Wase 7

Josefa Simici, e Dua na iYaya ni Cakacaka ena Liga ni Turaga

“O Josefa Simici, na Parofita ni gauna emuri oqo, sa iyaya ni cakacaka ena liga ni Turaga ena dolavi ni itabagauna ni kosipeli vou oqo, na iotioti ka itabagauna levu duadua talega ni kosipeli.”

Na Bula nei Ezra Taft Benson

Na gauna e a kaulotu tudei kina o Elder Ezra Taft Benson mai Igiladi ena itekivu ni 1920, erau sotava kina kei nona itokani na ka e vakatoka ni “gauna ni veicoqacoqa kina Lotu.” E muri e qai tukuna vakaoqo:

“Na niusipepa, na mekasini, na iyaloyalo sara ga ni veicoqacoqa kei na lotu Momani sa roboti Peritania sara tu ga.” Me vaka ni sa rui sivia na veicoqacoqa, e so na icakacaka ni kaulotu, me vaka na soqoni e bati ni sala kei na veisoliyaki ni tikidua, sa tamusuki. “Ia, mai na vualiku kei Igiladi na vanua keirau veiqaravi tiko kina,” e kaya o koya, “e tiko kina e dua na ilawalawa tamata ena tabana o South Shields ka ra sa yalodina sara ga ka dinata na lotu ka sa vinaka sara, ni ra sa sureti keirau kei noqu itokani me keirau lako yani ka laki vosa ena nodra soqoni ni sakaramede. Era kaya, “E lewe levu vei ira na neimami itokani era sega ni vakabauta na lasu ka ra sa tabaki tu oqori. Kevaka mo drau na lako mai, keimami na vakasinaita na valenilotu.’

“Keirau ciqoma na veisureti ka sa vakavakarau sara yani kina, kau sa vulica sara na veika baleta na vukitani. Oqo e dua na ulutaga au dau taleitaka, kau nanuma ni ra na gadreva mera na rogoca, kau sa vulica sara ga ka nanuma niu na rawa ni vosa kina me tinikalima na miniti.

“Keirau lako yani kina valenilotu lailai koya ka raica ni sa sinai tu. Era mamarau o ira kece era a tu kina. Ni oti na kena dolavi na soqoni sa vosa sara e liu o noqu itokani, kau qai vosa tarava mai o au ena dua na yalo sa galala kau se bera vakadua ni sotava ena dua na gauna e liu. Ka ni gauna au qai dabe kina ka raica na noqu kaloko, au a sa vosa tiko mai me ruasagavuluka lima na miniti kau sega ni se kaya e dua na ka me baleta na vukitani, au a sega mada ga ni bau nanuma na vukitani. Au a vosa baleti Josefa Simici, kau vakadinadinataka ni o koya e parofita ni Kalou kau kila deivaki tu. Au a tukuna na kena sa lako mai na iVola iMomani ka sa dua na ivakadinadina kei Karisito, kau vakadinadinataka ni dina. Na gauna au qai vakila mai kina na ka sa yaco, au sa sega ni tarova rawa na wai ni mata.

“Ni sa mai cava na soqoni, e lewe levu na Yalododonu Edaidai era lako mai mera mai vakavinavinakataka ni sa cavuti rawa e so na ka baleti Josefa Simici. Era kaya, ‘Levu na neimami icaba era kaya, “Keimami ciqoma na veika kece baleta na Lotu vakavo ga o Josefa Simici.”’ Tarava mai na nodra sa mai kaya e so vei ira na neimami icaba oqori, ’Keimami sa qai vakarau oqo. Keimami sa qai vakarau ena bogi nikua. Keimami sa qai ciqoma oqo na ivakadinadina ni o Parofita Josefa Simici e parofita ni Kalou.’”¹

E a tomana voli ga o Peresitedi Benson ena nona bula taucoko na nona wasea na nona ivakadinadina ni o Josefa Simici e parofita ni Kalou. Me kena ivakaraitaki, ena nona a veiqaravi tu vaka Sekeriteri ni Tabana ni Teitei ena matanitu o Amerika e a sureti koya e dua na vale ni kakaburaki me digitaka e dua na tiki ni ivolanikalou me wili ka kaburaki e macawa, sa qai digitaka o koya e dua na tikina me baleti Josefa Simici—Ai Tukutuku ena Mataniciva Talei.²

Dau tu sara e cake na nona wasea na nona ivakadinadina dei ka warumisa vei ira na nona ilawalawa Yalododonu. “O Josefa Simici e parofita ni Kalou Bula,” e a kacivaka, “e dua vei ira na parofita kilai ka rogo me bula e delai vuravura. O koya e a vakauyagataki koya na Kalou me na kauta mai na itukutuku ni kosipeli ena itabagauna oqo, na gauna vinaka duadua ka iotioti talega me vakarautaki kina na lesutale mai vakarua ni iVakavuvuli.”³

Na itukutuku ni Matai ni Raivotu e a “nakiti me baleti ira kece na luvei Tamada e delai vuravura.”

iVakavuvuli nei Ezra Taft Benson

Na iMatai ni Raivotu nei Josefa Simici sa ikoya e dua na ka levu e a yaco e vuravura mai na gauna e a Tucaketale kina o Jisu Karisito.

Ena gauna ni nona gone, e a dau vaqara voli ga na dina o Josefa Simici. Na veilecavi qaqa ni veimatalotu ena gauna o ya, e a vakavuna na nona laki vakataroga na Kalou se o cei vei ira e dina. Me isau ni nona laki masu o ya e a basika kina vua e dua na duru rarama ramase. Vakaoqo na ka e qai kaya:

“Ia ni sa mai toka e mataqu, au sa qai raica e rua na Tamata, ia na kedrau i serau kei na iukuuku sa sega ni vakamacalataki rawa, raica erau sa tucake tu ena maliwa lala donuya na mataqu. A sa kacivi au e dua vei rau, dusi koya na kena ikarua ka kaya—Oqo na Noqu Gone ni Toko. Mo Rogoci Koya! ” JS—AT 1:17.)

Taroga o Josefa na ikarua ni tamata, o Jisu Karisito, se o cei vei ira na Lotu va-Karisito e dina. Sa qai tukuni vua me kakua sara ni curu kina dua vei ira, ni ra sa cala kecega.⁴

Ni rau sa na lako mai ki vuravura na Kalou na Tamada kei na Luvena o Jisu Karisito, me vaka ga ena 1820 ena nodrau a rairai vua na gonetagane parofita o Josefa Simici, e sega ni baleta e vica walega na tamata. Sa dua na itukutuku kei na ivakatakila ka nanumi me baleti ira kece sara na luvena na Tamada ka ra bula tu e vuravura. O ya e dua na ka vakaitamera ka a yaco e vuravura mai na gauna e a tucaketale kina na iVakavuvuli. Ena so na gauna au nanuma ni da sa voleka sara tiko yani kina ka da sega gona kina ni vakavinavinakataka na kena duatani, na kena bibi, kei na kena vakaitamera.⁵

Na imatai ni raivotu ni Parofita o Josefa Simici sa vatuivakadei ni ivakavuvuli vakalotu ni Lotu.⁶

Na dina levu duadua sa kilai ka a basika ena ka e a sotava na Parofita ena 1820, sa ikoya na dina ni bula tiko na Kalou kei na kena dina ni o Jisu Karisito e a sa tucaketale. E a raici rau ni rau lewe rua, ka rau taukena na lagilagi ni Tamata sa tucaketale ka rau a vosa vua me vaka e a vosa e dua na tamata vei nona itokani.⁷

Au sa vakavinavinaka ena yalomalumalumu ena vuku ni kila sa tu oqo vei au, ni rau a rairai tale mai na Kalou na Tamada kei na Luvena o Jisu Karisito ena nodrau iserau lagilagi ena itabagauna oqo, ni rau a rairai sara ga vua na gonetagane parofita. … Oqo na ivakaraitaki ni nodrau lagilagi na Kalou na Tamada kei na Luvena ka sa tu oqo vei keda na kena itukutuku.⁸

Me salavata kei na parofisai ni veiyalayalati Vou, e a raica kina o Josefa Simici na ivakatakila vovou kei na nodra rairai vua na agilosi.

Sa vaka me kilai tu ni nodra vakabauta na lewe ni lotu ni Lotu i Jisu Karisito ni Yalododonu Edaidai e davo dei koto ena ka e tukuni ni o Josefa Simici e parofita ni Kalou ka sa vakaraitaka talega na lako mai ni iVola i Momani sa ivadinadina ni nodra rairai mai na agilosi ena maliwa ni 1823 kei na 1827.

Ena kena sa kilai na veika oqo, era sa tekivu vakalewa na tamata ka kaya ni sa sega ni kena gauna oqo me ra rairai mai kina ki vuravura na agilosi.

Na iVolaTabu e tiko kina na ivakadinadina ni Kalou e a vakatulewataka na Nona Lotu e vuravura ena va na udolu na yabaki ena ivakatakila, ka ena gauna e vinakati kina era na rairai mai na italai mai lagi.

Ena vakamacalataki ni ituvaki ni vanua ena iotioti ni gauna ni na lesu mai kina vakarua o Jisu Karisito, e a parofisai o Joni ena Veiyalayalati Vou ni bera ni lesu mai na iVakabula, ena ciqoma o vuravura e dua na ivakaro ni sa na voleka mai na nona gauna ni veilewai na Kalou. Na ivakaro oya ena lako mai vua e dua na agilosi mai lomalagi ka na kacivaka tiko na “kosipeli tawamudu.” Rogoca na nona vosa:

“Ia kau a raica e dua tani tale na agilosi sa vuka ena maliwa kei lomalagi kei vuravura, a sa taura na itukutuku vinaka e sega ni oti rawa, me vunautaka vei ira era sa tiko e vuravura, vei ira kece talega na veimatanitu, kei na veimataqali, kei na duivosavosa, kei ira na tamata,

“Ka sa kaya ena domo levu, Dou rerevaka na Kalou ka vakarokoroko veikoya, ni sa yaco na nona gauna me lewa ia, dou vakarokoroko veikoya ka buli lomalagi kei vuravura kei na wasawasa kei na ivurevure ni wai.” (Ai Vakatakila 14:6–7.)

Kevaka me dua e duavata kei na ivakadinadina nei Joni na Dauvakatakila, sa dodonu me namaki na ivakatakila vovou kei na nodra na rairai mai na italai mai lagi.

Sa noda ivakadinadina ni a rairai vei Josefa Simici e dua na agilosi ena itekivu ni ikatinikaciwa ni senitiuri. Na itukutuku oqo ni a rairai e dua na agilosi mai vua na Kalou vua e dua na parofita ena noda gauna sa lako vata sara tikoga kei na parofisai ena Veiyalayalati Vou ka sa dodonu me ra malele kina o ira kece era vakasaqara tiko na dina.⁹

Ena yakavi ni ika 21 ni Sepiteba 1823, e a rairai kina e dua na agilosi vei Parofita Josefa Simici. Na yaca ni agilosi o Moronai. O koya na iotioti ni parofita mai vei ira e dua na ilawalawa parofita ni dua na matatamata ka ra a bula … ena vanua o Amerika ena vica na senitiuri sa oti.¹⁰

E a lako mai o Moronai vei Josefa Simici me vakavatukana kina na parofisai.

Na iVola i Momani sa ikoya e dua bulu na ivakadinadina ni o Josefa Simici e kacivi me parofita.

Na ivakadinadina e duabulu me tokona ni o Josefa Simici e gusu ni vosa dina ni Kalou kaukauwa sa ikoya na kena sa tabaki rawa na ivolanikalou ka vakatokai na iVola iMomani.

Na iVola iMomani sa ikoya e dua na ivolatukutuku baleti ira na a bula tu ena dua na gauna makawa mai Amerika ka tiko talega kina na itukutuku ni nona a rairai kei na cakacaka ni veivakalotutaki nei Jisu Karisito vei ira na tamata ena vanua levu o ya ni sa oti na Nona a kaucake mai Jerusalemi. Na inaki levu ni ivolatukutuku me vakadeitaka vei ira na tamata ena veitabatamata e muri ni o Jisu na Karisito, na Luve ni Kalou. Na iVola i Momani, sa ikoya ena vakadeitaka e dua tale na ivakadinadina, me vaka na iVola Tabu ni o Jisu Karisito e Kalou.

E a kauta mai o Josefa Simici na ivolatukutuku oqo mai vua e dua na italai mai lagi, me vaka ga e a parofisaitaka o Joni. E a rairai vei koya na agilosi oqo ka tukuna vua na vanua sa maroroi tu kina na ivolatukutuku makawa ni volai tu ena peleti ka bulu tu ena dua na qara vatu. Sa qai yaco na gauna me soli kina vua na parofita gone oqo na peleti kei na veika me vukei koya me vakadewataka kina. Sa qai tabaki na ivola me kilai e vuravura me vaka e dua na ivolanikalou.

Me salavata kei na ivakadinadina nei Joni, na ivola e tiko kina na “kosipeli tawamudu.” Ena gauna oqo era sa vunautaka tiko na noda daukaulotu ena veiyasai vuravura.

Keimami sureti kemuni mo ni vakatovolea mada mo ni kila na dina ni neimami ivakadinadina baleta na ivurevure ni iVola i Momani. Ko ni rawa ni cakava oqo kevaka mo ni na wilika ka qai kerea vua na Tamada Vakalomalagi se e dina na veika oqo. Au yalataka vei kemuni, kevaka mo ni yalodina, ko ni na ciqoma na veivakadeitaki baleta na kena dina mai vua na Yalo Tabu. E milioni era yalodina ena via kila e yalodra era sa vakadinadinataka ni sa mai vua na Kalou.¹¹

Kevaka me sa dina na iVola iMomani, sa i Jisu na Karisito, o Josefa Simici e Nona parofita, na Lotu i Jisu Karisito ni Yalododonu Edaidai e dina ka liutaki tiko nikua mai vua e dua na parofita ka ciqoma tiko na ivakatakila.¹²

Sa tauyavutaka tale e vuravura na Nona matanitu na Kalou vua na Parofita o Josefa Simici.

Na veimatalotu va-Karisito ena veiyasai vuravura, era sa masulaka tiko mai ena veisenitiuri sa oti me yaco mai na nona matanitu na Kalou [raica na Maciu 6:10]. Keimami via vakaraitaka raraba: ni siga o ya sa tu oqo nikua!¹³

Na masu ni dua na gonetagane yabaki tinikava ena Veikau Tabu sa dolava e dua na itabagauna vou ni kosipeli.¹⁴

Sa tauyavutaka tale na Kalou na nona matanitu e vuravura me vakavotukana kina na parofisai. …

… O Josefa Simici e a kacivi mai vua na Kalou me tauyavutaka na matanitu o ya—Na Lotu i Jisu Karisito ni Yalododonu Edaidai. Au vakadinadinataka, ni o koya e vakacavara vinaka na nona itavi, e vakadavora na yavu ka virikotora ena Lotu na idola kei na kaukauwa me tomani kina na cakacaka Edaidai, ka a tekivutaka ena veidusimaki ni Kalou Kaukauwa.¹⁵

E so tale na tamata era a rairai vei Josfa Simici, wili kina o Joni na Dauveipapitaiso kei Pita, Jemesa kei Joni, ka ratou a tabaki koya ena veivakadonui me qarava na itavi ena yaca ni Kalou (raica na JS—AT 1:68–72; V&V 27:5–13). Na lotu kei na matanitu ni Kalou sa vakalesui mai ena tabagauna oqo edaidai, na Lotu i Jisu Karisito ni Yalododonu Edaidai, kei na kena isolisoli kece, veivakadonui, kaukauwa, ivunau, ilesilesi, kei na veivakalougatataki ni Lotu taumada. (Raica na V&V 65; 115:3–4.)¹⁶

Sa vakaroti na parofita o Josefa me lako yani me vaka na iyaragi ena liga ni Kalou ka tauyavutaka na Lotu, ka kacivaka e vuravura na ivakadinadina ni vakalou o Jisu Karisito, kei na ivolatukutuku ka sa vakatokai tu nikua me iVola iMomani. …

Na vakalesuimai oqo ni kosipeli, na kau lesu mai ni rarama kei na dina, e nakiti me ra vakalougatataki kina na luvena na Kalou. Sa yaco tu nikua me ra lako yani na daukaulotu kina veiyasai vuravura, me ra vakaraitaka ni a dua na vukitani mai na dina, ia ena nona sa rui vinaka na Kalou sa tadola tale kina o lomalagi ka vakatakilai mai na kosipeli vei Josefa Simici me tukuna vei ira na tamata.¹⁷

O Josefa Simici e a tudei ka dina me yacova sara na mate.

Salavata ena gauna e tekivu kina na Lotu, na yalo ni veisaqasaqa kei na veivakacacani. Na vanua ga e teivaki kina na “sore ni mosita” sa tekivu vata kei na kena meca me vakacacana na kena tubu.¹⁸

E dei na nona tu ena vanua e tu kina na cauravou yabaki tinikava. Na Kalou e kila na luvena ena gauna e digitaki kina. E kila ni na yalodina me yacova na mate.¹⁹

E so era coqa na ivakadinadina nei [Josefa Simici] kei na yalo ca ka ra sa tekivu vakadewataka na itukutuku lasu kei na veivakacacani baleti koya. Na parofita gone oqo me vakataki Paula na iApositolo ena gauna makawa, ena sega ni vakasuka na nona ivakadinadina, ia e taqomaka na ka e tukuni tiko ena veivosa oqo:

“Au sa raica dina e dua na raivotu, kau kila, kau kila ni kila na Kalou, kau kila ni kila tu na Kalou, kau sega kina ni rawa meu cakitaka kau sega ni rawa ni cakava, niu kila ni kevaka meu cakava au sa na cudruvi vakaidina mai vua na Kalou.” (JS—AT 1:25.)²⁰

O Josefa Simici na Parofita e a lakova ga vakai koya na nona mate. E a vauca na nona ivakadinadina ena nona bula—ena nona dra. Ena siga vakatuburarawa o ya mai Nauvoo ni a raica lesu na nona koro kei ira na lewena ka ni dau lomani ira ka sa lako yani ki Valeniveivesu mai Carthage me na laki vakamatei e vakaoqo na ka e kaya kina: Oqo na vanua rairai totoka duadua kei na tamata vinaka duadua e ra tu oqo e rukui lomalagi; ka ra sega ni kila tu na dredre sa waraki ira tu mai” [Ai Tukutuku ni Lotu, 6:554].

E muri e qai kaya vakaoqo na Parofita ena yalo e luvuci, ia e yalodei tu ka sa yalokaukauwa mai, “Au sa lako me vaka na lami sa laki vakamatei, ia au sa sega ni taqaya se yalo lailai kina. Raica au sa kila ena vu ni yaloqu niu sa sega ni cala vua na Kalou se vei ira na tamata. Kevaka mera na vakamatei au, au na mate ena noqu dodonu, ia ena qai tukuni vakaoqo ena vukuqu, ‘A laulaba bulabula ko koya’” [Ai Tukutuku ni Lotu, 6:555].²¹

Sa vaka tu ko ya na ituvaki ni bula nei Josefa Simici na Parofita ni mai cava na nona bula ka sa vakataucokotaka na nona itavi ka a lesi taumada kina. Na itavi e qarava oqo e sa vakamatatataka ena sega ni oti me yacova ni sa vakacavari. Me vaka na itavi ni iVakabula, “na lami sa vakamatei mai na ivakatekivu kei Vuravura” [raica na Ai Vakatakila 13:8], o Josefa sa lumutti taumada kina nona ilesilesi.²²

O Josefa Simici e tucake tu nikua me iliuliu ni iotioti ka itabagauna ni kosipeli vinaka duadua.

Au kila ni o Josefa Simici, e a vakamatei baleta na dina e se bula tu ga nikua me vaka ni iliuliu ni itabagauna ni—Kosipeli vinaka duadua mai na veitabagauna tale e so— ena tucake tu ena veitabagauna me yacova na tawamudu.²³

Na itukutuku kei Josefa Simici—na itukutuku ni Lotu i Jisu Karisito ni Yalodododnu Edaidai, na itukutuku ni lotu Momani—sa ikoya na itukutuku bibi duadua e vuravura. O Josefa Simici na Parofita, ka bula tiko nikua, ena dua tiko na nona tikina ena kena cicivaki tiko e vuravura ena gauna sara ga oqo.²⁴

Meda na raica na kena vakaitamera na itavi ni Parofita e vuravura e dodonu meda raica yani na kena irairai e na tawamudu. O koya e dua vei ira “sa vakaturaga ka lagilagi sara” ka vakamacalataka vakaoqo o Eparaama:

“Sa vakatakila vei au na Turaga na agilosi kece era sa bula tu ni bera ni buli ko vuravura, ia e so vei ira era sa vakaturaga ka lagilagi sara;

“A sa raica na Kalou ni ra sa vinaka a sa tu ena kedra maliwa ka kaya au sa lesi ira oqo mera noqu talai. Raica sa tu ko koya ena kedra maliwa na yalo ka raica ni ra sa vinaka a sa kaya vei au: I Eparaama; ko sa dua vei ira ko iko raica ko sa lesi tu ni bera ni ko sucu mai.” (Eparaama 3:22–23.)

Sa vakatalega o ya vei Josefa Simici. E a tu talega e ke ya o Koya. O koya e a dabe vata talega kei ira sa vakaturaga ka lagilagi. Ni toka o koya ena dua na itutu dokai ka kilai, o koya sa veivuke sara vakalevu ena kena yavutaki ka qaravi na cakacaka levu ni Turaga “me ra tucake tale mai na mate na tamata kecega ka rawata na bulatawamudu,” me ra vakabulai kece na luvena na Tamada [raica na Mosese 1:39]. Sa nona inaki me na tara na nodra bula kece sara o ira era a sa mai bula e vuravura o ira era bula tiko oqo e vuravura, kei ira era na qai lako tiko mai ki vuravura ka ra se bera ni sucu.

Na Parofita o Josefa Simici e a vakamatatataka na kila tawamudu oqo ena nona kaya: “Na tamata taucoko e tiko na nodra itavi mera veiqaravi vei ira na lewei vuravura e a sa vakatikori kina itavi oqori ena matabose mai lomalagi ni se bera ni buli na vuravura. Au vakabauta niu a sa vakatikori kina itavi oqo ena matabose o ya mai lagi. O ya na ivakadinadina au vinakata ni o au, au dauveiqaravi ni Kalou, vei ira na tamata, na Nona tamata” [raica na Ai Tukutuku ni Lotu, 6:364]. …

Na itavi qaravi levu duadua ena vuravura oqo se ena vuravura sa bera mai e veiwekani voleka sara kei na cakacaka kei na itavi nei Josefa Simici—na tamata sa kilai tu na nona icavacava, na parofita ni Kalou. Na cakacaka oqori ni veivakabulai kei na bula tawamudu ni tamata kecega. E a buli na vuravura me baleta na itavi levu oqori, era kacivi kina na parofita ni Kalou, era a talai mai kina na italai mai lagi, kei na dua na itavi levu me mai qaravi e vuravura e a lako sara ga mai kina na Kalou na Tamada me mai vakatakila kina na Luvena sa daulomana.

Na parofita o Josefa Simici e sega walega ni “dua vei ra sa vakaturaga ka dokai,” ia e a solia ka tomana na qaravi ni itavi bibi oqo e vuravura, ena gauna sara ga oqo, ena kena liutaki tiko mai cake. Ena mata ni Turaga, na Kalou ni Vuravura oqo ena ruku ni Lewa ni Tamada, sa dua ga na ituvatuva ena nona vakayacora na parofita o Josefa Simici e dua na itavi bibi ena ruku ni veivakadonui ni matabete ni Kalou.²⁵

Au vakadinadinataka vei kemuni ni o Josefa Simici e parofita ni Kalou, e dua vei ira na parofita qaqa ni veitabagauna, a turaga ni veiliutaki, a turaga vakaitovo, a turaga qaqa, a turaga bula vakayalo, e dua e vakalou na nona itavi vaka-parofita ni Turaga, e dua sa vakaturaga ka qaqa ena veigauna kece sara.²⁶

Io, o Josefa Simici na parofita ni gauna oqo, sa liga ni cakacaka vua na Turaga ena kena dolavi na kosipeli ni gauna oqo na iotioti ka gauna bibi duadua mai na veitabagauna kece sara.²⁷

Vakatutu ni Vuli kei na Veivakavulici

Taro

Na cava o ni nanuma kina ni iMatai ni Raivotu nei Josefa Simici “e sa ka bibi duadua … mai na gauna ni tucaketale ni iVakavuvuli”? (Raica na wase e 1.) Sa uqeti iko vakacava ena nomu bula na veika sa yaco oqo?
E vukei iko vakacava mo kila ni o Joni na Dauvakatakila e a parofisaitaki Moronai ena nona a rairai vei Josefa Simici? (Raica na iwasewase e 2.)
E a kaya o Pereitedi Benson ni iVola iMomani “sa ivakadinadina e duabulu” ni o Josefa Simici e parofita (raica na wase e 3). Sa tara vakaevei na nomu ivakadinadinataki Josefa Simici na nomu sa dau vakawilika na iVola iMomani?
Vakasamataka mada na vosa ni ivakadinadina nei Peresitedi Benson ena wase 4. Na veivakalougatataki cava soti sa lako mai vei iko kei na nomu matavuvale baleta na Veivakalesu mai ni kosipeli?
Na cava o sa vulica mai na wase 5 baleta na kena sotavi na veivakacacani? Na cava e rawa ni da vulica mai na ivakaraitaki nei Jossefa Simici ni ra sa dau bolei keda na tamata ena noda ivakadinadina?
Ena nona a vakananuma lesu tiko o Perestedi Benson na nona a tabaki taumada mai o Josefa Simici e qai kaya kina, “Na nona itavi sa tarai ira kece sara o ira era a sa lako mai kei ira era sa tiko oqo e vuravura kei ira e milioni era na qai lako malua mai” (wase 6). Sa tarai ira vakacava o ira kece era sa bula tu e vuravura na itavi e a mai qarava o Josefa Simici? Sa bau tarai iko vakaevei ena nomu bula vakai iko?

iVolanikalou Veisemati

Aisea 29:13–14; 2 Nephi 3:3–15; 3 Nifai 21:9–11; V&V 5:9–10; 135; Josefa Simici—Ai Tukutuku

Veivuke ni Veivakavulici

“Kerei ira na vakaitavi mera wasea na ka era sa vulica mai na nodra vakadikeva na iwasewase vakaiira. Ena rairai veivuke ke rawa ni ra tarai eso na vakaitavi ena loma ni macawa ka kerei mera vakarautaki ira mai ni wasea na veika era sa vulica” (mai na tabana vii ena ivola oqo).