Wase 15

Na Nodra Veikacivi Tabu na Tama kei na Tina

“Me da sa qai yalodina ki na ilesilesi cecere oqo ni itubutubu, na ilesilesi vakalou oqo.”

Na bula nei Ezra Taft Benson

Ena vosa kei na ivakaraitaki, ena itikotiko kei na veiyasai vuravura taucoko, ena loma ni Lotu kei na bula raraba tale eso, a vakavulica o Peresitedi Ezra Taft Benson na bibi ni itubutubu vinaka. “Susugi ira na luvemuni ena loloma kei na ivakasala ni Turaga, ” a kaya.¹ “Sa ilesilesi ni Kalou vei ira na itubutubu mera qarava na nodra susuga cake na nodra matavuvale. Oqo e dua na ilesilesi tabu cecere sara.”²

Rau a cakacaka vakaveivolekati sara o Peresitedi Benson kei na watina, o Flora, me rau vakayacora rawa na nodrau ilesilesi tabu vaka-itubutubu. Rau a “cakava na cakacaka oqo ni qaravi nodrau matavuvale ena kaukauwa kei na marau.”³ Rau dau veivakasalataki vakai rau baleti iratou na luvedrau kei na veika tale eso. “Au raica ni sa toka tikivi au e dua na marama yalomatua vakayalo,” e kaya o Peresitedi Benson.⁴

Rau a cakacaka vata me buli cake e dua na itikotiko mera na tubu cake ka vuli kina na luvedrau— na vanua era taleitaka na luvedrau mera tiko kina. “E vinaka cake vei au meu tiko e vale mai na dua tale na vanua,” e kaya o Mark na luvedrau. “E a dua na idrodro mai na cava. O tinaqu e a gacagaca ni isasabai, ka tu e kea o tamaqu ena nona kaukauwa.”⁵

Rau a cakava ena masumasu o Peresitedi Benson kei Sisita Benson na nodrau ilesilesi vaka-itubutubu. E kaya o Mark: “E levu cake na vakabauta nei tinaqu mai na dua tale na marama au bau kila. … Au se bera mada ni raica ena noqu bula me levu cake vakaoqo na masu. Ena dau vakasauri ga sa tekiduru, ka masulaki iratou na gone, me baleta e dua na veitarogi se veivala ena rara ni qito e koronivuli, se cava ga. O koya vata kei Tamaqu e tiko vei rau na vakabauta rawarawa oqo.”⁶

E dau gole tu vakayawa mai vale o Peresitedi Benson baleta na nona cakacaka kei na itavi ni Lotu, sa qai dau cola tu o Flora na vuqa na ilesilesi ni nodratou qaravi ka vakavulici na ono na luvedrau. E taleitaka dina na nona itavi vaka-marama tina. “Na itikotiko sa iusutu ni neitou gagadre ena bula oqo,” a kaya.⁷ E nanuma lesu o Mark, “E taleitaka dina na neitou itikotiko o tinaqu. Ka lomani keitou— sega ni baleta ni nona ilesilesi, ia baleta ni sa nona bula o ya.”⁸ Ena nona vakaraitaka na lomana baleta na bibi ni tina, a vola kina o Flora: “Kevaka o gadreva mo kune cecere, kakua ni rai ki na itutu vakatui, rai ki na veisusu. E tiko e dua na kaukauwa cecere ena tina. O koya e dauvakauqeta na yalo, na bula, ka tuvanaka na itovo.”⁹

Na gauna e dau gole vakayawa mai vale o Peresitedi Benson, sa dau vakasaqara na sala me qarauna ka vaqaqacotaka na nona matavuvale. Sa dau veitaratara tiko mai vei iratou ena talevoni kei na ivola. Ni tiko e vale, sa dau vakayagataka e vuqa na gauna kei iratou e rawata rawa. Sa dau tukuna vakalevu na italanoa “ni dua na tama osooso ka a vakamacalataka na gauna e vakayagataka me qito polo kei luvena tagane ena nona kaya, “E dau totolo cake me mosi na uluqu mai na mosi ni yalo e muri.’”¹⁰

Oqo o Ezra Taft Benson kei rau na luvena tagane, o Reed kei Mark

E dau vakuria talega na gauna eso vei iratou na luvena yadua. E nanuma lesu o Mark na gauna a kauti koya kina o tamana ki Salt Lake City, e Utah, me laki raica e dua na vuniwai torocake: “E ka marautaki na lako vata kei Tamaqu, o koya ga kei au! Keirau veivosakitaka na veika ga au gadreva meu tukuna. Niu se cauravou lailai mada ga, au kila ni lomani au o Tamaqu, baleta ni a tiko vata kei au ka vukea meu vinaka cake.”¹¹

Ni dau rawa, e dau kauti iratou na luvena o Peresitedi Benson ni gole ki na veivanua. Ena Maji ni 1948 a kauti luvena yalewa o Bonnie, ka se yabaki vitu tiko ena gauna o ya, ki na dua na bose ni iteitei mai Nebraska. “Era kurabui na dauvolaitukutuku ena nona maqosa na goneyalewa lailai oqo, kei na ivakaraitaki duatani ni dua na tama me kauta mai e dua na gone lailai vakaoqo ena dua na ilakolako balavu vakaoqo me tiko ena dua na soqo cecere, ka tabaki sara na iyaloyalo kei Bonnie ena waqa e liu [ni niusipepa] ena mataka e tarava. Ia kivei Elder Benson na ka sa yaco e sega ni ka duatani. Sa dau vakavuqa me kauti iratou tu na gone ki na ilakolako e taudaku ni taoni, me vaqaqacotaki na veimaliwai vinaka ka vakavulici iratou.”¹²

iVakavuvuli nei Ezra Taft Benson

Sa ka tawamudu na veikacivi ni dua na tama.

Kemuni na tama, na nomuni veikacivi sa tawamudu o ni na sega ni vakacegui mai kina. Na veikacivi ena Lotu, me vaka ni ra sa ka bibi, ena kedra ituvaki dina sa baleta ga e dua na gauna vakarautaki, ka na tarava mai na vagalalataki mai kina. Ia na veikacivi ni tama sa tawamudu, ka tawayalani na kena gauna. Sa veikacivi ena gauna oqo kei na veigauna tawamudu.¹³

Sa noda itovo, se ivakaraitaki, ni itutu vakatama na Tamada Vakalomalagi. E cakacaka vakacava o Koya kei ira na Luvena? Ia, ni gadrevi me kilai oqo, sa na gadrevi dina sara, [na tama] mera kila e dua na ka baleta na kosipeli, na yavu ni veivakabulai cecere ni Turaga.¹⁴

Vua e dua na tagane, e sega tale ni dua na veikacivi cecere me vakataka na peteriaki bula savasava, me vakamau ena vale ni Turaga, ka dabe vakatulewataki ira na Luvena. Na Iloimi mada ga e gadreva meda cavuta Vua “Tamai keimami mai lomalagi” (Maciu 6:9; 3 Nifai 13:9).¹⁵

Sa nodra itavi na tama mera vakarautaka na veiliutaki vakayalo ena nodra matavuvale.

Mena dau via kania ka via gunuva ka gadreva o tama me vakalougatataki nona matavuvale, gole vua na Turaga, vakasamataka vakatitobu na vosa ni Turaga, ka bula voli ena Yalotabu me kila na vakanananu kei na lewa ni Turaga kei na veika me cakava me liutaka kina na nona matavuvale.¹⁶

Kemuni [na tama,] sa tu vei kemuni e dua na ilesilesi tabu mo ni vakarautaka kina na veiliutaki vakayalo ena nomuni matavuvale.

Ena dua na tikidua a tabaka ena vica na yabaki sa oti na Matabose ni Le Tinikarua, keimami kaya kina oqo: “Na itutu vaka-tama sai koya na veiliutaki, na mataqali veiliutaki bibi duadua. Sa dau vakatu o ya mai liu; ka sa na vakatu oqo. Kemuni na tama, ena veivuke kei na ivakasala kei na veivakayaloqaqataki ni nomuni itokani tawamudu, ko ni sa na vakatulewa ena itikotiko” (Father, Consider Your Ways [tikidua, 1973], 4–5). …

Ena loloma sa tu e yaloqu me baleti ira na tama i Isireli, meu vakatura mada e 10 na sala matata e rawa mera veiliutaki vakayalo kina na tama vei ira na luvedra:

1. Solia na veivakalougatataki vakatama vei ira na luvemu. Papitaiso ka vakadeitaki ira na luvemu. Tabaki ira na luvemu tagane ki na matabete. Oqo ena yaco mera veivakabulabulataki vakayalo ki na nodra bula na luvemu.

2. Mo liutaka vakai iko na masu vakamatavuvale, wiliki ena veisiga na ivolanikalou, kei na lotu vakamatavuvale ena veimacawa. Na nomu vakaitavi sara ga o iko ena vakaraitaka vei ira na luvemu na kena rui bibi dina na itaviqaravi oqo.

3. Ke rawa, dou gole vata vakamatavuvale ki na soqoni ni Lotu. Na sokalou vakamatavuvale ena nomu veiliutaki sa ka bibi ki na nodratou bula raraba vakayalo na luvemu.

4. Dau gole vakagade vaka-tama kei luvemu yalewa vaka-tama kei luvemu tagane. …

5. Tuvanaka na ivakarau ni gade vakamatavuvale kei na tirivu kei na veilakoyaki. Na ivakananumi oqo era na sega ni guilecava na luvemuni.

6. Veivosaki vata vakayadudua kei ira na luvemu. Laiva mera tukuna mai na veika era via kaya. Vakavulica vei ira na ivakavuvuli ni kosipeli. Vakavulica vei ira na yavunibula dina. Tukuna vei ira ni ko lomani ira. Na nomu gauna vakai iko vata kei ira na luvemu e tukuna tiko vei ira na veika e vakaliuca tiko o Tamadra.

7. Vakavulici ira na luvemu ena cakacaka, ka vakaraitaka vei ira na yaga ni kena cakacakataki e dua na inakinaki yaga. …

8. Vakayaloqaqataka na sere ivakatagi vinaka kei na cakacaka ni liga kei na ivola ena nomu itikotiko. Na itikotiko e tiko kina na yalo ni veivakasavasavataki kei na totoka ena vakalougatataka na nodra bula na luvemu me tawamudu.

9. Ni rauta na balavu ni ilakolako, mo curu vakawasoma ki valetabu kei watimu. Era na qai kila vakavinaka cake na luvemu na bibi ni vakamau ena valetabu kei na bubului ni valetabu kei na tabana ni matavuvale tawamudu.

10. Mera raica na luvemu ni ko rekitaka ka taleitaka na veiqaravi ena Lotu. Oqo ena rawa ni dewavi ira, me rawa talega vei ira, era na gadreva mera veiqaravi ena Lotu ka ra na taleitaka na matanitu.

Isa, kemuni na tagane vakawati kei na tama e Isireli, sa rawa me vuqa na ka mo ni cakava mera vakabulai ka bula vakacerecerei kina na matavuvale! Sa rui ka bibi na nomuni ilesilesi.¹⁷

“Mo dau veivosaki vakayadudua kei ira na luvemu.”

Eso na gauna eda rogoca na kedra itukutuku na tagane, ena loma mada ga ni Lotu, era nanuma ni ra sa iliuliu ni itikotiko sa yaco kina mera liutaka na ka kecega ka rawa kina mera lewa ka vakasaurarataki ira na nodra matavuvale.

E vakaraitaka na iApositolo o Paula ni “sa ulu ni watina na tagane, me vaka sa ulu ni isoqosoqo lewe ni lotu na Karisito” (Efeso 5:23; vakuri ena vosa-kala). Sa ikoya oqo na ivakaraitaki meda muria ena noda itavi ni vakatulewa ena itikotiko. Eda sega ni raica na iVakabula me liutaka tiko na Lotu ena liga e veivakacacani se tawaloloma. Eda sega ni raica na iVakabula me qarava na Nona Lotu ena veibeci se veivakawaleni. Eda sega ni raica na iVakabula me vakasaurarataka se vakaukauwataka me vakayacori na Nona inaki. E sega ni dua na vanua meda raica kina na iVakabula e vakayacora e dua na ka ia na veivakararamataki, veilavaeti cake, veivakacegui, kei na veivakacerecerei ena vuku ni Lotu. Kemuni na veitacini, au kaya vei kemuni ena yalo sa tuvaki donu, sa i Koya ga na ivakaraitaki meda muria ni da taura na veiliutaki vakayalo ena noda matavuvale.¹⁸

Me vaka ni ko peteriaki ena nomu itikotiko, sa ka bibi sara na nomu ilesilesi mo tekivuna kina na veiliutaki ni cakacaka kei ira na luvemu. Sa dodonu mo veivuke mo bulia kina e dua na itikotiko me dau tiko kina na Yalo ni Turaga. …

Na nomuni itikotiko e dodonu me idrodro ka veivakacegui ka reki kina na nomu matavuvale. Sa dina sara ni sega ni dodonu vua e dua na gone me rerevaki tamana— vakabibi ni tama e lewe ni matabete. Na itavi nei tama o ya me cakava na nona itikotiko me vanua ni marau kei na reki. … Na revurevu ni nodra kaukauwa na tama ivalavala dodonu me ra tuvanaka e dua na ivakaraitaki, vunauca ka vakavulica, veisusugi ka loloma sa ka bibi ki na nodra bula raraba vakayalo na luvedra.¹⁹

Na itavi nei tina sa tabaki mai vua na Kalou.

O ira na [tina] era sa, se dodonu mera, uto ka yalo ni matavuvale. E sega tale ni tiko e dua na vosa tabu vakavuravura se ena ivola tabu me vakataka na tina. E sega ni tiko e dua tale na cakacaka dokai me vakataka nona cakacaka e dua na tina vinaka sa dau rerevaka na Kalou.

Ena matavuvale tawamudu, sa tauyavutaka na Kalou vei ira na tama mera na vakatulewa ena nodra itikotiko. O ira na tama mera na veiqaravi, loloma, ka veivakavulici, ka veidusimaki. Na itavi nei tina sa tabaki talega mai vua na Kalou. O ira na tina mera na kunekune, vakasucu, veisusugi, loloma, ka veituberi. Sa ivakaro oqo mai na ivakatakila.²⁰

Eda kila ni so na yalewa, e dina ni sega ni nodra cala, era sega ni vakaluveni rawa. Kivei ira na sisita vinaka oqo, era sa yalataka na parofita yadua ni Kalou ni ra na vakalougatataki ena gone ena veigauna tawamudu ka na sega ni cakitaki vei ira na nodra kawa oqo.

Mai na vakabauta savasava, vakamamasu, lolo, kei na veivakalougatataki digitaki, e vuqa vei ira na sisita totoka oqo, vata kei ira na nodra itokani dokai era tokoni ira, sa yaco na cakamana ena nodra bula ka ra sa vakalougatataki ena gone. Eso era sa masulaka mera susu gone. Eda sa dokai ira kina na veiwatini totoka oqo ena vuku ni nodra solibula kei na loloma ko ni sa solia kivei ira na gone oqo o ni sa mai digitaka mera vakatokai mera luvemuni dina.²¹

Na Kalou sa vakalougatataki ira na tina totoka oqo. Keimami dau masulaki kemuni. Keimami tokoni kemuni. Keimami rokovi kemuni ena nomuni veivakasucumi, veisusugi, veituberi, kei na loloma ki na veigauna tawamudu. Au sa yalataka vei kemuni na veivakalougatataki mai lomalagi kei na “ka kecega [sa] tu vei Tamaqu” (raica na V&V 84:38) ni ko vakarabailevutaka na veikacivi dokai duadua— mo ni tina kei Saioni.²²

Sa itavi nei tina me loloma, veivakavulici, ka vakayagataka na veigauna vinaka vei ira na luvedra.

Kemuni na tina kei Saioni, sa rui ka bibi na nomuni itavi e soli va-Kalou mo ni bula vakacerecerei kina kei na nodratou vakabulai ka bula vakacerecerei kina na nomuni matavuvale. Na gonelailai ena gadreva vakalevu cake na tinana ni vakatauvatani ki na veika taucoko e rawa ni volia na ilavo. Na nomu vakayagataka na nomu gauna vei ira na luvemu sa isolisoli cecere duadua.²³

Ni kovuti tu na yaloqu ena lomani ira na tina kei Saioni, meu na vakatura mada e 10 na sala matata era rawa ni vakayagataka na tinada na veigauna gugumatua vei ira na luvedra.

[iMatai,] ena gauna e rawa kina, mo dau waraki ira toka na luvemuni ena gauna era lesu tiko mai se gole yani —ni ra lako yani se lesu mai ena vuli, ni ra gole yani se lesu mai ena gade vakaitau, ni ra kauti ira nodra itokani mai e nomudou. Mo dau waraki ira toka na luvemuni ni ra sa yabaki 6 se 16. …

iKarua, kemuni na tina, me tiko na gauna mo nodra itokani dina vei ira na luvemuni. Vakarorogo vei ira, vakarorogo dina sara. Veivosaki vata kei ira dredre ka veiwali vata kei ira, lagasere vata kei ira, qito vata kei ira, tagi vata kei ira, mokoti ira, ka vakacaucautaki ira dina sara. Io, me tiko na gauna ni veivosaki vakayadudua kei ira na luvemu. Mo nodra itokani dina sara na luvemuni.

iKatolu, me tiko na gauna ni nomu wili vola vei ira na luvemuni. Tekivu mai ni ra se keveti, wilivola vei ira na luvemuni. … Ko na teivaka e lomamu mo taleitaka na ivola vivinaka kei na nomu taleitaka dina na ivolanikalou kevaka mo na wiliwili ena kena gauna vei ira na luvemuni.

iKava, me tiko na gauna mo masu vata kina kei ira na luvemu. Ena veidusimaki nei tama, e dodonu me vakayacori na masu vakamatavuvale ena mataka kei na bogi. Mera na vakila tiko na luvemu na nomu vakabauta ni ko kaciva na veivakalougatataki kei lomalagi me sobuti ira. … Mera vakaitavi na luvemu ena masu ni matavuvale kei na nodra dui masu, ka me rekitaki na veika totoka era cavuta vua na Tamadra mai Lomalagi.

iKalima, me dau vakaibalebale dina na gauna ni lotu vakamatavuvale ena veimacawa. Mera na vakaitavi vagumatua kina na luvemu. Vakavulica vei ira na ivakavuvuli dodonu. Cakava oqo me dua vei ira na nomudou itovo vakamatavuvale. …

iKaono, me vakawasoma ke rawa mo dou dau kana vata ena kena gauna. Oqo e dua na ibolebole ni ra sa qase cake tiko mai na gone ka sa osooso mai na bula. Ia na veivosaki mamarau, wasei ni ituvatuva ni siga nikua kei na itaviqaravi, kei na gauna digitaki ni veivakavulici e dau yaco ena gauna ni kana baleta ni ra cakacaka vata kina o rau na itubutubu kei ira na gone.

iKavitu, me tiko na gauna ena veisiga mo dou wilika vata kina vakamatavuvale na ivolanikalou. … Na kena wiliki vata vakamatavuvale na iVola i Momani ena vakalevutaka vakatabakidua na bula vakayalo ena nomudou itikotiko ka na solia vei rau na itubutubu kei iratou na gone na kaukauwa me ra vorata rawa na veitemaki ka yaco na Yalo Tabu me nodra itokani ena veigauna. Au sa yalataka vei kemuni ni iVola i Momani ena veisautaka na nodra bula na nomuni matavuvale.

iKawalu, me tiko na gauna mo dou cakacaka vata kina vakamatavuvale. Vakayacora na gade kei na pikiniki kei na soqo ni siganisucu kei na ilakolako digitaki me gauna taleitaki ka me balolo ni vakanananu. Kevaka e rawa, mo dou tiko vakamatavuvale, ena soqo e vakaitavi kina e dua na nomudou lewe ni matavuvale, me vakataka na vakatasuasua e koronivuli, e dua na qito, dua na vosa, kei na dua na lagasere se qiri ivakatagi. Mo dou lako vata ki na soqoni ni Lotu, ka dabe vata vakamatavuvale ke rawa. O ira na tina era vukea nodra matavuvale mera masu ka qito vata ena [vukei ira] mera duavata tiko ka na vakalougataka tawamudu na nodra bula na gone.

iKaciwa, kemuni na tina, me tiko na gauna ni nomuni vakavulici ira na luvemuni. Sa rawa mo veivakavulici ena gauna ni kana, ena gauna galala, se ena gauna ni dabe vata, ena yasa ni loga ni sa cava na siga, se ena gauna ni taubale vata ena mataka lailai. …

Na nona loloma e dua na tina kei na kauwai ena masumasu baleti ira na luvena sa gacagaca bibi duadua ni nona vakavulici ira. Vakavulici ira na gone ena ivakavuvuli ni kosipeli. Vakavulica vei ira ni na saumi ga na caka vinaka. Vakavulica vei ira ni sega na veitaqomaki ena ivalavala ca. Vakavulica vei ira mera taleitaka na kosipeli i Jisu Karisito kei na ivakadinadina ni sa ka vakalou.

Vakavulica vei ira na luvemuni tagane kei na goneyalewa na bula savasava, ka vakavulica vei ira mera doka na ilesilesi vakatagane kei na ilesilesi vakayalewa. Vakavulica vei ira na gone na veimoceri savasava, na ivakarau dodonu ni vakaitau, vakamau ena valetabu, veiqaravi ni kaulotu, kei na bibi ni kena ciqomi ka vakarabailevutaki ni veikacivi ni Lotu.

Vakavulica vei ira mera taleitaka na cakacaka kei na yaga ni vuli vakavinaka.

Vakavulica vei ira na bibi ni veivakamarautaki e savasava, oka kina na iyaloyalo yavala kilikili, sara vidio, sere kei na ivakatagi, ivola, kei na mekasini. Me veivosakitaki na butobuto ni iyaloyalo vakasisila kei na wai ni veivakamatenitaki, ka vakavulica vei ira na yaga ni kena bulataki na bula e savasava.

Io, kemuni na tina, ni vakavulica na kosipeli vei ira na luvemuni ena nomuni dui itikotiko, ena nomuni dui yasanibuka. Oqo na veivakavulici mana duadua era na bau ciqoma na luvemuni. …

iKatini ka kena iotioti, kemuni na tina, na nomuni gauna mo ni lomani ira vakaidina sara na luvemuni. Na nona loloma tawailavaki o tina sa vakamuria ga na loloma sa va-Karisito.

Era na gadreva talega na itabagone lalai na loloma kei na veikauwaitaki vata oqori. E dau rawarawa toka ki na vuqa na tina kei na tama mera vakaraitaka na nodra loloma vei ira na luvedra ni ra se gone tiko, ia e dau dredre toka vakalevu ni ra sa tubu cake tiko. Cakacakataka oqo ena masumasu. E sega ni gadrevi me lutu e dua na itabatamata. Na idola ga na loloma. Era gadreva tu o ira na noda itabagone mera lomani ka kauwaitaki, sega ni veivakasaurarataki. Era gadreva tu mera yaloni ka kilai vakavinaka, sega ni vakaduiduitaki mai vei tina kei tama. Era gadreva tu na nodra gauna na itubutubu. Na nona veivakavulici ena loloma e dua na tina kei na nona loloma ka yalonuidei tiko vei luvena tagane se luvena yalewa ena rawa ni vakabulai koya dina mai na vuravura ca oqo.²⁴

“Me tiko na gauna mo dau wilivola kina vei ira na luvemu.”

O kila beka e dua na vuna era lomani ira vakalevu kina na luvedra o ira na tina ivalavala dodonu? Baleta ga ni ra solibula vakalevu ena vukudra. Eda lomana na veika eda solibula kina ka da solibula ena veika eda lomana.²⁵

E dodonu mera cakacaka vata na itubutubu ena duavata kei na loloma ena susugi cake ni luvedra.

E dodonu vei ira na veiwatini, ni ra sa dauniveibuli talega, mera sureti ira vagumatua ena masumasu na luvedra ki na nodra itikotiko. … Sa kalougata na veiwatini e tiko na nodrau matavuvale ni gone. Na reki titobu kei na veivakalougatataki ni bula era sa kune ga ena matavuvale, ilesilesi vakaitubutubu, kei na solibula. Ni gadrevi me yaco mai na yalo vinaka vakaoqo ki na itikotiko sa kilkiliki kaya kei na solibula cava ga.²⁶

Ni ra vakayacora o ira na itubutubu, era veitokani, era loloma, ka duavata, na nodra ilesilesi mai lomalagi ka ra vakaio na gone ena loloma kei na talairawarawa, sa kena isau na reki cecere.²⁷

Sa vukei keda na Kalou meda veitokoni vakai keda. Me sa na tekivu mada e na itikotiko ni da tokoni ira noda matavuvale. Me sa tiko e dua na yalo ni dina, duavata, loloma, kei na veidokadokai vakai keda. Me ra sa yalodina tiko na tagane vei watidra, dina vei ira, lomani ira, saga me vakamamadataki na nodra icolacola, ka wasea na nodra ilesilesi ni nodra qaravi, tuberi, kei na susugi na gone. Mera sa vakaraitaka na tina kei na yalewa vakawati e dua na yalo ni dauveivuke vei watidra, tutaka ka tokoni ira ena nodra itavi vakamatabete, ka yalodina ka dina ki na veikacivi e yaco vei ira mai na matabete ni Kalou.²⁸

Meda sa qai dina ki na ilesilesi cecere oqo ni itubutubu, na ilesilesi tabu oqo, me rawa kina ni da tara cake vakaukauwa na noda itikotiko ena ivakavuvuli tawamudu, meda qai kakua kina ni veivutuni. Meda sa qai kakua ni tawadina [sega ni dina] ki na vakanuinui tabu sa vakatikori oqo vei keda. Meda sa qai daunanuma tiko ni o ira na yalo oqo era sa curuma tu na noda itikotiko era sa yalo taleitaki.²⁹

Vakatutu ni Vuli kei na Veivakavulici

Taro

E kaya o Peresitedi Benson, “Na noda ivakarau, se ivakaraitaki, ni ilesilesi vakatama, sa ikoya na Tamada vakalomalagi” (wase e 1). Ena sala cava era rawa ni muria kina na tama vakavuravura na ivakarau sa mai tuvanaka na Tamada Vakalomalagi?
Mo vakasamataka mada na lisi nei Peresitedi Benson ni “10 na sala matata ni sa rawa vei ira na tama mera veiliutaki vakayalo vei ira na luvedra” (wase e 2). Na cava o nanuma ni na rawa ni vakauqeti ira na gone na vakatutu yadudua oqo?
E kaya kina o Peresitedi Benson, “E sega ni tiko e dua tale na cakacaka dokai me vakataka nona cakacaka e dua na tina vinaka sa dau rerevaka na Kalou” (wase e 3). Na ivakaraitaki cava o sa raica vei ira na ilesilesi vakatina dokai? Me vaka ni sa veisau na nanuma nei vuravura baleta na ilesilesi vakatina, na cava e rawa ni da cakava meda tutaka na ilesilesi dokai ka tabu ni tina?
Na cava eso na ka yaga e yaco mai ena nodra gauna vata na itubutubu kei ira na gone? (Me baleta na ivakaraitaki eso, raica na wase e 4.)
Na cava eso na veivakalougatataki e yaco mai ki na dua na itikotiko ena gauna era sa duavata kina na itubutubu ena nodra ilesilesi? (Raica na wase e 5.) Na cava erau rawa ni cakava o tama kei tina me rau duavata kina vakalevu cake? Ena sala cava era na rawa ni vaqaqacotaki kina na itubutubu dua mera vakayacora kina na ilesilesi oqo?

iVolanikalou Veisemati

Vosa Vakaibalebale 22:6; Efeso 6:4; Mosaia 4:14–15; Alama 56:45–48; 3 Nifai 22:13; raica talega “Na Matavuvale: Ai Vakaro ki Vuravura Raraba,” Ensign, Nove. 2010, 129

Veivuke ni Veivakavulici

“Ni o sa vakarautaki iko vakayalo ka vakaliuca na Turaga ena nomu veivakavulici, o na mai Nona iyaragi e ligana. Ena vakadeitaka na nomu vosa e na kaukauwa ni Yalo Tabu” (Veituberi, Me iLutua ni Noda Bula [1999], 47).