“Lesona 6 Anomea mo le Sauniuniga o le Vasega: O Le Faaipoipoga i le va o se Alii ma se Tamaitai ua Faauuina e le Atua,” Anomea a le Faiaoga O Le Aiga e Faavavau (2022)
“Lesona 6 Anomea mo le Sauniuniga o le Vasega,” Anomea a le Faiaoga O Le Aiga e Faavavau
Lesona 6 Anomea mo le Sauniuniga o le Vasega
O Le Faaipoipoga i le va o se Alii ma se Tamaitai ua Faauuina e le Atua
O le folafolaga i le aiga e amata i le tautinoga paia e faapea “o le faaipoipoga i le va o se alii ma se tamaitai ua faauuina e le Atua” (“O Le Aiga: O Se Folafolaga i le Lalolagi,” ChurchofJesusChrist.org.,” ChurchofJesusChrist.org). Pe ua e mafaufau ea pe aisea ua saga aoao mai ai pea e perofeta, aposetolo, ma isi taitai o le Ekalesia lenei mea moni? A o e suesue i lenei lesona, mafaufau pe mafai faapefea e le faaaoga o le faatuatua i le Tama Faalelagi ma Iesu Keriso ona fesoasoani ia te oe i lou aga atu i le faaipoipoga.
Vaega 1
E fesoasoani faapefea ia te au le iloa o le silasila a le Tama Faalelagi i le faaipoipoga, ou te malamalama ai i Lana fuafuaga mo au?
I tausaga talu ai nei, na suia ai le vaaiga i le faaipoipoga i le tele o faalapotopotoga. O a nisi o manatu na e faalogo i ai talu ai nei?
E lei leva ona faatulaga le Ekalesia, ae manao Limani Copley i faifeautalai e folafola atu le talalelei i tagata o lana vaega faalelotu sa auai muamua, o le Au Sieka. Sa teena e le au Sieka le faaipoipoga, ae sa talitonu i le ola i se olaga e le faia ni toalua. Sa fesili le Perofeta o Iosefa Samita i le Alii e uiga i lenei mea ma isi talitonuga ma sa maua mai ai se faaaliga.
Suesue e Sauniuni ai mo le Vasega
Faitau le Mataupu Faavae ma Feagaiga 49:15--16, ma vaavaai mo le mea na tautino mai e le Alii e uiga i le faaipoipoga.
E pei ona faaaoga i le fuaiupu 15, faauuina o lona uiga ia faatonuina, faavae, pe tofia e ala i le mana o le pule maualuga (tagai i le Merriam-Webster.com Dictionary, “faauu”; mafaufau e tusi se faamanatu o lenei faauigaga i totonu o au tusitusiga paia). Sa faamamafa mai e Elder D. Todd Christofferson o le Korama a Aposetolo e Toasefululua, le taua o le faaipoipoga i le va o se alii ma se tamaitai ina ua ia aoao mai:
O se aiga e fausia i luga o le faaipoipoga a se alii ma se tamaitai e maua ai se faatulagaga sili mo le fuafuaga a le Atua ia lauusiusi—o le faatulagaga mo le fanauina o fanau, o e o mai i le mama a’ia’i ma le taumamaina mai le Atua, ma le siosiomaga mo le aoaoina ma sauniuniga o le a latou moomia mo se olaga manuia faaletino, ma se olaga e faavavau i le lalolagi a sau.
… O le [Atua] na foafoaina i le amataga ia Atamu ma Eva i Lona faatusa, o le tane ma le fafine, ma tuufaatasia i la’ua o se tane ma se ava. … E tofu tauaveina e tagata taitasi le faatusa paia, ae o totonu o le tuufaatasiga faalefaaipoipoga o le tane ma le fafine e avea ma tino e tasi, tatou te maua ai le uiga aupito sili ona atoa o le foafoaina o i tatou i le faatusa o le Atua—o le tane ma le fafine. E leai se tasi o i tatou po o se isi lava e mafai ona fetuuna’ia lenei faatulagaga paia o le faaipoipoga. E le o se mea na faia e le tagata lava ia. O lea faaipoipoga ua tonu ia “mai lugā, mai le Atua” [tagai i le Dietrich Bonhoeffer, O Tusi ma Pepa mai le Falepuipui, ed. Eberhard Bethge (1953), 42–43] ma ua faapea foi ona avea ma se vaega o le fuafuaga o le fiafia e pei foi o le Pau ma le Togiola. (“Aisea e Faaipoipo ai, Aisea e Fai ai se Aiga?,” Liahona, Me 2015, 52.)
O le faaipoipoga e tusa ai ma le tulafono a le Atua, o le sootaga sili lea ona paia e mafai ona i ai i le va o se alii ma se tamaitai. Sa faamalamalama mai e Peresitene Howard W. Hunter:
E le atoa le tane e aunoa ma le fafine. E le mafai foi e se tasi ona faaatoa le mea na foafoaina ai o ia e aunoa ma le isi [tagai 1 Korinito. 11:11; Mose 3:18]. O le faaipoipoga i le va o se alii ma se tamaitai ua faauuina e le Atua [tagai i le Mataupu Faavae ma Feagaiga 49:15--17]. E na o le feagaiga fou e faavavau o le faaipoipoga e mafai ai ona latou iloa le atoaga o faamanuiaga e faavavau [tagai Mataupu Faavae ma Feagaiga 131:1–4; Mataupu Faavae ma Feagaiga 132:15–19]. (“Avea ma Tane ma Tama Amiotonu,” Ensign, Nov. 1994, 49)
O tagata o e ulu atu i le feagaiga fou ma le faavavau o le faaipoipoga e mafai ona maua le tikeri aupito i maualuga o le mamalu i le malo selesitila (tagai Mataupu Faavae ma Feagaiga 131:1–4). O i tatou te “iloa ai le atoaga o faamanuiaga e faavavau,” ua iloa foi o le faaeaga po o le ola e faavavau. (O le a e aoao atili e uiga i le feagaiga fou ma le faavavau o le faaipoipoga i le lesona 10.)
Toe mafaufau i mea sa e aoaoina i lesona ua mavae e uiga i le natura o le ola e faavavau. Sa aoao mai Elder Robert D. Hales o le Korama a Aposetolo e Toasefululua:
O le fuafuaga a le Tama ua tatou maua ai le auala e mautofi ai i le ola e faavavau, o le olaga ua taitaia e o tatou matua faalelagi. I le fuafuaga,“e leai se tane pe a le o i ai le fafine, e leai foi se fafine pe a le o i ai le tane, i le Alii” [1 Korinito 11:11]. O le aano moni o le ola faavavau e aofia ai le faaipoipoga e faavavau o le alii ma le tamaitai, o se vaega e tatau ai o le avea e faapei o o tatou matua faalelagi. (“O Le Fuafuaga o le Faaolataga: O Se Oa Paia o le Malamalama e Taialaina i Tatou,” Ensign,Oke. 2015, 29)
Mafaufau Loloto i Sauniuniga mo le Vasega
O le a faapefea ona e faamatalaina le mafuaaga e faauuina ai le faaipoipoga i le va o se alii ma se tamaitai ma tatau ai i Lana fuafuaga e faavavau?
Vaega 2
E faapefea pe a ou le faaipoipo i lenei olaga pe ua faamuta foi la’u faipoipoga?
Ona o tulaga eseese, e le faaipoipo ai lava nisi tagata i lenei olaga tusa lava pe o a o latou manaoga amiotonu. O nisi e faaipoipo, e faamuta a latou faaipoipoga i le tete’a. Sa saunoa Peresitene Dallin H. Oaks o le Au Peresitene Sili e uiga i nei tulaga ina ua ia aoao mai:
E i ai nisi ua faafofoga mai i lenei savali ua faapea ane, “Ae a la a’u?” Ua matou iloa e toatele uso ma tuafafine lelei ma agavaa o le Au Paia o Aso e Gata Ai ua latou le maua i le taimi nei avanoa lelei ma mea taua o loo manaomia mo lo latou alualu i luma. O le nofotoatasi, lē fanau, maliu, ma le tete’a ma le toalua ua le taulau ai faamoemoega ma tolopo ai le faataunuuga o faamanuiaga folafolaina. … Ae o nei toatuga e le tumau. Ua folafola mai e le Alii e faapea i le faavavau, e leai se faamanuiaga o le a teena mai i ona atalii ma afafine o e latou te tausia poloaiga, ma faamaoni i a latou feagaiga, ma mananao i mea e sa’o. (“O Le Fuafuaga Sili o le Fiafia,” Ensign, Nov. 1993, 75)
E ui o nisi faamanuiaga e faavavau atonu e le maua atoatoa i lenei olaga, ae le o taofia ai le fiafia ma le faataunuuina mo i latou o e le o faaipoipo. (O le a talanoaina atili lenei autu i se isi lesona mulimuli.) E mafai ona oo tagata uma i le olioli tumau ma le tuputupu a’e anoa ma faia saofaga anoa i le taimi nei o ni e auai atoatoa i le faatinoga o le fuafuaga ma le malo o le Atua.
Mafaufau Loloto i Sauniuniga mo le Vasega
O le a se mea o le a e faasoa atu ia i latou ua manatu faapea ua latou le maua avanoa mo le fiafia ma le ola e faavavau ona latou te lei faaipoipo?
Vaega 3
E mafai faapefea e le faaaogaina o le faatuatua i le Tama Faalelagi ma Iesu Keriso ona fesoasoani ia te au e faatoilalo le fefe ma ou maua le olioli i le faaipoipoga?
Mafaufau i fesili po o atugaluga o ia te oe po o i latou o loo siomia ai oe e uiga i le faaipoipo. Na saunoa Elder Quentin L. Cook o le Korama a Aposetolo e Toasefululua i se tasi o mafuaaga e ala ai ona faatuatuai taumafaiga a nisi tagata e faaipoipo:
O nisi e tolopo le faaipoipoga seia maea le a’oga ma maua se galuega. E ui e taliaina lenei mea i le lalolagi atoa, ae o lenei mafaufauga e le o faaalia ai le faatuatua, e le ogatusa ma le fautuaga a perofeta o aso nei, ma e le tutusa foi ma le aoaoga faavae atoa. (“Filifili ma le Poto,” Liahona, Nov. 2014, 47)
O le fili e tele ina faatuputeleina le fefe, mafuaaga faalesoifuaga nei, po o faalavefau e mafai ai ona taofia tagata mai le tulimatai o se faaipoipoga. E feagai nisi tagata ma le fefe a o le’i faaipoipo pe i le taimi o le faaipoipoga ona ua latou molimauina luitau e oo mai le tatalaina o faaipoipoga. (I lesona o i luma, o le a e aoao ai i mataupu faavae e mafai ona fesoasoani ia te oe e faamalosi ai lau faaipoipoga ma puipuia ai mai le tatalaina.)
O le a se mea e mafai ona fesoasoani ia te oe e te agaigai atu ai i le faaipoipoga ma le mautinoa?
Suesue e Sauniuni ai mo le Vasega
Faitau le Faataoto 3:5–6; 2 Timoteo 1:7; ma le Mataupu Faavae ma Feagaiga 6:36. Mafaufau pe mafai faapefea ona faaaoga nei aoaoga i le ala e te agai atu ai i le faaipoipoga?
Sa aoao mai e Peresitene Jean B. Bingham, Peresitene Aoao o le Aualofa:
O nisi taimi tatou te fefefe ai e talitonuina ona tatou te le malamalama i le alofa atoatoa o le Atua ma le naunautaiga e fesoasoani ia i tatou. Ae a tatou suesue i le fuafuaga a le Tama Faalelagi ma le misiona a Iesu Keriso, ona tatou malamalama lea na pau lo La’ua faamoemoega o lo tatou fiafia e faavavau ma le alualu i luma [tagai Mose 1:39]. (“Ina Ia Atoa Lo Outou Olioli,” Liahona, Nov. 2017, 86)
Pe a faaipoipo tagata taitasi ma a faaauau o ni taitoalua e faaaoga le faatuatua, o le a faaauau e le Tama Faalelagi ma Iesu Keriso ona taiala ma faamanuia i latou. Na aoao mai Elder Hugh W. Pinnock a o avea o se uso o Fitugafulu, “Sa matuai aofia ai le Atua i le faaipoipoga a [Atamu ma Eva], ma e faapena foi ona matuai popole ma e tatau foi ona aofia ai i faaipoipoga ua i ona po nei” (“Making a Marriage Work,” Ensign, Sept. 1981, 37). E finagalo le Tama Faalelagi ma Iesu Keriso e fesoasoani ia te oe ia e manuia i le fauina o se faaipoipoga e faavavau.
Tusifaamaumau Ou Manatu
Na matauina e Peresitene Bonnie H. Cordon, Peresitene Aoao o Tamaitai Talavou, “E tatau ona tatou fesili ifo taitoatasi: E faapefea ona ou tumau i le ogatotonu ma aua le faalagolago i lo’u lava atamai? E faapefea ona ou iloa ma mulimuli i le siufofoga o le Faaola pe afai ua matua malolosi lava leo o le lalolagi? E faapefea ona ou atinaeina le faalagolago i le Faaola? (“Ia Faatuatua i le Alii a e Aua le Faalagolago,” Liahona, Me 2017, 6). Tusifaamaumau ou manatu e uiga i fesili a Peresitene Cordon e pei ona fesootai ma le faaipoipoga. Ia mafaufau foi pe i ai se isi mea o taofiofia ai oe mai le tulimatai atu (pe tulimatai atili ma le atoatoa) i se faaipoipoga e faavavau.