Wase 5

Na iVakavuvuli ni Veivutuni Dina

“Vei ira era sa lako curuma na veika e gadrevi kina na veivutuni dina, sa na dina sara na yalayala. Ko na rawa ni savasava tale. Na yalolailai ena kau laivi. Na vakilai ni kamikamica ni veivosoti ena drodrova yani na nomu bula.”

Na Bula nei Ezra Taft Benson

Ena imatai ni nona koniferei raraba o Peresitedi Ezra Taft Benson ni sa mai Persitedi ni Lotu e a kaya kina, “Niu sa vaqara na veidusimaki mai vua na Turaga, au sa vakadeitaka ena noqu vakasama kei na yaloqu na nona vakatutu na Turaga meu kaya, ‘dou vunauci ira na itabatamata oqo mera veivutuni.’ (V&V 6:9; 11:9.) Oqo sa vaka tu me nodra ulutaga na parofita kece sara ena gauna edaidai.”¹

Ni se bera mada ga ni kacivi me Peresitedi ni Lotu, e a dau vakaliuca tu o Peresitedi Benson na veivutuni me ulutaga ni nona veivakalotutaki. E a sa vakasalataki koya kina o George Albert Smith na Peresitedi ni Kuoramu ni iApositolo Le Tinikarua ena gauna o ya. Ena dua na ivola ka a volai ni se qai kacivi ga o Peresitedi Benson kina itutu vaka iApositolo, e a kaya kina vakaoqo o Persitedi Simici, “sa nomu madigi ena gauna oqo, mo na vakasaqara na sala mo na vakadewataka kina na dina ka vakasalataki ira na tamata ko na veisotari kei ira ena yalo loloma ni veivutuni walega ena vakavinakataka na veika sa mai vakacacani tu oqo e vuravura.²

O Peresitedi Benson e a dinata na itavi oqo ena nona vakatavuvulitaka na kosipeli ena veiyasai vuravura. E a vakatavuvulitaka ni “vinaka cake na vakavakarau ka tataqomaki mai na vakavinakataka ka veivutuni.”³ Ia e vakaraitaka talega o koya ni “o keda kece ena ganita me da veivutuni.”⁴ E a vakabibitaka na “veisau levu” ni yalo e rau veiwekani voleka sara kei veivutuni (raica na Alama 5:12–14) ka vakamacalataka na itavi ni iVakabula ena kau lesu mai na veisau.

“Na Turaga e dau cakacaka mai loma ki tuba. Na vuravura mai tuba ki loma. Na vuravura e kauta tani mai na tamata mai na vanua vakasisila. O Karisito e kauta laivi na vakasisila mai vua na tamata, ni oti era na qai kauti ira laivi na tamata mai na vanua vakasisila. Na vuravura ena veisautaka na ivakarau ni tamata me na qai veimoiyaka na ivakarau ni vanau e vakaitikotiko kina. O Karisito e veisautaka na tamata ka qai veisautaka na tamata na vanua e vakaitikotiko kina. Na vuravura ena veisautaka na itovo ni tamata, ia o Karisito ena veisautaka na ituvaki ni tamata. …

“Io, o Karisito ena veisautaka na tamata ka ni tamata era sa veisau, era na qai veisautaka na vuravura.”⁵

A young man kneeling by his bed in prayer. — Sa kaya na Turaga, “Ia, na noqu loloma sa rauti ira kecega sa vakamalumalumutaki ira vei au,” (Ica 12:27).

iVakavuvuli nei Ezra Taft Bennson

Ni da sa veivutuni dina, e dodonu meda kila tiko ni ituvatuva ni kosipeli e ituvatuva ni bula marau.

Na itomo ni vosa,lewe ni Lotu e kena ibalebale dina sara ni dua sa volai vakaivola tu na yacana ena ivolatukutuku ni Lotu. …

Ia, na Turaga e duidui na nona vakamacalataka ni dua sa lewe ni Nona matanitu. Ena 1828, e a vakaraitaka vaka oqo vei Parofita Josefa Simici, “Ia, oqo na noqu ivakavuvuli —Ko koya sa veivutuni ka lako mai vei au, sa lewe ni noqu lotu.” (V&V 10:67; kuri ena matanivola kala.) Vei Koya e Nona na Lotu oqo, e tiko sara e cake na ibalebale ni dua sa mai volai tu vakaivola na yacana me lewenilotu.

Au vinakata gona kina meu tuva vakaivola e vica na ivakavuvuli bibi e dodonu me da vulica ka bulataka kevaka meda sa veivutuni dina ka lesu vua na Turaga.

Dua na ivadi ca nei Setani ka dau vakayagataka wasoma sa ikoya na kila ni ivakaro ni Kalou e soli me vakalailaitaka na noda galala ka yalana na noda bula marau. Era dau nanuma na itabagone ni so na gauna e dau vaka na bai se sinucodo ka tarovi ira mai na veitaviqaravi era nanuma ni na vakamarautaki ira ena nodra bula. Ia, e veibasai sara ga na kena dina. Na yavu ni kosipeli sa ikoya na yavu ena kauti ira na tamata me taucoko na nodra bulamarau. Oqo na imatai ni ivakavuvuli au via vakabibitaka tiko. Na ivakavuvuli ni kosipeli sa ikoya na ikalawa kei na idusidusi ka na vukei keda meda sotava na bula marau.

Na kena kilai na ivakavuvuli e vakavuna me lagata na Daunisame, “A ka vakaidina na noqu loloma kina nomuni vunau! … Na nomuni vakaro sa vakavukui au cake vei ira na noqu meca. … A nomuni vosa na cina kina yavaqu, kei na rarama kina noqu sala. … Au sa taura na nomuni itukutuku me noqu ivotavota ka sega ni mudu: ni ra sa ka ni reki kina lomaqu.” (Same. 119:97–98, 105, 111.)

Kevaka me da vinakata dina me da veivutuni ka lako mai vei Koya me rawa ni da vakatokai ni da sa lewena na Nona Lotu, meda sa namaka sara ga na dina tawamudu oqo—ni yavu ni kosipeli na yavu ni bula marau. Ni ivalavala ca e a sega, e sega, ka na sega vakadua ni na kauta mai na bula marau [raica na Alama 41:10]. Na kena voroki na ivakaro ni Kalou ena kauta mai na rarawa, veivakabobulataki, kei na butobuto.⁶

Na vakabauti Jisu Karisito ena muria mai na veivutuni dina.

Na ikarua ni ivakavuvuli ka na bibi me da kila sa ikoya na nodra veiwekani na veivutuni kei na ivakavuvuli ni vakabauta. Na veivutuni sa ikoya na ikarua ni yavu ni ivakavuvuli ni kosipeli. Na imatai sa ikoya na vakabauta na Turaga o Jisu Karisito. Na cava e vakakina o ya? Na cava me liu kina na vakabauti Jisu Karisito qai muria na veivutuni dina?

Me da sauma na taro oqo e dodonu me da kila toka e so na ka baleta na vakacacabo ni veisorovaki ni iVakavuvuli. E vakatavulica i Liai ni, “sega ni rawa vua na tamata … me tiko ena mata ni Kalou, ia sa rawa duadua ga ena vuku ni Nona yalovinaka kei na nona loloma kei na nona lomasoli na Mesaia Yalosavasava.” (2 Nif. 2:8.) Ni o ira sara mada ga na tamata ivalavala dodonu ena sega ni rawa ni ra vakabulai ira ena nodra sasaga ga vakai ira, me vaka ga e a kaya na iApositolo o Paula, “ni sa ivalavala ca ko ira kecega na tamata ka ra sega ni yacova na ka sa vakarokorokotaki kina na Kalou.” (Roma. 3:23.)

Kevaka me a sega na ivakaraitaki vinaka sara, tawa ivalavala ca ni iVakabula, ka solia ena Nona solibula baleti keda, ke a sega ni rawa na vakabokoci ni ivalavala ca.

Sa ikoya gona ena vinakati kina na veivutuni me ka dina ka sega walega ni veisau ni ivakarau ni bula. E levu na tagane kei na yalewa e vuravura era vakaraitaka na kaukauwa ni yalo e tu vei ira kei na bula vakaivakarau ena nodra dau vakamalumalumutaka na ivakarau ca kei na malumalumu ni yago. Ena gauna vata oqori era sega ni dau vakasamataka na iVakavuvuli, ka so na gauna era dau sega sara ga ni ciqomi koya. Na veisau ni ivakarau vakaoqori, ena gauna sara ga ni tu vinaka na bula, ena sega ni vakataucokotaka na veivutuni dina.

Na vakabauta na Turaga o Jisu Karisito e dodonu me vakayagataki me yavu ni veivutuni ena yalodina. Kevaka meda sasagataka meda kauta laivi na ivalavala ca, me da rai taumada Vua, o Koya na iTekivu ni noda vakabulai.⁷

Na veivutuni e wili kina na veisau levu ni yalo.

Na ikatolu ni ivakavuvuli me da kila kevaka me da na wili vaka lewe ni Lotu dina sa ikoya na veivutuni e oka kina veisau ni yalo ka sega walega ni veisau ni ivakarau.

Ni sa mai cava na vosa rogorogo vinaka nei Tui Penijamini mai na vanua o Saraemala era domovata mai na tamata ka kailavaka yani ni ra sa vakabauta na veika kece e tukuna vei ira. Era sa kila vinaka sara tu ga ni veika e yalataka vei ira baleta na veivakabulai e ka dina, baleta ni a kaya, “raica sa cakacaka yaco na yalo ni Turaga sa Kaukauwa sara … kina yalo ikeimami ka keimami sa biuta tani na gagadre ca ka via kitaka tikoga na ivalavala dodonu.” (Mosaia 5:2.)⁸

E rawa beka ni veisau na yalo ni tamata? Io, e rawa! E yaco tu ena veisiga ena cakacaka ni kaulotu ni Lotu. Oqo e dua na cakacaka mana levu sara ena gauna oqo i Karisito. Kevaka me se bera tiko ni yaco vei iko—ie dodonu me sa yaco.

E a kaya na Turaga vei Nikotimo, “kevaka sa sega ni sucu tale na tamata ena sega ni raica rawa na matanitu ni Kalou.” (Joni 3:3.) …

Kaya o Alama, “A sa kaya vei au na Turaga: Kakua ni kurabui ni sa dodonu me sucu tale na tamata kecega, io, na tagane kei na yalewa,na veimataniitu, na veimataqali, duivosavosa kei na lewe ni veivanua io, mera sucu tale vua na Kalou ka saumaki mai ena nodra ivalavala vakayago kei na ivalavala ca mera ivalavala dodonu, a sa vakabulai ira na Kalou kara sa yaco me ra luvena;

“A ra sa yaco kina me ra tamata yalo vou, ia kevaka era sa sega ni kitaka oqo, era na sega ni rawata na matanitu ni Kalou.” (Mosaia 27:25–26.) …

Na ikava ni wase ni ivola iAlama e vakamacalataka ni dua na iwase ni kedra itukutuku na Nifai ni, “sa sega ni tubu kina na cakacaka ni lotu.” (Alama 4:10.) E a sa qarava rawa na bolebole oqo o Alama ena nona sa vakacegui koya mai na itavi vaka turaganilewa levu ena matanitu “ka sa qarava ga na cakacaka vakabete levu.” (Alama 4:20.)

E a “vunauci ira ena nodra ivalavala ca” na nona tamata (Alama 4:19), kei na ikalima ni wase ni ivola i Alama e a taroga kina e sivia ni vasagavulu na taro. Ni a vosa sara tikoga vei ira na lewe ni Lotu, e a kaya, “Ia au sa kaya vei kemudou na wekaqu lewe ni lotu, ko dou sa sucu li vakayalo vua na Kalou? Sa vakararamataki kemudou tikoga na iserau ni matana? Sa uqeti li kina na yalomudou mo dou veivutuni?” (Alama 5:14.)

E a tomana, “Kevaka ko dou sa kaya ni dou sa veivutuni ka dou sa rekitaka na loloma dou sa vakabulai kina, a cava dou sa nanuma ena gauna oqo?” (Alama 5:26.)

Ena sega li ni na toso vakalevu na Lotu ena gauna oqo, mai na nodra sa na veisau vakayalo e lewe levu era sa veisau mai? Ena rawa li ni ko vakasamataka na ka ena yaco ena noda veimatavuvale? Ena rawa li ni ko vakasamataka na ka ena yaco ni sa na levu na iwiliwili ni iVola i Momani me na tiko e ligadra e dua na iwiliwili levu ni daukaulotu ka ra sa kila tu na kena vakayagataki ni ra sa sucu oti Vua na Kalou? Ni sa na yaco na ka oqo, eda sa na qai tamusuka na wiliwili ni yalo era sa yalataki oti tu mai vua na Turaga. O ya na “sucu vua na Kalou” ka a wasea o Alama ena nona a kaulotu voli ka ra a sucu kina vua na Kalou e lewe levu sara na tamata. (Raica na Alama 36:23–26.)⁹

Book of Mormon prophet Alma the Younger depicted lying on a bed. He is just waking up from being struck dumb and repenting of his sins. Alma has his hand against his head. — Na veivutuni e a rawa kina vei Alama Lailai, kei ira na nona ilawalawa me veisau na yalodra ena cakamana.

Ni da sa lako curuma na veisau levu oqo, ka na yaco walega ena vakabauti Jisu Karisito kei na cakacaka ni Yalotabu vei keda, sa vaka sara ga eda sa yaco me dua na tamata vou. Sa na vaka sara ga e dua na sucu vou vakayago. E udolu vei kemuni sa sotava oti na veisau vakaoqo. Ko ni sa biuta laivi na bula ni ivalavala ca, e so vei ira sa ka levu sara, ka sa liviraki na nomuni bula ena dra i Karisito, ka sa yaco mo ni savasava. Ko ni sa sega tale ni qai vinakata na lesuva tale na bula makawa. Sa ka dina ni ko ni sa tamata vou sara ga. Oqo na ka e vakaibalebaletaki ena veisau ni yalo.¹⁰

Na rarawa va-Kalou e veimuataki kina veivutuni dina.

Na ikava ni ivakavuvuli au via vakabibitaka, sa ikoya na ka e tukuna na ivolanikalou me “rarawa va-Kalou” baleta na noda ivalavala ca. Ena sega soti ni dredre meda na raici ira na tagane kei na yalewa e vuravura ka na maduataka na veika era sa cakava cala tiko. Oqo e baleta ni veika era a sa cakava e vakavuna vei ira kei ira na nodra daulomani e dua na rarawa levu kei na madua. Ena so na gauna e dau vakavuna na nodra rarawa ni ra a tobo ka totogitaki baleta na nodra cala. Na veika e vakilai vakavuravura vakaoqori e sega ni salavata kei na “rarawa vakalou.”

… Ena icavacava ni nodra gauna na Nifai, e vakaoqo na ka e a kaya o Momani baleti ira na nona tamata: “dina ga sa yalololoma vei ira na Kalou, ia era sa sega ni rarawataka dina na nodra ivalavala ca, raica era sa rarawataka ga ni sa cudruvi ira na Turaga ka sega ni laiva me ra ia tikoga na ivalavala ca.

“Era sa sega ni lako vei Jisu ena yalo sa raramusumusu kei na yalo e bibivoro, era sa vosacataka na Kalou ka bolea na mate.” (Momani. 2:13–14.)

Ena Tokalu kei Vuravura, e a veiqaravi voli kina o Paula vei ira mai Korinica. Ni sa yaco mai na itukutuku ni leqa levu era sotava tiko na Yalododonu, wili kina na dauyalewa (raica na 1 Kori. 5:1), vola o Paula e dua na ivola ni veivosataki. Era a sauma mai na tamata ena yalo vinaka, ka kena irairai ni sa wali na leqa e a kune, baleta ni ivola e a vola tarava o Paula, e vaka oqo: “Au sa qai reki ka sega ga ni dou a vakararawataki ni dou sa rarawa ga kina veivutuni ni dou sa vakararawataki me vaka na loma ni Kalou. …

“Ia, na rarawa sa vaka na loma ni Kalou, sa vakayacora na veivutuni kina bula o koya sa sega ni veivutunitaki tale: ia na rarawa vakavuravura sa vakayacora na mate.” (2 Kori. 7:9–10.)

Erau vakaraitaka tiko na tiki ni ivolanikaou oqo, ni rarawa sa vaka na lomanikalou e rarawa ka na veimuataki yani ki na veivutuni.

Na rarawa sa vaka na lomanikalou sa isolisoli ni Yalotabu. Sa dua na vakanananu titobu ni noda ivalavala sa vakacudruya sara ga na Tamada ka noda Kalou. Ena vakasauri na kena kidavi ka kilai ni noda ivalavala sa vakavuna vua na iVakabula, o Koya ka sega ni dua na Nona cala o koya ka sa dua na vu ni qaqa, me vosota na mosi kei na rarawa. Na noda ivalavala ca sa vakavuna Vua me dra na vei vuti ni yagona. Na veika ena vakilai ena vakasama kei na vakanananu vakayalo sa ikoya na ka e vakatokai ena ivolanikalou me “yalo sa raramusumusu kei na yalo bibivoro.” (Raica na 3 Ni. 9:20; Moro. 6:2; V&V 20:37; 59:8; Same 34:18; 51:17; Aisea. 57:15.) Na yalo vakaoqori sa itekitekivu sara ga ni veivutuni dina.¹¹

Na Tamada Vakalomalagi kei Jisu Karisito erau via raica ni sa veisau na noda bula, ka Rau na vukei keda kina.

Na ivakavuvuli e tarava kau na via vakamacala kina sa ikoya oqo: O rau ga na Tamada kei na iVakabula e rau gadreva sara tikoga vakalevu me da veisautaka na noda bula. Volai tiko ena Ai Vakatakila e dua na veisureti veivaqaqacotaki mai vua na iVakabula. E kaya o Koya, “Raica kau sa tu e mata ni katuba, ka tukituki: kevaka sa rogoca na domoqu e dua na tamata, ka dolava na katuba, au na curu vua.” (Ai Vakatakila 3:20.) Me kilai tiko ni o Koya e sega ni tukuna, “Kau sa tu ena matanikatuba ka waraki iko mo tukituki.” O Koya e kaci tiko, veisureti, kerekere meda dolava ga na yaloda ka vakacurumi Koya mai.

E vakamatatataka sara o Moronai na ivakavuvuli oqo ena nona ivunau baleta na vakabauta. E a kaya vua na Turaga, “Kevaka era sa vakamalumalumutaki ira vei au, au na vakaukauwataki ira ena veika era sa malumalumu kina. Au sa vota vei ira na tamata na malumalumu vakayago mera yalomalumalumu kina, ia na noqu loloma sa rauti ira kece.” E sega ni dua na ka se cava e sega vei keda, se malumalumu kina, se eda sega ni rawa-ka kina. Na Nona isolisoli kei na kaukauwa sa na rawa me valuta na veika kece.

Tomana o Moronai na vosa ni Turaga: “ Na noqu loloma sa rauti ira kecega era sa vakamalumalumutaki ira vei au, ia kevaka era sa vakamalumalumutaki ira vei au ka vakabauti au, au na vakaukauwataki ira ena veika era malumalumu kina.” (Ica 12:27; ikuri na matanivola kala.)

Sa dua na yalayala vinaka mai vua na Turaga! Sa na rawa ni veisau na ivurevure ni noda leqa, me vakavoui, ka buli me vu ni kaukauwa ka ivurevure qaqa. Na yalayala oqo e cavuti vakawasoma ena dua tale na kena ivosavosa ena vica vata tale na tiki ni ivolanikalou. Kaya o Aisea, “Sa dau solia na kaukauwa vei ira era sa malumalumu; ia ena vakalevutaka na kaukauwa vei ira era sa sega ni gumatua rawa.” (Aisea. 40:29.) Kaya na Turaga vei Paula, “Sa rauti iko na noqu loloma ni sa vakalevui na noqu kaukauwa na sa malumalumu e dua.” (2 Kori. 12:9.) Eda wilika ena Vunau kei na Veiyalayalati, “Ia, ko koya sa sautaninini ena noqu kaukauwa ena vakaukauwataki, io, ena tukuna na ivakavuvuli dina kei na vakarokoroko me vaka na veika dina au sa vakaraitaka vei iko.” (V&V 52:17; raica talega na 1 Nif. 17:3; 2 Nif. 3:13; V&V 1:28; 133:58–59.)¹²

Dua na yaragi mana nei Setani vei ira sa temaki ira mera caka cala sa ikoya me vakasolokakanataka e daligadra ni ra sega ni bula kilikili mera masu. O koya ena tukuna vei iko ni o TamadaVakalomalagi sa cudruvi iko ka sa sega ni via rogoca na nomu masu. Oqo e dua na lasu, ka na tukuna vei iko me vakacalai iko. Na idre ni ivalavala ca sa rui kaukauwa. Kevaka meda na dretaki keda laivi mai kina, vakabibi mai na ivalavala ca, e dodonu me tiko vei keda e dua na kaukauwa e levu cake mai vei keda.

Sega ni dua me vinakata vakalevu mo dro mai na nomu ivalavala ca me vakataki Tamada Vakalomalagi. Lako vei Koya. Vakadinadinataka na nomu ivalavala ca, vakatusa na nomu madua kei na nomu cala, ka qai kerei Koya me veivuke. E tiko vei Koya na kaukauwa me vukei iko mo qaqa.¹³

Taciqu kei na ganequ, meda sa na kauta yani vua na Turaga na noda ivalavala ca ena yalomalumalumu kei na veivutuni. Me da sa kerei Koya me vakaukauwataki keda me da vakamalumalumutaka. Sa dei tu na yalayala. O Koya ena lako mai me veivuke. Eda na kunea na kaukauwa me veisautaka na noda bula.¹⁴

Me da kakua ni soro ni da segata tiko me da na va-Karisito.

Na ika ono ka iotioti ni ulutaga au na via kaya tiko baleta na ilakolako ni veivutuni, sai koya me da na qaqarauni sara vakavinaka, ni da sa vaqara meda na va-kalou o ya meda kakua ni yalolailai se vakamalumalumu. Na noda saga meda va-Karisito e ka ni noda bula taucoko ka na salavata kei na noda na tubu tiko ka veisau sara vakamalua, so na gauna ena via dredre sara. E volai tu ena ivolanikalou e so na tamata ka ra sa veisautaki vakalevu sara ena dua na gauna lekaleka: O Alama Lailai, Paula ena gaunisala mai Tamasiko, o Inosi ka masu tiko me yacova na bogi, o Tui Lamonai. Na ivakaraitaki e so oqo ka baleta na kaukauwa ni veisau ena yaco, vakabibi vei ira era vesuki tu ena so na ivalavala ca levu sara e vakadeitaka ni Veisorovaki ena rawa ni sereki ira o ira era tu sara ena vanua dredre ka veilecayaki.

Ia meda na qaqarauni sara ni da veiwaseitaka tiko na vei ivakaraitaki e so oqo. E dina ni ra a yaco dina ka sa veivakaukauwataki era sa veimuataki sara ga ena noda bula. O ira kece na Paula, o ira kece na Inosi, o ira kece na Tui Lamonai, era tu e vica vata tale na udolu na tamata ka sa raica ni icakacaka ni veivutuni era vakaicakacaka ka sa dau veibolei talega. Era toso voleka vua na Turaga ena veisiga, ka ra sega tiko ni kila ni ra sa tara tiko e dua na bula ena yaco me vakalou. Era toso tu ga vakamalua ka caka vinaka, era veiqaravi, ka yalodina. Era vakataki ira na Leimani ka a kaya na Turaga baleti ira “era papitaiso ena bukawaqa kei na Yalo Tabu, ka ra sega tiko ni kila.” (3 Nif. 9:20; kuri ena matanivola kala.)

Me kakua ni yali noda vakanuinui. Na vakanuinui sa iyaqa ni bula vakayalo ni tamata. Ena vinakata o Setani me da viritaka laivi na iyaqa oqori. Ni sa na yaco oqori eda sa na vakayalolailaitaki ka da sa na soro. Ia, meda kakua ga ni yalolailai. Sa marautaka na Turaga na sasaga eda sa cakava, na veika lalai sara mada ga e da sa cakava rawa meda na vakataki Koya kina. Eda na rairai raica beka ni se yawa sara na vanua me muri me na qai rawa na bula dodonu, meda kakua ga ni soreva na noda vakanuinui.¹⁵

Vei ira era sa na sotava na icolacola ni kena wali na leqa ena veivutuni dina, e tiko deivaki na kena yalayala. Ko na rawa ni bula savasava tale. Na yalolailai ena vueti cake tale. Na yalo vakacegu ni veivosovosoti ena drodrova lesu tale yani na nomu bula.

Na vosa ni Turaga mai vei Aisea sa dina taucoko sara: “Dou mada mai me tou veivosaki vata, sa kaya ko Jiova: ke sa vaka na ka kulakula na nomudou ivalavala ca, sa na vulavula me vaka na uca vulavula; ke sa damuvakula sa na vaka na vutika ni sipi” (Aisea. 1:18).

A vakamatataka na Turaga ena gauna oqo ena Nona kaya, “Raica ko koya sa veivutunitaka na nona ivalavala ca, ena vosoti, raica ko i au na Turaga au na sega ni nanuma tale na nona ivalavala ca.” (V&V 58:42).¹⁶

The resurrected Jesus Christ emerging from the Garden Tomb. Christ is portrayed stepping out of the tomb. He is depicted wearing white robes. Flowers are blooming near the entrance to the tomb. — “Na veivutuni dina yavutaki ka drodro mai ena vakabauta na Turaga o Jisu Karisito. Ka sega ni dua tale na kena sala.”

Au sa nuitaka ni da na sega ni kauta tiko mai na veika sa oti. O ira era dau kauta tiko mai na veika sa oti, ena sega na nodra veisiga vinaka ni mataka. Dau matau vei keda meda dau vakaisaisataka na veika eda sa vakayalia, na veika eda sa vakatulewa oti kina, ka da vakasamataka ni a cala na vakatulewa eda a cakava. Eda sa dau yalo ca sara ga kina ka da qai sotava tiko na kena revurevu, ka vakasamataka ni na vinaka cake kevaka me da a veisautaka na noda a vakatulewa taumada. Eda na rawa ni vuli mai na vakatulewa sa caka oti. Ia, me da kakua ni vakayagataka na gauna me da leqataka tiko kina na vakatulewa sa caka oti, na cala sa vakayacori oti. Me da sa bula tiko ena gauna oqo kei na veisiga ni mataka.¹⁷

Kemuni na veiwekani, ni da sa saga meda lewena na Lotu i Karisito—ena kena vakasama me vaka e kaya o Koya, o ira era sa veivutuni ka lako mai Vua—nanuma tiko e ono na ka oqo. Na imatai, na kosipeli ni Turaga e yavu ni bulamarau kei na veivutuni ena kauta mai na reki. Na ikarua, na veivutuni dina e yavutaki ena vakabauti Jisu Karisito na Turaga. E sega tale ni dua na kena sala. Na ikatolu, na veivutuni dina e oka kina na veisau ni yalo ka sega walega ni veisau ni ivakarau. Na ikava, e tiki ni veisau levu ni yalo na noda vakila na yalorarawa me vaka na kalou baleta na noda ivalavala ca. Oqo na ibalebale ni yalo sa raramusumsu kei na yalobibivoro. Na ikalima, na isolisoli mai vua na Kalou sa dodonu me vukei keda me da walia na cala kei na malumalumu kevaka me da lako Vua ka kere veivuke. Kena iotioti, me da nanuma tiko ni levu na veivutuni e sega ni yaco kina na veisau vakaitamera se vakasauri, ia e yaco veitaravi na veika lalai,vakamalua sara na itosotoso, me veimuataki tikoga yani kina bula vakalou.

Kevaka me da saga me da vakacuruma mai na ivakavuvuli oqo kina noda bula ka vakamuria ena veisiga, eda sa na qai wili kina meda sa lewena dina na sara na Lotu i Jisu Karisito. Ni da sa lewena dina na lotu, eda sa vakadonui meda ciqoma na Nona yalayala: “Ko koya yadua sa curu kina noqu Lotu, sa tara cake ena noqu uluvatu ia kevaka sa vosota tiko me yacova na ivakataotioti ena sega ni rawati koya na matamata ni koro ki etesi.” (V&V 10:69.)

Sa noqu masu me da na rawata kece sara na yalayala o ya me noda.¹⁸

Vakatutu ni Vuli kei na Veivakavulici

Taro

Kaya o Peresitedi Benson ni da sa veivutuni dina, e dodonu me da kila ni “yavu ni kosipeli na yavu ni bula marau” vakakina ni na bula ni ivalavala ca oqori “ena sega sara ni kauta mai vei keda na bula marau” (wase 1). Na cava o nanuma kina ni kila vakaoqo ena gadrevi me na rawati na icakacaka ni veivutuni?
Ena noda sa sasaga meda veivutuni, na cava e sega ni rauta ga kina na veisau ni ivakarau? (Raica na wase e 2.) Na cava na vuna o nanuma kina ni ganita meda rai vei Jisu Karisito me rawa kina na veivutuni dina?
Ko sa sotava oti mada vakacava na “veisau levu ni yalo,” me vaka e tukuni tiko ena wase 3? Na cava e rawa ni da cakava meda vukei ira na tani me ra na sotava talega na veisau vakaoqo?
Na sala cava so e duidui kina na “yalo rarawa vakalou” mai na lomaleqa ka yaco vei ira e so na tamata ni ra sa vakayacora e so na cala? (Raica na wase e 4.) Ena vakayagataka vakacava e dua na itubutubu se dua na bisopi na veivakavulici e tiko ena wase 4 me vukei kina e dua ka na gadreva me veivutuni?
Ni ko raica lesu tiko na wase 5, na veivakavulici cava ko raica ni na vakavure yalo vakacegu? E veivakacegui vakacava na veivakavulici oqo vei iko?
Ni vakadinadinataka tiko na kaukauwa ni Veisorovaki ni iVakabula, e kaya kina o Peresitedi Benson, “Meda kakua sara ni vakanuinui cala” (wase 6). Ni ko sa raica lesu tiko na wase 6, na dina cava ni Veisorovaki o raica ni na kauta mai vei iko na vakanuinui?

iVolanikalou Veisemati

Luke 15:11–32; Mosaia 4:10–12; 26:30–31; Alama 34:17–18; 3 Nifai 27:19–20; V&V 18:10–16; 19:15–19

Veivuke ni Veivakavulici

“Na nomu itavi bibi mo vukei ira na so me ra vulica na kosipeli, e sega ni vaka mo solia e dua na ivunau levu. Oqo e oka kina na nomu solia na madigi me ra veivakavulici vakataki ira na gonevuli” (Na Veituberi, Me iLutua ni Noda Bula, [1999], 64).