iVakamacala Taumada

Eratou a tauyavutaka na isoqoni ni Nodra iVakavuvuli na Peresitedi ni Lotu Na Mataveiliutaki Taumada kei na Kuoramu ni iApositolo Le Tinikarua me vukei iko ena nomu toro voleka yani vua na Tamamu Vakalomalagi ka vakatitobutaka na nomu kila na veika me baleta na kosipeli vakalesuimai nei Jisu Karisito. Ni vakaikuritaka tiko na Lotu eso tale na voliumu ki na isoqoni oqo, o sa na taracake tiko e dua na ivakasokumuni ni ivoladusidusi ni kosipeli ena nomu vale. Era sa vakarautaki na ivoladusidusi ena isoqoni oqo mera vakayagataki ena vuli yadudua vakakina me idusidusi ni Sigatabu. Era rawa talega ni na vukei iko ena nomu vakarautaka na lesoni kei na vosa ka vakakina me sauma na taro vakaivunau ni Lotu.

Na ivola oqo e tu kina na ivakavuvuli nei Peresitedi Ezra Taft Benson, ka a veiqaravi vaka-Peresitedi ni Lotu i Jisu Karisito ni Yalododonu Edaidai mai na 10 ni Noveba, 1985, ki na ika 30 ni Me, 1994.

iVakatakilakila

Benson, Ezra Taft. Signature

Vuli Yadua

Masulaka na veivakauqeti ni Yalo Tabu, ni ko vulica tiko na ivakavuvuli nei Peresitedi Ezra Taft Benson. Na taro ena mua ni iwase ena vukea na nomu vakasamataka vakatitobu, kila, ka bulataka na ivakavuvuli nei Peresitedi Benson. Na veivakasama eso oqo ena rawa talega ni vukei iko:

Vola na vakasama kei na nanuma e dau yaco mai vei iko mai vua na Yalo Tabu ni o vuli tiko.
Lainitaka na ruku ni veimalanivosa o na vinakata mo nanuma. Vakasamataka mo cavuqaqataka na veimalanivosa oqo se toqa ena nomu ivolanikalou tikiva na tikina veiwekani.
Wilika vakavica e dua na wase se malanivosa me rawa kina ni o kila vakatitobu cake.
Tarogi iko ena so na taro vakaoqo: E vakalevutaka cake vakacava na nomu kila na kosipeli na ivakavuvuli nei Peresitedi Benson? Na cava beka e vinakata na Turaga meu kila mai na veivakavuvuli oqo?
Wasea na veika o vulica vei ira na lewe ni matavuvale kei na itokani.
Tarogi iko ena sala cava ena vukei iko kina na ivola oqo ena nomu bolebole kei na kauwai.

Veivakavulici mai na iVola Oqo

Sa vakarautaki nai vola oqo me vakayagataki mai vale ka vakakina e valenilotu. Na idusidusi oqo me na vukei iko mo na veivakavulici mai na ivola oqo.

Vakavakarau mo Veivakavulici

Vakasaqara na Yalo Tabu ni ko sa vakarau mo veivakavulici. Masulaka na nomu vulica na wase e lesi me rawa ni o yalodei ena nomu kila vakavinaka na ivakavuvuli nei Peresitedi Benson. Ko na veivakavulici ena yalodina kei na kaukauwa ni sa vakayarayarataki iko na nona vosa (raica na V&V 11:21).

Kevaka mo vakavulica tiko e dua na lesoni ni Matabete i Melikiseteki se iSoqosoqo ni Veivukei, kakua ni biuta vakatikitiki na ivola oqo se vakarautaka na lesoni mai na dua tale na ivola. Digitaka mai na iwase ena masumasu na ivakavuvuli ko vakila ni na veivuke vakalevu vei ira ko na vakavulica. E so na iwase ena tiko kina e levu sara na ka ni vuli ka o na sega ni rawa ni vakavulica kece ena gauna ni kalasi.

Vakauqeti ira na vakaitavi mera vulica na iwase ni bera na lesoni ka mera kauta vata tiko mai kei ira na nodra ivola. Ni ra vakayacora oqo, era na vakarautaki vakavinaka cake ki na veivosaki ka veivakavulici vakaiira.

Ena nomu vakavakarau ki na veivakavulici, solia vakatabakidua na nomu vakasama ki na “Vakatutu ni Vuli kei na Veivakavulici” ena mua ni iwase yadua. Ena ruku ni ulutaga oqo, o na raica kina na taro, ivolanikalou veiwekani, kei na dua na veivuke ki na vuli se veivuke ni veivakavulici. Na taro kei na veiivolanikalou veisemati era cokotivata vakatabakidua kei na iwase era kunei kina. Na veivuke ki na vuli kei na veivuke ni veivakavulici e rawa ni tuberi iko ena nomu sasaga kece ni vulica ka bulataka na kosipeli ka vukei ira na tani me ra cakava vakakina.

Vakamacalataka na iWase

Ni ko vakamacalataka na iwase kei na vo ni lesoni, sasagataka mo sureta yani na Yalotabu me rawa ni tara na nodra bula o ira ko na vakavulici ira tiko. Tekivutaka na lesoni, ena nomu vukei ira ko vakavulica mera vakanamata ki na ivakavuvuli ni iwase. O na gadreva beka mo vakayagataka e dua se sivia mai na veivakasama oqo:

Wilika ka veivosakitaka na iwasewase ka kena iulutaga “Na Bula nei Ezra Taft Benson” mai na itekivu ni iwase.
Veivosakitaka e dua na iyaloyalo se ivolanikalou mai na iwase.
Lagata e dua na sere e salavata.
Wasea vakalekaleka na ka e sotavi yadua me baleta na iulutaga.

Vakauqeta na Veivosaki me baleta na iVakavuvuli nei Peresitedi Benson

Ni ko sa veivakavulici mai na ivola oqo, sureti ira e so mera wasea mai na nodra vakasama, taroga e so na taro ka veivakavulici vakai ira. Ni ra sa vakaitavi mai, era na qai vakarau mera na vulica ka ciqoma na ivakatakila baleti ira. Vakatara me toso na veiwasei e vinaka ka kakua ni saga mo vakacavara sara na veivakavulici. Me vakauqeta na veivosaki, vakayagataka na taro ena mua yadua ni wase. E rawa talega mo taroga e so na taro ko nanuma ni ganiti ira o vakavulici ira tiko.

Na veidigidigi oqo e rawa me vakaikuritaka na nomuni vakasama:

Mo ni kerei ira na vakaitavi me ra wasea na veika era vulica mai na nodra vulica yadudua na iwase. E rawa ni veivuke vakalevu sara me ia na veitaratara ena loma ni macawa vata kei na lewe vica era vakaitavi ka kerei ira me ra vakavakarau ena nodra lako mai ka mai wasea na veika era sa vulica.
Lesi ira era vakaitavi tiko mera wilika na taro digitaki eso e tiko ena mua ni wase (vakayadudua se vakailawalawa lalai). Kerei ira mera raica mai na ivakavuvuli e tiko ena wase e sema tiko ki na taro. Qai sureti ira me ra wasea nodra vakasama kei na rai.
Wilika vata eso na ivakavuvuli nei Peresitedi Benson mai na iwase. Kerei ira na vakaitavi me ra wasea na ivakaraitaki eso mai na ivolanikalou vakakina mai na veika era sa sotava ka vakaraitaka na veivakavuvuli oqori.
Kerei ira na vakaitavi mera digitaka e dua na kena iwasewase ka wilika lo toka. Sureti ira mera dabe yarua se yatolu era sa digitaka na iwasewase vata ga ka veiwaseitaka na veika era sa vulica.

Vakauqeta na Veiwasei kei na kena Vakayagataki

Na ivakavuvuli nei Peresitedi Benson ena vakaibalebale cake vei ira era vakaitavi tiko ka ra veiwaseitaka kei ira eso tale ka saga mera bulataka. O na gadreva beka mo vakayagataka e dua se sivia na veivakasama oqo:

Taroga vei ira era vakaitavi se sala cava era rawa ni vakayacora kina na ivakavuvuli nei Peresitedi Benson ena nodra itavi e vale vakakina ena lotu. Me kena ivakaraitaki, sa rawa mo vukei ira mera vakasamataka vakatitobu ka veivosakitaka na sala era rawa ni vakayagataka kina na ivakavuvuli vaka tama, tina, itubutubu, cauravou, goneyalewa, dausiko vuvale, se dauveituberi.
Vakauqeti ira na vakaitavi mera wasea eso na ivakavuvuli nei Peresitedi Benson vei ira na matavuvale kei na itokani.
Sureti ira na vakaitavi tiko mera na vakayagataka na veika era sa vulica ka wasea na veika era sa sotava ena itekivu ni kalasi e tarava.

Tinia na Veivosaki

Vakalekalekataka ga na veika e sa vulici se kerea e dua se rua na vakaitavi me rau cakava. Vakadinadinataka na ivakavuvuli o sa vakavulica. Ko na rairai gadreva mo sureta e so mera wasea na nodra ivakadinadina.

iTukutuku me baleta na iVurevure era Cavuti ena iVola Oqo

Na ivakavuvuli ena ivola oqo era cavuti vakadodonu mai na ivunau, itukutuku, ivola, kei na ivolaniveisiga eso nei Peresitedi Ezra Taft Benson. Na vosacavuti mai na vakavalagi ni ivola sa tabaki, e tautauvata tu kei na ivakatakilakila ni cegu, na sipeli, na matanivola levu, parakaravu ena kena a volai taumada, vakavo kevaka sa veisautaki me matata kina na kena wiliki. Oqo ena vakavuna na kena via duidui toka ena so na gauna na ka era volai. Me vakaoqo, na isosomi ni nauni ka baleta na Kalou era matanivola lalai ena so na vosacavuti ka matanivola lelevu ena so tale.

Vakatalega na nona dau vakayagataka o Peresitedi Benson na vosa tamata, tagane, se umatamata me vakadinadinataka kina tamata taucoko, tagane kei na yalewa. Dau vakayagataka wasoma o koya na vosa o koya, nona, kei na koya me baleta na tagane kei na yalewa. Oqo e sa matau ena gauna e bula tu kina o koya. Dina ga ni duidui na vosa e vakayagataki ena duidui ni veigauna kei na kena e vakayagataki, na ivakavuvuli nei Peresitedi Benson e baleta ruarua na tagane kei na yalewa.