1 Nana ianei, e hiahia ana au kia mōhio ai koutou, nō muri iho i tā tōku matua, i tā Rīhai, whakakapinga poropititanga e pā ana ki ōna uri, i pahawa ake, i kōrero anō te Ariki ki a ia, e mea ana kāore e tika ana mōna, mō Rīhai, kia kawea e ia tōna hapū ki roto i te koraha ko rātou anake; engari kē me taumau ana tama i ngā tamāhine hei hoawahine, e whakatupuria ai he uri ki te Ariki i te whenua whakaari.

2 Ā, i pahawa ake, i whakahau te Ariki i a ia, nā, māku, mā Nīwhai, me ōku tuākana, e hoki anō ai ki te whenua o Hiruharama, ā, ka mauria iho mai a Ihimaera me tōna hapū ki roto i te koraha.

3 Ā, i pahawa ake, nāku, nā Nīwhai anō, me ōku tuākana, i haere whakamua atu ki roto i te koraha kia haere ake ai ki Hiruharama.

4 Ā, i pahawa ake, i haere ake mātou ki te whare o Ihimaera, ā, ka whaipai mātou i te tirohanga a Ihimaera, nā konā mātou i kōrero atu ki a ia i ngā kupu a te Ariki.

5 Ā, i pahawa ake, i whakangāwarihia e te Ariki te ngākau o Ihimaera, me tōna whare anō hoki, nā konā rātou i haere tahi iho ai me mātou ki roto i te koraha ki te tēneti o tōku matua.

6 Ā, i pahawa ake, i a mātou e haere ana i te koraha, nana ko Rāmana rāua ko Remuere, me ngā tamāhine tokorua a Ihimaera, me ngā tama tokorua a Ihimaera me ō rāua hapū, ka haututū mai ki a mātou; āe rā, ki ahau, a Nīwhai, me Hāmi, me tō rātou matua, a Ihimaera, me tana hoawahine, me ētahi atu o ana tamāhine tokotoru.

7 Ā, i pahawa ake, i taua haututūtanga, i te hiahia rātou kia hoki anō ai ki te whenua o Hiruharama.

8 Nana ianei au, a Nīwhai, i te pōuri nō te mārō o ō rātou ngākau, nō reira au ka kōrero ki a rātou, e kī ana, āe rā, ki a Rāmana rāua ko Remuere pū anō: Nana ko ōku tuākana kōrua, ā, nā te aha i pēnā rawa ai te mārō i ō kōrua ngākau, ā, i pēnā rawa ai te kāpō i ō kōrua hinengaro, e whaitake ai kōrua māku, tā kōrua teina, e kōrero atu ki a kōrua, āe rā, me te whakatakoto tauira mā kōrua?

9 Nā te aha i kore ai tā kōrua whakarongo ki te kupu a te Ariki?

10 Nā te aha i wareware ai tā kōrua kitenga atu i te anahera a te Ariki?

11 Āe rā, nā te aha anō i wareware ai kōrua i ngā mea nui i mahia e te Ariki mō tātou, i tana whakarauoratanga i a tātou i ngā ringaringa o Rāpana, ā, kia riro mai anō ai i a tātou te tuhinga?

12 Āe rā, nā te aha anō i wareware ai kōrua e taea ana e te Ariki ngā mea katoa e ai ki tana hiahia, mō ngā tamariki a te tangata, mēnā rā ia ka whakapakari rātou i tō rātou whakapono i roto i a ia? Nā reira, kia pono tonu tātou ki a ia.

13 Ā, mēnā rā ia ka pono tātou ki a ia, ka whiwhi tātou i te whenua whakaari; ā, ka mōhio koutou ā tōna wā ka tutuki te kupu a te Ariki e pā ana ki te whakangaromanga o Hiruharama; nā te mea ko ngā mea katoa kua kōrerotia e te Ariki e pā ana ki te whakangaromanga o Hiruharama, me tutuki.

14 Nana rā, hei ākuanei ka oti te Wairua o te Ariki ki te tohetohe ki a rātou; nana rā, kua whakaparahakotia ngā poropiti, ā, kua makaia a Heremaia ki roto i te whareherehere. Ā, kua whai rātou ki te muru i te oranga o tōku matua, nā konā rātou i pei atu ai i a ia ki waho atu i te whenua.

15 Nana ianei, ka kī atu au ki a koutou mēnā rā ka hoki atu koutou ki Hiruharama ka mate tahi anō koutou me rātou. Āpiti, mēnā i a koutou te kōwhiri, haere ake ki te whenua, me mahara anō ki ngā kupu ka kōrero atu nei au ki a koutou, nā, mēnā ka haere koutou ka mate anō koutou; nā konei rā e akiaki ana te Wairua o te Ariki i ahau kia kōrero au.

16 Ā, i pahawa ake, i tāku, i tā Nīwhai, kōrerotanga atu i ēnei kupu ki ōku tuākana, i tino riri ki ahau. Ā, i pahawa ake ka pā mai ō rāua ringaringa ki runga i ahau, nana rā, i tino pukuriri rawa rāua, ka here rāua i ahau ki ngā taura, nā te mea i whai rāua kia muru ai i tōku oranga, kia mahue au i a rāua i te koraha e kaingia ai e ngā kararehe mohoao.

17 Engari, i pahawa ake, i inoi au ki te Ariki, e kī ana: Auē e te Ariki, e ai ki tōku whakapono i roto i a koe, Māu ahau e whakaputa i ngā ringaringa o ōku tuākana; āe rā, homai ki ahau he kaha e taea ai te momotu atu i ēnei hereherenga e herea nei ahau.

18 Ā, i pahawa ake, i taku kōrerotanga i ēnei kupu, nana, ka wetekia ngā hereherenga mai i ōku ringaringa me ōku waewae, ā, ka tū ahau i mua i ōku tuākana, ā, ka kōrero anō ahau ki a rāua.

19 Ā, i pahawa ake, i riri anō rāua ki ahau, ka whai mai e pā ai ō rāua ringaringa ki runga i ahau; engari nana, ko tētahi o ngā tamāhine a Ihimaera, āe rā, me tōna whaea anō hoki, me tētahi o ngā tama a Ihimaera, ka tohe ki ōku tuākana, nā konā i whakangāwarihia ō rāua ngākau; ka mutu tā rāua ngana ki te muru atu i tōku oranga.

20 Ā, i pahawa ake, i pōuri rāua, nā tō rāua whakarihariha, nā konā rāua i tuohu iho i mua i ahau, ka inoi mai kia whakamuru au i a rāua mō ngā mea i mahi ai rāua ki ahau.

21 Ā, i pahawa ake, i whakamurua noatia rāua e ahau me ngā mea katoa i mahi ai rāua, ā, ka akiaki ahau i a rāua kia inoi ai ki te Ariki tō rāua Atua mō te whakamurunga hara. Ā, i pahawa ake, i pēnā rāua. Ā, whai muri iho i te mutunga o tā rāua inoi ki te Ariki ka haere anō mātou i tō mātou haerenga whaka-te-tēneti o tō mātou matua.

22 Ā, i pahawa ake, i haere iho mātou ki te tēneti o tō mātou matua. Ā, whai muri iho i tāku, me tā ōku tuākana me tā te whare katoa o Ihimaera haere iho ki te tēneti o tōku matua, ka whakawhetai atu rātou ki te Ariki tō rātou Atua; ā, ka tuku whakahere me ngā whakaherenga tahu ki a ia.