Wase 2

Masu Tikoga

“Au sa vakamasuti kemuni kece sara … mo ni dau veitaratara wasoma kei na Tamada mai lomalagi ena masu.”

Na Bula nei Ezra Taft Benson

“Ena noqu bula taucoko sa ivakarau tu ni noqu bula na ivakasala au ciqoma baleta na yaga ni masu mai na ivakasala tale e so au ciqoma,” e kaya o Peresitedi Ezra Taft Benson. “Sa dua tu na tiki bibi ni noqu bula, sa kena itakele, sa ivurevure ni kaukauwa, ka sa yavu ni veika vakalou au sa mai vulica ka kila.

“‘Nanuma tiko ni veika o na cakava se na vanua cava o na tiko kina, ko na sega vakadua ni tu taudua’ na ivakasala talei nei tamaqu ena gauna au se gone kina. ‘Ena dau voleka tu ga na Tamada Vakalomalagi. Ko na rawa ni dodoliga yani ka tarai koya ena nomu masu tiko Vua.’ Au sa vakadinadinataka sara ga na ivakasala oqo. Me vakavinavinakataki na Kalou ni rawa ni da dodoliga yani ka kerea na kaukauwa oqo ka sega ni rawa vua na tamata me caka vinaka kina, kevaka e sega.”¹

E vakamuria na ivakasala oqo o Peresitedi Benson ena veika kecega e cakava ena nona bula. Ena nona sa lesi me sekeriteri ni tabacakacaka ni iteitei ena matanitu o Amerika, e a “masulaka ka digitaka sara vakamatau” na tamata me cakacaka vata kei koya, ka kerea vua na Kalou me solia vei [koya] na yalo ni kila.”² Ena imatai ni nodra bose, e a taroga “se dua vei ira ena saqata kevaka me dolavi na nodra bose ena dua na masu. Sega ni dua me saqata. Sa tekivu e kea e dua na ka e a tekivutaka o [koya] me walu na yabaki. E a sureti ira kece na tamata cakacaka mera masu ena dua na gauna ni masu.”³ Era taleitaka sara na ivakarau oqo, ka dina ga ni vaka e sega soti ni taleitaki ena kena itekivu. E dua na tamata cakacaka e a qai tukuna e muri ni so vei ira na tamata cakacaka era se masu ga ena domolevu ni ra a se gone. “Eda sasagataka vakaukauwa ena vosa meda vakayagataka,” e a kaya. “Ia, na Boso [Peresitedi Benson] e a sega ni vakaraitaka ni raica na ka o ya. Ni sa qaravi mai vakavica vata sa tekivu me matau sara mai. Sa bau veivuke li? Na ka ga au via tukuna ni ko tekivutaka vaka oya e dua na bose, era na sega ni viavialevu kina o ira na tamata ena nodra vakanananu vakai ira. Ena totolo sara na yaco ni duavata ena ka e vinakati me na vakayacori ena gauna e gadrevi kina.”⁴

O ira na itokani nei Peresitedi Benson ena Mataveiliutaki Taumada kei na Kuoramu ni iApositolo Le Tinikarua era a vakaivotavota talega ena yalo ni masumasu e tiko vei koya. O Peresitedi Gordon B. Hinckley, ka a iMatai ni Daunivakasala vei Peresitedi Benson ena Mataveiliutaki Taumada, e kaya:

“Au sa tekiduru vata kei koya ka rogoci koya ni dau masu.

“Sa bau veilauti sara toka ga na nona masu. Ena levu sara na tomo ni nona masu ka sega tale ni vakataratutu sa masu kecega ni vakavinavinaka. Lailai sara na ka e dau kerea. Dau vakaraitaka ga vakalevu na nona vakavinavinaka.

“Dau vakavinavinakataka vua na Turaga na bula, na matavuvale, na kosipeli, na vakabauta, na cila ni matanisiga kei na uca, na sinai ni ibulibuli vakalou, kei na galala ni digidigi ni tamata. Dau vakavinavinakataka vua na Turaga baleti ira na nona itokani kei na ilawalawa. E vakaraitaka na nona lomana na iVakabula kei na nona vakavinavinakataka na Nona veisorovaki. E vakavinavinakataka na Turaga na kena soli rawa vua me veiqaravi vei ira na tamata.”⁵

Erau tauyavutaka o Peresitedi Benson kei watina, o Flora, e dua na matavuvale me ra dau masu yadudua ka masu vata talega. Tukuna vakaoqo o Mark na luvena: “Ni dau tekiduru o Ta me masu, e dau sega ni vakusakusa. Dau vakaibalebale sara na veivosa e dau vakayagataka. Sa dau makaresese sara ga ni o koya e sa veitaratara sara tikoga kei na Tamada mai lomalagi.”⁶ O Peresitedi kei Sisita Benson e rau vakavulici ira na luvedrau me ra dau masulaka baleta na nodra tuberi kei na veivakaukauwataki, kei na nodra veimasulaki vakai ira. Dua na itokani ni matavuvale e a vakaraica toka na revurevu ni nodrau veivakavulici ena nona a tiko vata kei iratou na Benson ena dua na soqoni ni koniferedi raraba. E a vola vakaoqo:

“Ena dua na siga ni Epereli … , au a sotava kina na ivurevure ni nona kaukauwa e dua na Vakaitutu Raraba.

“Au a dabe vata toka kei iratou na ono na luvei Elder Ezra Taft Benson, e dua vei iratou, e noqu itokani ena rumu au tiko kina mai koronivuli. E laveti na ka au via kila ni sa tucake o Peresitedi [David O.] McKay me kacivaka na vosa e tarava. Au vakaraica toka na nona sa tucake o Elder Benson, kau se bera mada ga ni kilai koya, me taubale yani kina gusu ni vosa. O koya sa bau bulicaki levu toka ni sivia na ono na fiti na kena balavu. O koya … e sa kilai levu tu e vuravura ni Sekeriteri ni Tabana ni Teitei mai Amerika ka dua vei ira na ivakadinadina duatani ni Turaga, e dua ka kilai ni dau vosa vakalevu kina lewe levu sara ena veiyasai vuravura. Vakasauri ni dua sa tara na ligaqu. Dua na goneyalewa lailai e vakalakala mai vei au ka vakasolokakanataka mai, ‘Masulaki Ta.’

“Veivakurabuitaki dina, niu vakasamataka, ‘Sa veitukutukunitaki sobu mai na itukutuku oqo, ka meu na vakadewataka sara. Meu kaya beka, “Masulaki Elder Benson”? Meu kaya beka, “O iko ga mo cabora e dua na masu baleti tamamu”?’ Niu vakila ni dodonu meu sa yavala, au kala yani ka vakasolokakanataka yani, “Masulaki Ta.’

“Au vakaraica na kena sa vakadewataki yani na itukutuku oqo me yaco sara vei Sisita Benson, ka sa vakacavara rawa tu na uluna ena masu. …

“Ni sa toso na veiyabaki, ka sa oti tale e vica vata na koniferedi raraba, ena veigauna ni tucake o Peresitedi Benson me vosa, au da vakasamataka, “O ira na luvena, era sa tu oqo ena veiyasana era sa na duavata ena veimasulaki me baleti tamadra.’”⁷

A woman from Nepal kneeling by her bed. Scriptures are lying on the bed in front of her as she prays. — “Kevaka me da na toso ena yalodina—toso cake noda veikilai kei na Kalou—sega ni dua na ka me sosomitaka na masu.”

iVakavuvuli nei Ezra Taft Benson

Sa vakavulica o Jisu Karisito meda dau masu tikoga.

Ena gauna ni nona bula e vuravura, e a vakatavuvulitaka o Jisu na iwalewale ni masu:

“O koya mo dou qai dau masu vakaoqo: Tamai keimami mai lomalagi, Me vakarokorokotaki na yacamuni.

“Me yaco na nomuni lewa. Me caka na lomamuni e vuravura, me vaka sa caka mai lomalagi.

Solia mai vei keimami ena siga oqo na kakana e yaga vei keimami.

“Ia kakua ni cudruvi keimami ena vuku ni neimami ivalavala ca, me vaka keimami sa sega ni cudruvi ira era sa ivalavala ca vei keimami.

“Ia, kakua ni kauti keimami kina vere, ka mo ni vakabulai keimami mai na ca: Ni sa nomuni na lewa, kei na kaukauwa, kei na vakarokoroko, ka sega ni mudu. Emeni.” (Maciu. 6:9–13.)

E a kuria vakaoqo ka kaya, “Sa dodonu me daumasu tiko ka kakua ni ceguoca.” (Luke 18:1.)

“Dou vakatawa ka masu,” e a kaya, “me kakua ni rawai kemudou na vere.” (Maciu. 26:41.)

Sa veivakasalataki ena itabagauna oqo ka kaya, “Dou daumasu tiko ga me kakua ni rawai kemudou na tevoro mo dou kakua ni muduki tani.” (V&V 93:49.)

E a kaya vei Josefa Simici na iVakabula, “Raica sa kilikili sara me vakatusa na tamata ni sa bulia na ka kecega na Kalou, io me muria talega na nona vunau. Ia kevaka e sega, ena tau vua na nona cudru waqawaqa.” (V&V 59:21.)

Oqo na ivakasala mai vua na Turaga ni sa tucaketale ena Nona a rairai vei ira na Nifai ena Ra kei Vuravura: “Dou dau vakatawa ka masu me kakua ni rawai kemudou na tevoro ka vakabobulataki kemudou. …

“Dou dau vakatawa ka masu me kakua ni rawai kemudou na vere, raica sa vinakata ko Setani me tauvuloni kemudou me vaka na witi.

“O koya mo dou dau masu tikoga vei Tamaqu ena yacaqu;

“Ia na ka kecega sa dodonu dou sa kerea vei Tamaqu ena yacaqu ka vakabauta ni dou na rawata, raica ena solia vei kemudou ko Koya.” (3 Nif. 18:15, 18–20.)⁸

Kevaka me na vakalou na noda na toso ki liu—me tosocake na noda veikilai kei na Kalou—na sega ni dua na ka me na vakaisosomitaka na masu. Kau sa vakauqeti kemuni mo ni cakava na masu—me ka ni veisiga—caka vuni— me na vakaliuci ena nomu bula. Kakua ni lako sivita e dua na siga me sega kina na masu. Na veiyaloni kei koya sa Cecere sara, sa dau ivurevure ni kaukauwa, veivakauqeti, kei na veivakararamataki kina tamata ena itukutuku kei vuravura vei ira era sa vakairogorogo ena ivolatukutuku yadua kei na vuravura raraba.⁹

Na matavuvale e dau masu vata era dau vakalougatataki ena duavata qaqaco kei na loloma vakalomalagi.

Sa vakaraitaka tu na Turaga ni sa itavi ni itubutubu me vakavulici ira na luvedra mera dau masu [raica na V&V 68:28]. Oqo e sega ni kena ibalebale na masu vuni walega. Au kila ni oqo e kena ibalebale na veivakavulici ena masu vaka- matavuvale. Eda na gadreva na veivakasavasavataki ena lako mai ena lotu kei na masu—vakamatavuvale.¹⁰

Ena gadrevi ena matavuvale me da dau masu vata vakamatavuvale ena yakavi kei na mataka. Ena vica tale na mala ni vosa me ikuri ni masu ena kena dau masulaki na kakana ka sa vakamatau tu e daidai ena sega soti ni veiriti. Ena gadrevi meda tekiduru ena vakacacabo ni vakavinavinaka.¹¹

Sa dau dua tu na itakele na masu ni veivakaukauwataki kei na ivurevure ni idusidusi ena itaviqaravi ni neitou matavuvale. Au nanuma sara niu dau tekiduru ena yasa ni loga nei luvequ lailai, ka vukei koya ena masu ena gauna era se gone kina, ka qai raici ira na sa qasecake ni ra vukei ira era se gone sara. Keitou dau masu vakamatavuvale ena yakavi kei na mataka, ka soli vei ira na gone na madigi mera veiliutaki, ka cabori talega na masu ni dua ga na leqa e sotavi tiko. E cabori talega ena masu ni matavuvale o ira na gone era qaravi itavi tiko ena [Lotu]. … Keitou kerea na veivuke ni sotava e dua vei iratou na gone e dua na veitarogi dredre mai koronivuli. Dau masulaki talega e dua na lewe ni matavuvale e tu tani mai vale. … Na kena dau masulaki vakaoqo e dua na ka e duatani toka ena neitou masu ni matavuvale e dau veivakadeitaki toka, na yalodei, ka veivaqaqacotaki, vei ira na lewe ni matavuvale e sotava tiko na leqa kei na itavi me qaravi.¹²

A Polynesian family kneeling in family prayer. — “Dodonu meda rawata na veivakasavasavataki veilaveti ni … masu vakamatavuvale.”

Na duidui kei na logaloga ca ni dua na siga sa na waicala yani ni ra sa vakanamata vata yani na matavuvale kina idabedabe vakatui mai lomalagi. Sa toso cake na duavata. Na isema ni loloma kei na veilomani sa na vaqaqacotaki sara ka sa na curu mai na vakacegu mai lagi.

Ena veimatavuvale vakaoqori e dau cabori na masu ena veiyakavi kei na veimataka mai vei ira na lewe ni matavuvale. Na veileqa yadua kei na leqa ni matavuvale sa na sotavi ena yalodei ka na masuti na veivakacegui mai lagi me sotavi. O ira na itabagone era vakaitavi tiko ena lotu vakamatavuvale vaka oqori, sa vagalalataki mai na yalodra ena veika ca ena nodra sa na biubiu kina dua na itaviqaravi ena yakavi bogi. O ira na [itabagone] oqori era na veimaroroi mai na veidre ni cakacala ni sa yaco mai na veivakatovolei. O ira na itubutubu ka ra vakavulici ira na luvedra ena ivakavuvuli ni lotu ni matavuvale ena veisiga, e ra sa vakarautaki ira sara tiko ga na luvedra ena nodra na maroroya na … itikotiko.¹³

Eda na rawa ni vakatorocaketaka na noda veitaratara kei na Tamada Vakalomalagi.

Oqo e lima na sala me vakatorocaketaki kina na noda veitaratara kei na Tamada Vakalomalagi:

1. Meda dau masu vakawasoma. E dodonu me da na dau veitaratara kei na Tamada Vakalomalagi vakarua se vakatolu ena dua na siga—“mataka, sigalevu, kei na yakavi,” me vaka e kaya na ivolanikalou. Alama 34:21. Kena ikuri ga, ni tukuni vei keda me da dau masu tikoga. (Raica na 2 Nif. 32:9; V&V 88:126.) Oqo e kena ibalebale ni yaloda me na vakasinaiti ena yalo ni masumasu, ni da sa tacake tiko vakawasoma vua na Tamada Vakalomalagi. (Raica na Alama 34:27.)

2. Meda vakasaqara e dua na vanua e na ganita me da vakagagalu kina ka masu.Eda sa vakaroti ni oqo me ‘loma ni [noda] loqi kei na [noda] tikina vuni, kei na [noda] vanua liwa lala.” (Alama 34:26.) O ya, e dodonu me galala mai na veivakasosataki, ka me caka vuni. (Raica na 3 Nif. 13:5–6.)

3. Meda na vakarautaki keda ena masu.Ni da dau sega ni via masu, me da sasaga sara me da masu me yacova ni da sa vakila na yalo ni via masu. Meda dau yalo malumalumu. (Raica na V&V 112:10.) Meda masulaka na veivosoti kei na loloma veivueti. (Raica na Alama 34:17–18.) Meda na vosoti ira eso eda dau vakanananucataki ira. (Raica na Marika 11:25.) Ni sa vakarota tiko na ivolanikalou ni noda masu sa na ka walega kevaka me da “guilecavi ira sa dravudravua kei ira sa luvaiwale, ka sega ni sikovi ira sa tauvimate ka rarawa tu, ka [sega] ni wasea na veika sa tu vei [keda]” (Alama 34:28.)

4. Na noda masu me vakaibalebale ka veiganiti. Meda qarauna na vakayagataki ni itomo ni vosa vata ga ena veigauna ni masu. Eda na vakayalocataki kevaka me vakayagataka mai vei keda e dua na noda itokani na vosa vata ga ena veisiga, ka vaka me sa vucesataka na vosa mai, ka sa gadreva ga me vakaotia me rawa ni lako sara ki sara retio yaloyalo ka guilecavi keda. …

Na cava soti meda masulaka? Meda masulaka na noda cakacaka, meda taqomaki mai vei ira na keda meca kei na vu ni ca, baleta na noda bula kei ira era vakavolivoliti keda tu. Meda dau vei talanoataka kei na Turaga na noda vakatutu kei na itaviqaravi. (Raica na Alama 37:36–37.) Meda na dau vakavinavinakataka tu ga na veika kece sa tu rawa vei keda. (Raica na V&V 59: 21.) Meda na vakadinadinataka na Ligana ena veika kece. E dua na noda ivalavala ca levu na sega ni dau vakavinavinaka.

A yalataka na Turaga ena ivakatakila nikua, “Ia ko koya sa vakavinavinakataka na ka kece ga sa soli vua, ena vakalougatataki; ia ena soli vua na veika kece ga e vuravura; ia ena yadrau ka sivia.” (V&V 78:19.)

Meda kerea ga na ka eda gadreva, ka qarauna me da kakua ni kerea na ka ena vakacacani keda. (Raica na Jemesa 4:3.) Meda kerea na veivakaukauwataki meda walia rawa kina noda leqa. (Raica na Alama 31:31–33). Meda masulaki ira na Peresitedi ni Lotu, Vakaitutu Raraba, noda peresitedi ni iteki, noda bisopi, noda peresitedi ni kuoramu, noda dausiko vuvale, noda lewe ni matavuvale, kei ira na noda iliuliu ni matanitu. Rawa ni so tale na vakatutu, ia na Yalo Tabu ga ena qai vakatulewa ena veika meda masulaka. (Raica na Roma. 8:26–27.)

5. Ni sa oti na kerekere ena masu, sa noda itavi meda veivuke ena kena na vakadonui. E dodonu meda dau vakarorogo. Ena rairai gadreva na Turaga me vakasalataki keda ena gauna eda tekiduru tiko kina.¹⁴

Sa dau nanumi keda tu ga na Kalou, ka tu vakarau me vukei keda ena noda masu ni da sa vakararavitaka vei Koya na veika kece e ganiti keda.

E tiko na kaukauwa ena masu. Ena rawa na veika kecega ena masu. E a tadola o lomalagi ena itabagauna oqo ena masu. Na nona masu e dua na gone yabaki tinikava, ena loma ni Veikau Vakatabui, e a dolava tale e dua na itabagauna vou ni kosipeli, ka kauta mai e dua na raivotu ni Tamana kei na Luvena ena nodrau a rairai ena lagilagi vua na gone o Josefa [raica na iTukutuku— i Josefa Simici 1:11–17].¹⁵

Sa noqu ivakadinadina, kemuni na taciqu kei na ganequ kei na noqu itokani, ni Kalou e dau rogoca ka sauma na masu. Au sega vakadua ni vakatitiqataka na dina o ya. Niu a se gone, niu dau tene toka vei tinaqu na vanua au a vulica taumada kina na masu; niu a se cauravou, niu a se daukaulotu voli mai vanua tani; niu a se tamani gone kina, niu a se iliuliu tu ni Lotu, niu a se vakailesilesi tu ni matanitu, au kila ka sega tale niu lomatarotaro ni sa dodonu vua na tagane kei na yalewa me ra dolele yani ena yalomalua kei masumasu ka tukia na Kaukauwa Vuni, me saumi mai kina na masu. Ena sega ni tu duadua na tamata, se me na gadrevi me tu duadua na tamata. Na masu ena dolava na katuba; na masu ena kauta laivi na veika e vakalatilati; na masu ena vakamamadataka na icolacola; na masu ena solia na vakacegu mai loma kei na veivakacegui ena gauna e dau tubu kina na dra kei na gauna ni dredre. Vakavinavinakataki na Kalou ena vuku ni masu.¹⁶

Ena gauna ni veivakatovolei kei na ririko, ena rawa ni da toso voleka vua na Turaga, me vakilai na nona kaukauwa kei na veitaqomaki—ni na sega ni dua me na tu duadua, kevaka walega me na vakamalumalumutaki koya e matai Koya sa Cecere sara. Au vakavinavinakataka na ivakadinadina kei na veivakadeitaki o ya.¹⁷

Mai na veika au sa sotava oti, au sa kila na vinaka vakaoti kei na kaukauwa ni masu. …

Ena yabaki 1946 au a lesi mai vei Peresitedi George Albert Smith meu lako kina vanua sa vakacacani ena ivalu o Iurope ka vakaduria tale na iTikotiko ni Kaulotu mai Nowei ki Sauca Aferika ka vakaduria talega na parokaramu ni kena veivotayaki na isolisoli ni welefea.

Keitou tauyavutaka na itikotiko liu mai Lodoni. Keitou sa qai veivosakitaka na veitaratara kei na mataivalu ena vanua vakaiurope. Na imatai ni tamata au gadreva meu na raica na komada ni mataivalu ni Amerika mai Iurope. O koya e vakaitikotiko mai Frankfurt, Jamani.

Ni keitou yaco yani ki Frankfurt, keirau sa sasaga sara vata kei noqu itokani me keirau sotavi koya na komada. Kaya mai na vakailesilesi ni mataivalu, “Kemudrau na turaga, ena sega ni rawa mo drau raici koya na komada me yacova ni sa oti e tolu na siga. O koya sa rui osooso sara ga ka sa sinai sara tu ga na nona ituvatuva ni veisiga yadua vei ira era via raici koya.”

Au kaya yani, “Sa ka bibi sara me keirau raici koya ka sa na sega ni rawa ni keirau na wawa vakadede vakaoqori. O keirau me na tiko mai Berlin ni mataka.”

Kaya mai o koya, “Drau vosota sara.”

Keirau biuta na vale ka lako yani kina neirau motoka, luvata na neirau isala ka duavata ena masu. Keirau sa qai lesu tale kina vale o ya ka raica ni sa duatani tale na vakailesilesi e toka ena vanua ni kere raici komada. Ena loma ga ni tinikalima na miniti keirau sa tu sara ga e matai komada. Keirau a masulaka me rawa ni keirau raici koya ka tara sara na yalona, ka kila ni veivuke kece e lako mai na veivanua duidui me na mai biu ena liga ni mataivalu me qai nodra itavi na kena votai. Na neirau inaki me vaka keirau sa vakamacalataka vua na komada me keirau veivotayaka na ka ni veivuke vei ira na neirau ilawalawa ena kena sala sa virikotori oti tu, vakakina na iloloma kei na nodra vakani na gonelalai.

Keirau vakamacalataka na parokaramu ni welefea kei na kena dau cicivaki. Oti sa kaya cake mai, “Sa vinaka kemudrau na turaga, drau lako yani ka soqona mai na nomudrau ka ni veivuke; ka ni gauna sa soqoni mai kina sa na rairai veisau na lawatu ni mataivalu.” Keirau kaya, “Komada, na ka ni veivuke sa soqoni oti tu, sa dau vakasoqoni tu ga. Ena loma ni ruasagavulukava na aua mai na gauna keirau na vakau itukutuku kina ki na Mataveiliutaki Taumada ni Lotu mai Salt Lake, sa na tekivu tasoro yani na lori ni usana ni ka ni veivuke ki Jamani. Sa levu tu na vale ni maroroi iyaya ena vinakati vakatotolo ena gauna ni leqa.”

Kaya mai o koya, “Au se bera vakadua ni rogoca me so na tamata e tiko vei ira na rai vakaoqori.” Sa uaqeti na yalona me vaka keirau a masulaka me vakakina. Ni bera ni keirau biuta mai na nona valenivolavola, sa solia o koya na ivola ni nona veivakadonui me keirau sa na qarava ga na kena veivotayaki na ka ni veivuke ena kena sala sa tauyavu rawa tu.

Chaplain Howard C. Badger, Ezra Taft Bensonand Max Zimmerin Freiberg, Germany. Caption: "'Man's mighty cities lie in ruins, yet the faith of the Saints is even stronger than before teh war... -Karlsruhe-" — Erau a masu o Elder Ezra Taft Benson kei na nona itokani me rau liutaki ena kena veivotayaki na ka ni veivuke ni welefea mai Iurope ni oti na iKarua ni iValu Levu kei Vuravura.

Sa bau veivakacegui sara ga ni da kila ni Kalou e nanumi keda vinaka tu ka na sauma na noda kerekere ni da vakaraitaka vua na lomada ka caka dodonu tiko e matana. Ena sega na yalo ni rere vei ira era laiva vua na Kalou Cecere na veika era qarava, ka ra sega ni weletaka na nodra kerea vua na veituberi ena yalo masumasu. Dina ni yaco na veivakasosataki, na suka i muri, eda na sotava na vakacegu ena masu, ni Kalou ena vosa vakaceguya na yalo ni tamata. Na vakacegu o ya kei na yalo ni veivakacegui sa ikoya na veivakalogatataki levu ena bula oqo.

Au a vulica na serekali oqo niu a se cauravou lailai ka se tu kina ena Matabete i Eroni. Se tu ga oqo vei au.

Au sega ni kila se caka vakacava,
Au kila ga ni Kalou ena sauma na masu ni tamata.
Sa solia oti o Koya na Nona yalayala
Ni masu kecega ena saumi dina sara,
Ena saumi ga oqo, se vakamalua.
Au na masu ga ka tu vakadua.
Sega ni macala na veika au dau kerea
Ena yaco beka mai se sa na sega;
Kakua ni leqataka na noqu dau vosa Vua,
Ni o Koya sa rui vuku ena ka e kila, 
O Koya ena rogoca na noqu kerekere,
Me rawa na kalougata vei keda kece.

… Au vakadinadinataka vei kemuni na taciqu kei na ganequ lomani, ni Kalou e bula tiko. O Koya e sega ni mate. … Au vakadinadinataka ni tiko e dua na Kalou mai lomalagi, ka dau rogoca ka sauma na masu. Au kila ni dina na ka oqo. Au sa vakamasuti kemuni kece … mo sa dau veivolekati sara kei na Tamada mai lagi ena masu. E se bera vakadua ni dua na gauna ena kosipeli ni itabagauna oqo me na gadrevi kina vakalevu na veimasulaki. Sa noqu kerekere bibi ni da na dau vakararavi tu ga vei Tamada Vakalomalagi ena veigauna kece sara ka tara cake na noda dau veitaratara kei Koya.¹⁸

Vakatutu ni Vuli kei na Veivakavulici

Taro

Kaya o Peresitedi Benson ni dodonu me da “kakua ni laiva e dua na siga” me sega ni cabori kina e dua na masu vakaikeda (wase 1). Ko sa vakalougatataki vakacava ena nomu masu vakai iko?
Ena wase 2, e a vakaraitaka kina o Peresitedi Benson e levu sara na veivakalougatataki ena yaco mai ki na matavuvale dau masu vata vakawasoma. Na gauna cava o raica kina na veivakalougatataki kina dua na matavuvale dau masu vata. Na cava e da rawa ni cakava me na vakaliuci na masu vakamatavuvale?
Vakasamataka na lima na vakatutu nei Peresitedi Benson ena wase 3. Ena vukei keda vakacava na vakatutu oqo me vakatorocaketaki kina na noda dau veitaratara kei na Tamada Vakalomalagi? Vakasamataka na ka o na cakava mo vakamuria kina na ivakasala oqo.
Ena vukea vakacava e dua e vakatitiqataka tiko na kaukauwa ni masu, na vosa nei Peresitedi Benson ena wase 4? Na vosa cava ena ivakadinadina e rawa ni o kuria kina na nei Peresitedi Benson?

iVolanikalou Veisemati

Jemesa 1:5–6; Inosi 1:1–8; 3 Nifai 14:7–8; V&V 10:5; 19:38; 88:63

Veivuke ki na Vuli

Dua na ivakavuvuli sa ikoya e dua na dina ka na veituberi yani kina vakatulewa kei na ka me caka. “Ni ko sa wili ivola tiko, tarogi iko, ‘Na ivakavuvuli ni kosipeli cava e vakatavuvulitaki tiko ena tikina oqo? Au na bulataka rawa vakacava ena noqu bula?’ ” (Veituberi, Me iLutua ni Noda Bula [1999], 17).