1 Ā, i pahawa ake, i kī mai te anahera ki ahau, e mea ana: Titiro! Ā, ka titiro ahau, ā, ka kite i ngā iwi maha me ngā kīngitanga.

2 Ā, ka kī mai te anahera ki ahau: He aha tāu e kite nei? Ā, ka kī atu ahau: Kei te kite ahau i ngā iwi maha me ngā kīngitanga.

3 Ā, ka kī mai ia ki ahau: Koinei ngā iwi me ngā kīngitanga o ngā Tauiwi.

4 Ā, i pahawa ake, i kite ahau i waenganui i ngā iwi o ngā Tauiwi ko te whakatūnga o tētahi hāhi nui.

5 Ā, ka kī mai te anahera ki ahau: Tirohia te whakapūmautanga o tētahi hāhi e tino whakarihariha ake ana i ērā atu hāhi katoa, koia e whakamate ana i te hunga tapu o te Atua, āe rā, e whakamamae ana i a rātou me te herehere iho i a rātou, ā, ka whakaiokangia ki te ioka rino, ā, ka whakarau iho i a rātou ki roto i te hereherenga.

6 Ā, i pahawa ake, i kite ahau i tēnei hāhi nui mōrikarika; ā, ka kite ahau i te rēwera ko ia tōna kaihanga.

7 Ā, ka kite anō ahau i te kōura, me te hiriwā, me ngā hiraka, me ngā kahu whero, me ngā rīnena miro pai, me ngā tūmomo kākahu utu nui katoa; ā, ka kite ahau i ngā wahine pūremu tokomaha.

8 Ā, ka kī mai te anahera ki ahau, e mea ana: Tirohia te kōura, me te hiriwā, me ngā hiraka, me ngā kahu whero, me ngā rīnena miro pai, me ngā kākahu utu nui, me ngā wahine pūremu, koia ngā hiahia o tēnei hāhi nui mōrikarika.

9 Ā, ka whakangaromia te hunga tapu o te Atua mō ngā whakamoemiti o te ao, ā, ka whakarau iho i a rātou ki roto i te hereherenga.

10 Ā, i pahawa ake, i titiro ahau, ā, ka kite atu i ngā wai maha; ā, ka wehewehea e aua wai ngā Tauiwi i ngā uri o ōku tuākana.

11 Ā, i pahawa ake, i kī mai te anahera ki ahau: Tirohia te riri o te Atua i runga i ngā uri o ō tuākana.

12 Ā, ka titiro ahau, ā, ka kite i tētahi tangata i waenganui i ngā Tauiwi, ko ia kua māwehehia mai i ngā uri o ōku tuākana e ngā wai maha; ā, ka kite ahau i te Wairua o te Atua, nā, i heke iho mai ia, ā, ka pā iho ki runga i te tangata; ā, ka haere whakamua atu ia ki runga i ngā wai maha, tae atu anō ki ngā uri o ōku tuākana, e noho ana i te whenua whakaari.

13 Ā, i pahawa ake, i kite ahau i te Wairua a te Atua, nā, ka pā iho ki runga i ētahi atu Tauiwi; ā, ka haere whakamua rātou i waho atu i te hereherenga, ki runga i ngā wai maha.

14 Ā, i pahawa ake, i kite ahau i ngā Tauiwi mano tini i runga i te whenua whakaari; ā, ka kite ahau i te riri o te Atua, nā, kei runga ia i ngā uri o ōku tuākana; ā, ka whakamararatia atu i mua i ngā tauiwi, ā, ka patua.

15 Ā, ka kite ahau i te Wairua o te Atua, nā, kei runga ia i ngā Tauiwi, ā, ka whaioranga rātou me te whiwhi i te whenua hei whenua tuku iho mō rātou; ā, ka kite ahau he kiritea, he pūrotu rawa atu, he ātaahua anō hoki, he rite ki tōku iwi i mua i tō rātou whakamatenga.

16 Ā, i pahawa ake, nāku, nā Nīwhai, i kite atu i ngā Tauiwi kua haere whakamua atu i waho i te hereherenga ka whakaiti rātou i a rātou anō i te aroaro o te Ariki; i a rātou anō te mana o te Ariki.

17 Ā, ka kite ahau kua huihuia tahitia ō rātou whaea Tauiwi i runga i ngā wai, i runga hoki i te whenua, kia whawhai atu ai ki a rātou.

18 Ā, ka kite ahau, nā, i a rātou te mana o te Atua, ā, ko te riri o te Atua i runga i te hunga katoa kua huihuia tahitia ki te whawhai atu ki a rātou.

19 Ā ko au, ko Nīwhai, ka kite i ngā Tauiwi kua haere whakamua atu i waho i te hereherenga he mea whakarauora nā te mana o te Atua i ngā ringaringa o ērā atu iwi katoa.

20 Ā, ka pahawa noa atu nāku, nā Nīwhai, i kite i tō rātou whaioranga i te whenua; ā, ka kite ahau i tētahi pukapuka, ā, kua kawea whakamuatia atu ki waenganui i a rātou.

21 Ā, ka kī mai te anahera ki ahau: E mōhio ana rānei koe te tikanga o te pukapuka?

22 Ā, ka kī atu ahau ki a ia: Kāore ahau i te mōhio.

23 Ā, ka kī mai ia: Tirohia e puta mai ana ia i te māngai o tētahi Hūrai. Ā ko au, ko Nīwhai, ka tirohia ia; ā, ka kī mai ia ki ahau: Ko te pukapuka e tirohia nei e koe tētahi tuhinga mō ngā Hūrai, kua mau nei ngā kawenata a te Ariki, kua meatia e ia ki te whare o Iharaira; e mau ana anō hoki ngā poropititanga maha a ngā poropiti tapu; ā, he tuhinga ia e rite ana ki ngā whaowhaonga kei runga i ngā papa parāhe, heoi kāore e pērā rawa ana te maha; hei aha koa, kua mau i a ia ngā kawenata a te Ariki, kua meatia e ia ki te whare o Iharaira; nā reira, he nui tōna painga ki ngā Tauiwi.

24 Ā, ka kī mai te anahera a te Ariki ki ahau: Kua kite nei koe i puta mai ai te pukapuka i te māngai o tētahi Hūrai; ā, i tōna putanga mai i te māngai o tētahi Hūrai i a ia te rāneatanga o te rongopai o te Ariki, koia tēnei e whakaaturia nei e ngā āpotoro tekau mā rua; ā, ka whakaaturia e rātou e ai ki te pono i roto nei i te Reme a te Atua.

25 Nā reira, ka puta whakamuatia atu ēnei mea mai i ngā Hūrai i runga i te tika ki ngā Tauiwi, e ai ki te pono i roto nei i te Atua.

26 Ā, i muri i tō rātou putanga whakamuatanga atu nā te ringaringa o ngā āpotoro tekau mā rua a te Reme, mai i ngā Hūrai ki ngā Tauiwi, ka kite koe i te hanganga o te hāhi nui mōrikarika, he mea mōrikarika rawa ake i ērā atu hāhi katoa; nana rā, kua tangohia atu e rātou mai i te rongopai a te Reme ngā wāhanga mārama utu nui maha; me ngā kawenata maha anō hoki a te Ariki kua tangohia atu e rātou.

27 Ā, koinei katoa kua mahia e rātou e rāweke kino nei pea rātou i ngā mahinga a te Ariki, nā, me kore pea e whakakāpō i ngā karu me te whakapakeke i ngā ngākau o ngā tamariki a te tangata.

28 Nā reira, ka kite nei koe i muri iho i te putanga whakamuatanga atu i te pukapuka i ngā ringaringa o te hāhi nui mōrikarika, he maha ngā mea mārama utu nui kua tangohia atu mai i te pukapuka, koia te pukapuka a te Reme a te Atua.

29 Ā, i muri iho i te tangohanga atu i ēnei mea mārama utu nui ka puta whakamuahia atu ki ngā iwi katoa o ngā Tauiwi; ā, i muri iho i tana putanga whakamuatanga atu ki ngā iwi katoa o ngā Tauiwi, āe rā, ka whakawhiti pū anō i ngā wai maha kua kite nei koe i ngā Tauiwi kua haere whakamua atu i waho i te hereherenga, e kite nei koe—nā ngā mea mārama utu nui maha kua tangohia atu i te pukapuka, kua mārama ki tō ngā tamariki a te tangata māramatanga, e ai ki te māramatanga i roto nei i te Reme a te Atua—nā ēnei mea kua tangohia atu i te rongopai a te Reme, he tokomaha rawa atu nei e tūtuki ana, āe rā, nā konā ka whaikaha nui nei a Hātana i runga i a rātou.

30 Hei aha koa, ka kite nei koe ko ngā Tauiwi kua haere whakamua atu i waho i te hereherenga, ā, kua hāpaingia ake e te mana o te Atua i runga ake i ērā atu iwi katoa, i runga i te mata o te whenua he whenua ia kua whiriwhiria i runga ake i ērā atu whenua, koia te whenua kua kawenatatia e te Ariki te Atua me tō matua hei whenua tuku iho mō ōna uri; nā reira, ka kite koe e kore te Ariki te Atua e tuku kia whakangaromia katoatia e ngā Tauiwi te hanumitanga o ō uri, i waenganui nei i ō tuākana.

31 E kore rānei ia e tuku kia whakangaromia e ngā Tauiwi ngā uri o ō tuākana.

32 E kore rānei te Ariki te Atua e tuku kia noho āke tonu ai ngā Tauiwi i taua āhuatanga weriweri o te kāpōtanga, e kite nei koe e pērā ana rātou, nā ngā wāhanga mārama utu nui rawa atu o te rongopai a te Reme kua kaiponuhia e taua hāhi mōrikarika, ko tōna hanganga kua kite nei koe.

33 Nā reira e ai tā te Reme a te Atua: Ka whakaaroha atu ahau ki ngā Tauiwi, tae atu ana ki te karawhiunga i ngā mōrehu o te whare o Iharaira i te whakawākanga nui.

34 Ā, i pahawa ake, i kī mai te anahera a te Ariki ki ahau, e mea ana: Nana, e ai tā te Reme a te Atua, hei muri iho i taku karawhiunga i ngā mōrehu o te whare o Iharaira—ko ēnei mōrehu e kōrero nei ahau ko ngā uri o tō matua—nā reira, hei muri iho i taku karawhiunga i a rātou i te whakawākanga, ā, ka patua rātou e te ringaringa o ngā Tauiwi, ā, hei muri iho i te tirikohutanga nui a ngā Tauiwi, nā ngā mea tino mārama utu nui o te rongopai a te Reme kua kaiponuhia e taua hāhi nui mōrikarika, koia te whaea o ngā kaikairau katoa, e ai tā te Reme—Ka aroha au ki ngā Tauiwi hei taua rā, nā konā rā ka kawea atu ki a rātou, i tōku ake mana, te nuinga o tōku rongopai, koia he mārama utu nui, e ai tā te Reme.

35 Nana rā, e ai tā te Reme: Māku ahau e whakakite atu ki ō uri, nā, ka tuhituhi rātou i ngā mea maha e minita ai ahau ki a rātou, koia he mea mārama utu nui; ā, hei muri atu i te whakangaromanga o ō uri, me te memeha haeretanga i te whakapono kore, me ngā uri anō o ō tuākana, nana, ka hunaia ake ēnei mea, kia puta mai ai ki ngā Tauiwi, mā te takohatanga me te mana o te Reme.

36 Ā, i roto i ēnei ka tuhia taku rongopai, e ai tā te Reme, me tōku toka me tōku whakaoranga.

37 Ā, ka manaakitia rātou e ngana ai ki te whakaputa whakamua mai tōku Hiona hei taua rā, ā, i a rātou te takohatanga me te mana o te Wairua Tapu; ā, ki te ū tonu rātou tae atu ki te mutunga ka whakateiteingia ake rātou hei te rā whakamutunga, ā, ka whakaorangia i roto i te kīngitanga mutunga kore a te Reme; ā, ko ia e kauhau i te rongomau, āe rā, i ngā rongo whakahari nui, anō tō rātou ātaahua i runga i ngā maunga.

38 Ā, i pahawa ake, i kite ahau i ngā mōrehu o ngā uri o ōku tuākana, me te pukapuka anō hoki a te Reme a te Atua, koia kua puta whakamua mai i te māngai o tētahi Hūrai, nā, i puta whakamua mai i ngā Tauiwi ki ngā mōrehu o ngā uri o ōku tuākana.

39 Ā, i muri iho i tana putanga whakamuatanga ki a rātou ka kite ahau i ētahi atu pukapuka, koia i puta whakamua ai nā te mana o te Reme, mai i ngā Tauiwi ki a rātou, tae atu ana ki te whakapakepaketanga o ngā Tauiwi me ngā mōrehu o ngā uri o ōku tuākana, ā, ko ngā Hūrai anō hoki kua whakamararatia atu ki runga katoa i te mata o te ao, nā, ko ngā tuhinga a ngā poropiti me ngā āpotoro tekau mā rua a te Reme, āna, he pono.

40 Ā, ka kī mai te anahera ki ahau, e mea ana: Koinei tuhinga whakamutunga, kua kite nei koe i waenganui i ngā Tauiwi, ka whakapūmau i te pono o te tuatahi, koia nā ngā āpotoro tekau mā rua a te Reme, ā, ka whakamōhiotia atu ngā mea mārama utu nui kua tangohia atu i a rātou; ā, ka whakamōhiotia atu ki ngā iwi katoa, ngā reo, ngā tāngata, nā, ko te Reme a te Atua ko ia te Tama a te Atua Ora Tonu, me te Kaiwhakaora o te ao; nā, me haere mai ngā tāngata katoa ki a ia, tē taea rānei rātou te whakaora.

41 Ā, me haere mai rātou e ai ki ngā kupu e whakapūmautia ai e te māngai o te Reme; ā, ka whakamōhiotia ngā kupu a te Reme i roto i ngā tuhinga a ō uri, i roto anō i ngā tuhinga a ngā āpotoro tekau mā rua a te Reme; nā reira ka whakapūmautia ngā mea e rua kia kotahi; nā te mea kotahi te Atua, ā, kotahi te Hēpara i runga i te ao katoa.

42 Ā, kei te haere mai te wā e whakakite ia i a ia anō ki ngā iwi katoa, ki ngā Hūrai tahi me ngā Tauiwi anō hoki; ā, hei muri iho i tana whakakitenga atu i a ia anō ki ngā Hūrai me ngā Tauiwi anō hoki, kātahi ia ka whakakite i a ia anō ki ngā Tauiwi me ngā Hūrai anō hoki, ā, ko muri hei mua, ā, ko mua hei muri.