1 Ā, i pahawa ake, i whakahau te Ariki i ahau, nā reira au i hanga ai i ngā papa ki te oa kia whaowhao ai au i runga i ērā te tuhinga mō tōku iwi. Ā, i whaowhaoa e ahau i runga i ngā papa i hanga ai au te tuhinga o tōku matua, me ā mātou haerenga i roto i te koraha, me ngā poropititanga a tōku matua; me āku ake poropititanga maha anō hoki kua whaowhaoa nei ki runga i ērā e ahau.

2 Ā, kāore au i mōhio i te wā i hanga ai ahau i ērā, nā, ka whakahaua ahau e te Ariki kia hangaia ai ēnei papa; nā reira, ko te tuhinga o tōku matua, me ngā whakapapa o ōna tīpuna, me te wāhi nui o ā mātou mahi i roto i te koraha kua whaowhaoa ki runga i ērā papa tuatahi kua kōrerotia ake nei e ahau; nā reira, ko ngā mea i puta pū i mua i taku hanganga i ēnei papa, he pono ia, kua kōrerotia pūtia i runga i ngā papa tuatahi.

3 Ā, i muri iho i taku hanganga i ēnei papa mā runga i te whakahaunga, nāku, nā Nīwhai, i whiwhi tētahi whakahaunga, nā, ko te minitatanga me ngā poropititanga, ko ngā wāhi mārama utu nui o reira, me tuhituhi ki runga i ēnei papa; ā, ko ngā mea kua tuhia me mau mō te whakaakoranga i tōku iwi, ko rātou e whakanoho ai i te whenua, ā, mō ngā take whaimōhiotanga anō hoki, ko aua take e mōhiotia ana e te Ariki.

4 Nā reira, nāku, nā Nīwhai, i hanga tētahi tuhinga ki runga i ētahi atu papa, e tuku kōrero ana ia, e tuku kōrero nui ake ana rānei ia mō ngā pakanga me ngā tautohetohenga me ngā whakangaromanga o tōku iwi. Ā, nāku tēnei i mahi, me te whakahau i tōku iwi me aha rātou hei muri i tōku rironga atu; ā, me tuku iho ēnei papa mai i tētahi whakatupuranga ki tētahi whakatupuranga, mai i tētahi poropiti rānei ki tētahi poropiti, ā, kia whakahau mai rā anō ai te Ariki.

5 Ā, ka tukuna tētahi kōrero mō taku hanganga i ēnei papa a muri ake nei; ā kātahi rā, nana, ka haere tonu e ai ki tāku kua kōrerotia ake nei; ā, ka mahia tēnei e ahau kia puritia ai ngā mea tino tapu mō te mātauranga o tōku iwi.

6 Hei aha koa, kāore au mō te tuhi i tētahi mea ki runga i ngā papa hāunga ngā mea e whakaaro ana au he tapu ia. Ā ināianei, mēnā ka hē ahau, i hē pū anō rātou i onamata; kua kore ahau e whakawātea i ahau anō nā ētahi atu tangata, engari nō te ngoikoretanga kei roto i ahau, e ai tō te kikokiko, ka whakawātea ahau i ahau anō.

7 Nā te mea ko ngā mea e whakaaro nuitia ana e ētahi tangata, ki te tīnana tahi me te wairua, e whakakorehia ana e ētahi atu, ā, e takatakahia iho ana e ō rātou waewae. Āe rā, ko te Atua pū anō o Iharaira e takatakahia iho ana e ō ngā tangata waewae; ko tāku, takatakahia iho e ō rātou waewae engari me pēnei kē hei kōrero māku—ka whakakore rātou i a ia, ā, tē whakarongo ki te reo o ōna whakangārahu.

8 Ā nana ka haere mai ia, e ai tā ngā kupu a te anahera, hei ngā tau e ono rau mai i te wā i wehe ai tōku matua i Hiruharama.

9 Ā, ko te ao, nā tā rātou mahi haututū, ka whakawākia ia he mea kore noa iho; nā reira ka whakawhiua ia e rātou, ā, ka whakaririka kau ia; ā, ka patua ia e rātou, ā, ka whakaririka kau ia. Āe rā, ka tūhaina ia e rātou, ā, ka whakaririka kau ia, nā tōna atawhai aroha me tōna manawa-nui ki ngā tamariki a te tangata.

10 Ā ko te Atua o ō mātou matua, i ārahina mai nei rātou ki waho o Ihipa, ki waho o te hereherenga, ā, i tiakina anōtia i te koraha e ia, āe rā, ko te Atua o Aperahama, o Ihaka hoki, ko te Atua hoki o Hākopa, ka tukua ia e ia anō, e ai tā ngā kupu a te anahera, anō he tangata, ki roto ki ngā ringaringa o ngā tāngata whakarihariha, kia whakaarahia ake, e ai tā ngā kupu a Henoka, ā, kia rīpekatia ai, e ai tā ngā kupu a Neuma, ā, ka tāpuketia i tētahi ana, e ai tā ngā kupu a Henohi, i kōrerohia ake nei e ia e pā ana ki ngā rangi e toru o te pōuritanga, e hoatu nei hei tohu ki te hunga e noho ana i ngā motu o te moana, e hoatu pū anō ake nei ki te hunga ko rātou nei nō te whare o Iharaira.

11 Nā i pēnei tā te poropiti: Ka toro mārika mai te Ariki te Atua ki te whare o Iharaira katoa hei taua rā, ko ētahi ki tōna reo, nā tō rātou tika, tae atu ana ki tō rātou hari nui me tō rātou whakaoranga, ā, ko ētahi atu ki ngā whatitiri me ngā uira o tōna mana, mā te tūpuhi, mā te ahi, mā te paoa hoki, me te kohu pōuri, mā te tūwheratanga hoki o te whenua, mā ngā maunga hoki e kahakina ake ai.

12 Ā, ka puta mārika mai ēnei mea katoa, tā te poropiti Henohi. Ā, me pakaru ngā kōhatu o te whenua; ā, nā ngā ngungurutanga o te whenua, he tokomaha ngā kīngi o ngā motu o te moana e meinga ai e te Wairua o te Atua, kia hāmama ai: E whakaririka ana te Atua o te ao māori.

13 Ā, mō te hunga kei Hiruharama, tā te poropiti, ka whakawhiua rātou e ngā tāngata katoa, nā te mea e rīpeka ana rātou i te Atua o Iharaira, ā, e tahuri kē atu ana ō rātou ngākau, e whakaparahako tohu ana me ngā mea whakamīharo, me te mana me te korōria o te Atua o Iharaira.

14 Ā, nā te mea e tahuri kē atu ana rātou i ō rātou ngākau, tā te poropiti, ā, kia whakahāweatia te Mea Tapu o Iharaira, ka kāewaewa rātou i te kikokiko, ā, ka mate, ā, ka meinga he mūrau whakahihī, ā, ka mauāharatia i waenganui i ngā iwi katoa.

15 Hei aha koa, ina haere mai ai taua rā, tā te poropiti, tē tahuri kē atu rātou i ō rātou ngākau ki te Mea Tapu o Iharaira, i reira ia e maumahara ai ki ngā kawenata i mea ai ia ki ō rātou matua.

16 Āe rā, i reira ia e maumahara ai ki ngā motu o te moana; ā, ko ngā tāngata katoa ko rātou nei nō te whare o Iharaira, māku e whakahui mai, tā te Ariki, e ai ki tā ngā kupu a Henohi, mai i ngā tōpito e whā o te ao.

17 Āe rā, ka kite te ao katoa i te whakaoranga a te Ariki, tā te poropiti; ka manaakitia ia iwi, hapū, reo me ngā tāngata.

18 Ā nāku, nā Nīwhai, i tuhi ēnei tuhinga ki tōku iwi, me kore pea ahau e whakapakepake i a rātou kia mahara ai rātou ki te Ariki tō rātou Kaihoko.

19 Nā reira, kei te kōrero ahau ki te whare o Iharaira, mēnā rā ia e whiwhi ai i ēnei mea.

20 Nana rā, he mahinga ōku i te wairua, e whakangenge nei i ahau tae atu ana ki te ngoikoretanga o ōku pona katoa, mō te hunga kei Hiruharama; nā te mea me i kore te Ariki i aroha mai, kia whakaatu mai ai ki ahau e pā ana ki a rātou, pēnā ki tāna mō ngā poropiti onamata, kua mate anō hoki ahau.

21 Ā, i whakaatu mārika atu ia ki ngā poropiti onamata i ngā mea katoa e pā ana ki a rātou; ā, i whakaatu atu anō ia ki te hunga tokomaha e pā ana ki a mātou; nā reira, e tika ana kia mōhio ai mātou e pā ana ki a rātou nā te mea kua tuhia ēnā ki runga i ngā papa parāhe.

22 I pahawa ianei ake nāku, nā Nīwhai, i whakaako i ōku tuākana i ēnei mea; ā, i pahawa ake, i pānui au i ngā mea maha ki a rātou, kua whaowhaoa nei i runga i ngā papa parāhe, kia mōhio ai rātou e pā ana ki ngā mahinga a te Ariki i ētahi atu whenua, i waenganui i ngā iwi onamata.

23 Ā, i pānui ahau i ngā mea maha ki a rātou kua tuhia nei i roto i ngā pukapuka a Mohi; otirā, kia tino whakapakepake i a rātou kia whakapono ai i te Ariki tō rātou Kaihoko i pānui ai ahau ērā kua tuhia nei e te poropiti Ihāia; nā te mea i whakataurite ahau i ngā karaipiture katoa ki a mātou, hei painga, hei akoranga mō mātou.

24 Nā reira ahau i kōrero atu ki a rātou, e mea ana: Whakarongo ki ngā kupu a te poropiti, e koutou ngā mōrehu o te whare o Iharaira, he manga kua whatia atu; whakarongo ki ngā kupu a te poropiti, kua tuhia nei ki te whare katoa o Iharaira, ā, whakatauritetia rātou ki a koutou anō, kia whai tūmanako ai koutou pērā i ō koutou huānga kua whatia mai nei koutou i a rātou; nā tēnei āhuatanga kua tuhi nei te poropiti.