1 Ā, i pahawa ake, i muri iho i tōku, tō Nīwhai, kawenga atu i roto i te Wairua, me te kitenga atu i ēnei mea katoa, ka hoki atu ahau ki te tēneti o taku matua.

2 Ā, i pahawa ake, i kite ahau i ōku tuākana, ā, i te tautohetohe tētahi ki tētahi e pā ana ki ngā mea i kōrero ai tōku matua ki a rātou.

3 Nā te mea i tino kōrero ia i ngā mea nui maha ki a rātou, e uaua nei kia mārama ai, hāunga te tangata e uiui ake ki te Ariki; ā, i te pakeke rātou i ō rātou ngākau, nō reira kāore rātou i titiro atu ki te Ariki e ai ki te mea tika mā rātou.

4 Ā ināianei au, a Nīwhai, i te pōuri nā te pakeketanga o ō rātou ngākau, ā waihoki, nā ngā mea i kite ai ahau, me te mōhio ka tino pahawa rawa atu nei ēnā mea nā te whakarihariha nui o ngā tamariki a te tangata.

5 Ā, i pahawa ake, i warea ahau nā ōku mamae, nā te mea i whakaaro ahau he tino nui kē ake ōku mamaetanga i te katoa, nā te whakangaromanga o tōku iwi, nā te mea i kite ahau i tō rātou hinganga.

6 Ā, i pahawa ake, i muri iho i taku whiwhinga kaha ka kōrero ahau ki ōku tuākana, e hiahia ana kia mōhio ai i a rātou te pūtake o ā rātou tautohetohenga.

7 Ā, ka kī mai rātou: Nana, kāore mātou i te mārama ki ngā kupu kua kōrerotia nei e tō tātou matua e pā ana ki ngā manga tupu o te rākau ōriwa, ā, e pā ana anō hoki ki ngā Tauiwi.

8 Ā, ka kī atu ahau ki a rātou: Kua uiui ake rānei koutou ki te Ariki?

9 Ā, ka kī mai rātou ki ahau: Kīhai mātou; nā te mea kāore te Ariki e whakamōhiotia mai tētahi mea pēnei ki a mātou.

10 Nana, ka kī atu ahau ki a rātou: E pēhea nei koutou e kore ai e pupuri ki ngā whakahaunga a te Ariki? Me pēhea rā koutou e mate ai, nā te pakeketanga o ō koutou ngākau?

11 E mahara ana rānei koutou i ngā mea kua kōrerotia e te Ariki?—Ki te kore koutou e whakapakeke i ō koutou ngākau, me te uiui mai i te whakapono, e whakapono ana ka whiwhi koutou, me te ū anō ki te pupuri i aku whakahaunga, kāore e kore ka whakamōhiotia atu ēnei mea ki a koutou.

12 Nana, ka kī atu ahau ki a koutou, nā, kua whakatauritetia te whare o Iharaira ki te rākau ōriwa, nā runga i te Wairua o te Ariki i roto nei i tō tātou matua; ā nana kāore rānei i whatia atu tātou i te whare o Iharaira, ā, kāore rānei tātou i tētahi manga o te whare o Iharaira?

13 Ā ināianei, ko te mea e whakaaro nei tō tātou matua e pā ana ki te whakahonotanga mai o ngā manga tupu mā roto i te rāneatanga a ngā Tauiwi, ko tēnei, nā, hei ngā rā o muri, ina memeha haere ō tātou uri i te whakapono kore, āe rā, mō te wā o ngā tau maha, me ngā whakatipuranga maha i muri iho i tā te Mīhaia whakakitenga atu ā-tīnana ki ngā tamariki a te tangata, hei reira haere mai ai te rāneatanga o te rongopai a te Mīhaia ki ngā Tauiwi, ā, mai i ngā Tauiwi ki ngā mōrehu o ō tātou uri—

14 Ā, hei taua rā anō e mōhio ai ngā mōrehu o ō tātou uri nō te whare o Iharaira rātou, ā, ko rātou anō te iwi kawenata a te Ariki; kātahi rātou ka mōhio, ā, ka tae rātou ki te mātauranga o ō rātou mātua tīpuna, me te mātauranga anō o te rongopai o tō rātou Kaihoko, koia i minitatia ki ō rātou mātua tīpuna e ia; nā reira, ka tae rātou ki te mātauranga o tō rātou Kaihoko me ngā tino wāhanga o tana whakaakoranga, nā, kia mōhio ai rātou me pēhea e haere ai ki a ia, ā, kia whakaorangia ai.

15 Ā, hei reira i taua rā ka kore rānei rātou e hari me te tuku whakamoemiti atu ki tō rātou Atua ora tonu, tō rātou toka me tō rātou whakaoranga? Āe rā, hei taua rā, ka kore rānei rātou e whiwhi kaha me te oranga mai i te aka pono? Āe rā, ka kore rānei rātou e haere mai ki te kāhui tūturu o te Atua?

16 Nana, ko tāku e mea atu nei ki a koutou, Āe rā; ka mahara anō rātou i waenganui i te whare o Iharaira; ka whakahonoa mai rātou, ko ia he manga tupu nō te rākau ōriwa, ki roto ki te rākau ōriwa tūturu.

17 Ā, koinei te whakaaro o tō tātou matua; ā, e whakaaro ana ia ka kore e pahawa ake kia whakamararatia rā anō ai rātou e ngā Tauiwi; ā, e whakaaro ana ia ka puta mai mā ngā Tauiwi, kia whakaatu atu ai te Ariki i tōna mana ki ngā Tauiwi, nā te take pū anō ka whakaparahakongia ia e ngā Hūrai, e te whare o Iharaira rānei.

18 Nā reira, kāore i kōrero tō tātou matua mō ō tātou uri anake, engari mō te katoa hoki o te whare o Iharaira, e aro ana ki te kawenata e whakatutukihia ai i ngā rā o muri; koia te kawenata i mahi ai te Ariki ki tō tātou matua a Aperahama, e mea ana: Mā ō uri ngā hapū katoa o te ao e manaakitia ai.

19 Ā, i pahawa ake, nāku, nā Nīwhai, i kaha kōrero ki a rātou e pā ana ki ēnei mea; āe rā, i kōrero atu ahau ki a rātou e pā ana ki te whakahounga o ngā Hūrai i ngā rā o muri.

20 Ā, i whakahua au ki a rātou i ngā kupu a Ihāia, nāna i kōrero e pā ana ki te whakahounga o ngā Hūrai, o te whare o Iharaira rānei; ā, i muri iho i tō rātou whakahounga kua kore tonu e whakapōauautia, kua kore rānei e whakamararatia anōtia. Ā, i pahawa ake, i kōrero ai ahau i ngā kupu maha ki ōku tuākana, nā, ka whakamārietia rātou, ā, ka whakaiti i a rātou anō ki te aroaro o te Ariki.

21 Ā, i pahawa ake, i kōrero mai anō rātou ki ahau, e mea ana: He aha te tikanga o tēnei mea i kite ai tō tātou matua i roto i tētahi moemoeā? He aha te tikanga o te rākau i kite ai ia?

22 Ā, ka kī atu ahau ki a rātou: He tohu ia mō te rākau o te ora.

23 Ā, ka kī mai rātou ki ahau: He aha te tikanga o te tokotoko rino i kite ai tō tātou matua, nā, i ārahina atu ai ki te rākau?

24 Ā, ka kī atu au ki a rātou ko ia te kupu a te Atua; ā, ko ia e whakarongo ai ki te kupu a te Atua, me te ū ki te pupuri ki a ia, kua kore rawa e mate; kua kore rānei e taea e ngā whakawainga me ngā pere muramura a te hoariri ki te whakamatapō i a rātou, ki te ārahi atu i a rātou ki te whakangaromanga.

25 Nā reira, nāku, nā Nīwhai, i akiaki ki a rātou kia āta aro atu ki te kupu a te Ariki; āe rā, nāku i whakahau ki a rātou i runga i ngā kaha katoa o tōku wairua, me ngā atamai katoa i ahau, kia āta aro atu ai rātou ki te kupu a te Atua me te mahara ki te pupuri i āna whakahaunga i ngā wā katoa i roto i ngā mea katoa.

26 Ā, ka kī mai rātou ki ahau: He aha te tikanga o te awa i kite ai tō tātou matua?

27 Ā, ka kī atu ahau ki a rātou ko te wai i kite ai tōku matua ko te pokenga; ā, anō te horomitanga ake o tana hinengaro i ētahi atu mea kīhai ia i kite atu i te pokenga o te wai.

28 Ā, ka kī atu ahau ki a rātou he tawhā whakamataku ia, koia i whakawehe nei i te hunga kino mai i te rākau o te ora, me te hunga tapu o te Atua anō hoki.

29 Ā, ka kī atu ahau ki a rātou he tohu ia mō taua ao rēwera whakamataku, koia i kī mai ai te anahera ki ahau i whakaritea mō te hunga kino.

30 Ā, ka kī atu ahau ki a rātou i kite anō tō tātou matua ko te tika o te Atua anō i whakawehe i te hunga kino mai i te hunga tika; ā, ko te kānapatanga o reira e rite nei ki te kānapatanga o tētahi ahi muramura, e kake ake ana ki te Atua mō āke tonu atu, ā, kāore tōna mutunga.

31 Ā, ka kī mai rātou ki ahau: Ko te tikanga o tēnei mea ko te whakamamaetanga o te tīnana i ngā rā o te poropeihana, ko te tikanga rānei ko te āhuatanga whakamutunga o te wairua a muri i te matenga o te tīnana kikokiko, kei te kōrero rānei ia mō ngā mea ā-kikokiko?

32 Ā, i pahawa ake, i kī atu ahau ki a rātou, nā, he tohu ia mō ngā mea ā-kikokiko me ngā mea ā-wairua anō; nā te mea ka haere mai te rā me whakawā rātou mō ā rātou mahinga, āe rā, ko ngā mahi pū anō i mahia e te tīnana kikokiko i ōna rā poropeihana.

33 Nā reira, ki te mate rātou i roto i ō rātou whakarihariha me maka atu rātou anō hoki, e ai ki ngā mea ā-wairua, koia e pā ana ki te tika; nā reira, me kawe mai kia tū ai ki te aroaro o te Atua, kia whakawākia ai ā rātou mahinga; ā, mehemea he poke āna mahinga me poke ka tika ia; ā, mehemea e poke ana rātou ka whakatakotoria te tikanga kia kore ai rātou e noho ki roto i te kīngitanga o te Atua; ki te pērāhia, ka poke pū anō te kīngitanga o te Atua.

34 Engari nana, ko tāku ki a koutou, kāore te kīngitanga o te Atua i te poke, ā, tē taea e tētahi mea poke te kuhu ki roto i te kīngitanga o te Atua; nā reira me whakarite tētahi wāhi poke mō ērā e poke ana.

35 Ā, he wāhi anō kua whakaritea, āe rā, ko taua ao rēwera whakamataku pū anō kua kōrero nei ahau, ā, ko te rēwera te kaiwhakarite i a ia; nā reira ko te āhuatanga whakamutunga o ngā wairua a te tangata ko te noho i roto i te kīngitanga o te Atua, ko te makanga atu rānei nā taua tika kua kōrero nei ahau.

36 Nā reira, ka whakaparahakongia te hunga whakarihariha mai i te hunga tika, ā, mai i taua rākau o te ora anō hoki, ko ōna hua he mea hiahiatia ake i runga i ērā atu hua rākau katoa; āe rā, ko ia te tākoha nui anō o ngā tākoha katoa o te Atua. Ā, i pēnei taku kōrero atu ki ōku tuākana. Āmine.