Wase 24
E Dua na Bula Vakarisito
“Na ivakarau vinaka duadua ni cecere dina sai koya e vakatu beka evei na noda Vakarisito.”
Na Bula nei Ezra Taft Benson
E dau cavuta vakavuqa o Peresitedi Ezra Taft Benson na nona ivakasala na iVakabula vei iratou na tisaipeli Nifai e tinikarua: “Ia a cava na ivalavala sa kilikili kei kemudou? Au sa kaya vakaidina vei kemudou, mo dou vakataki au” (3 Nifai 27:27).1 Na ivakavuvuli oqo—na kena gadrevi me da Vakarisito vakalevu cake—e dua na ulutaga dau talevi wasoma ena veiqaravi vakalotu nei Peresitedi Benson, vakauasivi ena gauna ni nona veiqaravi vaka-Peresitedi ni Kuoramu ni iApositolo Le Tinikarua kei na Peresitedi ni Lotu.
Ni sa solia na nona bula me qarava na Turaga, a vosa ena mana kei na yalodina o Peresitedi Benson ena nona wasea na veimalanivosa ni ivakadinadina oqo:
“Au vakadinadinataka vei kemuni ni sega ni dua tale na bolebole e cecere cake, e veivakauqeti cake, ka vakaturagataka vakalevu cake na yalo, mai na noda tovolea me da vulici Karisito ka lako ena imawe ni Yavana. Na noda ivakaraitaki, o Jisu Karisito, a lako ena dela ni vuravura me vaka ni ‘iVakaraitaki.’ O Koya na noda Dautataro vei Tamana. A cakacakataka o Koya na isoro cecere ni veivakaduavatataki me rawa ni taucoko kina na noda reki ka vakacererecei me vaka na Nona loloma soliwale kei na noda veivutuni kei na buladodonu. E cakava vakavinaka sara na veika kecega ka vakaroti keda me da vinaka sara me vaka ni rau sa vinaka sara o Koya vata kei na Tamana. (Raica na 3 Nif. 12:48.)
“‘Na cava ena cakava o Jisu?’ se ‘na cava ena vinakata o Koya meu cakava?’ era taro bibi vakatamata yadua ni bula oqo. Na lakova na Nona sala sai koya na rawaka cecere duadua ni bula oqo. Na tagane se na yalewa oya sa tamata qaqa dina duadua, o koya sa voleka sara ni tautauvata kei na iVakavuvuli na nona bula.”2
Ni vakauqeti ira na Yalododonu o Peresitedi Benson me ra vakatotomuria na nona ivakaraitaki uasivi na iVakabula, a vakananuma vei ira ni rawa walega ni ra cakava vakakina ena nona veivuke na iVakabula. A tukuna kina o koya:
“Au kila ni bula tiko na Turaga. Au kila ni lomani keda o Koya. Au kila ni na sega ni qaqa rawa e dua kevaka e sega ni tu vata Kaya, ia kevaka eda veitokani vata kei Koya ena sega ni druka rawa e dua.
“Au kila ni rawa ni vakavurea e levu cake na ka ena noda bula na Kalou mai vei keda.
“Me tu vei keda na yaloqaqa savasava mai na gauna oqo ka lako yani me da segata kina vakavinaka ena veisiga yadua me da vakasamataki Karisito, vuli mai Vua, lako ena imawe ni Yavana, ka cakava na veika ena vinakata o koya me da cakava.”3
“Sa kaya vua ko Jisu … , Oi au na sala, kei na vu-ni-dina, kei na vu-ni-bula, sa sega ni torovi Tamaqu walega e dua na tamata, ena vukuqu ga” (Joni 14:6).
iVakavuvuli nei Ezra Taft Benson
1
Na ivakaraitaki kei na ivakavuvuli nei Jisu Karisito e vakarautaka na ivakatagedegede cecere me baleta na kawatamata kece.
Ena rua na udolu na yabaki sa oti a lakova kina na dela ni vuravura e dua na tamata vinaka sara: o Jisu na Karisito. O Koya na luvena tagane e dua na tama vakalomalagi kei na dua na tina vakavuravura. O koya na Kalou ni vuravura oqo, mai vei Tamana. E vakavuvulitaka vua na tamata na dina, me rawa kina ni ra galala. Na Nona ivakaraitaki kei na ivakavuvuli sa vakarautaka na ivakarau cecere, na sala tudei duadua ga, me baleta na kawatamata.4
E sega tale ni dua na veivakauqeti me cecere cake na kena revurevu ena vuravura oqo me vaka na bula nei Jisu na Karisito. Eda na sega ni vakasamataka rawa na noda bula ni sega kina na nona ivakavuvuli. Kevaka e sega o koya eda na veilecayaki ena veivakabauta lasu kei na iwalewale eso ni sokalou, eda na sucu ena taqaya kei na butobuto ka dau nanumi kina ni bibi na veika vakavuravura kei na ka vakatamata. Eda sega sara ni yacova na takete sa vakotora tu o koya vei keda, ia me kakua sara ni yali mai matada; me da kakua talega ni guilecava ni noda kaba yani ki na rarama, ki na vinaka sara, ena sega ni rawa vakavo ga ena nona ivakavuvuli, nona bula, kei na nona tucaketale.
… E dodonu me da vulica ka vulica tale ni, ena noda ciqoma ka bulataka duadua ga na kosipeli ni loloma me vaka e vakavuvulitaka na iVakavuvuli kei na noda cakava ga na lomana ena rawa kina ni da tasereka na ivau ni lecaika kei na vakatitiqa ka vesuki keda tu. Sa dodonu me da vulica na veidina rawarawa, ka lagilagi oqo me rawa kina ni da vakila na reki kamica ni yalo ena gauna oqo ka tawamudu. Me da vakayali keda ena noda cakava na lomana. Me da vakaliuci koya ena noda bula.5
Ena ika 14 ni wase ni Joni, e tukuna tiko kina vakamalua o Jisu na nona vosa ni tatau vei iratou na nona tisaipeli ni oti na iotioti ni vakayakavi. E tukuna vei iratou ni sa lako me laki vakarautaka e dua na tikina me nodratou ena vale nei Tamana; me rawa kina ni ratou tiko talega ena vanua sa tiko kina ko koya. Qai kaya vua o Tomasi:
“Kemuni na Turaga, keitou sa sega ni kila se ko ni sa lako ki vei; ia keitou na kila rawa vakaevei na sala?
“Sa kaya vua ko Jisu, Oi au na sala, kei na vu-ni-dina, kei na vu-ni-bula, sa sega ni torovi Tamaqu walega e dua na tamata, ena vukuqu ga.” (Joni –14:5–6.) Sa tu e matada na sala. E vakatakilakilataki tu vakavinaka.6
2
Eda na lako vei Karisito ni da rai Vua ena noda vakasama kecega ka vakatotomuria na Nona ivakarau ni bula.
Ena ivosavosa ni iVola i Momani, eda na gadreva me da “vakabauta na Karisito ka kakua ni cakitaki Koya.” (2 Nif. 25:28.) Eda gadreva me da vakabauta na Karisito ka kakua ni vakararavi ki na liga ni tamata. (Raica na 2 Nif. 4:34.) Eda gadreva me da “lako vei Karisito,… mo dou vinaka kina.” (Moro. 10:32.) Eda na gadreva me da lako mai “ena yalo sa raramusumusu kei na yalo sa bibivoro” (3 Nif. 12:19) ka, viakania ka viagunuva na ivalavala dodonu (raica na 3 Nif. 12:6). Eda gadreva me da lako mai ka “tugana ki lomamudou na vosa i Karisito” (2 Nif. 31:20), ni da ciqoma mai na Nona ivolanikalou, mai vei ira na Nona ilumuti, kei na Nona Yalo Tabu.
Kena ivakalekaleka ga, eda gadreva me da muria “na nona ivunau na Luve ni Kalou Bula” (2 Nif. 31:16).7
E kaya na Turaga, “Ia mo drau vakaliuci au ena nomudrau nanuma kecega.” (V&V 6:36.) Noda vakaliuca na Turaga ena noda nanuma kecega sai koya duadua ga na sala e rawa ni da yaco kina me vaka na ivalavala ni tagane kei na yalewa sa kilikili kei keda.
A taroga na Turaga na taro oqo vei iratou na Nona tisaipeli, “Ia a cava na ivalavala sa kilikili kei kemudou?” A qai sauma ga na Nona taro ena Nona kaya, “Mo dou vakataki au.” (3 Nif. 27:27.) Me da yaco me vakataki Koya, sa dodonu me dau tiko o Koya ena noda vakasama—me dau tikoga ena noda vakanananu. Ena veigauna kece eda vakaivotavota kina ena sakaramede, eda yalataka me da “daunanumi koya.” (Moro. 4:3; 5:2; V&V 20:77, 79.)
Kevaka ena vakavuna na vakasama o cei me da vaka, ka dodonu me da vakataki Karisito, sa dodonu me da vakasamataka na veivakasama e Vakarisito. Meu tukuna tale mada oya: Kevaka ena vakavuna na vakasama o cei me da vaka, ka dodonu me da vakataki Karisito, sa dodonu me da vakasamataka na veivakasama e Vakarisito.
… Sa dodonu me tiko vua na Turaga na noda vakasama. E dodonu me da vakasamataki Karisito.8
Me rokataka na itovonibula Vakarisito na noda bula yadua, noda vuvale, kei na noda ivakarau ni cakacaka. O koya mo bula me rawa ni ra tukuna kina na tani me baleti iko, “Oqori e dua na tamata Vakarisito dina!”
Io, eda vakabauti Jisu Karisito, ia e levu cake—ni da raici Koya cake, eda vakabauti Koya ka segata me da vakatotomuria na Nona ivakarau ni bula.9
O Karisito e ganiti keda vakavinaka duadua. O Koya na noda ivakaraitaki. … Na ivakarau vinaka duadua ni bula cecere dina sai koya na levu ni Vakarisito ni noda bula.10
Me vaka na iVakabula—sa dua na bolebole levu ki na tamata kecega! O Koya e dua vei iratou na Lewetolu Vakalou. O Koya na iVakabula ka Dauveivueti. A vinaka sara o Koya ena veiyasa taucoko ni Nona bula. A sega na cala se na druka Vua. Ena rawa beka vei keda … me da vakataki Koya? Na kena isau na io. Sega walega ni rawa beka vei keda, oqori na noda ilesilesi, na noda itavi. Ena sega ni solia vei keda o Koya na ivakaro oqori kevaka e sega ni namaka o Koya me da cakava [raica na Maciu 5:48; 3 Nifai 12:48].
Na iApositolo ko Paula, erau taba vata tu kei Jisu Karisito sa vakaturi cake mai na mate, e vakavuvulitaka na sala e rawa ni da vakatotomuria kina na itovonibula ni iVakabula.
A vosa na iApositolo o Pita me baleta na iwalewale e rawa kina me vakaivotavota e dua na tamata ena “ka sa Vakalou” (2 Pita 1:4). Sa ka bibi sara oqo, kevaka eda yaco vakaidina me da vakaivotavota ena ka sa vakalou, eda na yaco me vakataki Koya. Me da vakadikeva mada vakavinaka na veika e vakavuvulitaka vei keda o Pita me baleta na iwalewale oqo. Oqo na veika e tukuna:
“Ia, ena vuku ni veika oqo, dou gumatua vakalevu sara kina, mo dou vakaikuritaka na nomudou vakabauta ena ivalavala vinaka; kei na ivalavala vinaka ena vuku;
“Kei na vuku ena ivalavala malua; kei na ivalavala malua ena vosota; kei na vosota ena daulotu;
“Kei na daulotu ena veilomani vakaveitacini; kei na veilomani vakaveitacini ena yalololoma” (2 Pita 1:5–7).
Na ivalavala dodonu e tuva koto o Pita era tiki ni veika vakalou, se na nona itovonibula na iVakabula. Oqo na ivalavala dodonu e dodonu me da vakatotomuria kevaka me da vakataki Koya vakalevu cake. Me da veitalanoataka mada e vica vei ira na itovo bibi oqo.
Na imatai ni itovonibula, me qai vakuri mai na kena vo, sai koya na vakabauta. Na vakabauta sai koya na yavu e tarai cake kina e dua na itovonibula vakalou. …
E tomana o Pita ena nona kaya me da vakuria na vakabauta ena ivalavala dodonu. … Na itovo ni ivalavala dodonu e kena ibalebale ni savasavavuka tu na nona vakasama [e dua na tamata] ka savasava na nona ivalavala. Ena sega ni dau gagano e yalona, baleta ni vakayacori oqori sa “cakitaka na lotu” ka na biuti koya na Yalotabu (V&V 42:23)—e sega tale ni dua na ka e bibi cake ena cakacaka oqo mai na Yalotabu. …
Na ivalavala dodonu erau veiwekani voleka sara kei na daulotu, e dua na itovo vakalou . E dodonu [me da] dau vakasaqara vagumatua na veika e vinaka ka rairai totoka ka sega na veika e lolovira se vakasisila. Na ivalavala dodonu ena vakasavasavataka tikoga na [noda] vakanananu (raica na V&V 121:45). Ena rawa vakacava vua e dua na tamata e soli koya tiko ki na veika ca ni iyaloyalo vakasisila, na vosa vakacaca, se vosavosa ca me qai nanuma tiko ni savasava vinaka tu? …
Na ikarua ni ikalawa e vakamacalataka o Pita ena iwalewale ni tubu sai koya me da vakaikuritaka ena vuku na noda vakabauta kei na ivalavala dodonu. Sa tukuna oti vei keda na Turaga ni “sa ka dredre me vakabulai na tamata e lecaika” (V&V 131:6). Ena dua tale na vanua e vakarota kina na Kalou, “Dou gumatua sara mo dou veivakavulici vakai kemudou ena veika mo dou yalomatua kina; dou gumatua sara mo dou kila ka; io ena vuli kei na vakabauta” (V&V 88:118). … E yaga taucoko na kena vulici na ka dina, na dina ni veivakabulai sai koya na dina bibi duadua e rawa ni vulica e dua na tamata. Na nona taro na Turaga, “Ia ka cava na kena yaga vua na tamata, kevaka e rawati vuravura taucoko, ka vakayalia na yalona?” (Maciu 16:26) e rawa ni vakayagataki ena veisasaga vakavuli ka vakakina na kena sagai na veika vinaka ni vuravura. Ena taroga tale beka ga kina na Turaga, “Ia ka cava na kena yaga vua na tamata, kevaka e vulica na veika taucoko e vuravura ka sega ni vulica na sala me vakabulai kina?”…
Na noda vakaduavatataka na noda vuli vakayalo ki na vuli ni veika vakayago ena vukea me da vakanamata tikoga ki na veika e bibi duadua ena bula oqo. …
E dua tale na itovonibula e vakamacalataka o Pita ni tiki ni veika vakalou na ivalavala malua. [Na tamata ivalavala malua] ena dau qarauna na ivakarau ni yalona kei na vosa e tauca. E dau cakava vakarauta na veika eso ka sega ni dau cakava vakasivia. Ena dua ga na kena vosa, e dau lewai koya vakamatau. E lewa o koya na lomana, ka sega ni kena veibasai. …
Ki na noda ivalavala malua me da vakuria kina na vosota. … Na vosota e dua na ivakarau ni dau lewai koya vinaka. Sai koya na noda rawata me da vakadaroya mada na vakavinavinaka ka lewa vakavinaka na lomada. Ena nona veimaliwai kei ira na nona daulomani, ena sega ni vakaitovotaki koya e dua na tamata dau vosota ena itovo ni vakatotolo ka na veivutunitaka e muri. Na vosota sai koya na tudei tu ena gauna ni bula osooso. Na tamata dauvosota e dau ciqoma nodra cala na tani.
Na tamata dauvosota ena waraka na Turaga. Ena so na gauna eda dau wilika se rogoca eso na tamata ena nodra vakasaqara na veivakalougatataki mai vua na Turaga, qai sega ni vosota rawa ni sega ni yaco totolo mai. E tiki ni veika vakalou na noda vakabauta na Turaga me rawa kina ni “dou tiko lo, mo dou kila niu sa Kalou” (V&V 101:16).
Na [tamata] dau vosota ena ciqoma na nodra cala kei na nodra malumalumu na nona daulomani. Baleta ni lomani ira, ena sega ni dau dusia na nodra malumalumu se vosa vakacacani ira se beitaki ira.
E dua tale na itovonibula e cavuta o Pita na veilomani. … E dua e dauloloma e dau veikauwaitaki ka ivakarau malua vei ira na tani. E dau kauwaitaka na nodra nanuma na tani ka dauveinanumi ena nona ivalavala ni bula. E nona ivakarau me dau veivuke. Na veilomani e dau vosota na nodra malumalumu kei na nodra cala na tani. Na loloma e dau soli ki na tamata kecega—vei ira na qase kei na gone, ki na manumanu, vei ira e tu ga e ra na nodra bula vakakina vei ira e cecere.
Oqo na itovo dina ni bula ena veika vakalou. Sa rawa beka ni o raica na ivakarau eda na Vakarisito vakalevu cake kina ni da ivalavala vinaka cake, veilomani cake, ka lewa vakavinaka cake na lomada kei na noda nanuma?
A vakayagataka na iApositolo o Paula eso na ivakamacala matata me vakaraitaka kina ni sa dodonu me da duatani mai vei vuravura na lewe ni Lotu. E vakasalataki keda me da “vakasulumi keda vei Karisito” (Kalatia 3:27), “biuta tani … na tamata makawa,” ka “vakaisulu ena tamata vou” (Efeso 4:22, 24).
Na iotioti ni ivalavala dodonu ka isala vakatui ni itovonibula vakalou na yalololoma, se na loloma uasivi i Karisito (raica na Moronai 7:47). Kevaka eda segata vakaidina me da vakataka vakalevu cake na noda iVakabula ka iVakavuvuli, sa na noda takete cecere duadua kina me da vulica me da dauloloma me vaka na Nona dauloloma. E vakatoka o Momani na yalololoma “ni sa uasivi sara” (Moronai 7:46).
Sa dau tukuni vakalevu ena vuravura nikua na loloma, ka sa vakasaqara voli e vuqa sara. Ia na loloma uasivi i Karisito e duidui sara vakalevu mai na veika e nanuma o vuravura me baleta na loloma. Na loloma cecere sa sega ni dau vakasaqara na ka e baleti koya ga. Na loloma uasivi i Karisito sa dau vakasaqara ga na nodra tubu tawamudu kei na reki na tani. …
Sa tukuna na iVakabula ni bula tawamudu sai koya me da kilai koya na Kalou dina duadua ga kei na Luvena o Jisu Karisito (raica na Joni 17:3). Kevaka e dina oqo, kau wasea vei kemuni na noqu ivakadinadina bula ni dina, sa qai dodonu me da taroga se a yaco vakacava me da kila na Kalou. Na iwalewale ni kena vakuri e dua na itovonibula vakalou ki na dua tale, me vaka e vakamacalataka o Pita, sa yaco me idola ni kena rawati na kila ka oqo ka na kauti keda ki na bula tawamudu. Raica na yalayala nei Pita, ka muria mai na iwalewale sa vakamacalataki:
“Ia kevaka sa tu ga e lomamudou na veika oqo, ka sa tubu cake me levu, era sa uqeti kemudou mo dou kakua ni vucesa se tawa vua ena nomudou kila na noda Turaga ko Jisu Karisito” (2 Pita 1:8; matanivola kala).
… Au masuta me na noda na veika talei kei na itovonibula oqo ni iVakabula me rawa kina ena gauna eda na laki tu kina ena Veilewai ka na tarogi keda yadua o Koya, “A vakaivei na nomu ivalavala?” ni tacake na uluda ena vakavinavinaka kei na reki ka da sauma, “A vakataki kemuni.”11
3
Ena vakacegui keda ka laveti keda cake na iVakabula ena noda sasaga me da tiko ga ena sala sa vakatakilakilataka vei keda o Koya.
Ena gauna eda sa gole tani kina mai na sala sa vakatakilakilataka vei keda na Tamata mai Kaleli, ena gauna vata oqori eda sa druka tiko kina ena noda dui ivalu yadua. … Ia e sega ni yali vei keda na nona veivuke. Sa dau taleva wasoma vei iratou na nona tisaipeli o koya, vakakina vei keda kece, “Me kakua ni rarawa na lomamudou. …”
“A ka kecega dou na kerea ena yacaqu, au na kitaka.”
“Au na sega ni laivi kemudou mo dou luveniyali. …”
“Au sa laiva vei kemudou na vakacegu, au sa solia vei kemudou na noqu vakacegu. …” (Joni 14:1, 14, 18, 27.)12
Me da lesu tale mada ki na iVola i Momani … me da vulica eso na ivakavuvuli ni lako mai vei Karisito, noda soli keda ki Vua, yavutaki keda mai Vua, ka rawai vakadua mai Vua. Eda na cavuvosa ena vica ga vei ira na itukutuku e vuqa era tu me baleta na tikina oqo.
Taumada, e dodonu me da kila ni sureti keda tiko o Karisito me da lako Vua. “Raica sa kacivi ira na tamata kecega ko Koya, a sa dodoka yani vei ira na ligana dauloloma,… Ia sa kaya ko Koya: Dou lako mai vei au mo dou mai kania na vunikau ni bula” (Alama 5:33–34).
Lako mai, ni sa tu ko koya ka “dodoka tu yani na ligana vei kemudou” (Momani 6:17).
Lako mai, ni na “vakacegui kemudou ko Koya ena nomudou rarawa ka na totaki kemudou ka cudruvi ira era sa segata me vakacacani kemudou” (Jekope 3:1).
“Ia, mo dou lako mai ka cabora na yalomudou taucoko me isoro vua” (Omanai 1:26).
Ni sogota o Moronai na ivolatukutuku me baleta na nodra vakararamataki na Jeretaiti, a vola kina, “Au sa vakaroti kemudou mo dou vakasaqarai Jisu o koya era sa tukuna na parofita kei ira na iapositolo” (Ica 12:41).
Ena nona tinia na nona vosa o Moronai ka volai ena itinitini ni nodra gauna ni veivakararamataki na Nifai, e kaya kina o koya, “Io dou lako vei Karisito ka biuta tani na ivalavala sa sega ni vakalotu, mo dou vinaka kina, … ia kevaka dou sa biuta na ivalavala sa sega ni vakalotu ka lomana na Kalou ena lomamudou taucoko, kei na yalomudou taucoko, kei na nomudou igu taucoko, sa na qai rauti kemudou na nona loloma” (Moronai 10:32).
O ira era sa soli ira vei Karisito era na “vakadinadinataka na Kalou ena veigauna kecega, ena veika kecega kei na veivanua kecega” era na tiko kina “me yacova na mate” (Mosaia 18:9). Era na “nanuma dei tikoga na yacana” o Karisito “ka volai tu ga” e yalodra (Mosaia 5:12). Era sa “lomadra vakaidina me ra taura na yaca i Karisito ka qarava me yacova na ivakataotioti” (Moronai 6:3).
Ni da bulataka e dua na bula ka Vakarisito, “eda sa tukuni Karisito, ka rekitaki Karisito, ka vunautaki Karisito” (2 Nifai 25:26). Eda “vakabauta na vosa talei ni Kalou me nomudou na nona loloma” (Jekope 3:2). Ena gauna sa vutugu voli kina na yaloi Nifai ena vuku ni nona talaidredre, a kaya, “Au sa kilai Koya kau sa vakararavi Vua. Sa dau totaki au na noqu Kalou” (2 Nifai 4:19–20).
Eda nanuma na ivakasala nei Alama: “Ia mo vakaliuca na Turaga ena nomu cakacaka kecega, ka vakarorogotaka vua na nomu sala kecega; mo dau nanuma tikoga na Turaga , ia mo lomani Koya ena gauna taucoko. Mo vakarorogotaka vua na Turaga na nomu sala kecega” (Alama 37:36–37).
“Ia oi kemudrau na luvequ, drau nanuma,” e kaya o Ilamani, “mo drau tara na nomudrau yavu ena uluvatu ni nomudrau iVakabula, sai Koya na Karisito, … ni sa vakaliwava mai na tevoro na nona cagi kaukauwa, … [era] na sega ni rawai kemudrau se dreti kemudrau sobu ki na ikeli ni rarawa” (Ilamani 5:12).
E kaya o Nifai, ni Turaga “sa vakasinaiti au ena nona loloma ka sa curuma na yagoqu taucoko” (2 Nifai 4:21). O ira sa curumi ira na Karisito era sa “bula ga vei Karisito” (2 Nifai 25:25). Era na “vosota rawa na veika rarawa, ia me ratou marau ga ena vuku i Karisito” (Alama 31:38). Ena “karoni ira ko Jisu” (Momani 5:11). E kaya o Nifai, “Au sa vakacaucautaki Jisu ni sa vakabula na yaloqu” (2 Nifai 33:6). E kaya o Liai, “Sa vakavolivoliti au na nona loloma ka tawamudu” (2 Nifai 1:15). …
… Na tamata dokai oya o Momani [a vola e dua] na ivola vua na luvena lomani, o Moronai, ena veimalanivosa oqo:
“Na luvequ, mo yalodina vei Karisito; mo kakua ni rarawa ena veika au sa vola, de na vakamalumalumutaki iko; io me vakaukauwataki iko ko Karisito, ka mo nanuma tiko ga na nona vakararawataki kei na nona mate, na nona vakaraitaki koya vei ira na noda qase, na nona loloma, na nona vosota vakadede kei na inuinui ni nona veivakalougatataki kei na bula tawamudu.
“Ia me tiko ga kei iko na loloma ni Kalou ko Tamada sa tiko mai lomalagi, kei na loloma i Jisu Karisito na noda Turaga, sa tiko ena liga imatau i Koya sa kaukauwa, me yacova sara ni sa vakamalumalumutaka na ka kecega” (Moronai 9:25–26).
Na noqu masu me baleti keda yadua me na muria talega na ivakasala vakauqeti oya: “Yalodina vei Karisito.” Ena qai laveti keda cake ko Koya ka na qai tiko ga kei keda na Nona loloma soliwale me tawamudu.13
Vakatutu ni Vuli kei na Veivakavulici
Taro
-
E kaya o Peresitedi Benson, “E sega tale ni dua na veivakauqeti me cecere cake na kena revurevu ena vuravura oqo me vaka na bula nei Jisu na Karisito” (wase e 1). Ena sala cava beka sa vakilai tiko kina e vuravura na revurevu ni nona bula na iVakabula? Na sala cava beka sa vakauqeti iko kina na Nona bula?
-
Ena veisau vakacava na noda bula ni da “vakasamataki Karisito”? E semati vakacava ki na noda itovo ni bula na noda vakanananu? Ni o vulica na wase e 2, vakananuma vakatitobu na veika e rawa ni o cakava mo vakatorocaketaka kina vakavinaka sara na itovonibula Vakarisito e tukuni kina.
-
E rawa ni solia vakacava vei keda na inuinui na ivakavuvuli ena wase e 3 ni da segata me da vakataka vakalevu cake na iVakabula? Sa vukei iko beka vakacava na iVakabula ena nomu sasaga mo muri Koya?
iVolanikalou Veisemati
Marika 8:34; Filipai 4:13; 1 Joni 3:23–24; 2 Nifai 25:23, 26; Mosaia 3:19; Alama 7:11–13; Moronai 7:48
Veivuke ki na Vuli
“Dau navuca na veitaviqaravi ni vuli ka na tara cake na nomu vakabauta na iVakabula” (Vunautaka na Noqu Kosipeli [2004], 24). Taura mada vaqo, ni o vuli tiko o na tarogi iko beka ena so na taro me vakaoqo: “Na sala cava beka e rawa ni vukei au kina na ivakavuvuli oqo meu vakalevutaka cake na noqu kila na Veisorovaki nei Jisu Karisito? Ena vukei au vakacava na veivakavuvuli oqo meu yaco me vakataka vakalevu cake na iVakabula?”