“Lesona 27 Anomea mo le Sauniuniga o le Vasega: Faalauiloaina ma le Puipuia o le Aiga o se Iunite Faavae o Malo,” Anomea a le Faiaoga O Le Aiga e Faavavau (2022)
“Lesona 27 Anomea mo le Sauniuniga o le Vasega,” Anomea a le Faiaoga O Le Aiga e Faavavau
Lesona 27 Anomea mo le Sauniuniga o le Vasega
Faalauiloaina ma le Puipuia o le Aiga o se Iunite Faavae o Malo
Na saunoa mai Peresitene M. Russell Ballard o le Korama a Aposetolo e Toasefululua, “O loo manaomia ona iloa e le lalolagi le mea o loo aoao mai e le folafolaga i le [aiga], aua o le aiga o le iunite faavae lea o malo, o le tamaoaiga, o la tatou aganuu, ma lo tatou faigamalo. Ma e pei ona iloa ai e le Au Paia o Aso e Gata Ai, o le a avea foi le aiga ma iunite faavae i le malo selesitila” (“O Le Mea e Sili Ona Taua e Sili Atu Foi Ona Umi,” Liahona, Nov. 2005, 42). A o e mafaufau e uiga i le matafaioi autu o loo faia e le aiga i le lalolagi ma le faavavau, mafaufau po o le a se mea e mafai ona e faia e faalauiloa ma puipuia ai.
Vaega 1
O a faatosinaga o loo saofaga i le malepelepe o le aiga?
E tele mea ua faavaivaia ai le aiga i malo i neionapo. Ona e alofa ma finagalo le Alii e faamanuia i tatou, ua Ia fetalai mai ai e ala i perofeta e lapataia i tatou e uiga i nei mea ma isi mea matautia. Ua lapatai mai perofeta o aso nei e faapea “o le faamalepeina o le aiga o le a aumai ai i tagata taitoatasi, alaalafaga, ma malo, faafanoga ia na ulua’i ta’u mai e perofeta anamua ma aso nei” (“O le Aiga: O se Folafolaga i le Lalolagi,” ChurchofJesusChrist.org).
O faamaoniga o “le malepelepe o le aiga” o loo siomia ai i tatou. Mo se faataitaiga, tatou te vaaia
-
le faateleina o le nonofo faatasi ae lei faaipoipoina, i fanau e fananau mai i fafo atu o le faaipoipoga, ma i aiga o matua nofotoatasi,
-
faaitiitia o faaipoipoga ma le fananau mai,
-
o le taatele o le faapau pepe, tatalaina o faaipoipoga, sauaga, ma le le gafataulimaina i le olaga faaleaiga, ma
-
aiaiga faavae ma ala o faasalalauga lautele e faavaivaia ai le aiga.
(Tagai Bruce C. Hafen, “O Le Folafolaga i le Aiga: E Fesoasoani i le Fenumiai Faaleaganuu,” Liahona, Aok. 2015, 54; Dallin H. Oaks, “Puipui Tamaiti,” Liahona, Nov. 2012, 43; “Tatalaina o Faaipoipoga,” Liahona, Me 2007, 70; Julie B. Beck, “Aoaoina Atu o Le Aoaoga Faavae o le Aiga,” Liahona, Mat. 2011, 14.)
Sa lapatai mai le Aposetolo o Paulo e uiga i mea matautia o le a i ai i aso e gata ai.
Suesue e Sauniuni ai mo le Vasega
Faitau le 2 Timoteo 3:1–6, 13, ma mafaufau loloto pe faapefea e tulaga na faamatalaina e Paulo ona saofaga i le faamalepeina o le aiga. Mafaufau foi pe mafai faapefea e le malepelepe o le aiga ona faatelevaveina nei uiga faaalia i le lalolagi. (Atonu e te manao e faitau ia vaefaamatalaga pe sue upu e le masani ai i se lomifefiloi e faaloloto ai lou malamalama i lenei fuaitau.)
Sa talanoaina e Elder Bruce D. Porter, o le sa avea muamua ma Fitugafulu, se tasi o mafuaaga ua avea ai alii ma tamaitai ma “e ua alolofa ia i latou lava” (2 Timoteo 3:2):
O le faamalepeina o le faitau miliona o aiga ua faia o se vaega ona ua faalauiloaina e ala o faasalalauga ma aganuu lauiloa le sailiga o le tagata lava ia: o le matua faaleagaina atoatoa o tagata taitoatasi e le fesootai ma matafaioi faaagafesootai pe mama, saoloto e tulitulimatagauina soo se iuga na te filifilia, pau lava le mea ia aua nei mafua ai se afaina faaletino i isi tagata ua faateteleina. (“Defending the Family in a Troubled World,” Ensign, Iuni 2011, 15)
Mafaufau Loloto e Sauniuni ai mo le Vasega
O a ni aafiaga e te manatu ua i ai i le lalolagi ona o le malepelepe o le aiga? O a ni faataitaiga ua e vaaia o nei aafiaga?
Vaega 2
O le a le tiutetauave o ia te au e faalauiloa ma puipuia ai le aiga?
Ua tuuina mai e le Au Peresitene Sili ma le Korama a Aposetolo e Toasefululua le poloaiga lenei: “Matou te valaau atu i tamalii ma failauga ma taitai o malo i soo se mea ina ia faalauiloa atu na fua faatatau ua fuafuaina ina ia faatumauina ma faamalosia le aiga o se iunite faavae o malo” (“O le Aiga: O se Folafolaga I le Lalolagi”).
E tele auala e mafai ai ona tatou faataunuuina lenei poloaiga faaperofeta. Mafaufau i nisi o manatu nei:
-
Galue e faamalosia lou lava aiga.
-
Aoao i faafitauli e faamata‘uina ai le aiga i le mea o loo e nofo ai.
-
Lagolago pe puipuia taitai faaupufai, faalapotopotoga, ma aiaiga faavae lautele e faalauiloa ai le aiga.
-
Faaaoga ala o faasalalauga faaagafesootai e faalauiloa ai tulaga faatauaina lelei faaleaiga.
-
Vaavaai mo avanoa e faasoa atu ai aoaoga o le talalelei ma ou lagona e uiga i le aiga.
O tulaga o o tatou aiga e le faapea e tatau ona atoatoa mo i tatou e faalauiloa pe puipuia ai le aiga. E manaomia o tatou leo, po o a lava tulaga o o tatou aiga.
A o galue ai i le Au Peresitene Aoao o Tamaitai Talavou, sa aoao mai e Peresitene Bonnie L. Oscarson:
E tatau foi ona tatou puipuia ma le lototoa ia aoaoga faavae a le Alii na faaalia mai o loo faamatala ai le faaipoipoga, aiga, o matafaioi paia a alii ma tamaitai, ma le taua o aiga o ni nofoaga paia—e tusa lava pe o tauvalaau mai le lalolagi i o tatou taliga faapea o nei mataupu faavae ua tuai, faatapulaa, ma e le o toe aoga. O tagata uma, e tusa lava po o a o latou tulaga faaleulugalii pe fia le aofai o le fanau, e mafai ona avea ma e puipuia le fuafuaga a le Alii o loo faamatala mai i le folafolaga o le aiga. (“O Tagata e Puipuia le Folafolaga o le Aiga,,” Liahona, Me 2015, 15)
Atonu e i ai taimi e te lagona ai le fefe e faalauiloa pe puipuia le aiga ona o le tetee atonu e te oo i ai. Mafaufau pe mafai faapefea ona e maua le malosi mai faatinoga a Kapeteni Moronae ma sa Nifae, o e na tutu atu ma le lototetele i le saua o sa Lamana “e tausi o latou laueleele, ma o latou fale, ma a latou ava, ma a latou fanau” (Alema 43:9).
Faatino
Fai se fuafuaga faigofie o faatinoga e mafai ona e faia e faaleleia atili ai pe puipuia ai le aiga. Ia saunia e faasoa atu ia le itiiti ifo ma le tasi se manatu mai lau fuafuaga i le vasega.
Vaega 3
E mafai faapefea ona ou to’a atili i le talanoa atu i isi e uiga i aoaoga a le Alii e uiga i le aiga?
Na ta‘ua e Peresitene Dallin H. Oaks o le Au Peresitene Sili o aoaoga i le folafolaga i le aiga e “eseese mai nisi o tulafono o iai nei, faiga masani, ma mea ua taliaina e le lalolagi o loo tatou ola ai nei” (“O Le Fuafuaga ma le Folafolaga,” Liahona, Nov. 2017, 29). I le gasologa o lou olaga, atonu o le a e talanoaina ai autu e faatatau i le faaipoipoga ma le aiga ma tagata o loo i ai ni manatu e ese mai ia te oe. I taimi faapena, aloese mai le faafinau atu (tagai Mataupu Faavae ma Feagaiga 19:30). Nai lo lena, taumafai ia avea ma “soo filemu o Keriso” (Moronae 7:3; tagai foi fuaiupu 4–5) ma ia “[tautala atu] le upumoni i le alofa” (Efeso 4:15).
Na aoao mai Elder Robert D. Hales o le Korama a Aposetolo e Toasefululua e uiga i le mulimuli i le faataitaiga a Iesu Keriso i le ala tatou te tali atu ai i tagata taitoatasi o e atonu e tetee i o tatou talitonuga:
Ina ia tali atu i se ala e faapei o Keriso, e le mafai ona tusitusia pe faavae i se fua faatatau. Sa eseese lava tali a le Faaola i tulaga uma. Ina ua faafesagai o ia ma le Tupu amioleaga o Herota, sa lei gagana o Ia i se upu. Ina ua tu o ia i luma o Pilato, sa Ia tuuina atu se molimau faatauvaa ma le mamana e uiga i Lona paia ma Lona faamoemega. Ina ua silasila atu i le au faapututupe ua faaaogaina ma le le migao le malumalu, sa Ia faaaogaina Lona tiutetauave paia e tausisia ma puipuia ai mea paia. Ina ua siitia i luga o se satauro, sa Ia fetalai atu i se tali e le mafaatusalia faa-Kerisiano: “Lo’u Tama e, ia e faamagalo atu ia te i latou; aua ua latou le iloa le mea ua latou fai” (Luka 23:34).
E i ai nisi tagata e mafaufau sese faapea o tali e pei o le le gagana, agamalu faamagalo atu, ma le tuuina atu faamaualalo o se molimau e le tinoa pe vaivai foi. Peitai, o le “alofa i e ita mai ia [te i tatou], ia faamanuia atu i e ua fetuu mai ia [te i tatou], ia agalelei atu i e ua inoino mai ia [te i tatou] ma [tatou] tatalo foi mo e ua tuua’i fua mai ma faasaua mai ia te i [tatou]” (Mataio 5:44) e manaomia ai le faatuatua, malosi, ao le mea sili o le lototele faaKerisiano. (“Lototele Faakerisiano: O Le Tulaga Manaomia o se Soo,” Liahona, Nov. 2008, 72)
Mafaufau pe mafai faapefea e mataupu faavae nei ona fesoasoani ia te oe a o e talanoa atu i isi e uiga i le faaipoipoga ma le aiga:
-
Mulimuli i le Agaga. E mafai ona fesoasoani le Agaga ia te oe ia iloa upu e fai atu ma mea e le tautatala ai (tagai i le Mataupu Faavae ma Feagaiga 100:5–6). O Lana faatosinaga e mafai foi ona fesoasoani ia te oe e pulea ai ou lagona (tagai Kalatia 5:22–23).
-
Auai i le faalogo ma le mataalia. Tuu atu lou gauai atoa i isi pe a latou talanoa. Aloese mai le faalavelaveina o i latou pe mafaufau i se tali i lou mafaufau a o latou tautatala mai. Ina ia mautinoa ua e malamalama i mea na latou fai mai ai, e mafai ona e fai atu ni fesili manino pe aotele mea na e faalogo o latou fai mai ai.
-
Saili e fausia ni alalaupapa o le malamalama. Aua nei faatagaina ou eseesega e faamalumalu ifo i mea o tou tutusa ai. A o e talanoa, vaavaai mo tulaga tutusa ma atinae ae ai.
-
Faasoa atu aoaoga a le Alii i se gagana faigofie, manino, ma le le finauvale. Aloese mai upu e tulaga ese i tagata o le Ekalesia (tagai David A. Edwards, “Communication Breakdown,” New Era, Oke. 2012, 32–33). Ae, faaaoga upu ma fasifuaitau e sa‘o, uunaia le malamalama, ma faalauiloa ai le agalelei. Ia faapuupuu au tali. Ia faatumulia lou loto i le alofa ina ia avea lou leo o se tasi o le agalelei.
-
Tuu atu se molimau mama ma faigofie. E le manaomia ona faatomua lau molimau i le faapea atu, “Ou te molimau atu…” Ae, e mafai ona e fai atu mea e pei o le, “Ua faamanuiaina lo‘u olaga ona … ,” “Ua ou lagonaina … ,” po o le “E taua lenei mea ia te a’u ona …”
-
Pe a e le ioeina, filifili e aua le le ioeina. Tumau i le toafimalie ma le faaaloalo ina ia mafai ona e faafaileleina se faigauo ae aua nei fatuina se fili. E mafai ona e faailoa atu e te faaaloalo i le manatu a le isi tagata, ae ia faailoa atu foi atonu lua te le autasi i se autu faapitoa. Manatua o soo se agaga o finauga o le a mafua ai ona alu ese le Agaga Paia (tagai i le 3 Nifae 11:29).
Mafaufau Loloto e Sauniuni ai mo le Vasega
O le a se auala se tasi e mafai ona e faaleleia ai lou tomai e faia ai ni talanoaga faaKeriso e uiga i le faaipoipoga ma le aiga ma isi?