1 Ā, i pahawa ake, i muri iho i tā mātou taenga iho ki te koraha ki tō mātou matua, nana, ka kī ia i te hari, me tōku whaea anō hoki, a Haraia, i tino harikoa, nā te mea i nui tana tangi mō mātou.

2 Nā te mea i whakapono ia kua mate mātou i te koraha; ā, i kaha amuamu anō ia ki tōku matua, e mea ana ki a ia he tangata matakite ia; e kī ana: Nana, nāu mātou i arataki mai i tō mātou whenua tuku iho, ā, kua kore ianei aku tama, ā, kei te mate haere mātou i te koraha.

3 Ā, koinei te āhua o te reo i amuamu ai tōku whaea ki tōku matua.

4 Ā, i pahawa ake, i kōrero tōku matua ki a ia, e kī ana: E mōhio nei ahau he tangata matakite ahau; nā te mea mehemea kīhai au i kite atu i ngā mea o te Atua i tētahi whakakitenga kua kore au e mōhio ki ngā painga a te Atua, engari kua noho tonu i Hiruharama, ā, kua mate tahi me aku huānga.

5 Engari nana, kua whiwhi au i tētahi whenua whakaari, koia anō ngā mea e koa nei ahau; āe rā, e mōhio ana ahau mā te Ariki anō aku tama e whakaputa mai i ngā ringaringa o Rāpana, ā, ka mauria iho mai anō rātou ki a tāua i te koraha.

6 Ā, koinei te āhua o te reo nā tōku matua, a Rīhai, i whakamārire ai i tōku whaea, a Haraia, e pā ana ki a mātou, i a mātou e haere ake ana i te koraha ki te whenua o Hiruharama, kia hopu ai i te tuhinga o ngā Hūrai.

7 Ā, i tō mātou hokinga ki te tēneti o tōku matua, nana, kua kī tonu tō rāua koa, ā, kua whakamāriretia tōku whaea.

8 Ā, ka mea mai ia, e kī ana: Nā, e mōhio pū ana ahau kua whakahau te Ariki i taku hoatāne kia tahuti atu ki roto i te koraha; āe rā, e mōhio pū ana anō ahau kua tiaki te Ariki i aku tama, ā, kua whakaputaia rātou i ngā ringaringa o Rāpana, ā, kua hoatu ki a rātou he mana mā konei rā i taea ai te tutuki i tēnei mea kua whakahaua rātou e te Ariki. Ā, koinei te āhua o te reo i kōrero ai ia.

9 Ā, i pahawa ake, i hari rawa rāua, ā, ka tuku whakahere me ngā whakaherenga tahu ki te Ariki; ā, ka tuku whakamoemiti rāua ki te Atua o Iharaira.

10 Ā, whai muri iho i tā rāua tuku whakamoemiti ki te Atua o Iharaira, ko tōku matua, ko Rīhai, ka haria atu ngā tuhinga kua whaowhaoa ki runga i ngā papa parāhe, ā, ka rangahaua e ia mai i te tīmatatanga.

11 Ā, ka kite ia i reira ngā pukapuka e rima a Mohi, i tuku kōrero ia mō te hanganga o te ao, me Arama rāua ko Iwi anō hoki, ko rāua ō tātou mātua tuatahi;

12 Ā, he tuhinga anō mō ngā Hūrai mai i te tīmatanga, tae iho ana ki te tīmatanga o te whakahaeretanga a Herekia, kīngi o Hura.

13 Ā, ko ngā poropititanga anō a ngā poropiti tapu, mai i te tīmatanga, tae iho ana ki te tīmatanga o te whakahaeretanga a Herekia; me ngā poropiti maha kua kōrerohia e te māngai o Heremaia.

14 Ā, i pahawa ake i tōku matua, a Rīhai, ka kimi anō i runga i ngā papa parāhe he whakapapa o ōna mātua; nā reira ia i mōhio ai he uri ia nō Hōhepa; āe rā, ko taua Hōhepa pū anō koia te tama a Hākopa, kua hokona atu ki roto o Ihipa, ā, kua whakarauorahia e te ringa o te Atua, me kore pea ia e whakarauora i tōna matua, a Hākopa, me tōna whare katoa kei mate i te hemokaitanga.

15 Ā, kua ārahina anōtia rātou ki waho atu i te hereheretanga ki tua atu i te whenua o Ihipa, e taua Atua pū anō nāna rātou i whakarauora.

16 Ā, nā konā tōku matua, a Rīhai, i kimi i te whakapapa o ōna tīpuna. Ā, ko Rāpana anō tētahi uri nō Hōhepa, nā reira ia me ōna tīpuna i tuhituhi ai i ngā tuhinga.

17 Ā, i te kitenga a tōku matua i ēnei mea katoa, ka kī ia i te Wairua, ā, ka tīmata ki te poropiti mō ōna uri—

18 Ka kawea whānuitia atu ēnei papa ki ngā iwi katoa, ki ngā hapū, ki ngā reo, ki ngā tāngata anō he uri nōna.

19 Nā reira, i kī ai ia kua kore rawa ēnei papa parāhe e memeha; e kore rānei e pōuriuri i te huringa o te wā. Ā, i poropititia e ia ngā mea maha mō ōna uri.

20 Ā, i pahawa ake, i tau ki tēnei wā mohoa kua puritia e māua ko tōku matua ngā whakahaunga i whakahaua ai māua e te Ariki.

21 Ā, kua hopungia e mātou ngā tuhinga kua whakahaua mātou e te Ariki, ā, kua rangahaua ērā me te kite atu he mea e hiahiatia ana; āe rā, he mea utu nui kē ki a mātou, nā konā ka āhei mātou ki te tiaki i ngā whakahaunga a te Ariki mō ā mātou tamariki.

22 Nā reira, he whaimōhiotanga ia i roto i te Ariki kia kawe ai mātou i ērā me mātou, i a mātou e haere ana i te koraha whaka-te-whenua whakaari.