Ko te Pukapuka Tuatahi a Nīwhai
Tana Whakahaere me Tana Minitatanga
He tuhinga mō Rīhai me tana wahine Harāia, me āna tamariki tāne tokowhā, e huaina ana, (e tīmata ana i te mātāmua), ko Rāmana, ko Remuere, ko Hāmi rātou ko Nīwhai. Ka whakatūpato te Ariki i a Rīhai kia wehe atu ai i te whenua o Hiruharama, nō te mea i te poropiti ia ki te iwi mō ā rātou mahi haututū kātahi ka whai ratou ki te muru i tōna oranga. Ka toru rā tana haerenga i te koraha rātou ko tana hapū. Ka mau a Nīwhai ki ōna tuākana ka hoki atu ki te whenua o Hiruharama e hopu ai i te tuhinga o ngā Hūrai. Ko te tuhinga o ō rātou mamaetanga. Ka moea e rātou ngā tamāhine a Ihimaera hei hoawahine. Ka mau rātou ki ō rātou whānau, ā, ka wehe atu ki te koraha. Ko ō rātou mamaetanga me ngā pōuritanga i roto i te koraha. Te ritenga atu o tō rātou huarahi. Ka tae rātou ki ngā wai nunui. Ka haututū ngā tuākana o Nīwhai ki a ia. Ka whakapōauau ia i a rātou, ā, ka hangaia he kaipuke. Ka whakahua rātou i te wāhi ko Mōmona. Ka whakawhiti atu rātou i ngā wai nunui ki roto i te whenua i whakaaria, ā, haere ake. E ai tēnei ki te kōrero a Nīwhai; me kī kē rānei, nāku, nā Nīwhai, tēnei tuhinga i tuhi.
Upoko 1
Ka tīmata a Nīwhai i tana tuhinga mō tana iwi—Ka kite ā-whakakitenga a Rīhai i tētahi pou ahi, ā, ka pānui mai i tētahi pukapuka poropititanga—Ka whakamoemitihia te Atua, ka matakite ia mō te haerenga mai o te Mīhaia, ā, ka poropititia te whakangaromanga o Hiruharama—Ka whakahāweatia e ngā Hūrai. Takiwā 600 M.K.
1 Ko ahau, ko Nīwhai, kua whānau mai i ngā mātua pai, nō reira ahau i āhua ākona ai ki tētahi wāhi o te mātauranga o tōku matua; ā, kua kite anō ahau i ngā pōuritanga maha i roto i ōku rā katoa—hei aha koa, kua atawhaitia nuitia ahau e te Ariki i ōku rā katoa; āe rā, i a au hoki he mātauranga nui o te painga me ngā mea ngaro o te Atua, nō reira ahau e hanga nei i tētahi tuhinga mō aku mahi i ōku rā.
2 Āe rā, e hanga nei ahau i tētahi tuhinga i te reo o tōku matua, koia rā ia nō te mātauranga o ngā Hūrai me te reo o ngā Ihipiana.
3 Ā, e mōhio ana ahau he pono te tuhinga e hanga nei ahau; ā, e hanga nei ahau ki tōku ringaringa ake; ā, e hanga nei ahau i a ia e ai ki tōku mātauranga.
4 Nā, i pahawa ake i te tīmatanga o te tau tuatahi o te whakahaeretanga a Herekia, kīngi o Hura, (tōku matua, a Rīhai, kua noho i Hiruharama i ōna rā katoa); ā, i taua tau anō i haere mai ai ngā poropiti tokomaha, e poropititia ana ki te iwi me rīpeneta rātou, ka whakangaromia ai rānei te pā nui o Hiruharama.
5 Nā reira, i pahawa ake i tōku matua, a Rīhai, i a ia e haere atu ana ka inoi ki te Ariki, āe rā, kua whakapaua katoatia e ia tōna ngākau, mō tōna iwi.
6 Ā, i pahawa ake i a ia e inoi ana ki te Ariki, ka puta mai tētahi pou ahi, ā, ka tau ki tētahi toka i mua i tōna aroaro; ā, nā te nui o ngā mea i kite ai ia, i rongo ai ia, tūoioi ana, ngāueue rawa ana ia.
7 Ā, i pahawa ake tana hokinga atu ki tōna ake whare i Hiruharama; ā, ka ruke atu i a ia anō ki runga ki tōna moenga, i te mea kua warea nā te Wairua me ngā mea i kitea ai e ia.
8 Ā, i te mea kua warea nā te Wairua, i kahakina atu ia i roto i tētahi whakakitenga, tae atu ana ki tana kite atu i te puaretanga o ngā rangi, ā, ka mahara ia i kite ai ia i te Atua e noho ana i runga i tōna torona, e karapotia ana e ngā mano tini o ngā anahera e noho waiata ana, e whakamoemiti ana ki tō rātou Atua.
9 Ā, i pahawa ake tana kite atu i Tētahi e heke iho ana i te pito o te rangi, ā, ka kite atu ia i tōna kānapatanga i kō atu i tō te poutūmārōtanga o te rā.
10 Ā, ka kite anō ia i tētahi hunga tekau mā rua e whai ana i a ia, ā, he nui noa atu ō rātou pīatatanga i ō ngā whetū i te kikorangi.
11 Ā, ka heke iho rātou, ka haere atu i runga i te mata o te whenua; ā, ka tae mai te tuatahi, ka tū ki te aroaro o tōku matua, ā, ka hoatu ki a ia he pukapuka, kātahi ka tonoa ia kia pānui ai ia.
12 Ā, i pahawa ake i a ia e pānui ana, ka whakakīa ia ki te Wairua o te Atua.
13 Ā, ka pānui ia, e mea ana: Auē, auē te mate mō Hiruharama, kua kite ai au i ō whakarihariha! Āe rā, he maha ngā mea i pānui ai tōku matua e pā ana ki a Hiruharama—ka whakangaromia ia, me ōna tāngata anō; he tokomaha e mate ai i te hoari, he tokomaha anō hoki e kawea hereheretia atu ai ki Papurona.
14 Ā, i pahawa ake i te pānuitanga a tōku matua me tana kitenga i ngā mea nui whakamīharo maha, he nui tāna i whakahua ai ki te Ariki; ka pēnei: Anō te nui me te whakamīharo o āu mahi, e te Ariki te Atua Kaha Rawa! Ko tō torona kei ngā rangi ikeike, me tō kaha, me tō painga, me tō aroha nui kei runga i ngā tangata katoa o te whenua; ā, nō te mea e aroha nui nei koe, kua kore koe e tuku i te hunga e haere mai ana ki a koe kia mate ai!
15 Ā, i pēnei rawa te āhua o te reo o tōku matua i te whakamoemititanga ki tōna Atua; nō te mea i hari tōna wairua, ā, i whakakīa tōna ngākau katoa, nā ngā mea i kite ai ia, āe rā, koia anō ngā mea i whakakitea ai e te Ariki ki a ia.
16 Ā, ko au ianei, ko Nīwhai, e kore e hanga nei i tētahi tuhinga whānui o ngā mea i kitea ai, i tuhia ai e tōku matua, nō te mea he maha ngā mea i tuhia ai e ia mō ōna whakakitenga me ōna moemoeā; ā, he maha anō āna i tuhia ai kua poropititia, kua kōrerotia anōtia e ia ki ana tamariki, koirā e kore au e hanga nei i tētahi tuhinga whānui.
17 Engari ka hanga nei ahau i tētahi tuhinga mō aku mahi i ōku rā. Nana, ka hanga nei ahau i tētahi whakarāpopototanga o te tuhinga a tōku matua, i runga i ngā papa kua hangaia nei e ōku ringaringa ake; nā reira, hei muri i taku whakarāpopototanga i te tuhinga a tōku matua ka hanga nei ahau i tētahi tuhinga mō tōku ake oranga.
18 Nō reira, e hiahia ana au kia mōhio ai koutou, nā, i muri i te whakakitenga mai a te Ariki i ngā mea whakamīharo maha ki tōku matua, a Rīhai, āe rā, e pā ana ki te whakangaromanga o Hiruharama, nana, i haere atu ia ki waenganui i te iwi, kātahi ka tīmata ia ki te poropiti me te kauhau ki a rātou e pā ana ki ngā mea i kite ai, i rongo ai ia.
19 Ā, i pahawa ake, i whakatoi ai ngā Hūrai i a ia nā ngā mea i whakaatu ai ia mō rātou; nā te mea i tino whakaatuhia e ia ō rātou hara me ō rātou whakarihariha; ā, i whakaatuhia anōtia e ia ko ngā mea i kite ai, i rongo ai, me ngā mea anō i pānui ai i te pukapuka, i whakapuakina māramatia nei mō te haerenga mai o tētahi Mīhaia, me te hokonga anō hoki o te ao.
20 Ā, rongo ana ngā Hūrai i ēnei mea ka riri ki a ia; āe rā, he pērā rawa ki tā rātou ki ngā poropiti onamata, i peia atu e rātou, i ākina hoki ki te kōhatu, i patua hoki; ā, ka whai atu anō i tōna oranga, e murua atu ai ia. Engari nana, ko au, ko Nīwhai, ka whakaatu atu ki a koutou ko te aroha nunui o te Ariki kei runga katoa i ngā tāngata kua whiriwhiria e ia, nā ō rātou whakapono, hei whakakaha i a rātou tae atu ana ki te mana o te whakarauoranga.