1 Ā, koinei mea katoa i kite ai tōku matua, i rongo ai, i kōrero ai, i a ia e noho tēneti ana, i te raorao o Remuere, ā, he maha rawa anō ngā mea hoki, kāore e taea te tuhituhi i runga i ēnei papa.

2 Ā ināianei, i te mea kua kōrero ahau e pā ana ki ēnei papa, nana, ehara ēnei i ngā papa ka tuhia te roanga atu o ngā hītori mō tōku iwi; nā te mea ko ngā papa ka tuhia e ahau te roanga atu o ngā kōrero mō tōku iwi kua huaina e au ki te ingoa o Nīwhai; nā reira, e karangahia ana ko ngā papa a Nīwhai, whai muri ana i tōku ake ingoa; ā, koinei papa anō kua karangahia ko ngā papa a Nīwhai.

3 Hei aha koa, kua riro mai i ahau he whakahaunga nā te Ariki kia hangaia ai ēnei papa, mō tētahi take motuhake kia whaowhaoa ai tētahi tuhinga mō te minitatanga a tōku iwi.

4 Me whaowhao i runga i ērā atu papa ko ngā tuhinga mō ngā whakahaeretanga a ngā kīngi, ā, ko ngā pakanga me ngā tautohetohenga o tōku iwi; nā reira ko te wāhi nui o ēnei papa ko te minitatanga; ā, ko te wāhi nui o ērā atu papa ko te whakahaeretanga a ngā kīngi me ngā pakanga, me ngā tautohetohenga o tōku iwi.

5 Nā reira, kua whakahau te Ariki i ahau kia hangaia ai ēnei papa mō tētahi take motuhake i roto i a ia, ko taua take kāore au e mōhio ana.

6 Engari e mōhio ana te Ariki i ngā mea katoa mai i te tīmatanga; nā reira, ka whakaritea e ia he huarahi kia whakatutuki ai i āna mahi katoa i waenganui i ngā tamariki a te tangata; nana rā, i a ia te mana katoa tae atu ana ki te whakatutukitanga i āna kupu katoa. Ā, koia anō tēnei. Āmine.