisito kei na Nona lotu. E dua na ka eda na rawa ni kauta vata kei keda ni da sa biuta na bula oqo sa ikoya na ivakadinadina.

Me tiko e dua na noda ivakadinadina kei Jisu ka na lako mai vua na Yalo Tabu baleta na itavi vakalou i Jisu Karisito.

Na ivakadinadina kei Jisu meda na kila na ituvaki vakalou ni nona sucu na noda Turaga—ni o koya sara ga na Luvena Le Duabauga.

Na ivakadinadina kei Jisu sa ikoya meda kila ni o Koya na Mesaia ka sa yalataki tu ka ni nona mai tiko voli kei ira na tamata e a vakayacora kina o Koya e levu sara na caka mana.

Na ivakadinadina kei Jisu sa ikoya me da kila ni lawa ka vakamacalataka ni o Koya e Nona na ivunau e ka dina kei na me na vakamuri na lawa kei na kena cakacaka vakalotu.

Me tiko vei keda na ivakadinadina kei Jisu sa ikoya me kilai ni solia ga vakaikoya na Nona bula me boko kina na ivalavala ca ni kai vuravura mai na Were o Kecisemani, ka vakavuna Vua me na rarawa ni yago kei na yalo ka bunotaka kina na dra. E cakava na veika oqo me rawa kina ni da na sega ni vakararawataki kevaka me da veivutuni. (Raica na V&V 19:18.)

Me tiko vei keda na ivakadinadina kei Jisu sa ikoya me da kila ni o Koya e a tucake mai ena qaqa mai na bulubulu kei na dua na yago sa tucaketale. Me vaka ni o Koya sa bula, ena vaka kina na tamata kece sara.

Me tiko na ivakadinadina kei Jisu sa ikoya me kilai ni Kalou na Tamada kei Jisu Karisito erau a rairai vei Josefa Simici me tauyavutaka kina na tabagauna ni Nona kosipeli me rawa ni vunautaki na veivakabulai kina veivanua kecega ni bera ni lako mai.

Me tiko na ivakadinadina kei Jisu sa ikoya ni Lotu ka sa tekivutaka ena icavacava ni gauna oqo sa vaka ga e a kaya na Turaga, “sa ikoya na lotu dina duadua e tiko e vuravura raraba.” (V&V 1:30.)

Sa ka bibi me tiko na ivakadinadina vaka o ya. Ia e bibi cake sara na noda dinata na ivakadinadina.

Na ivakadinadina kei Jisu sa ikoya na kena ciqomi na itavi vakalou i Jisu Karisito, lomana na Nona kosipeli ka cakava na Nona cakacaka. Sa kena ibalebale talega meda ciqoma na itavi vakaparofita i Josefa Simici kei ira era sosomitaki koya ka vakamuria na nodra ivakasala. Me vaka e a kaya o Jisu, “Ena vakayacori vakaidina na vosa kau sa tukuna se ra tukuna na noqu tamata.” (V&V 1:38.)

Ni vosa me baleti ira era na ciqoma na veivakalougatataki ni matanitu silesitieli, e a kaya na Turaga vei Josefa Simici:

“Ia, sai ira oqo era sa rogoca na itukutuku kei Jisu, ka vakabauta na yacana a ra sa papitaiso me vaka sa bula ko koya raica era sa bulu ena wai ena yacana me vaka na nona ivakaro (V&V 76:51.)

Oqo o ira sa kaukauwa na nodra ivakadinadina baleti Jisu, sa kaya na Turaga, Io, ko ira sa rawa na ka kecega ena vakabauta ka ra sa vakataudeitaki ena Yalo Tabu sa yalataki tu ka sa sovaraka ko Tamada vei ira kecega sa dina ka dodonu.” (V&V 76:53.)¹⁶

Na vakabauti Jisu Karisito e wili kina na vakararavi vakatabakidua vei Koya, ka vakamuria na Nona veivakavulici.

Na yavu ni ivakavuvuli ni noda matalotu na vakabauti Jisu Karisito na Turaga. Na cava e gadrevi kina me da sa vakaliuca sara ga na noda veivakadeitaki, na vakanuinui, na vakararavi, vua e duabulu na tamata? Na cava e bibi kina ki na vakasama ena bula oqo kei na vakanuinui ena bula sa bera mai na vakabauti Koya?

Na noda isaunitaro oqo ena vakavurea na vakasama ni noda na sa qarava na veisiga ni mataka ena qaqa, vakanuinui, kei na rai vakayalomatua se yaloveilecayaki nuiqawaqawa kei na nuinui cala.

Na noqu itukutuku kei na ivakadinadina e vaka oqo: sa i Jisu Karisito duadua ena rawa ni solia na vakanuinui, na yalodei, kei na veivakaukauwataki ka da gadreva me da na vakamalumalumutaki vuravura rawa kina ka lako curuma rawa na malumalumu vakayago. Me da na rawata na ka oqo, sa dodonu meda laiva Vua na veivakabauti ka bulataka na Nona lawa kei na veivakavulici. …

Na vakabauti Koya e tiko sara e cake na ka me caka mai na kena vakamacalataki ni o Koya e bula dina tiko. E levu sara mai na kena vakaraitaki ni vakabauti.

Na vakabauti Jisu Karisito e wili kina na vakaliuci Koya sara ga ena veika kece. Me vaka ni Kalou e tiko Vua na kaukauwa, vuku, kei na loloma. E sega ni tiko e dua na leqa ka na sega ni rawa Vua me walia. Me vaka ni o Koya sa toro sobu sara mai ki ra ena veika kece (raica na V&V 122:8), e kila tu o Koya na ka me caka me vukei keda meda ulabaleta yani na dredre eda sotava tiko.

Na vakabauti Koya e oka kina ni dina ga ni da sega ni kila tu na veika kecega e yaco, ia o Koya e kila vinaka sara tu ga. O keda, me da sa na rai sara ga Vua “ia mo drau vakaliuci au ena nomudrau nanuma kecega.” (V&V 6:36.)

Na vakabauti Koya, e kena ibalebale meda vakararavi Vua ni tiko Vua na kaukauwa me lewai ira na tamata kece sara ena veivanua kecega. E sega ni dua na ca ena sega ni rawa Vua me walia. Sa tiko kece e ligana na veika kece. Sa itutu ni yavana o vuravura. Ia, e vakatara ga na ca me rawa ni da vakayagataka na noda galala ni digidigi mai na vinaka kei na ca.

Sa iwali vinaka duadua ga ni ca kei na leqa ena bula oqo na kosipeli.

Ia na kosipeli ena yaga walega kevaka me na vakayagataki ena noda bula. Mo dou tugana ki lomamudou na vosa i Karisito; raica na vosa i Karisito sa tukuna vei kemudou na veika kece mo dou kitaka.” (2 Nif. 32:3.)

Vakavo walega meda cakava na Nona ivakavuvuli, eda na sega ni vakaraitaka na noda vakabauti Koya.

Vakasamataka mada se na vakacava mada na ituvaki ni vuravura eda bula tiko kina kevaka me cakava na tamata taucoko na veika e a kaya o Koya, “Mo lomani Jiova na nomu Kalou ena lomamu taucoko kei na yalomu taucoko kei na nomu nanuma kecega. … Ia mo lomana na kai nomu me vaka ko sa lomani iko.” (Maciu. 22:37, 39.)

Na cava na isaunitaro e tarogi “Na cava me caka baleta na leqa kei na dredre ka dau sotava na tamata yadua, dua na itikotiko, kei na dua na matanitu ena gauna oqo?” Oqo, e dua na ivakamacala rawarawa sara:

“Mo ni vakabauta na Kalou; mo ni vakabauta ni sa bula tiko, ka sa bulia na ka kecega, mai lomalagi kei vuravura; mo ni vakabauta ni sa nona kece na lewa kei na kaukauwa mai lomalagi kei vuravura; mo ni vakabauta ni sa sega ni kila rawa na tamata na ka sa kila na Turaga. …

“Mo ni vakabauta ni sa dodonu mo ni veivutunitaka na nomuni ivalavala ca ka biuta tani sara, ka vakamalumalumutaki kemuni ena mata ni Kalou; mo ni kerea ena yalodina me vosoti kemuni; ia kevaka ko ni sa vakabauta na ka kece oqo, mo ni vakayacora sara vakakina.” (Mosaia 4:9–10; kuri ena matanivola kala.)¹⁷

Eda na vakalougatataki ka reki vakalevu ni da sasagataka meda na vakataki Jisu Karisito.

E dua na inaki ni bula oqo, sa ikoya meda na vakatovolei me laurai se eda, “na vakayacora na vei kece e vakarota vei keda na Turaga” na noda Kalou. (Epa. 3:25.) Me vakalekalekataki ga, sa dodonu me da vulica na loma ni Turaga ka cakava. Meda na vakamuria na ivakaraitaki i Jisu Karisito ka me da na veiucui kei Koya.

Na taro ena ganita me tarogi ena bula oqo, sa ikoya ka a taroga o Paula: “Turaga, na cava ko ni sa vinakata meu kitaka?” (Cakacaka 9:6.) …

Eda gadreva e levu na tagane kei na yalewa e va-Karisito na nodra bula ka rawa ni ra na dau nanumi Koya tikoga, ka ra na muria na nona ivakaro, ka sa solia vei ira o Koya. Na ivakaraitaki levu duadua ni rawa-ka sa ikoya me da raica na veivolekati ni noda na rawa ni taubale vata kei Koya ena veikalawa ni noda bula.¹⁸

E so … era sa tu vakarau mera na mate ena nodra vakabauta, ia, e sega ni ra rawata mera bulataka. O Karisito e a bula ka mate me baleti keda. Mai na Nona veisorovaki kei na noda na muria na we ni yavana, eda na rawa ni rawata na isolisoli levu duadua—bulatawamudu, sa ikoya na bula e bula tiko kina o Koya ka Tawamudu—na Tamada Vakalomalagi.

E a taroga na Karisito na taro, “O koya mo [dou] qai veiucui kei cei?” Oti sa qai sauma na taro ena nona kaya ni dodonu me da na veiucui kei Koya. (3 Ni. 27:27.)

Na [tamata] o ya ena qaqa ka na kalougata vakalevu ka reki ni sa volekata tiko yani na ivakarau ni bula nei Karisito. Oqo e sega ni baleta na iyau vakavuravura, kaukauwa, se itutu. Na ivakaraitaki levu duadua ni qaqa, kalougata, yaloreki, sa ikoya ni dua sa na rawa ni volekata sara na iVakavuvuli, o Jisu Karisito. O Koya dina na sala, na dina e taucoko, kei na bula e rawa-ka vakalevu.

Na taro e dau tarogi wasoma ena noda vakasama, ka dau tara sara vakalevu na vakanananu kei na ka e dau vakayacori ena noda bula sa dodonu me, “Kemuni na Turaga, a cava ko ni sa vinakata meu cakava?” (Cakacaka 9:6.) Na isau ni taro oqori ena qai lako walega mai ena Rarama i Karisito kei na Yalo Tabu. Ena vinaka sara vei ira era sa bulakilikili voli ga ni ra na vakasinaiti tu mai vei rau ruarua. …

Ni vakasamataki na veika sa cakava oti o [Jisu Karisito] kei na ka sa cakava tiko oqo, ena tiko na ka e dodonu meda solia lesu Vua.

Na isolisoli levu sa solia vei keda o Karisito sai koya na Nona bula kei na vakacacabo. E sega li ni ganita o ya me noda isolisoli lesu Vua—na noda bula kei na vakacacabo, sega walega ena gauna sara ga oqo, ia ena veigauna mai muri.¹⁹

[O ira era] liutaki mai vei Karisito era na vakasinaiti vei Karisito. … Na veika era vinakata sa tiko ena loma ni veika e vinakata ga o Koya. (Raica na Joni 5:30.) Era na cakava ga na veika e vaka na loma ni Turaga. (Raica na Joni 8:29.) Sega walega ni ra na mate ena vukuna na Turaga, ia, era na via bula tiko me baleti Koya.

Ni o curu e nodra veivale, ko na raica na iyaloyalo era lili tu e lalaga, na ivola ena nodra vata ni ivola, na ivakatagi ena rogoci, na nodra ivosavosa kei na veika era cakava ena tukuna ni ra lotu va-Karisito. E dodonu me ra tu ka ivakadinadina ni Kalou ena veigauna kecega kei na veika kecega kei na veivanua kecega. (Raica na Mosaia 18:9.) Ena tiko o Karisito ena nodra vakasama, ni ra na rai yani Vua ena veika kecega era vakasamataka. (Raica na V&V 6:36.) E tiko o Karisito e yalodra, ni ra sa vakaliuci Koya sara tu ga ena veika kece era cakava. (Raica na Alama 37:36.)

Ena veimacawa era na taura na sakaramede ka ra vakavoua na nodra vakadinadinataka vua na Tamadra Tawamudu ni ra sa taura na yaca ni Luvena, daunanumi Koya, ka talairawarawa kina Nona ivunau. (Raica na Moro. 4:3.)

Ena ivosavosa mai na iVola iMomani, era “tugana ki lomadra na vosa i Karisito” (2 Ni. 32:3), “tukuni Karisito” (2 Ni. 25:26), “rekitaki Karisito” (2 Ni. 25:26), “era sa bula ga ena vuku iKarisito” (2 Ni. 25:25), ka vakacaucautaki [nodra] Jisu” (raica na 2 Ne. 33:6). Me vakalekalekataki ga, era sa vakaliuca sara ga na Turaga ka na kunea na bula tawamudu. (Raica na Luke 17:33.)²⁰

Vakatutu ni Vuli kei na Veivakavulici

Taro

O Peresitedi Benson e a vakavulica ni na sega beka ni rawa me da kila taucoko na cakacaka ni Nona veisorovaki na iVakabula, eda rawa ni kila na vuna e a cakava kina (raica na wase 1). E tara vakacava na nomu bula na kila oqo?
Ni ko vulica tiko na wase 2, vakasamataka na kena revurevu na Tucaketale ni iVakabula. E tara vakacava na nomu bula na Nona Tucaketale?
Na cava o nanuma kina ni ivakadinadina kei Jisu Karisito sa “dua na veivakalougatataki levu”? (Raica na wase e 3.) Na cava na kena ibalebale vei iko mo yalodina ena nomu ivakadinadina baleta na iVakabula?
Vakasamataka na vosa i Peresitedi Bensson baleta na vakabauti Jisu Karisito (raica na wase 4). Na veigaunisala cava e so e rawa ni ulabaleta kina na ivakamacala ni vakabauti Jisu Karisito na “kena vakadinadinataki tu ni o Koya e bula tiko”?
Tukuna o Peresitedi Benson ni o ira e “liutaki ira tu o Karisito” era sa tu vakarau mera “mate ena vuku ni Turaga, ia, e bibi vei ira mera na bula tiko me baleti Koya.” (wase 5). Na cava na kena ibalebale vei iko mo bula tiko ena vukui Karisito?

iVolanikalou Veisemati

Joni 10:17–18; 2 Nifai 9:20–24; 31:20–21; Mosaia 16:6–11; 3 Nifai 27:20–22; Moronai 7:33; V&V 19:1–3, 16–19; 76:22–24; Yavu niVakabauta 1:3

Veivuke ki na Vuli

“Ni ko sa vakila na reki e lako mai ena kena sa kilai na kosipeli, ko sa na rairai gadreva beka mo bulataka na ka o sa vulica. Sasagataka mo bulataka na ka o sa vulica ka kila. Ni ko cakava oqori ena vaqaqacotaki na nomu vakabauta, na ka o kila, kei na nomu ivakadinadina” (Vunautaka na Noqu Kosipeli [2004], 19).