“Lesona 4: Anomea mo Sauniuniga a le Vasega: O Le Aiga e Totonugalemu i le Fuafuaga a le Tama Faalelagi,” Anomea a le Faiaoga O Le Aiga e Faavavau (2022)
“Lesona 4 Anomea mo le Sauniuniga o le Vasega,” Anomea a le Faiaoga O Le Aiga e Faavavau
Lesona 4 Anomea mo Sauniuniga o le Vasega
O Le Aiga e Totonugalemu i le Fuafuaga a le Tama Faalelagi
Ua folafola mai e perofeta ma aposetolo o aso nei faapea “o le aiga o le totonugalemu lea o le fuafuaga a Le Foafoa, mo le taunuuga e faavavau o Lana fanau” (“O Le Aiga: O Se Folafolaga i le Lalolagi,” ChurchofJesusChrist.org). Pe ua e mafaufau ea pe faapefea ona fesootai le aiga i isi poutu autu o le fuafuaga a le Tama Faalelagi, e pei o le Foafoaga, o le Pau o Atamu ma Eva, ma le Togiola a Iesu Keriso? A o e suesue, mafaufau i le uiga e mafai e aoaoga nei ona i ai i au filifiliga ma faamoemoega mo lou lava aiga.
Vaega 1
Na faapefea e le Foafoaga o le lalolagi ma le Pau o Atamu ma Eva ona fesoasoani e faataunuu ai faamoemoega e faavavau a le Tama Faalelagi mo le aiga?
Sa aoao mai Elder Robert D. Hales o le Korama a Aposetolo e Toasefululua:
O le aoaoga faavae autu o le aiga e amata i matua faalelagi. O lo tatou faamoemoega sili ia avea faapei o i laua. (“The Eternal Family,” Ensign, Nov. 1996, 64)
Ina ua fetalai le Atua ia Mose i luga o le mauga, sa Ia faamalamalama atu e faapea, o Lana galuega ma Lona mamalu o le “Ia aumaia le tino ola pea ma le ola faavavau o le tagata” (Mose 1:39). O le ola e faavavau o le nonofo lea faatasi ma le Atua e pei ona Ia soifua ai, o lona uiga o le ola e faavavau o se vaega o se aiga e faavavau. O le meaalofa aupito sili lea e mafai Ona ia faaee mai i o tatou luga (tagai i le Mataupu Faavae ma Feagaiga 14:7).
O le Foafoaga o le lalolagi ma le Pau o Atamu ma Eva o ni vaega taua ia o le fuafuaga a le Tama ia faataunuuina ai nei faamoemoega e faavavau. I le popofou o le talafaasolopito o le Ekalesia, sa tautino mai ai e le Alii le taua o le faaipoipoga ma fanau i le fuafuaga a le Atua mo le lalolagi. Ma i le Tusi a Mamona, sa faamalamalama mai ai e Liae i lona atalii le poto i le Pau o Atamu ma Eva.
Suesue e Sauniuni ai mo le Vasega
Faitau le Mataupu Faavae ma Feagaiga 49:15–17 ma le 2 Nifae 2:22–23, ma vaavaai pe na faapefea e le Foafoaga ma le Pau ona saofaga i le faatulagaga ma le tuputupu ae o aiga e faavavau.
Na aoao mai Peresitene Russell M. Nelson ma Elder Jeffrey R. Holland o le Korama a Aposetolo e Toasefululua:
Po o le a le matagofie e pei ona i ai, o le paneta o le Lalolagi o se vaega o se mea e sili atu ona maoae---lena fuafuaga tele a le Atua. E aoteleina faafaigofie, na foafoaina le lalolagi ina ia i ai aiga. (“O Le Foafoaga,” Liahona,, Me 2000, 85)
O le Pau o se vaega manaomia o le ata paia a le Tama Faalelagi. Ana leai lena, e leai ni fanau faaletino e fananau ia Atamu ma Eva, ma o le a leai se aiga o tagata e lagonaina le tuu faafeagai o mea ma le ola tuputupu a’e, saolotoga lelei, ma le olioli i le toetutu, faaolataga, ma le ola e faavavau. (“O Le Togiola a Iesu Keriso,” Ensign, Mat. 2008, 35)
Mafaufau Loloto i Sauniuniga mo le Vasega
E mafai faapefea e le malamalama i nei faamoemoega maoae o le Foafoaga ma le Pau ona tosina ai au taumafaiga i le fausiaina o lou lava aiga e faavavau?
Vaega 2
E mafai faapefea ona i ai aiga e faavavau ona o le Togiola a Iesu Keriso?
O le Pau o Atamu ma Eva na folasia mai ai i lo tatou lalolagi ia tuutuuga ole agasala ma le oti. Na tuueseese ai i tatou mai le Atua ma mafai ai ona maua le ola e faavavau ma o tatou aiga.
I le Tusi a Mamona, o loo faamatala mai ai e Liae le faatumulia o le olaga o Iakopo laitiiti i puapuaga ma le faanoanoa ona o ona uso (tagai i le 2 Nifae 2:1). Na maliu foi Liae a o laitiiti lava Iakopo. E ui i nei luitau faaleaiga, na maua lava e Iakopo le faamoemoe i lona malamalama i se taulaga i le lumanai o le a faia e Iesu Keriso e fesoasoani ai ia i tatou uma ma o tatou aiga e sosola ese ai mai le oti ma seoli.
Suesue e Sauniuni ai mo le Vasega
Faitau le 2 Nifae 9:6–8, 10, 18, ma mafaufau e faailoga upu a le perofeta o Iakopo ma lagona e uiga i le ala e faatoilalo ai e le Togiola a Iesu Keriso le agasala ma le oti.
Na aoao mai e Peresitene Julie B. Beck, o se na avea ma Peresitene Aoao o le Aualofa, ma Peresitene Henry B. Eyring o le Au Peresitene Sili e uiga i le ala ua faatagaina ai e le Togiola a Iesu Keriso ia aiga ia faavavau.
O le Togiola [a Iesu Keriso] ua mafai ai ona faamau faatasi le aiga e faavavau. Ua mafai ai ona maua e le aiga le tuputupu ae ma atoatoaga e faavavau. O le fuafuaga o le fiafia, ua taua foi o le ata o le faaolataga, o se fuafuaga na foafoaina mo aiga. (“Teaching the Doctrine of the Family,” Ensign, Mat. 2011, 12)
E silafia e lo tatou Tama Faalelagi agaalofa o tatou loto. O Lona faamoemoega ia tuu mai ia i tatou le fiafia (tagai 2 Nifae 2:25). Ma o lea na Ia tuuina mai ai le meaalofa o Lona Alo ina ia mafai ai ona maua le olioli i sootaga faaleaiga lea e faaauau e faavavau. Ona sa motusia e le Faaola filifili o le oti, o le a faapea ona tatou toetutu ai. Ona sa Ia togiolaina a tatou agasala, tatou te mafai ai, e ala i le faatuatua ma le salamo, ona agavaa i le malo selesitila, lea e fusia faatasi ai aiga i le alofa e faavavau. (“The Hope of Eternal Family Love,” Ensign, Auk. 2016, 4)
Tusifaamaumau Ou Manatu
Pe ana faapea na e maua le avanoa e faaali atu ai ou lagona i le Faaola e ugia i Lana matafaioi i le faatagaina o oe ia maua sou aiga e faavavau, mata o le a sau tala e fai atu ia te Ia? Aisea?
Vaega 3
O le a le totonugalemu o i ai le aiga i lau fuafuaga?
I le faamatalaina o le totonugalemu o le aiga i le faavavau, na aoao mai ai Elder L. Tom Perry o le Korama a Aposetolo e Toasefululua:
O le talitonuga atoa o le tatou talalelei toefuataiina ua faatotonugalemu i aiga ma le feagaiga fou ma le faavavau o le faaipoipoga. …
Tatou te talitonu foi o aiga malolosi masani o … iunite faavae o le faavavau ma le malo ma le faigamalo o le Atua.
Tatou te talitonu o le faatulagaga ma le faigamalo o le lagi o le a fausiaina i aiga ma aiga lautele. (“Why Marriage and Family Matter—Everywhere in the World,” Liahona, Me 2015, 41)
Ona o le taua o le aiga i le fuafuaga a le Tama Faalelagi, e mafai ona tatou faamoemoe e tetee Satani ia tatou taumafaiga e fatufatu ma faamalolosia o tatou aiga. O lo tatou malamalama i le fuafuaga a le Tama Faalelagi e mafai ona fesoasoani ia tatou vaai ai e ala i taufaasese a Satani. Na aoao mai Elder Hales:
Ua faailoa e se vaaiga e faavavau a tatou faaiuga i aso taitasi ma faatinoga. Na te faatoaina o tatou mafaufau ma agaga. Pe a taavili faataamilo ia i tatou manatu faatauanau ae faavavau le sese, tatou te tutumau ma le le mafaagaeetia. …
O le faaipoipoga ma le aiga o loo i lalo o le osofaiga aua ua iloa e Satani o mea na e taua i le mauaina o le ola e faavavau—e pei o le taua o le Foafoaga, le Pa‘ū, ma le Togiola ma le Toetu o Iesu Keriso. I le lē faamanuiaina i le faaumatiaina o soo se tasi o na poutu o le fuafuaga, ua saili Satani e faaumatia lo tatou malamalama ma le faatinoga o faaipoipoga ma aiga. (“The Plan of Salvation: A Sacred Treasure of Knowledge to Guide Us,” Ensign, Oct. 2015, 28, 29)
Tusifaamaumau Ou Manatu
E mafai faapefea ona e faatotonugalemuina atili lou aiga i lou olaga? E mafai faapefea ona e valaaulia le mana o le Alii i au taumafaiga e fatufatu pe faamalosia lou lava aiga e faavavau?